ເພງ^ສັນລະເສີນ 105 - ພຣະຄຳພີສັກສິພຣະເຈົ້າແລະປະຊາຊົນຂອງພຣະອົງ. ( 1 ຂຄ 16:8-22 ) 1 ຈົ່ງໂມທະນາຂອບພຣະຄຸນພຣະເຈົ້າຢາເວ ຈົ່ງປະກາດພຣະນາມຂອງພຣະອົງ ຈົ່ງບອກຊົນຊາດທັງຫລາຍ ໃນສິ່ງທີ່ພຣະອົງໄດ້ກະທຳນັ້ນ. 2 ຈົ່ງຮ້ອງເພງຖວາຍແດ່ພຣະອົງ ຈົ່ງກ່າວເຖິງສິ່ງອັດສະຈັນທີ່ຊົງໄດ້ກະທຳນັ້ນ. 3 ຈົ່ງອວດພຣະນາມບໍຣິສຸດຂອງພຣະອົງ ທຸກຄົນທີ່ສະແຫວງຫາພຣະເຈົ້າຢາເວ ຈົ່ງຊື່ນໃຈຍິນດີເທີ້ນ. 4 ຈົ່ງສະແຫວງຫາພຣະເຈົ້າຢາເວ ແລະພຣະກຳລັງຂອງພຣະອົງ ແລະສືບຕໍ່ສະແຫວງຫາພຣະພັກຂອງພຣະອົງເລື້ອຍໄປ. 5-6 ພວກເຈົ້າຜູ້ເປັນລູກຫລານຂອງອັບຣາຮາມຜູ້ຮັບໃຊ້ຂອງພຣະອົງເອີຍ ພວກເຈົ້າຜູ້ເປັນເຊື້ອສາຍຂອງຢາໂຄບຜູ້ທີ່ພຣະອົງຊົງເລືອກໄວ້ ຈົ່ງຈົດຈຳການອັດສະຈັນທີ່ພຣະອົງໄດ້ຊົງກະທຳ ແລະການພິພາກສາທີ່ພຣະອົງໄດ້ມອບໃຫ້. 7 ພຣະອົງແມ່ນພຣະເຈົ້າຢາເວ ພຣະເຈົ້າຂອງພວກເຮົາ ຂໍ້ຄຳສັ່ງຂອງພຣະອົງໃຊ້ກັນຢູ່ທົ່ວໂລກ. 8 ພຣະອົງຈະຮັກສາພັນທະສັນຍາຂອງພຣະອົງສືບໆໄປ ເປັນພຣະສັນຍາສຳລັບຫລາຍຊົ່ວພັນເຊັ່ນຄົນ. 9 ພຣະອົງຈະຮັກສາຄຳຕົກລົງທີ່ມີກັບອັບຣາຮາມ ແລະຄຳສັນຍາທີ່ມີກັບອີຊາກ. 10 ພຣະເຈົ້າໄດ້ເຮັດພັນທະສັນຍາກັບຢາໂຄບຄືກັນ ເປັນພັນທະສັນຍາຢ່າງດຽວທີ່ມີຢູ່ເປັນນິດ. 11 ພຣະອົງໄດ້ກ່າວວ່າ, “ເຮົາຈະມອບການາອານໃຫ້ ເປັນກຳມະສິດຂອງພວກເຈົ້າແຕ່ເທົ່ານັ້ນ.” 12 ປະຊາຊົນຂອງພຣະເຈົ້າມີຈຳນວນໜ້ອຍ ເປັນຄົນຕ່າງດ້າວທີ່ອາໄສຢູ່ໃນດິນແດນການາອານນັ້ນ. 13 ພວກເພິ່ນທ່ອງທ່ຽວຈາກປະເທດນີ້ສູ່ປະເທດອື່ນ ຈາກອານາຈັກນີ້ໄປສູ່ອານາຈັກອື່ນອີກ. 14 ພຣະອົງບໍ່ໃຫ້ຜູ້ໃດກົດຂີ່ພວກເພິ່ນ ເພື່ອປົກປ້ອງ ພຣະອົງໄດ້ເຕືອນ ບັນດາກະສັດດັ່ງນີ້: 15 “ຢ່າທຳຮ້າຍຜູ້ຮັບໃຊ້ທີ່ເຮົາໄດ້ເຈີມໄວ້ ຢ່າແຕະຕ້ອງບັນດາຜູ້ທຳນວາຍຂອງເຮົາ.” 16 ພຣະອົງສົ່ງການອຶດຢາກມາສູ່ປະເທດຂອງພວກເພິ່ນ ແລະໄດ້ເອົາອາຫານທັງໝົດໜີໄປດ້ວຍ. 17 ແຕ່ພຣະອົງໄດ້ສົ່ງຊາຍຄົນໜຶ່ງໄປກ່ອນໜ້າພວກເພິ່ນ ຄືໂຢເຊັບຜູ້ທີ່ໄດ້ຖືກຂາຍໃຫ້ໄປເປັນທາດ. 18 ຕີນຂອງເພິ່ນຖືກພວກເຂົາລ່າມໂສ້ແລະຄໍຂອງເພິ່ນ ກໍຖືກພວກເຂົາໃສ່ປອກເຫລັກ 19 ຈົນສິ່ງທີ່ເພິ່ນໄດ້ທຳນວາຍນັ້ນກາຍເປັນຈິງ ຖ້ອຍຄຳຂອງພຣະເຈົ້າຢາເວຈຶ່ງພິສູດວ່າເພິ່ນຖືກຕ້ອງ. 20 ແລ້ວກະສັດແຫ່ງເອຢິບກໍໄດ້ປົດປ່ອຍໃຫ້ເພິ່ນໄປ ຜູ້ປົກຄອງນາໆຊາດໄດ້ປ່ອຍເພິ່ນໃຫ້ເປັນອິດສະຫລະ. 21 ເພິ່ນໄດ້ຖືກແຕ່ງຕັ້ງໃຫ້ຮັບຜິດຊອບລັດຖະບານ ເພິ່ນໄດ້ປົກຄອງປະຊາຊົນທົ່ວທັງແດນດ້າວ 22 ທັງມີອຳນາດເໜືອຂ້າຣາຊການທັງໝົດ ມີອຳນາດແນະນຳທີ່ປຶກສາຂອງກະສັດດ້ວຍ. 23 ແລ້ວຢາໂຄບກໍໄດ້ໄປທີ່ເອຢິບ ແລະໄດ້ຕັ້ງຖິ່ນຖານຢູ່ໃນທີ່ນັ້ນ. 24 ພຣະເຈົ້າຢາເວໄດ້ໃຫ້ປະຊາຊົນຂອງພຣະອົງທະວີຫລາຍຂຶ້ນ ແລະໃຫ້ພວກເຂົາເຂັ້ມແຂງກວ່າພວກສັດຕູດ້ວຍ. 25 ຊາວເອຢິບຈຶ່ງກຽດຊັງປະຊາຊົນຂອງພຣະອົງ ແລະໃຊ້ອຸບາຍຕໍ່ພວກຜູ້ຮັບໃຊ້ຂອງພຣະອົງດ້ວຍ. 26 ແລ້ວພຣະອົງກໍໄດ້ສົ່ງໂມເຊຜູ້ຮັບໃຊ້ຂອງພຣະອົງໄປ ແລະສົ່ງອາໂຣນຜູ້ທີ່ພຣະອົງໄດ້ເລືອກໄວ້. 27 ທັງສອງໄດ້ກະທຳຣິດທານຸພາບຂອງພຣະອົງໃຫ້ເຫັນ ໂດຍໄດ້ເຮັດການອັດສະຈັນຕ່າງໆໃນປະເທດເອຢິບນັ້ນ. 28 ພຣະອົງໄດ້ສົ່ງຄວາມມືດມາສູ່ເອຢິບ ແຕ່ຊາວເອຢິບບໍ່ໄດ້ເຊື່ອຟັງ ຂໍ້ຄຳສັ່ງຂອງພຣະອົງ. 29 ພຣະອົງໄດ້ປ່ຽນນໍ້າໃຫ້ກາຍເປັນເລືອດໄຫລນອງ ແລະໄດ້ເຮັດໃຫ້ປາຂອງພວກເຂົາຕາຍໝົດກ້ຽງ. 30 ປະເທດຂອງພວກເຂົາໄດ້ຖືກຝູງກົບມາຮາວີ ແມ່ນແຕ່ໃນວັງກໍເຕັມໄປດ້ວຍຝູງກົບທັງນັ້ນ. 31 ພຣະອົງໄດ້ສັ່ງໃຫ້ຝູງຮີ້ນແລະຝູງເຫລືອກມາ ມີຈຳນວນມາກມາຍໄຕ່ຢູ່ທົ່ວປະເທດຂອງພວກເຂົາ. 32 ພຣະອົງສົ່ງໝາກເຫັບແລະຟ້າແມບເຫລື້ອມ ແທນທີ່ຈະເປັນນໍ້າຝົນລົງມາສູ່ດິນແດນນັ້ນ. 33 ພຣະອົງທຳລາຍເຄືອອະງຸ່ນແລະຕົ້ນເດື່ອເທດ ແລະເຮັດໃຫ້ຕົ້ນໄມ້ຕ່າງໆຫັກລົ້ມລົງໝົດສິ້ນ. 34 ພຣະອົງໄດ້ໃຫ້ຄຳສັ່ງແລະຝູງຕັກແຕນກໍໄດ້ມາ ພວກມັນມາຢ່າງມະຫາສານ ຈົນນັບບໍ່ໄດ້. 35 ພວກມັນກິນພືດພັນທັງໝົດທີ່ໄດ້ເກີດໃນດິນແດນ ແລະກິນຜົນລະປູກທຸກແນວຕາມພື້ນດິນນັ້ນ. 36 ພຣະອົງໄດ້ຂ້າລູກຊາຍກົກທັງຫລາຍ ຂອງທຸກໆຄອບຄົວໃນເອຢິບຖິ້ມ. 37 ແລ້ວພຣະອົງກໍໄດ້ນຳພວກອິດສະຣາເອນອອກໄປ ພວກເຂົາໄດ້ຖືເອົາເງິນແລະຄຳໄປນຳດ້ວຍ, ທຸກຄົນຕ່າງກໍມີສຸຂະພາບແຂງແຮງດີ ພ້ອມທັງມີກຳລັງເຂັ້ມແຂງດີດ້ວຍ. 38 ຊາວເອຢິບຕ່າງກໍເກີດຄວາມຢ້ານຢ່າງໃຫຍ່ຫລວງ ຕ່າງກໍດີໃຈເມື່ອເຫັນພວກເຂົາໜີໄປແລ້ວ. 39 ພຣະອົງໄດ້ໃຊ້ເມກປົກບັງປະຊາຊົນຂອງພຣະອົງ ແລະໃຊ້ໄຟເພື່ອເປັນແສງສະຫວ່າງໃນເວລາກາງຄືນ. 40 ພວກເພິ່ນ ຮຽກຮ້ອງແລະພຣະອົງໄດ້ສົ່ງນົກຂຸ້ມມາ ພຣະອົງປະທານອາຫານຈາກສະຫວັນໃຫ້ພວກເພິ່ນຢ່າງອຸດົມສົມບູນ. 41 ພຣະອົງໄດ້ແຍກຫີນ ແລະນໍ້າໄດ້ໄຫລພຸ້ງອອກມາ ມັນໄຫລຜ່ານຖິ່ນແຫ້ງແລ້ງກັນດານເໝືອນດັ່ງແມ່ນໍ້າ. 42 ພຣະອົງໄດ້ລະນຶກເຖິງພຣະສັນຍາອັນສັກສິດ ທີ່ມີຕໍ່ອັບຣາຮາມຜູ້ຮັບໃຊ້ຂອງພຣະອົງ. 43 ດັ່ງນັ້ນ ພຣະອົງໄດ້ນຳປະຊາຊົນຂອງພຣະອົງອອກໄປ ຢ່າງຊົມຊື່ນຍິນດີ ຄືຄົນທັງຫຼາຍທີ່ພຣະອົງໄດ້ເລືອກໄວ້ນັ້ນດ້ວຍການຮ້ອງເພງ. 44 ພຣະອົງໄດ້ຍົກດິນແດນຂອງຊົນຊາດອື່ນໃຫ້ພວກເພິ່ນ ແລະໃຫ້ຢຶດເອົາໄຮ່ນາຂອງຄົນເຫຼົ່ານັ້ນ 45 ເພື່ອວ່າປະຊາຊົນຂອງພຣະອົງຈະເຊື່ອຟັງກົດບັນຍັດ ແລະຖືຮັກສາຂໍ້ຄຳສັ່ງທັງໝົດຂອງພຣະອົງ. ຈົ່ງຍ້ອງຍໍສັນລະເສີນພຣະເຈົ້າຢາເວເຖີດ. |
@ 2012 United Bible Societies. All Rights Reserved.