ເພງ^ສັນລະເສີນ 139 - ພຣະຄຳພີສັກສິພຣະເຈົ້າຮູ້ທຸກສິ່ງ ແລະເຝົ້າເບິ່ງທຸກເວລາ 1 ຂ້າແດ່ພຣະເຈົ້າຢາເວ ພຣະອົງໄດ້ກວດເບິ່ງຂ້ານ້ອຍ ແລະພຣະອົງກໍຮູ້ຈັກຮອດສ່ວນເລິກ ໃນຈິດໃຈຂອງຂ້ານ້ອຍນັ້ນ. 2 ພຣະອົງຮູ້ທຸກໆສິ່ງທີ່ຂ້ານ້ອຍກະທຳໄປ ເຖິງວ່າຢູ່ໄກແສນໄກ ກໍເຂົ້າໃຈຄວາມນຶກຄິດຂອງຂ້ານ້ອຍໄດ້. 3 ພຣະອົງເຫັນຂ້ານ້ອຍໄດ້ ເຖິງແມ່ນວ່າຂ້ານ້ອຍກຳລັງເຮັດວຽກງານ ຫລືພັກຜ່ອນ ພຣະອົງຮູ້ຈັກການກະທຳທຸກຢ່າງຂອງຂ້ານ້ອຍໄດ້. 4 ຂ້າແດ່ພຣະເຈົ້າຢາເວ ແມ່ນວ່າກ່ອນທີ່ຂ້ານ້ອຍເວົ້າຄຳໃດໆອອກມາ ພຣະອົງກໍຮູ້ລ່ວງໜ້າສິ່ງທີ່ຂ້ານ້ອຍຈະເວົ້ານັ້ນ. 5 ພຣະອົງສະຖິດຢູ່ນຳຂ້ານ້ອຍຮອບດ້ານໃນທຸກສະຖານະການ ພຣະອົງຄຸ້ມຄອງຂ້ານ້ອຍໄວ້ດ້ວຍຣິດອຳນາດຂອງພຣະອົງ. 6 ພຣະອົງຮູ້ຈັກຂ້ານ້ອຍຢ່າງເລິກເຊິ່ງທີ່ສຸດ ເໜືອກວ່າຄວາມເຂົ້າໃຈຂອງຂ້ານ້ອຍອີກ. 7 ຂ້ານ້ອຍຈະປົບໜີຈາກພຣະອົງໄປທາງໃດ? ຈະໜີໄປໃສເພື່ອຫລີກຈາກສາຍຕາຂອງພຣະອົງໄດ້? 8 ຖ້າຂຶ້ນໄປທີ່ຟ້າສະຫວັນ ພຣະອົງກໍຢູ່ທີ່ນັ້ນແລ້ວເດ ຖ້າລົງໄປໃນພິພົບຄົນຕາຍ ພຣະອົງກໍຢູ່ທີ່ນັ້ນດ້ວຍ. 9 ຖ້າບິນໄປຮອດທິດຕາເວັນອອກ ຫລືໄປຕັ້ງຖິ່ນຖານທີ່ທາງທິດຕາເວັນຕົກພຸ້ນ. 10 ພຣະອົງກໍຈະຢູ່ທີ່ນັ້ນເພື່ອນຳພາຂ້ານ້ອຍ ແລະຢູ່ທີ່ນັ້ນເພື່ອຊ່ວຍເຫຼືອຂ້ານ້ອຍເຊັ່ນກັນ. 11 ຖ້າຂ້ານ້ອຍຂໍຮ້ອງຄວາມມືດໃຫ້ປົກບັງຂ້ານ້ອຍ ຫລືໃຫ້ແສງສະຫວ່າງກາຍເປັນຄວາມມືດອ້ອມຂ້ານ້ອຍໄວ້, 12 ແຕ່ຄວາມມືດນັ້ນກໍບໍ່ມືດສຳລັບພຣະອົງ ກາງຄືນກໍກາຍເປັນແສງແຈ້ງຄືກາງເວັນໄດ້. ສຳລັບພຣະອົງບໍ່ແຕກຕ່າງຢ່າງໃດ ແຕ່ທັງມືດແລະແຈ້ງກໍເປັນຢ່າງດຽວກັນທັງສິ້ນ. 13 ທຸກສ່ວນໃນຮ່າງກາຍຂອງຂ້ານ້ອຍແມ່ນພຣະອົງໄດ້ສ້າງມາ ໄດ້ປະກອບທຸກສ່ວນເຂົ້າກັນແຕ່ຢູ່ໃນທ້ອງແມ່. 14 ຂ້ານ້ອຍຍ້ອງຍໍສັນລະເສີນພຣະອົງ ເພາະພຣະອົງເປັນທີ່ຢ້ານຢຳ ທຸກສິ່ງທີ່ພຣະອົງຊົງກະທຳນັ້ນປະຫລາດໃຈແທ້ໆ ແລະຊ່າງເປັນໜ້າອັດສະຈັນໃຈຢ່າງຍິ່ງໃຫຍ່ ຂ້ານ້ອຍຮູ້ເຖິງທຸກກິດຈະການນັ້ນຢູ່ເຕັມໃຈ. 15 ເມື່ອສ້າງກະດູກຂອງຂ້ານ້ອຍປະກອບເຂົ້າກັນ ຢ່າງລະມັດລະວັງຢູ່ໃນທ້ອງມານດານັ້ນ ເມື່ອໃຫຍ່ຂຶ້ນຢູ່ໃນທ້ອງມານດາຢ່າງບໍ່ມີຜູ້ໃດເຫັນ ພຣະອົງກໍຮູ້ວ່າຂ້ານ້ອຍເປັນຢູ່ໃນທີ່ນັ້ນ. 16 ກ່ອນຂ້ານ້ອຍໄດ້ເກີດສາຍຕາຂອງພຣະອົງ ກໍແນມເຫັນຂ້ານ້ອຍຢູ່ແລ້ວ. ວັນທັງຫລາຍທີ່ຖືກກຳນົດໃຫ້ນັ້ນກໍຊົງບັນທຶກໄວ້ໝົດ ກ່ອນທີ່ວັນໃດໆໃນວັນເຫຼົ່ານີ້ຍັງບໍ່ເລີ່ມຂຶ້ນ. 17 ຂ້າແດ່ພຣະເຈົ້າ ທີ່ຈະເຂົ້າໃຈຄວາມຄິດຂອງພຣະອົງໄດ້ກໍຍາກຫລາຍ ເພາະຄວາມຄິດຂອງພຣະອົງນັ້ນເລິກລັບເກີນທີ່ຈະຢັ່ງຮູ້ໄດ້. 18 ຖ້າຂ້ານ້ອຍນັບຄວາມຄິດຂອງພຣະອົງໄດ້ກໍດີ ຄົງມີຫລວງຫລາຍກວ່າເມັດດິນຊາຍຫລາຍເທົ່າ ເຖິງແມ່ນວ່າຂ້ານ້ອຍນັບໄດ້ກໍດີ ຂ້ານ້ອຍກໍຍັງເຂົ້າໃຈພຣະອົງບໍ່ໄດ້. 19 ຂ້າແດ່ພຣະເຈົ້າ ຂ້ານ້ອຍຢາກໃຫ້ພຣະອົງຂ້າຄົນຊົ່ວຮ້າຍໝົດ ແລະຢາກໃຫ້ຜູ້ຂ້າຄົນໜີໄກໄປຈາກດ້ວຍ. 20 ພວກເຂົາເວົ້າສິ່ງຊົ່ວຮ້າຍຕ່າງໆກ່ຽວກັບພຣະອົງ ຄືເວົ້າຕໍ່ສູ້ພຣະນາມ ດ້ວຍຄຳເວົ້າອັນຊົ່ວຊ້າ. 21 ຂ້າແດ່ພຣະເຈົ້າຢາເວ ຂ້ານ້ອຍກຽດຊັງຜູ້ທີ່ກຽດຊັງພຣະອົງທີ່ສຸດ ແລະສົມນໍ້າໜ້າຜູ້ທີ່ກະບົດຄົດລ້ຽວຕໍ່ພຣະອົງ. 22 ຂ້ານ້ອຍກຽດຊັງພວກເຂົາຫລາຍຈົນບໍ່ມີສິ່ງໃດປຽບປານ ແລະຖືພວກເຂົານັ້ນເປັນສັດຕູຂອງຂ້ານ້ອຍດ້ວຍ. 23 ຂ້າແດ່ພຣະເຈົ້າ ຂໍຊົງໂຜດກວດກາເບິ່ງຂ້ານ້ອຍ ແລະຮູ້ຈິດໃຈຂອງຂ້ານ້ອຍ, ຂໍຊົງໂຜດທົດສອບເບິ່ງຂ້ານ້ອຍແລະຄົ້ນເບິ່ງຄວາມນຶກຄິດຂອງຂ້ານ້ອຍໄດ້. 24 ໂຜດກວດເບິ່ງວ່າຂ້ານ້ອຍມີຄວາມຊົ່ວຢ່າງໃດ, ໂຜດນຳຂ້ານ້ອຍຕາມທາງນິຣັນດອນຂອງພຣະອົງດ້ວຍ. |
@ 2012 United Bible Societies. All Rights Reserved.