ຈົດບັນຊີ 7 - ພຣະຄຳພີສັກສິການຖວາຍຂອງພວກຫົວໜ້າ 1 ໃນວັນທີ່ໂມເຊກາງຫໍເຕັນສັກສິດສຳເລັດຮຽບຮ້ອຍນັ້ນ; ເພິ່ນໄດ້ໃຊ້ນໍ້າມັນສັກສິດຫົດສົງ ແລະອຸທິດຖວາຍຫໍເຕັນກັບເຄື່ອງໃຊ້ຕ່າງໆປະຈຳຫໍເຕັນ ແລະແທ່ນບູຊາກັບເຄື່ອງໃຊ້ຕ່າງໆປະຈຳແທ່ນບູຊາ. 2 ແລ້ວບັນດາຫົວໜ້າຕະກຸນທັງຫລາຍ ທີ່ເປັນຜູ້ນຳໃນເຜົ່າຕ່າງໆຂອງຊາດອິດສະຣາເອນ ຄືພວກທີ່ຮັບຜິດຊອບໃນການຈົດສຳມະໂນຄົວ 3 ຕ່າງກໍນຳເອົາສິ່ງຂອງຂອງພວກຕົນມາຖວາຍຕໍ່ໜ້າພຣະເຈົ້າຢາເວດັ່ງນີ້: ກວຽນຫົກລຳກັບງົວເຖິກຫົກຄູ່, ກວຽນລຳໜຶ່ງຕໍ່ຜູ້ນຳສອງຄົນ ແລະງົວເຖິກໂຕໜຶ່ງຕໍ່ຜູ້ນຳຄົນໜຶ່ງ ເມື່ອນຳສິ່ງເຫຼົ່ານີ້ມາຕໍ່ໜ້າຫໍເຕັນສັກສິດແລ້ວ 4 ພຣະເຈົ້າຢາເວກໍບອກໂມເຊວ່າ, 5 “ຈົ່ງຮັບເອົາຂອງຖວາຍເຫຼົ່ານີ້ໄວ້ໃຊ້ໃນວຽກງານຂອງຫໍເຕັນບ່ອນຊຸມນຸມ ແລ້ວຈົ່ງມອບຕໍ່ໃຫ້ຊາວເລວີຕາມວຽກງານທີ່ພວກເຂົາຮັບຜິດຊອບນັ້ນ.” 6 ດັ່ງນັ້ນ ໂມເຊຈຶ່ງເອົາກວຽນແລະງົວມອບໃຫ້ຊາວເລວີ. 7 ເພິ່ນໄດ້ມອບກວຽນສອງລຳກັບງົວເຖິກສອງຄູ່ໃຫ້ພວກເກໂຊນ 8 ແລະກວຽນສີ່ລຳກັບງົວເຖິກສີ່ຄູ່ໃຫ້ພວກເມຣາຣີ. ວຽກງານທັງໝົດຂອງພວກເຂົາແມ່ນຢູ່ໃຕ້ການຊີ້ນຳຂອງອີທາມາ ລູກຊາຍຂອງອາໂຣນ. 9 ແຕ່ໂມເຊບໍ່ໄດ້ມອບກວຽນແລະງົວໃຫ້ພວກໂກຮາດ ເພາະວ່າສິ່ງຂອງບໍຣິສຸດທີ່ພວກເຂົາເບິ່ງແຍງຮັກສານັ້ນ ຕ້ອງແບກຫາມໂດຍພວກເຂົາເອງ. 10 ບັນດາຜູ້ນຳຊາດອິດສະຣາເອນໄດ້ນຳເຄື່ອງຖວາຍ ສຳລັບການອຸທິດແທ່ນບູຊາມາໃຫ້ເຊັ່ນດຽວກັນ. ເມື່ອພວກເຂົາຕຽມພ້ອມທີ່ຈະຖວາຍຂອງຖວາຍທີ່ແທ່ນບູຊານັ້ນ 11 ພຣະເຈົ້າຢາເວໄດ້ບອກໂມເຊວ່າ, “ແຕ່ລະມື້ ຈົ່ງໃຫ້ຫົວໜ້າແຕ່ລະຄົນນຳເຄື່ອງມາຖວາຍບູຊາທີ່ແທ່ນ ຕາມຜຽນຂອງໃຜລາວໃຫ້ຄົບສິບສອງວັນ.” 12-83 ພວກເຂົານຳຂອງມາຖວາຍເປັນລຳດັບກັນດັ່ງນີ້: ມື້ ເຜົ່າ ຜູ້ນຳ ທີ 1 ຢູດາ ນາໂຊນ ລູກຊາຍຂອງອຳມີນາດາບ ທີ 2 ອິດຊາຄາ ເນທາເນນ ລູກຊາຍຂອງຊູອາ ທີ 3 ເຊບູໂລນ ເອລີອາບ ລູກຊາຍຂອງເຮໂລນ ທີ 4 ຣູເບັນ ເອລີຊູ ລູກຊາຍຂອງເຊເດອູເຣ ທີ 5 ຊີເມໂອນ ເຊລູມີເອນ ລູກຊາຍຂອງຊູຣິດຊັດດາຍ ທີ 6 ກາດ ເອລີອາສັບ ລູກຊາຍຂອງດູເອນ ທີ 7 ເອຟຣາອິມ ເອລີຊາມາ ລູກຊາຍຂອງອາມມີຮຸດ ທີ 8 ມານາເຊ ກາມາລີເອນ ລູກຊາຍຂອງເປດາຊູ ທີ 9 ເບັນຢາມິນ ອາບີດານ ລູກຊາຍຂອງກີເດໂອນີ ທີ 10 ດານ ອາຮີເອເຊ ລູກຊາຍຂອງອຳມີຊັດດາຍ ທີ 11 ອາເຊ ປາກີເອນ ລູກຊາຍຂອງອົກກະຣັນ ທີ 12 ເນັບທາລີ ອາຮີຣາ ລູກຊາຍຂອງເອນັນ. ຫົວໜ້າແຕ່ລະຄົນໄດ້ນຳເຄື່ອງຖວາຍຢ່າງດຽວກັນມາດັ່ງນີ້: ຊາມເງິນໜຶ່ງໃບ ໜັກ 1.500 ກຼາມ, ອ່າງເງິນໃບໜຶ່ງ ໜັກ 800 ກຼາມ ໂດຍໄດ້ຄິດໄລ່ຕາມອັດຕາຊັ່ງຂອງສຳນັກນະມັດສະການ, ຊາມແລະອ່າງທັງສອງໃບເຕັມດ້ວຍແປ້ງ ປົນກັບນໍ້າມັນໝາກກອກເທດ ຕາມລະບຽບການຖວາຍພືດຜົນເປັນເມັດ; ຈານຄຳໜຶ່ງໃບ, ໜັກ 110 ກຼາມ, ໃສ່ເຄື່ອງຫອມມາພ້ອມ; ງົວເຖິກໜຸ່ມໂຕໜຶ່ງ, ແກະເຖິກໂຕໜຶ່ງ, ລູກແກະເຖິກ ອາຍຸໜຶ່ງປີໂຕໜຶ່ງສຳລັບເຜົາບູຊາ; ແບ້ເຖິກໂຕໜຶ່ງສຳລັບຖວາຍບູຊາລຶບລ້າງບາບ; ງົວເຖິກສອງໂຕ, ແກະເຖິກ ຫ້າໂຕ, ແບ້ເຖິກຫ້າໂຕ ແລະລູກແກະເຖິກຫ້າໂຕ ອາຍຸໜຶ່ງປີ ສຳລັບຖວາຍເພື່ອຄວາມສາມັກຄີທຳ. ມື້ ເຜົ່າ ຜູ້ນຳ 84-88 ລວມຈຳນວນເຄື່ອງຖວາຍທັງໝົດ ທີ່ພວກຜູ້ນຳສິບສອງຄົນໄດ້ເອົາມາ ເພື່ອການອຸທິດຖວາຍແທ່ນບູຊານັ້ນ ມີດັ່ງນີ້: ຊາມເງິນ 12 ໃບ ແລະອ່າງເງິນ 12 ໃບ, ທັງໝົດໜັກ 24 ກິໂລກຼາມ; ຈານຄຳ 12 ໃບ, ທັງໝົດໜັກ 1.200 ກຼາມ; ງົວເຖິກ 12 ໂຕ, ແກະເຖິກ 12 ໂຕ, ລູກແກະເຖິກ ອາຍຸໜຶ່ງປີ 12 ໂຕ, ທັງພືດຜົນເປັນເມັດທີ່ຕ້ອງຖວາຍພ້ອມກັນສຳລັບເຜົາບູຊາ. ແບ້ເຖິກ 12 ໂຕ ສຳລັບຖວາຍບູຊາລຶບລ້າງບາບ; ງົວເຖິກ 24 ໂຕ, ແກະເຖິກ 60 ໂຕ, ແບ້ເຖິກ 60 ໂຕ ແລະລູກແກະເຖິກ ອາຍຸໜຶ່ງປີ 60 ໂຕ ສຳລັບຖວາຍເພື່ອຄວາມສາມັກຄີທຳ. 89 ເມື່ອໂມເຊເຂົ້າໄປກ່າວຕໍ່ພຣະເຈົ້າຢາເວໃນຫໍເຕັນບ່ອນຊຸມນຸມ ເພິ່ນກໍໄດ້ຍິນພຣະອົງກ່າວແກ່ເພິ່ນຈາກເທິງຝາຫີບພັນທະສັນຍາ ລະຫວ່າງເຄຣຸບ. |
@ 2012 United Bible Societies. All Rights Reserved.