ເພງ^ສັນລະເສີນ 118 - ພຣະຄຳພີສັກສິຄຳພາວັນນາອະທິຖານໂມທະນາຂອບພຣະຄຸນເພາະມີໄຊ 1 ຈົ່ງໂມທະນາຂອບພຣະຄຸນພຣະເຈົ້າຢາເວເພາະພຣະອົງປະເສີດ ເພາະຄວາມຮັກໝັ້ນຄົງຂອງພຣະອົງດຳລົງຢູ່ສືບໄປເປັນນິດ. 2 ຂໍໃຫ້ປະຊາຊົນຊາດອິດສະຣາເອນກ່າວວ່າ, “ຄວາມຮັກຂອງພຣະອົງດຳລົງຢູ່ສືບໄປເປັນນິດ.” 3 ຂໍໃຫ້ພວກປະໂຣຫິດຂອງພຣະເຈົ້າພາກັນກ່າວວ່າ, “ຄວາມຮັກໝັ້ນຄົງຂອງພຣະອົງດຳລົງຢູ່ສືບໄປເປັນນິດ.” 4 ຂໍໃຫ້ຜູ້ທີ່ຢຳເກງພຣະເຈົ້າຢາເວທຸກຄົນຈົ່ງກ່າວວ່າ, “ຄວາມຮັກໝັ້ນຄົງຂອງພຣະອົງດຳລົງຢູ່ສືບໄປເປັນນິດ.” 5 ຂ້ານ້ອຍໄດ້ຮ້ອງຫາພຣະເຈົ້າຢາເວໃນຍາມທຸກຮ້ອນເຂັນໃຈ ພຣະເຈົ້າຢາເວໄດ້ຕອບຄຳຮ້ອງຂໍຂອງຂ້ານ້ອຍ ແລະປົດປ່ອຍຂ້ານ້ອຍໃຫ້ພົ້ນ. 6 ພຣະເຈົ້າຢາເວຢູ່ນຳຂ້ານ້ອຍ ຂ້ານ້ອຍຈະບໍ່ຢ້ານກົວເລີຍ ແມ່ນຜູ້ໃດເຮັດຫຍັງໃຫ້ຂ້ານ້ອຍໄດ້? 7 ແມ່ນພຣະເຈົ້າຢາເວທີ່ໄດ້ໃຫ້ຄວາມອູ້ມຊູແກ່ຂ້ານ້ອຍ ຂ້ານ້ອຍຈະໄດ້ເຫັນພວກສັດຕູພ່າຍແພ້. 8 ການໄວ້ວາງໃຈໃນພຣະເຈົ້າຢາເວເປັນການດີ ດີກວ່າທີ່ຈະເພິ່ງພາອາໄສມະນຸດ. 9 ການໄວ້ວາງໃຈໃນພຣະເຈົ້າຢາເວເປັນການດີ ດີກວ່າທີ່ຈະເພິ່ງພາອາໄສຜູ້ນຳທີ່ເປັນມະນຸດ. 10 ພວກສັດຕູໄດ້ອ້ອມຂ້ານ້ອຍໄວ້ຕັ້ງຫລວງຫລາຍ ແຕ່ຂ້ານ້ອຍໄດ້ທຳລາຍພວກເຂົາດ້ວຍພຣະນາມຂອງພຣະເຈົ້າຢາເວ 11 ພວກເຂົາໄດ້ອ້ອມຂ້ານ້ອຍໄວ້ທຸກໆດ້ານ ແຕ່ຂ້ານ້ອຍໄດ້ທຳລາຍພວກເຂົາ ດ້ວຍພຣະນາມຂອງພຣະເຈົ້າຢາເວ. 12 ພວກເຂົາບຸກໂຈມຕີຂ້ານ້ອຍດັ່ງຝູງເຜິ້ງຫຸ້ມໂຈມຕີ ແຕ່ພວກເຂົາຖືກດັບຊີວີຢ່າງວ່ອງໄວໝົດສິ້ນ ຄືຖືກດັບສູນໄປກ້ຽງດັ່ງຫຍ້າແຫ້ງທີ່ຖືກໄຟ ຂ້ານ້ອຍໄດ້ທຳລາຍພວກເຂົາດ້ວຍພຣະນາມຂອງພຣະເຈົ້າຢາເວ. 13 ຂ້ານ້ອຍຖືກໂຈມຕີຢ່າງໂຫດຫ້ຽມໃຫ້ພ່າຍແພ້ໄປ ແຕ່ພຣະເຈົ້າຢາເວໄດ້ຊ່ວຍຊູເອົາຂ້ານ້ອຍໄວ້ໄດ້. 14 ພຣະເຈົ້າຢາເວໃຫ້ຂ້ານ້ອຍມີອຳນາດແຂງແຮງຂຶ້ນໃໝ່ ພຣະອົງໄດ້ຊ່ວຍຊູຂ້ານ້ອຍໃຫ້ຫວິດພົ້ນໂພຍໄພ. 15 ຈົ່ງຟັງສຽງປະຊາຊົນຂອງພຣະເຈົ້າໂຮຮ້ອງຍິນດີ ເພາະຄວາມມີໄຊທີ່ຜ້າເຕັນຂອງເຂົາເຈົ້າ ຣິດທານຸພາບຂອງພຣະເຈົ້ານັ້ນຍິ່ງໃຫຍ່ຫລາຍ ພຣະເຈົ້າຢາເວກຳໄຊຊະນະຄັ້ງຍິ່ງໃຫຍ່. 16 ຣິດທານຸພາບຂອງພຣະເຈົ້າຢາເວໄດ້ນຳໄຊຊະນະມາສູ່ພວກເຮົາ ຄືອຳນາດອັນຍິ່ງໃຫຍ່ຂອງພຣະເຈົ້າຢາເວໃນສະໜາມຮົບ. 17 ແທນທີ່ຂ້ານ້ອຍຈະສິ້ນຊີວິດ ແຕ່ຂ້ານ້ອຍຈະມີຊີວິດຢູ່ ແລະປະກາດສິ່ງທີ່ພຣະເຈົ້າຢາເວໄດ້ຊົງກະທຳ. 18 ພຣະເຈົ້າຢາເວໄດ້ລົງໂທດຢ່າງໜັກ ແຕ່ພຣະອົງບໍ່ໄດ້ປະປ່ອຍຂ້ານ້ອຍໃຫ້ສິ້ນຊີວິດ. 19 ຂໍເປີດປະຕູແຫ່ງຄວາມຊອບທຳໃຫ້ຂ້ານ້ອຍ ຂ້ານ້ອຍຈະເຂົ້າໄປ ແລະຖວາຍໂມທະນາຂອບພຣະຄຸນແດ່ພຣະເຈົ້າຢາເວ. 20 ນີ້ຄືປະຕູແຫ່ງພຣະເຈົ້າຢາເວ ຜູ້ທີ່ຈະເຂົ້າໄປເຖິງໄດ້ ມີແຕ່ຄົນຊອບທຳເທົ່ານັ້ນ. 21 ຂ້ານ້ອຍໂມທະນາຂອບພຣະຄຸນພຣະອົງ ເພາະພຣະອົງໄດ້ຍິນສຽງທີ່ຂ້ານ້ອຍຮ້ອງຫາແລ້ວ ແລະໄດ້ໂຜດໃຫ້ຂ້ານ້ອຍ ມີໄຊຊະນະແລ້ວ. 22 ຫີນທີ່ຊ່າງກໍ່ໄດ້ໂຍນຖິ້ມແລ້ວເພາະຖືວ່າໄຮ້ຄ່າ ກໍກາຍເປັນຫີນເສົາເອກສຳຄັນກວ່າໝູ່ໝົດ. 23 ເລື່ອງນີ້ແມ່ນພຣະເຈົ້າຢາເວທີ່ໄດ້ກະທຳການ ຊຶ່ງເປັນການອັດສະຈັນປະຈັກຕາແທ້ໆ. 24 ວັນນີ້ ເປັນວັນທີ່ພຣະເຈົ້າຢາເວໃຫ້ຄວາມມີໄຊ ຈົ່ງຊົມຊື່ນຍິນດີແລະສະຫລອງກັນເຖີດ. 25 ຂ້າແດ່ພຣະເຈົ້າຢາເວ ຂໍຊົງໂຜດຊ່ວຍຂ້ານ້ອຍໃຫ້ພົ້ນເຖີດ ຂ້າແດ່ພຣະເຈົ້າຢາເວ ໂຜດປະທານຄວາມສຳເລັດໃຫ້ແກ່ພວກຂ້ານ້ອຍແດ່ທ້ອນ. 26 ຂໍໃຫ້ທ່ານຜູ້ທີ່ມາໃນພຣະນາມຂອງພຣະເຈົ້າຢາເວ ຈົ່ງໄດ້ຮັບພຣະພອນ ຂ້ານ້ອຍທັງຫລາຍອວຍພອນທ່ານຈາກວິຫານຂອງພຣະເຈົ້າຢາເວ. 27 ພຣະເຈົ້າຢາເວເປັນພຣະເຈົ້າ ພຣະອົງດີຕໍ່ພວກເຮົາ. ຈົ່ງຖືກິ່ງໄມ້ ແລະເລີ່ມສະຫລອງເທດສະການ ຈົ່ງພາກັນຍ່າງເປັນຂະບວນອ້ອມແທ່ນບູຊາເຖີດ. 28 ພຣະອົງເປັນພຣະເຈົ້າຂອງຂ້ານ້ອຍ ຂ້ານ້ອຍໂມທະນາຂອບພຣະຄຸນພຣະອົງ ແລະຈະປະກາດຄວາມຍິ່ງໃຫຍ່ຂອງພຣະອົງ. 29 ຈົ່ງໂມທະນາຂອບພຣະຄຸນພຣະເຈົ້າຢາເວ ເພາະພຣະອົງປະເສີດ ຄວາມຮັກໝັ້ນຄົງຂອງພຣະອົງດຳລົງຢູ່ສືບໄປເປັນນິດ. |
@ 2012 United Bible Societies. All Rights Reserved.