ຈົດບັນຊີ 29 - ພຣະຄຳພີສັກສິເຄື່ອງຖວາຍບູຊາໃນເທດສະການປີໃໝ່ ( ລລວ 23:23-25 ) 1 ໃນວັນທີໜຶ່ງຂອງເດືອນທີເຈັດ ໃຫ້ພວກເຈົ້າເຕົ້າໂຮມກັນເພື່ອນະມັດສະການ ແລະຢ່າເຮັດວຽກໃດໆທັງສິ້ນ. ໃນວັນນີ້ຈົ່ງເປົ່າແກໃຫ້ດັງສະໜັ່ນ. 2 ຈົ່ງເຜົາເຄື່ອງບູຊາຖວາຍດັ່ງນີ້: ງົວເຖິກໂຕໜຶ່ງ, ແກະເຖິກໂຕໜຶ່ງ ແລະລູກແກະອາຍຸໜຶ່ງປີເຈັດໂຕ. ສັດທັງໝົດນັ້ນໃຫ້ເປັນສັດທີ່ມີສຸຂະພາບດີແລະບໍ່ມີຕຳໜິ. ກິ່ນຫອມຫວນຈຶ່ງເປັນທີ່ພໍໃຈພຣະເຈົ້າຢາເວ. 3 ໃຫ້ຖວາຍພືດຜົນເປັນເມັດເປັນແປ້ງເຂົ້າປົນກັບນໍ້າມັນໝາກກອກເທດຄື: ແປ້ງເຂົ້າສາມກິໂລກຼາມຕໍ່ງົວເຖິກໂຕໜຶ່ງ ແປ້ງເຂົ້າສອງກິໂລກຼາມຕໍ່ແກະເຖິກໂຕໜຶ່ງ 4 ແລະແປ້ງເຂົ້າໜຶ່ງກິໂລກຼາມຕໍ່ລູກແກະໂຕໜຶ່ງ. 5 ໃຫ້ຖວາຍແບ້ເຖິກໂຕໜຶ່ງອີກເພື່ອເຮັດພິທີຊຳລະບາບກຳຂອງປະຊາຊົນ. 6 ໃຫ້ຖວາຍສິ່ງເຫຼົ່ານີ້ຕື່ມໃສ່ເຄື່ອງບູຊາດ້ວຍໄຟປະຈຳສຳລັບວັນທີໜຶ່ງຂອງເດືອນ ພ້ອມກັບພືດຜົນເປັນເມັດ ແລະເຄື່ອງບູຊາດ້ວຍໄຟປະຈຳວັນພ້ອມກັບພືດຜົນເປັນເມັດ ແລະຖວາຍເຫຼົ້າອະງຸ່ນ. ກິ່ນຫອມຫວນຂອງອາຫານທີ່ຖວາຍບູຊານັ້ນ ຈຶ່ງເປັນທີ່ພໍໃຈພຣະເຈົ້າຢາເວ. ເຄື່ອງຖວາຍບູຊາໃນວັນລຶບລ້າງບາບ ( ລລວ 23:26-32 ) 7 ໃນວັນທີສິບຂອງເດືອນທີເຈັດໃຫ້ພວກເຈົ້າເຕົ້າໂຮມກັນເພື່ອນະມັດສະການ; ຢ່າກິນອາຫານໃດໆ ແລະຢ່າເຮັດວຽກປະຈຳວັນໃດໆທັງສິ້ນ. 8 ຈົ່ງຖວາຍເຄື່ອງບູຊາດ້ວຍໄຟດັ່ງນີ້: ງົວເຖິກໂຕໜຶ່ງແກະເຖິກໂຕໜຶ່ງ, ກັບລູກແກະເຖິກອາຍຸໜຶ່ງປີເຈັດໂຕ; ຊຶ່ງທັງໝົດໃຫ້ເປັນສັດທີ່ມີສຸຂະພາບດີແລະບໍ່ມີຕຳໜິ, ກິ່ນຫອມຫວນຈຶ່ງເປັນທີ່ພໍໃຈພຣະເຈົ້າຢາເວ. 9 ໃຫ້ຖວາຍພືດຜົນເປັນເມັດເປັນແປ້ງເຂົ້າປົນກັບນໍ້າມັນໝາກກອກເທດຄື: ແປ້ງເຂົ້າສາມກິໂລກຼາມຕໍ່ງົວເຖິກໂຕໜຶ່ງ ແປ້ງເຂົ້າສອງກິໂລກຼາມຕໍ່ແກະເຖິກໂຕໜຶ່ງ, 10 ແລະແປ້ງເຂົ້າໜຶ່ງກິໂລກຼາມຕໍ່ລູກແກະໂຕໜຶ່ງ. 11 ໃຫ້ຖວາຍແບ້ເຖິກອີກໂຕໜຶ່ງເພື່ອລຶບລ້າງບາບ ເພີ່ມຕື່ມໃສ່ແບ້ທີ່ຖືກເຜົາບູຊາເພື່ອຊຳລະລ້າງບາບຂອງປະຊາຊົນ ພ້ອມທັງເຄື່ອງບູຊາດ້ວຍໄຟປະຈຳວັນຄູ່ກັບພືດຜົນເປັນເມັດ ແລະເຫຼົ້າອະງຸ່ນ. ເຄື່ອງຖວາຍບູຊາໃນເທດສະການປຸກຕູບຢູ່ ( ລລວ 23:33-44 ) 12 ໃນວັນທີສິບຫ້າຂອງເດືອນທີເຈັດໃຫ້ພວກເຈົ້າເຕົ້າໂຮມກັນເພື່ອນະມັດສະການ. ຈົ່ງສະຫລອງເທດສະການນີ້ ເພື່ອຍົກຍໍໃຫ້ກຽດພຣະເຈົ້າຢາເວຕະຫລອດເຈັດວັນ ແລະຢ່າເຮັດວຽກໃດໆທັງສິ້ນ. 13 ໃນມື້ທີໜຶ່ງ ໃຫ້ຖວາຍບູຊາອາຫານແກ່ພຣະເຈົ້າຢາເວ ກິ່ນຫອມຫວນຈຶ່ງເປັນທີ່ພໍໃຈພຣະອົງ ດັ່ງນີ້: ງົວເຖິກໜຸ່ມສິບສາມໂຕ ແກະເຖິກສອງໂຕ ແລະລູກແກະເຖິກອາຍຸໜຶ່ງປີສິບສີ່ໂຕ ຊຶ່ງທັງໝົດນັ້ນໃຫ້ເປັນສັດທີ່ມີສຸຂະພາບດີແລະບໍ່ມີຕຳໜິ. 14 ໃຫ້ຖວາຍພືດຜົນເປັນເມັດ ເປັນແປ້ງເຂົ້າປົນກັບນໍ້າມັນໝາກກອກເທດຄື: ແປ້ງເຂົ້າສາມກິໂລກຼາມຕໍ່ງົວເຖິກໂຕໜຶ່ງ ແປ້ງເຂົ້າສອງກິໂລກຼາມຕໍ່ແກະເຖິກໂຕໜຶ່ງ, 15 ແລະແປ້ງເຂົ້າໜຶ່ງກິໂລກຼາມຕໍ່ລູກແກະໂຕໜຶ່ງ ພ້ອມທັງຖວາຍເຫຼົ້າອະງຸ່ນຕາມທີ່ກຳນົດໄວ້. 16 ໃຫ້ຖວາຍແບ້ເຖິກໂຕໜຶ່ງເໝືອນກັນເພື່ອເຮັດພິທີລຶບລ້າງບາບ. ໃຫ້ຖວາຍສິ່ງເຫຼົ່ານີ້ຕື່ມໃສ່ເຄື່ອງເຜົາຖວາຍບູຊາປະຈຳວັນພ້ອມກັບພືດຜົນເປັນເມັດ ແລະເຫຼົ້າອະງຸ່ນ. 17 ໃນມື້ທີສອງ ໃຫ້ຖວາຍງົວເຖິກໜຸ່ມສິບສອງໂຕ, ແກະເຖິກສອງໂຕ ແລະລູກແກະເຖິກອາຍຸໜຶ່ງປີສິບສີ່ໂຕ ຊຶ່ງທັງໝົດນັ້ນໃຫ້ເປັນສັດທີ່ມີສຸຂະພາບດີແລະບໍ່ມີຕຳໜິ. 18-19 ພ້ອມກັບການຖວາຍສັດເຫຼົ່ານັ້ນໃຫ້ຖວາຍເຄື່ອງອື່ນໆ ຕາມທີ່ໄດ້ກຳນົດໄວ້ໃນມື້ທີໜຶ່ງ. 20 ໃນມື້ທີສາມ ໃຫ້ຖວາຍງົວເຖິກໜຸ່ມສິບເອັດໂຕ, ແກະເຖິກສອງໂຕ ແລະລູກແກະເຖິກອາຍຸໜຶ່ງປີສິບສີ່ໂຕ ຊຶ່ງທັງໝົດນັ້ນໃຫ້ເປັນສັດທີ່ມີສຸຂະພາບດີແລະບໍ່ມີຕຳໜິ. 21-22 ພ້ອມກັບການຖວາຍສັດເຫຼົ່ານັ້ນໃຫ້ຖວາຍເຄື່ອງອື່ນໆອີກ ຕາມທີ່ໄດ້ກຳນົດໄວ້ໃນມື້ທີໜຶ່ງ. 23 ໃນມື້ທີສີ່ ໃຫ້ຖວາຍງົວເຖິກໜຸ່ມສິບໂຕ, ແກະເຖິກສອງໂຕ ແລະລູກແກະເຖິກອາຍຸໜຶ່ງປີ ສິບສີ່ໂຕ ຊຶ່ງທັງໝົດນັ້ນໃຫ້ເປັນສັດທີ່ມີສຸຂະພາບດີແລະບໍ່ມີຕຳໜິ. 24-25 ພ້ອມສັດເຫຼົ່ານັ້ນໃຫ້ຖວາຍເຄື່ອງອື່ນໆອີກ ຕາມທີ່ໄດ້ກຳນົດໄວ້ໃນມື້ທີໜຶ່ງ. 26 ໃນມື້ທີຫ້າ ໃຫ້ຖວາຍງົວເຖິກໜຸ່ມເກົ້າໂຕ, ແກະເຖິກສອງໂຕ ແລະລູກແກະເຖິກອາຍຸໜຶ່ງປີ ສິບສີ່ໂຕ ຊຶ່ງທັງໝົດນັ້ນໃຫ້ເປັນສັດທີ່ມີສຸຂະພາບດີແລະບໍ່ມີຕຳໜິ. 27-28 ພ້ອມກັບການຖວາຍສັດເຫຼົ່ານັ້ນໃຫ້ຖວາຍເຄື່ອງອື່ນໆອີກ ຕາມທີ່ໄດ້ກຳນົດໄວ້ໃນມື້ທີໜຶ່ງ. 29 ໃນມື້ທີຫົກ ໃຫ້ຖວາຍງົວເຖິກໜຸ່ມແປດໂຕ, ແກະເຖິກສອງໂຕ ແລະລູກແກະເຖິກອາຍຸໜຶ່ງປີສິບສີ່ໂຕ ຊຶ່ງທັງໝົດນັ້ນໃຫ້ເປັນສັດທີ່ມີສຸຂະພາບດີແລະບໍ່ມີຕຳໜິ. 30-31 ພ້ອມກັບການຖວາຍສັດເຫຼົ່ານັ້ນໃຫ້ຖວາຍເຄື່ອງອື່ນໆອີກ ຕາມທີ່ໄດ້ກຳນົດໄວ້ໃນມື້ທີໜຶ່ງ. 32 ໃນມື້ທີເຈັດ ໃຫ້ຖວາຍງົວເຖິກໜຸ່ມເຈັດໂຕ, ແກະເຖິກສອງໂຕ ແລະລູກແກະເຖິກອາຍຸໜຶ່ງປີສິບສີ່ໂຕ ຊຶ່ງທັງໝົດນັ້ນໃຫ້ເປັນສັດທີ່ມີສຸຂະພາບດີແລະບໍ່ມີຕຳໜິ. 33-34 ພ້ອມສັດເຫຼົ່ານັ້ນໃຫ້ຖວາຍເຄື່ອງອື່ນໆອີກ ຕາມທີ່ໄດ້ກຳນົດໄວ້ໃນມື້ທີໜຶ່ງ. 35 ໃນມື້ທີແປດ ໃຫ້ພວກເຈົ້າເຕົ້າໂຮມກັນເພື່ອນະມັດສະການ ແລະຢ່າເຮັດວຽກປະຈຳວັນໃດໆທັງສິ້ນ. 36 ໃຫ້ເຜົາສັດຖວາຍບູຊາຕາມພິທີຖວາຍອາຫານແກ່ພຣະອົງດັ່ງນີ້: ງົວເຖິກໜຸ່ມໂຕໜຶ່ງ, ແກະເຖິກໂຕໜຶ່ງ ແລະລູກແກະເຖິກອາຍຸໜຶ່ງປີເຈັດໂຕ ຊຶ່ງທັງໝົດນັ້ນໃຫ້ເປັນສັດທີ່ມີສຸຂະພາບດີແລະບໍ່ມີຕຳໜິ. ກິ່ນຫອມຫວນຈຶ່ງເປັນທີ່ພໍໃຈພຣະເຈົ້າຢາເວ. 37-38 ພ້ອມກັບການຖວາຍສັດເຫຼົ່ານັ້ນ ໃຫ້ຖວາຍເຄື່ອງອື່ນໆອີກຕາມທີ່ໄດ້ກຳນົດໄວ້ໃນມື້ທີໜຶ່ງ. 39 ອັນນີ້ ແມ່ນລະບຽບການຕ່າງໆກ່ຽວກັບການເຜົາບູຊາ, ການຖວາຍພືດຜົນເປັນເມັດການຖວາຍເຫຼົ້າອະງຸ່ນ ແລະການຖວາຍເພື່ອຄວາມສາມັກຄີທຳ ທີ່ໃຫ້ພວກເຈົ້າຖວາຍແກ່ອົງພຣະຜູ້ເປັນເຈົ້າໃນເທດສະການຕ່າງໆທີ່ໄດ້ກຳນົດໄວ້. ອັນນີ້ແມ່ນຕື່ມໃສ່ການຖວາຍຂອງພວກເຈົ້າ ອັນສືບເນື່ອງມາຈາກຜົນສຳເລັດໃນການບະບົນໄວ້ເປັນພິເສດ ຫລືການຖວາຍບູຊາຕາມຄວາມສະໝັກໃຈ. 40 ສະນັ້ນ ໂມເຊຈຶ່ງໄດ້ບອກປະຊາຊົນອິດສະຣາເອນທຸກສິ່ງ ຕາມທີ່ພຣະເຈົ້າຢາເວໄດ້ສັ່ງເພິ່ນໄວ້ທຸກປະການ. |
@ 2012 United Bible Societies. All Rights Reserved.