ເພງ^ສັນລະເສີນ 135 - ພຣະຄຳພີສັກສິອົງພຣະຜູ້ເປັນເຈົ້າຍິ່ງໃຫຍ່ 1 ຈົ່ງຍ້ອງຍໍສັນລະເສີນພຣະເຈົ້າຢາເວ ຈົ່ງຍ້ອງຍໍສັນລະເສີນພຣະນາມຂອງພຣະເຈົ້າຢາເວເຖີດ ພວກເຈົ້າຜູ້ຮັບໃຊ້ຂອງພຣະເຈົ້າຢາເວເອີຍ ຈົ່ງຍ້ອງຍໍສັນລະເສີນພຣະນາມຂອງພຣະອົງ. 2 ພວກເຈົ້າຜູ້ທີ່ຢືນຢູ່ໃນວິຫານຂອງພຣະເຈົ້າຢາເວ ຄືຢູ່ໃນເດີ່ນວິຫານພຣະເຈົ້າຂອງພວກເຮົາ. 3 ຈົ່ງຍ້ອງຍໍສັນລະເສີນພຣະເຈົ້າຢາເວ ເພາະພຣະເຈົ້າຢາເວຊົງເມດຕາ ຈົ່ງຮ້ອງເພງຍ້ອງຍໍສັນລະເສີນພຣະນາມຂອງພຣະອົງເພາະຊົງເມດຕາ. 4 ພຣະເຈົ້າຢາເວໄດ້ເລືອກຢາໂຄບໃຫ້ເປັນຄົນຂອງພຣະອົງເອງ ຊາວອິດສະຣາເອນໃຫ້ເປັນກຳມະສິດຂອງພຣະອົງ. 5 ຂ້ານ້ອຍຮູ້ວ່າພຣະເຈົ້າຢາເວຂອງພວກເຮົາຍິ່ງໃຫຍ່ຫລາຍ ອົງພຣະຜູ້ເປັນເຈົ້າຂອງພວກເຮົາເປັນອົງຍິ່ງໃຫຍ່ເໜືອກວ່າບັນດາພະອື່ນໃດທັງສິ້ນ. 6 ພຣະເຈົ້າຢາເວກະທຳທຸກສິ່ງຕາມພຣະປະສົງ ໃນສະຫວັນ ແລະທີ່ແຜ່ນດິນໂລກ ທັງໃນທ້ອງທະເລເລິກ ແລະທ່າມກາງມະຫາສະໝຸດອັນກວ້າງໃຫຍ່ຄືກັນ. 7 ພຣະອົງນຳເອົາເມກໝອກອັນມືດຄື້ມມາ ຈາກຂອບຟ້າສົ້ນສຸດແຫ່ງແຜ່ນດິນໂລກ ເຮັດໃຫ້ຟ້າແມບເຫລື້ອມໃນທ່າມກາງພະຍຸຝົນ ແລະປ່ອຍໃຫ້ລົມພັດມາຈາກບ່ອນຢູ່ຂອງມັນນັ້ນ. 8 ພຣະອົງໄດ້ຂ້າລູກຫົວປີທັງຫລາຍໃນປະເທດເອຢິບ ບໍ່ວ່າຂອງຄົນແລະຂອງສັດກໍເຊັ່ນດຽວກັນ. 9 ໃນທີ່ນັ້ນພຣະອົງໄດ້ສຳແດງການປະຕິຫານແລະການອັດສະຈັນ ເພື່ອລົງໂທດກະສັດຟາໂຣ ແລະຂ້າຣາຊການຂອງເພິ່ນ. 10 ພຣະອົງໄດ້ທຳລາຍຫລາຍຊົນຊາດໃຫ້ແຕກກະຈັດກະຈາຍ ແລະໄດ້ຂ້າບັນດາກະສັດຜູ້ທີ່ມີອຳນາດ 11 ຄືເຈົ້າສີໂຫນຜູ້ເປັນກະສັດຂອງຊາວອາໂມ ເຈົ້າໂອກກະສັດແຫ່ງບາຊານ ແລະກະສັດທຸກຄົນໃນການາອານດ້ວຍ. 12 ພຣະອົງໄດ້ໃຫ້ປະຊາຊົນຂອງພຣະອົງຢຶດດິນແດນຂອງພວກເຂົາ ໃຫ້ຊາວອິດສະຣາເອນໄດ້ຮັບກຳມະສິດເໜືອດິນແດນນັ້ນ. 13 ຂ້າແດ່ພຣະເຈົ້າຢາເວ ຊື່ສຽງຂອງພຣະອົງຈະເປັນທີ່ຈົດຈຳຕະຫລອດໄປ ຂ້າແດ່ພຣະເຈົ້າຢາເວ ທຸກຊົ່ວເຊັ່ນຄົນຈະລະນຶກຄິດເຖິງພຣະອົງຕະຫລອດໄປ. 14 ພຣະເຈົ້າຢາເວຈະປ້ອງກັນປະຊາຊົນຂອງພຣະອົງ ຈະເມດຕາສົງສານພວກຜູ້ຮັບໃຊ້ຂອງພຣະອົງ. 15 ພະຂອງບັນດາຊົນຊາດເຮັດດ້ວຍເງິນດ້ວຍຄຳ ຖືກສ້າງຂຶ້ນມາໂດຍມືມະນຸດ. 16 ພະເຫຼົ່ານັ້ນມີປາກ ແຕ່ພັດເວົ້າຈາບໍ່ເປັນ, ພະເຫຼົ່ານັ້ນມີຕາ ແຕ່ພັດເຫັນຮຸ່ງບໍ່ໄດ້. 17 ພະເຫຼົ່ານັ້ນມີຫູ ແຕ່ພັດຟັງບໍ່ໄດ້ຍິນຫຍັງ ພະເຫຼົ່ານັ້ນຫາຍໃຈເຂົ້າອອກບໍ່ໄດ້. 18 ຂໍໃຫ້ທຸກຄົນທີ່ສ້າງແລະໄວ້ວາງໃຈໃນມັນ ຈົ່ງກາຍເປັນດັ່ງ ຮູບປັ້ນທີ່ພວກເຂົາໄດ້ສ້າງນັ້ນ. 19 ຊາວອິດສະຣາເອນເອີຍ ຈົ່ງຍ້ອງຍໍສັນລະເສີນພຣະເຈົ້າຢາເວ ປະໂຣຫິດຂອງພຣະເຈົ້າເອີຍ ຈົ່ງຍ້ອງຍໍສັນລະເສີນພຣະເຈົ້າຢາເວເທີ້ນ. 20 ຊາວເລວີເອີຍ ຈົ່ງຍ້ອງຍໍສັນລະເສີນພຣະເຈົ້າຢາເວເຖີດ ເຈົ້າຜູ້ທີ່ຢຳເກງພຣະເຈົ້າຢາເວ ຈົ່ງຍ້ອງຍໍສັນລະເສີນພຣະເຈົ້າຢາເວເທີ້ນ. 21 ທີ່ເທິງພູເຂົາຊີໂອນ ຈົ່ງຍ້ອງຍໍສັນລະເສີນພຣະເຈົ້າຢາເວ ໃນນະຄອນເຢຣູຊາເລັມບ່ອນທີ່ພຣະອົງປະທັບຢູ່ນັ້ນ. ຈົ່ງຍ້ອງຍໍສັນລະເສີນພຣະເຈົ້າຢາເວເຖີດ. |
@ 2012 United Bible Societies. All Rights Reserved.