ເພງ^ສັນລະເສີນ 104 - ພຣະຄຳພີສັກສິຈົ່ງໂມທະນາຂອບພຣະຄຸນພຣະເຈົ້າພຣະຜູ້ສ້າງ 1 ຈິດໃຈຂອງຂ້ອຍເອີຍ ຈົ່ງຍ້ອງຍໍສັນລະເສີນພຣະເຈົ້າຢາເວ ຂ້າແດ່ພຣະເຈົ້າຢາເວ ພຣະເຈົ້າຂອງຂ້ານ້ອຍເອີຍ ພຣະອົງຊົງຍິ່ງໃຫຍ່. ພຣະອົງຫົ່ມສະຫງ່າຣາສີແລະກຽດຕິຍົດ. 2 ພຣະອົງຫຸ້ມຫໍ່ພຣະອົງເອງດ້ວຍແສງຣັດສະໝີ ພຣະອົງກາງຟ້າສະຫວັນດັ່ງກາງຜ້າເຕັນ. 3 ສ້າງບ່ອນຢູ່ຂອງພຣະອົງເທິງນໍ້າທັງຫລາຍ ພຣະອົງໃຊ້ກ້ອນເມກເປັນມ້າແລະຢູ່ເທິງປີກລົມຂີ່ເຫາະໄປ. 4 ພຣະອົງໃຊ້ລົມໃຫ້ເປັນຜູ້ສົ່ງຂ່າວຂອງພຣະອົງ ແລະໃຫ້ແສງຟ້າແມບເຫລື້ອມເປັນຜູ້ຮັບໃຊ້. 5 ພຣະອົງຕັ້ງແຜ່ນດິນໂລກເທິງຮາກຖານອັນໝັ້ນຄົງ ແລະຈະບໍ່ຖືກເຄື່ອນຍ້າຍໄປສູ່ທີ່ໃດຈັກເທື່ອ. 6 ພຣະອົງໃຫ້ມະຫາສະໝຸດຫຸ້ມຫໍ່ດັ່ງເຄື່ອງນຸ່ງຫົ່ມຮ່າງກາຍ ແລະໃຫ້ນໍ້າປົກຄຸມຢູ່ເທິງຖ້ວມພູທັງຫລາຍໄວ້. 7 ແຕ່ເມື່ອພຣະອົງນາບຂູ່ນໍ້າມັນກໍຫລົບໜີໄປ ເວລາມັນໄດ້ຍິນສຽງພຣະອົງຮ້ອງສັ່ງ ມັນກໍໄຫລໄປໂລດ. 8 ມັນໄຫລຜ່ານພູຕ່າງໆສູ່ຮ່ອມພູທັງຫລາຍ ຄືສູ່ບ່ອນທີ່ພຣະອົງໄດ້ສ້າງໄວ້ສຳລັບມັນນັ້ນ. 9 ພຣະອົງຕັ້ງເຂດແດນໄວ້ເພື່ອບໍ່ໃຫ້ນໍ້າໄຫລເຂົ້າມາ ເພື່ອວ່າບໍ່ໃຫ້ນໍ້າໄຫລຖ້ວມແຜ່ນດິນໂລກອີກ. 10 ພຣະອົງສ້າງນໍ້າພຸໃຫ້ໄຫລໄປຕາມຮ່ອມພູ ແລະໃຫ້ແມ່ນໍ້າໄຫລຜ່ານລະຫວ່າງເນີນພູດ້ວຍ. 11 ເປັນບ່ອນທີ່ບັນດາສັດປ່າກິນນໍ້າຕາມລຳທານ ແລະລໍປ່າທັງຫລາຍກໍບັນເທົາກະຫາຍນໍ້າ. 12 ໃນທ່າມກາງຕົ້ນໄມ້ທີ່ຢູ່ໃກ້ແຄມລຳທານ ຝູງນົກສ້າງຮັງພ້ອມທັງສົ່ງສຽງຮໍ່າຮ້ອງ. 13 ຈາກທ້ອງຟ້າພຣະອົງໃຫ້ຝົນຕົກໃສ່ພູທັງຫລາຍ ແລະພຣະພອນກໍເຕັມໄປທົ່ວທັງແຜ່ນດິນໂລກ. 14 ພຣະອົງເຮັດໃຫ້ຫຍ້າເກີດຂຶ້ນສຳລັບຝູງສັດ ແລະພືດພັນສຳລັບໃຫ້ມະນຸດເພາະປູກ 15 ເພື່ອວ່າພວກເຂົາຈະໄດ້ປູກຝັງຕາມຜືນແຜ່ນດິນ ແລະຜະລິດເຫຼົ້າອະງຸ່ນທີ່ໃຫ້ຄວາມມ່ວນຊື່ນ ນໍ້າມັນໝາກກອກເທດທີ່ໃຫ້ຄວາມຊື່ນບານ ແລະເຂົ້າທີ່ໃຫ້ພວກເຂົາມີເຫື່ອແຮງຂຶ້ນໃໝ່. 16 ສ່ວນຕົ້ນແປກທີ່ເລບານອນກໍຮັບນໍ້າຝົນຫລາຍ ເປັນຕົ້ນໄມ້ທີ່ພຣະເຈົ້າຢາເວອົງຍິ່ງໃຫຍ່ໄດ້ປູກໄວ້. 17 ເທິງຕົ້ນໄມ້ນັ້ນຝູງນົກໄດ້ເຮັດຮັງຂອງພວກມັນ ເປັນຮັງນົກຍາງຢູ່ເທິງຕົ້ນສົນນັ້ນ. 18 ແບ້ປ່າກໍອາໄສຢູ່ຕາມເທິງພູທັງຫລາຍ ແລະກະຕ່າຍກໍຫລົບລີ້ຢູ່ຕາມໜ້າຜານັ້ນ. 19 ພຣະອົງໄດ້ສ້າງດວງເດືອນເພື່ອໝາຍເດືອນປີ ແລະດວງຕາເວັນເພື່ອໃຫ້ຮູ້ເວລາຕັ້ງໄວ້. 20 ພຣະອົງໄດ້ສົ່ງຄວາມມືດມາເປັນຕອນກາງຄືນ ຊຶ່ງເປັນເວລາທີ່ສັດປ່າອອກໄປທ່ອງທ່ຽວ. 21 ສິງໜຸ່ມແຜດສຽງຮ້ອງເວລາອອກຊອກຫາກິນ ໂດຍຊອກຫາອາຫານທີ່ພຣະເຈົ້າຈັດໄວ້ໃຫ້. 22 ເມື່ອຕາເວັນຂຶ້ນ ພວກມັນກໍກັບຄືນສູ່ຖິ່ນເດີມ ແລະເອ່ນຕົວລົງນອນຢູ່ຕາມເຫວຕາມຖໍ້າ. 23 ແລ້ວມະນຸດກໍອອກໄປເຮັດວຽກງານຂອງຕົນ ແລະເຮັດວຽກຕໍ່ໄປຈົນຕະຫລອດຮອດຄໍ່າ. 24 ຂ້າແດ່ພຣະເຈົ້າຢາເວ ພຣະອົງໄດ້ສ້າງຫລາຍສິ່ງຫລາຍແນວ ພຣະອົງໄດ້ສ້າງສັບພະທຸກສິ່ງໃນຈັກກະວານນີ້. ພຣະອົງໄດ້ສ້າງສິ່ງເຫຼົ່ານີ້ຢ່າງສະຫລາດ ແຜ່ນດິນໂລກກໍເຕັມດ້ວຍສິ່ງທີ່ພຣະອົງໄດ້ສ້າງ. 25 ມີມະຫາສະໝຸດອັນເລິກກວ້າງໃຫຍ່ໄພສານ ບ່ອນສັດນ້ອຍໃຫຍ່ທັງຫລາຍອາໄສຢູ່ນັບບໍ່ຖ້ວນ. 26 ເຮືອແລ່ນໄປມາແລະເງືອກກໍລອຍຫລີ້ນສະບາຍ ຊຶ່ງເປັນສັດໃຫຍ່ທີ່ພຣະອົງໄດ້ສ້າງຂຶ້ນມານັ້ນ. 27 ສັດທັງໝົດເຫຼົ່ານັ້ນເພິ່ງພາອາໄສພຣະອົງ ເປັນຜູ້ໃຫ້ອາຫານໃນຍາມພວກມັນຢາກ. 28 ພວກມັນກິນອາຫານທີ່ພຣະອົງເປັນຜູ້ຈັດຫາ ແມ່ນພຣະອົງທີ່ໃຫ້ອາຫານກິນອີ່ມທ້ອງ. 29 ເວລາພຣະອົງຫັນໜ້າໜີມັນກໍເກີດຢ້ານກົວ ເມື່ອຖອດລົມຫາຍໃຈຄືນ ພວກມັນກໍຕາຍແລະກັບກາຍເປັນຂີ້ດິນອີກ. 30 ແຕ່ເມື່ອພຣະອົງສົ່ງວິນຍານຂອງພຣະອົງອອກໄປ ພວກມັນກໍຖືກສ້າງຂຶ້ນມາ ແລະພຣະອົງກໍປ່ຽນໂສມໜ້າຂອງແຜ່ນດິນໂລກຄືນໃໝ່. 31 ຂໍໃຫ້ສະຫງ່າຣາສີຂອງພຣະເຈົ້າຢາເວດຳລົງຢູ່ຕະຫລອດໄປ ຂໍໃຫ້ພຣະເຈົ້າຢາເວພໍໃຈນຳສິ່ງທີ່ຖືກສ້າງມານັ້ນ. 32 ພໍຫລຽວເບິ່ງແຜ່ນດິນໂລກ ມັນກໍສັ່ນສະເທືອນ ພໍພຣະອົງແຕະຕ້ອງພູ ຄວັນໄຟກໍຟົ້ງອອກໂລດ. 33 ຂ້ານ້ອຍຈະຮ້ອງເພງແດ່ພຣະເຈົ້າຢາເວ ຖວາຍເປັນຄຳສັນລະເສີນຕະຫລອດຊົ່ວຊີວິດ ຕາບໃດທີ່ຊີວິດຍັງມີຢູ່ ຂ້ານ້ອຍຈະຮ້ອງເພງ ສັນລະເສີນພຣະເຈົ້າຂອງຂ້ານ້ອຍ. 34 ຂໍໃຫ້ບົດເພງນັ້ນຈົ່ງເປັນທີ່ພໍໃຈພຣະອົງ ຂ້ານ້ອຍຊົມຊື່ນຍິນດີໃນພຣະເຈົ້າຢາເວ. 35 ຂໍໃຫ້ຄົນບາບຖືກທຳລາຍສ້ຽງຈາກໂລກນີ້ສາ ຂໍຢ່າສູ່ໃຫ້ມີຄົນຊົ່ວຫລົງເຫລືອຢູ່ຕໍ່ໄປອີກ. ຈິດວິນຍານຂອງຂ້ານ້ອຍເອີຍ ຈົ່ງຍົກຍໍສັນລະເສີນພຣະເຈົ້າຢາເວ ຈົ່ງຍ້ອງຍໍສັນລະເສີນພຣະເຈົ້າຢາເວເຖີດ. |
@ 2012 United Bible Societies. All Rights Reserved.