ເພງ^ສັນລະເສີນ 103 - ພຣະຄຳພີສັກສິຄວາມຮັກຂອງພຣະເຈົ້າ 1 ຈິດວິນຍານຂອງຂ້ານ້ອຍເອີຍ ຈົ່ງຍ້ອງຍໍສັນລະເສີນພຣະເຈົ້າຢາເວ ທຸກສິ່ງທີ່ຢູ່ພາຍໃນຂ້ານ້ອຍ. ຈົ່ງຍ້ອງຍໍສັນລະເສີນພຣະນາມບໍຣິສຸດຂອງພຣະອົງ 2 ຈິດວິນຍານຂອງຂ້ານ້ອຍເອີຍ ຈົ່ງຍ້ອງຍໍສັນລະເສີນພຣະເຈົ້າຢາເວ ຢ່າລືມໄລພຣະຄຸນຄວາມດີຂອງພຣະອົງ. 3 ພຣະອົງຍົກການບາບຂອງຂ້ານ້ອຍໃຫ້ໝົດໄປ ແລະປິ່ນປົວພະຍາດທຸກຊະນິດຂອງຂ້ານ້ອຍ. 4 ພຣະອົງຮັກສາຂ້ານ້ອຍໄວ້ຈາກຂຸມຝັງສົບ ທັງອວຍພອນດ້ວຍຄວາມຮັກແລະຄວາມເມດຕາ. 5 ພຣະອົງເຮັດໃຫ້ຊີວິດຂອງຂ້ານ້ອຍ ເຕັມດ້ວຍສິ່ງທີ່ດີ ໃຫ້ຂ້ານ້ອຍໜຸ່ມແໜ້ນແຂງແຮງດັ່ງນົກອິນຊີນັ້ນ. 6 ພຣະເຈົ້າຢາເວຕັດສິນເຂົ້າຂ້າງຜູ້ທີ່ຖືກຂົ່ມເຫັງ ແລະມອບສິດທີ່ພວກເຂົາຄວນມີໃຫ້ພວກເຂົາເຈົ້າ. 7 ພຣະອົງໄດ້ໃຫ້ໂມເຊຮູ້ເຫັນແຜນການຂອງພຣະອົງ ໃຫ້ຊາວອິດສະຣາເອນເຫັນພຣະຣາຊກິດອັນຍິ່ງໃຫຍ່. 8 ພຣະເຈົ້າຢາເວເຕັມໄປດ້ວຍຄວາມເມດຕາ ແລະເຕັມໄປດ້ວຍພຣະຄຸນ ເຕັມດ້ວຍຄວາມຮັກອັນໝັ້ນຄົງ ແລະຊ້າໃນການຮ້າຍ. 9 ພຣະອົງບໍ່ສືບຕໍ່ຕຳໜິຕິຕຽນສະເໝີໄປ ພຣະອົງບໍ່ໂກດຮ້າຍໄປຕະຫລອດ. 10 ພຣະອົງບໍ່ໄດ້ລົງໂທດພວກເຮົາຕາມທີ່ສົມຄວນ ຫລືບໍ່ຕອບແທນໃນການບາບແລະຄວາມຜິດດ້ວຍ. 11 ຟ້າສະຫວັນສູງເໜືອແຜ່ນດິນໂລກຫລາຍເທົ່າໃດ ພຣະອົງກໍຮັກຜູ້ທີ່ຢຳເກງພຣະອົງສູງຫລາຍເທົ່ານັ້ນ. 12 ທິດຕາເວັນອອກໄກຈາກທິດຕາເວັນຕົກເທົ່າໃດ ພຣະອົງກໍຍົກການບາບຂອງພວກເຮົາໄປໄກເທົ່ານັ້ນ. 13 ພໍ່ເມດຕາກະລຸນາລູກໆຫລາຍເທົ່າໃດ ພຣະເຈົ້າຢາເວກໍເມດຕາຜູ້ທີ່ຢຳເກງພຣະອົງຫລາຍເທົ່ານັ້ນ. 14 ພຣະອົງຮູ້ດີວ່າພວກເຮົາຖືກສ້າງມາຢ່າງໃດ ແລະຈົດຈຳໄວ້ວ່າພວກເຮົາເປັນພຽງແຕ່ຂີ້ຝຸ່ນດິນເທົ່ານັ້ນ. 15 ສ່ວນມະນຸດນັ້ນຊີວິດຂອງພວກເຂົາເໝືອນຕົ້ນຫຍ້າ ທີ່ເກີດແລະບານເໝືອນດອກໄມ້ຕາມທ້ອງທົ່ງນາ. 16 ແລ້ວລົມກໍພັດແລະເຮັດໃຫ້ສູນຫາຍໄປ ບໍ່ມີຜູ້ໃດເຫັນຮ່ອງຮອຍມັນຕໍ່ໄປອີກ. 17 ແຕ່ຄວາມຮັກໝັ້ນຄົງຂອງພຣະເຈົ້າຢາເວດຳລົງຢູ່ສືບໆໄປ ສຳລັບທຸກຄົນທີ່ຍ້ອງຍໍໃຫ້ກຽດພຣະອົງ ແລະຄວາມຊອບທຳຂອງພຣະອົງກໍດຳລົງຢູ່ ຕະຫລອດທຸກຊົ່ວເຊັ່ນລູກເຊັ່ນຫລານ 18 ຄືເປັນຂອງຜູ້ທີ່ສັດຊື່ຕໍ່ພັນທະສັນຍາຂອງພຣະອົງ ແລະຂອງຜູ້ທີ່ເຊື່ອຟັງຂໍ້ຄຳສັ່ງຂອງພຣະອົງ. 19 ພຣະເຈົ້າຢາເວຕັ້ງພຣະບັນລັງໄວ້ຢູ່ໃນຟ້າສະຫວັນ ຊົງເປັນກະສັດປົກຄອງເໜືອສັບພະທຸກສິ່ງ. 20 ຈົ່ງຍ້ອງຍໍສັນລະເສີນພຣະເຈົ້າຢາເວເຖີດ ພວກເທວະດາຜູ້ແຂງແຮງແລະມີຣິດອຳນາດຍິ່ງໃຫຍ່ເອີຍ ຄືຜູ້ທີ່ເຊື່ອຟັງຂໍ້ຄຳສັ່ງຂອງພຣະອົງ ຜູ້ທີ່ຍອມຟັງສິ່ງທີ່ພຣະອົງຊົງກ່າວ. 21 ຈົ່ງຍ້ອງຍໍສັນລະເສີນພຣະເຈົ້າຢາເວເຖີດ ກອງທັບທັງຫລາຍຂອງພຣະອົງຜູ້ມີຣິດເອີຍ ຄືຜູ້ຮັບໃຊ້ທີ່ປະຕິບັດຕາມພຣະປະສົງຂອງພຣະອົງນັ້ນ. 22 ຂໍພຣະເຈົ້າຢາເວຈົ່ງເປັນທີ່ຍ້ອງຍໍສັນລະເສີນ ທຸກສິ່ງທີ່ຖືກສ້າງມາ ຈົ່ງຍ້ອງຍໍສັນລະເສີນພຣະເຈົ້າ. ຈົ່ງຍ້ອງຍໍສັນລະເສີນພຣະເຈົ້າໃນທຸກບ່ອນທີ່ພຣະອົງປົກຄອງ ຈິດວິນຍານຂອງຂ້ານ້ອຍເອີຍ ຈົ່ງຍົກຍໍພຣະເຈົ້າຢາເວ. |
@ 2012 United Bible Societies. All Rights Reserved.