ເພງ^ສັນລະເສີນ 130 - ພຣະຄຳພີສັກສິຄຳພາວັນນາອະທິຖານເມື່ອຄາວທຸກໂສກ 1 ຂ້າແດ່ພຣະເຈົ້າຢາເວ ເມື່ອຂ້ານ້ອຍທຸກໂສກເພາະສິ້ນຫວັງ ຈຶ່ງຮ້ອງຫາພຣະອົງ. 2 ໂອ ອົງພຣະຜູ້ເປັນເຈົ້າເອີຍ ຂໍຊົງໂຜດຟັງສຽງຮ້ອງໄຫ້ຂອງຂ້ານ້ອຍດ້ວຍ ໂຜດຟັງສຽງຂອງຂ້ານ້ອຍເອີ້ນຫາໃຫ້ຊ່ວຍເຫຼືອແດ່ທ້ອນ. 3 ຖ້າພຣະອົງ, ພຣະເຈົ້າຢາເວບັນທຶກການບາບຂອງພວກຂ້ານ້ອຍ ໂອ ອົງພຣະຜູ້ເປັນເຈົ້າເອີຍ ແມ່ນຜູ້ໃດນໍ ຈະໜີພົ້ນໄດ້ຈາກການລົງໂທດນີ້? 4 ແຕ່ພຣະອົງຍົກໂທດໃຫ້ແກ່ພວກຂ້ານ້ອຍ ເພື່ອວ່າພວກຂ້ານ້ອຍຈະໄດ້ຢຳເກງຢູ່ຊ້ອງໜ້າຂອງພຣະອົງ. 5 ຂ້ານ້ອຍລໍຖ້າຢ່າງຮ້ອນຮົນໃຫ້ພຣະເຈົ້າຢາເວຊ່ວຍເຫຼືອ ແລະໄວ້ວາງໃຈໃນຖ້ອຍຄຳຂອງພຣະອົງ. 6 ຂ້ານ້ອຍຄອງຄອຍຖ້າອົງພຣະຜູ້ເປັນເຈົ້າດ້ວຍຈິດໃຈຮ້ອນຮົນ ຍິ່ງກວ່າຄົນເຝົ້າຍາມຄອງຄອຍຖ້າໃຫ້ເຖິງຮຸ່ງເຊົ້າ. 7 ອິດສະຣາເອນເອີຍ ຈົ່ງວາງໃຈໃນພຣະເຈົ້າຢາເວ ເພາະຄວາມຮັກຂອງພຣະເຈົ້າຢາເວນັ້ນໝັ້ນຄົງ. ແລະພຣະອົງກໍຕັ້ງໃຈທີ່ຈະຊ່ວຍໃຫ້ພົ້ນໄພຢູ່ສະເໝີ 8 ພຣະອົງຈະໄຖ່ປະຊາຊົນອິດສະຣາເອນຂອງພຣະອົງ ໃຫ້ພົ້ນຈາກການບາບທຸກຢ່າງຂອງພວກເຂົາເຈົ້າ. |
@ 2012 United Bible Societies. All Rights Reserved.