ເພງ^ສັນລະເສີນ 115 - ພຣະຄຳພີສັກສິພຣະເຈົ້າທ່ຽງແທ້ແຕ່ອົງດຽວ 1 ຂ້າແດ່ພຣະເຈົ້າຢາເວ ຂໍກຽດສັກສີຈົ່ງເປັນຂອງພຣະອົງພຽງແຕ່ເທົ່ານັ້ນ ບໍ່ເປັນຂອງພວກຂ້ານ້ອຍເລີຍ ກໍເພາະຄວາມຮັກອັນໝັ້ນຄົງ ແລະຄວາມສັດຈິງຂອງພຣະອົງ. 2 ເປັນຫຍັງບັນດາຊົນຊາດຈຶ່ງຖາມວ່າ, “ພຣະເຈົ້າຂອງພວກເຈົ້າຢູ່ໃສ?” 3 ພຣະເຈົ້າຂອງພວກຂ້ານ້ອຍຢູ່ເທິງຟ້າສະຫວັນ ພຣະອົງປາຖະໜາສິ່ງໃດກໍກະທຳສິ່ງນັ້ນ. 4 ພະຂອງພວກເຂົານັ້ນເຮັດດ້ວຍເງິນ ດ້ວຍຄຳ ຖືກສ້າງຂຶ້ນມາດ້ວຍມືຂອງມະນຸດ. 5 ພະເຫຼົ່ານີ້ມີປາກ ແຕ່ພັດເວົ້າຈາບໍ່ເປັນ, ພະເຫຼົ່ານີ້ມີຕາ ແຕ່ເບິ່ງບໍ່ເຫັນ. 6 ພະເຫຼົ່ານີ້ມີຫູ ແຕ່ບໍ່ໄດ້ຍິນ, ພະເຫຼົ່ານີ້ມີດັງ ແຕ່ດົມກິ່ນບໍ່ໄດ້. 7 ພະເຫຼົ່ານີ້ມີມື ແຕ່ຈັບບາຍບໍ່ເປັນ, ພະເຫຼົ່ານີ້ມີຕີນ ແຕ່ຍ່າງໄປມາບໍ່ໄດ້, ພະເຫຼົ່ານີ້ເຮັດໃຫ້ມີສຽງອອກຈາກລຳຄໍບໍ່ໄດ້. 8 ຂໍໃຫ້ທຸກຄົນທີ່ສ້າງພວກພະແລະໄວ້ໃຈໃນມັນ ຈົ່ງກາຍເປັນ ດັ່ງຮູບປັ້ນເຫຼົ່ານັ້ນເຖີດ. 9 ຊາວອິດສະຣາເອນເອີຍ ຈົ່ງໄວ້ວາງໃຈໃນພຣະເຈົ້າຢາເວ ພຣະອົງໃຫ້ຄວາມຊ່ວຍເຫລືອແລະຄຸ້ມຄອງໄດ້. 10 ບັນດາປະໂຣຫິດເອີຍ ຈົ່ງໄວ້ວາງໃຈໃນພຣະເຈົ້າຢາເວ ພຣະອົງໃຫ້ຄວາມຊ່ວຍເຫລືອແລະຄຸ້ມຄອງໄດ້. 11 ທຸກຄົນທີ່ຢຳເກງພຣະເຈົ້າຢາເວ ຈົ່ງໄວ້ວາງໃຈໃນພຣະເຈົ້າຢາເວເຖີດ ພຣະອົງໃຫ້ຄວາມຊ່ວຍເຫລືອ ແລະເປັນໂລ້ກຳບັງ. 12 ພຣະເຈົ້າຢາເວລະນຶກເຖິງພວກເຮົາ ແລະຈະອວຍພອນພວກເຮົາ ພຣະອົງຈະອວຍພອນພວກອິດສະຣາເອນ ແລະປະໂຣຫິດທຸກຄົນດ້ວຍ. 13 ພຣະອົງຈະອວຍພອນທຸກຄົນທີ່ຢຳເກງພຣະເຈົ້າຢາເວ ທັງຜູ້ໃຫຍ່ແລະຜູ້ນ້ອຍ. 14 ຂໍພຣະເຈົ້າຢາເວໂຜດໃຫ້ພວກເຈົ້າມີລູກຫລານຫລາຍ ທັງພວກເຈົ້າ ແລະເຊື້ອສາຍຂອງພວກເຈົ້າດ້ວຍ. 15 ຂໍໃຫ້ພວກເຈົ້າໄດ້ຮັບພອນຈາກພຣະເຈົ້າຢາເວ ຄືຜູ້ສ້າງສະຫວັນ ແລະແຜ່ນດິນໂລກ. 16 ຈັກກະວານ ເປັນຂອງພຣະເຈົ້າຢາເວເທົ່ານັ້ນ ແຕ່ພຣະອົງໄດ້ປະທານແຜ່ນດິນໂລກໃຫ້ແກ່ມະນຸດ. 17 ຄົນຕາຍຈະບໍ່ໄດ້ຍ້ອງຍໍສັນລະເສີນພຣະເຈົ້າຢາເວ ຫລືຄົນທີ່ລົງໄປສູ່ແດນແຫ່ງຄວາມງຽບ ແລ້ວກໍເຊັ່ນກັນ. 18 ແຕ່ພວກເຮົາຜູ້ທີ່ມີຊີວິດຢູ່ນີ້ ຈະໂມທະນາຂອບພຣະຄຸນພຣະເຈົ້າຢາເວ ທັງໃນປັດຈຸບັນແລະຕະຫລອດໄປເປັນນິດ. ຈົ່ງຍ້ອງຍໍສັນລະເສີນພຣະເຈົ້າຢາເວເຖີດ. |
@ 2012 United Bible Societies. All Rights Reserved.