ເພງ^ສັນລະເສີນ 132 - ພຣະຄຳພີສັກສິຄຳຍ້ອງຍໍສັນລະເສີນຖວາຍແກ່ພຣະວິຫານ 1 ຂ້າແດ່ພຣະເຈົ້າຢາເວ ຂໍຢ່າລືມໄລດາວິດ ແລະຄວາມລຳບາກທຸກຢ່າງທີ່ເພິ່ນໄດ້ທົນນັ້ນ. 2 ຂ້າແດ່ພຣະເຈົ້າຢາເວ ໂຜດຈື່ຈຳສິ່ງທີ່ເພິ່ນໄດ້ສາບານ ສາບານກັບອົງຊົງຣິດອຳນາດຍິ່ງໃຫຍ່ຂອງຢາໂຄບວ່າ, 3-4 “ຂ້ານ້ອຍຈະບໍ່ເມືອບ້ານຫລືເຂົ້າໄປນອນ ແລະຈະບໍ່ພັກຜ່ອນຫລືເຊືອບຫລັບໄປດ້ວຍ 5 ຈົນກວ່າຂ້ານ້ອຍຈັດຫາສະຖານທີ່ສຳລັບພຣະເຈົ້າຢາເວສະຖິດ ຄືທີ່ຢູ່ສຳລັບອົງຊົງຣິດອຳນາດຍິ່ງໃຫຍ່ຂອງຢາໂຄບ.” 6 ທີ່ເອຟຣາທາພວກເຮົາໄດ້ຍິນເຖິງຫີບພັນທະສັນຍາ ທີ່ທົ່ງນາເຢອາຣິມ ພວກເຮົາໄດ້ພົບຫີບນີ້. 7 ພວກເຮົາກ່າວວ່າ, “ຈົ່ງໄປທີ່ຜາສາດຂອງພຣະອົງ ໃຫ້ເຮົາພາກັນຂາບລົງນະມັດສະການຕໍ່ໜ້າພຣະບັນລັງຂອງພຣະອົງ.” 8 ຂ້າແດ່ພຣະເຈົ້າຢາເວ ຂໍຊົງສະເດັດມາທີ່ພຣະວິຫານ ພ້ອມກັບຫີບພັນທະສັນຍາ ຊຶ່ງເປັນສັນຍາລັກແຫ່ງຣິດອຳນາດຂອງພຣະອົງ ແລະສະຖິດຢູ່ບ່ອນນີ້ຕະຫລອດໄປເປັນນິດ. 9 ຂໍໃຫ້ພວກປະໂຣຫິດກະທຳສິ່ງທີ່ຖືກຕ້ອງສະເໝີໄປ ຂໍໃຫ້ປະຊາຊົນທຸກຄົນຂອງພຣະອົງໂຮຮ້ອງຍິນດີເຖີດ. 10 ພຣະອົງໄດ້ສັນຍາກັບດາວິດຜູ້ຮັບໃຊ້ຂອງພຣະອົງ ຂໍຢ່າປະຖິ້ມກະສັດທີ່ໄດ້ຊົງຫົດສົງ. 11 ພຣະເຈົ້າຢາເວໄດ້ເຮັດສາບານຢ່າງໜັກແໜ້ນໄວ້ກັບດາວິດ ເປັນຄຳສາບານທີ່ພຣະອົງບໍ່ຖອນຄືນເປັນວ່າ, “ເຮົາຈະຕັ້ງລູກຊາຍຂອງເຈົ້າຄົນໜຶ່ງໃຫ້ເປັນກະສັດ ແລະລາວຈະປົກຄອງສືບຕໍ່ແທນເຈົ້າ.” 12 ຖ້າລູກຊາຍຂອງເຈົ້າສັດຊື່ຕໍ່ພັນທະສັນຍາຂອງເຮົາ ຕະຫລອດທັງຂໍ້ຄຳສັ່ງທີ່ເຮົາໄດ້ໃຫ້ແກ່ພວກເຂົານັ້ນ ແລ້ວລູກຊາຍຂອງພວກເຂົາກໍຈະໄດ້ເປັນກະສັດຄືກັນ ເພື່ອສືບຕໍ່ເປັນກະສັດທຸກຍຸກທຸກສະໄໝແທນເຈົ້າ. 13 ພຣະເຈົ້າຢາເວໄດ້ເລືອກເຟັ້ນເອົາພູເຂົາຊີໂອນ ພຣະອົງຕ້ອງການເຮັດໃຫ້ພູນີ້ເປັນທີ່ປະທັບຂອງພຣະອົງ. 14 ພຣະອົງໄດ້ກ່າວວ່າ, “ນີ້ແມ່ນບ່ອນທີ່ເຮົາຈະຢູ່ອາໄສ ນີ້ແມ່ນບ່ອນທີ່ເຮົາຈະປົກຄອງຕະຫລອດໄປ. 15 ເຮົາຈະຈັດຫາໃຫ້ພູເຂົາຊີໂອນຕາມທີ່ຕ້ອງການ ຄົນທຸກຈົນຈະມີອາຫານກິນອີ່ມທ້ອງ. 16 ເຮົາຈະອວຍພອນທຸກສິ່ງທີ່ປະໂຣຫິດກະທຳ ຊາວເມືອງຈະຮ້ອງລຳທຳເພງຢ່າງຊົມຊື່ນ. 17 ຢູ່ທີ່ນີ້ ເຮົາຈະຕັ້ງເຊື້ອສາຍດາວິດຜູ້ໜຶ່ງເປັນກະສັດຜູ້ຍິ່ງໃຫຍ່ ເຮົາຈະຮັກສາການປົກຄອງຂອງກະສັດຜູ້ທີ່ເຮົາໄດ້ຫົດສົງໄວ້. 18 ເຮົາຈະໃຫ້ເຫຼົ່າສັດຕູຂອງລາວໄດ້ຖືກອັບອາຍ ແຕ່ອານາຈັກຂອງລາວຈະຈະເລີນຮຸ່ງເຮືອງຂຶ້ນ.” |
@ 2012 United Bible Societies. All Rights Reserved.