ເພງ^ສັນລະເສີນ 129 - ພຣະຄຳພີສັກສິໂຜດຕໍ່ສູ້ສັດຕູຂອງຊາດອິດສະຣາເອນ 1 ໃຫ້ອິດສະຣາເອນກ່າວເຖີດວ່າ, “ພວກເຂົາໄດ້ໃຫ້ຂ້ານ້ອຍທຸກຍາກຢ່າງໜັກ ຕັ້ງແຕ່ຍັງໜຸ່ມນ້ອຍເປັນຕົ້ນມາ. 2 ພວກເຂົາຂົ່ມເຫັງຢ່າງໂຫດຮ້າຍແຕ່ຄາວຍັງໜຸ່ມມາ ແຕ່ວ່າພວກເຂົາເອົາຊະນະຂ້ານ້ອຍບໍ່ໄດ້ເລີຍ. 3 ພວກເຂົາຂີດຫລັງຂອງຂ້ານ້ອຍໃຫ້ເປັນຮອຍບາດແຜ ໃຫ້ເປັນດັ່ງຮອຍດິນນາທີ່ຖືກໄຖແລ້ວ. 4 ແຕ່ພຣະເຈົ້າຢາເວເປັນອົງທີ່ຊອບທຳ ໄດ້ປົດປ່ອຍໃຫ້ຫລຸດພົ້ນຈາກການເປັນທາດ.” 5 ຂໍໃຫ້ທຸກໆຄົນທີ່ກຽດຊັງພູເຂົາຊີໂອນ ພ່າຍແພ້ແລະຖືກຂັບໄລ່ຄືນໄປເຖີດ. 6 ຂໍໃຫ້ພວກເຂົາທັງໝົດເປັນດັ່ງຫຍ້າທີ່ປົ່ງຕາມຫລັງຄາ ຊຶ່ງຫ່ຽວແຫ້ງຕາຍໄປກ່ອນມັນຈະໃຫຍ່ຂຶ້ນ. 7 ບໍ່ມີຜູ້ໃດຮວບຮວມມັນໄດ້ພໍກຳມື ຫລືຂົນເອົາໜີໄປພໍເປັນມັດໄດ້. 8 ບໍ່ມີຜູ້ໃດຈັກຄົນທີ່ກ້າວຍ່າງກາຍໄປ ຈະສາມາດກ່າວຕໍ່ພວກເຂົາໄດ້ວ່າ, “ຂໍໃຫ້ພຣະເຈົ້າຢາເວອວຍພອນພວກເຈົ້າເດີ ເຮົາຂໍອວຍພອນພວກເຈົ້າໃນພຣະນາມຂອງພຣະເຈົ້າຢາເວ.” |
@ 2012 United Bible Societies. All Rights Reserved.