ເນເຫມີຢາ 9 - ພຣະຄຳພີສັກສິປະຊາຊົນສາລະພາບການບາບຂອງຕົນ 1-2 ໃນມື້ທີຊາວສີ່ ຂອງເດືອນດຽວກັນນີ້ ປະຊາຊົນຊາວອິດສະຣາເອນໄດ້ເຕົ້າໂຮມກັນຖືສິນອົດອາຫານ ເພື່ອສະແດງຄວາມໂສກເສົ້າເສຍໃຈສຳລັບການບາບຂອງພວກເຂົາ. ພວກເຂົາແຍກຕົວເອງອອກຈາກຄົນຕ່າງຊາດທຸກຄົນ. ພວກເຂົານຸ່ງເຄື່ອງທີ່ເຮັດດ້ວຍຜ້າກະສອບເຂົ້າ ພ້ອມທັງໂຮຍຂີ້ຝຸ່ນດິນໃສ່ເທິງຫົວ ອັນສະແດງເຖິງຄວາມໂສກເສົ້າ. ແລ້ວພວກເຂົາກໍຢືນຂຶ້ນສາລະພາບການຜິດບາບຂອງພວກເຂົາເອງ ແລະຜິດບາບຂອງບັນພະບຸລຸດຂອງພວກເຂົາທີ່ໄດ້ເຮັດ. 3 ເປັນເວລາເກືອບສາມຊົ່ວໂມງ ທີ່ກົດບັນຍັດຂອງພຣະເຈົ້າຢາເວ ພຣະເຈົ້າຂອງພວກເຂົາໄດ້ມີການອ່ານສູ່ພວກເຂົາຟັງ ແລະໃນສາມຊົ່ວໂມງຕໍ່ໄປ ພວກເຂົາໄດ້ສາລະພາບການບາບຂອງພວກເຂົາ ແລະນະມັດສະການພຣະເຈົ້າຢາເວ ພຣະເຈົ້າຂອງພວກເຂົາ. 4 ມີເວທີຖືກຈັດໄວ້ໂດຍສະເພາະ ຊຶ່ງທີ່ເທິງນັ້ນມີຊາວເລວີຢືນຢູ່ດັ່ງນີ້: ເຢຊູອາ, ບານີ, ກາດມີເອນ, ເຊບານີຢາ, ບັນນີ, ເຊເຣບີຢາ, ບານີ ແລະເກນານີ. ພວກເຂົາຕ່າງກໍພາວັນນາອະທິຖານດ້ວຍສຽງດັງ ຕໍ່ພຣະເຈົ້າຢາເວ ພຣະເຈົ້າຂອງພວກເຂົາ. 5 ແລ້ວກໍມີການຮຽກຮ້ອງປະຊາຊົນໃຫ້ນະມັດສະການພຣະເຈົ້າ ໂດຍຊາວເລວີ ມີດັ່ງນີ້: ເຢຊູອາ, ກາດມີເອນ, ບານີ, ຮາຊັບເນອີຢາ, ເຊເຣບີຢາ, ໂຮດີຢາ, ເຊບານີຢາ ແລະເປທາຮີຢາ. ພວກເຂົາໄດ້ເວົ້າວ່າ, “ຈົ່ງລຸກຢືນຂຶ້ນ ແລະສັນລະເສີນ ພຣະເຈົ້າຢາເວ ພຣະເຈົ້າຂອງພວກເຈົ້າ; ຈົ່ງສັນລະເສີນພຣະອົງສືບໄປຊົ່ວນິຣັນດອນ ຈົ່ງໃຫ້ທຸກຄົນຍົກຍໍພຣະນາມອັນຮຸ່ງເຮືອງຍິ່ງໃຫຍ່ ເຖິງແມ່ນວ່າມະນຸດນັ້ນໃຫ້ຄຳຍົກຍໍ ບໍ່ຍິ່ງໃຫຍ່ພໍສຳລັບພຣະອົງກໍຕາມ.” ຄຳພາວັນນາອະທິຖານຮັບສາລະພາບ 6 ແລ້ວປະຊາຊົນອິດສະຣາເອນກໍໄດ້ພາວັນນາອະທິຖານດ້ວຍຖ້ອຍຄຳດັ່ງນີ້: “ຂ້າແດ່ພຣະເຈົ້າຢາເວ ພຣະອົງເທົ່ານັ້ນ ພຣະອົງເທົ່ານັ້ນ; ພຣະອົງໄດ້ຊົງສ້າງສະຫວັນ, ຟ້າສະຫວັນທີ່ສູງສຸດ ພ້ອມທັງບໍລິວານຂອງຟ້າສະຫວັນທຸກຢ່າງທັງໝົດ, ແຜ່ນດິນໂລກກັບທະເລ ແລະທຸກໆສິ່ງທີ່ຢູ່ໃນນັ້ນ; ພຣະອົງຊົງພິທັກຮັກສາສິ່ງເຫຼົ່ານັ້ນທັງໝົດ ທຸກສິ່ງໃນສະຫວັນກໍນະມັດສະການພຣະອົງ. 7 ຂ້າແດ່ພຣະເຈົ້າຢາເວ ພຣະເຈົ້າຜູ້ຊົງເລືອກເອົາອັບຣາມ ໄດ້ນຳອອກມາແຕ່ອູເຣ ໃນບາບີໂລນພຸ້ນ; ພຣະອົງປ່ຽນຊື່ໃຫ້ອັບຣາມເສຍໃໝ່ ກາຍມາເປັນອັບຣາຮາມ. 8 ພຣະອົງຮູ້ວ່າເພິ່ນສັດຊື່ຕໍ່ພຣະອົງ ແລະໄດ້ຕັ້ງພັນທະສັນຍາໄວ້ກັບເພິ່ນ. ຄືຈະມອບດິນແດນຂອງຊາວການາອານ ຂອງຊາວຮິດຕີແລະຊາວອາໂມດ້ວຍ ຂອງຊາວເປຣີຊີພ້ອມຊາວເຢບຸດແດ່ ແລະຂອງເກີດກາຊີໃຫ້ເປັນຂອງພວກເພິ່ນ; ຄືດິນແດນທີ່ເຊື້ອສາຍຂອງເພິ່ນຢູ່ອາໄສ ພຣະອົງຮັກສາຄຳສັນຍາເພາະຊົງສັດຊື່. 9 ໃນປະເທດເອຢິບພຣະອົງເຫັນພວກເພິ່ນທົນທຸກສໍ່າໃດ ຄືບັນພະບຸລຸດຮ້ອງໃຫ້ຊ່ວຍເຫຼືອທີ່ທະເລແດງນັ້ນ, 10 ພຣະອົງເຮັດການອັດສະຈັນໃຫຍ່ຕໍ່ສູ້ກະສັດ ຕໍ່ສູ້ຂ້າຣາຊການ ແລະປະຊາຊົນດ້ວຍ; ເພາະຮູ້ວ່າປະຊາຊົນພຣະອົງຖືກກົດຂີ່ຢ່າງໃດ ແລ້ວຊື່ສຽງພຣະອົງກໍຍັງໂດ່ງດັງເຖິງດຽວນີ້. 11 ເພື່ອຜ່ານທະເລ ພຣະອົງໄດ້ໃຫ້ທາງແກ່ພວກເພິ່ນ ແລະນຳພາຍ່າງຜ່ານເທິງພື້ນດິນແຫ້ງ. ພວກທີ່ໄລ່ຕາມມານັ້ນກໍພາກັນຈົມລົງໄປ ດັ່ງກ້ອນຫີນຈົມລົງໃນທະເລປ່ວງບ້າ. 12 ໂດຍເສົາເມກຊົງນຳພາພວກເພິ່ນໃນກາງເວັນ ໂດຍເສົາໄຟຊົງນຳພາພວກເພິ່ນໃນກາງຄືນດ້ວຍ. 13 ທີ່ພູເຂົາຊີນາຍພຣະອົງໄດ້ລົງມາຈາກສະຫວັນ; ພຣະອົງໄດ້ກ່າວແກ່ປະຊາຊົນໃນທີ່ນັ້ນ ແລະໄດ້ມອບກົດບັນຍັດທີ່ດີແກ່ພວກເພິ່ນ ທັງຄຳສັ່ງສອນທີ່ມີຫລັກແກ່ພວກເພິ່ນດ້ວຍ. 14 ພຣະອົງສັ່ງສອນໃຫ້ຢຶດຖືວັນຊະບາໂຕ ໃຫ້ເປັນວັນບໍຣິສູດ ຊົງໃຫ້ຂໍ້ຄຳສັ່ງ ແລະກົດບັນຍັດຜ່ານທາງໂມເຊ ຜູ້ຮັບໃຊ້. 15 ເມື່ອຫິວເຂົ້າ ຊົງໃຫ້ເຂົ້າຕົກຈາກສະຫວັນ ເມື່ອຫິວນໍ້າ ກໍມີນໍ້າໄຫລຈາກໂງ່ນຫີນໄດ້ດື່ມ. ພຣະອົງບອກພວກເພິ່ນໃຫ້ເຂົ້າຢຶດດິນແດນ ບ່ອນທີ່ພຣະອົງໄດ້ສັນຍາມອບໃຫ້ພວກເພິ່ນ. 16 ແຕ່ບັນພະບຸລຸດຂອງພວກຂ້ານ້ອຍພັດດື້ດ້ານຈອງຫອງ ໂດຍບໍ່ຍອມເຊື່ອຟັງຄຳສັ່ງຂອງພຣະອົງ. 17 ເມື່ອບໍ່ເຊື່ອຟັງແລ້ວພວກເພິ່ນກໍລືມໄລທຸກສິ່ງ ຄືການອັດສະຈັນຕ່າງໆທີ່ພຣະອົງໄດ້ກະທຳ; ດ້ວຍຄວາມຈອງຫອງພວກເພິ່ນໄດ້ເລືອກເອົາຜູ້ນຳ ພາພວກເພິ່ນກັບຄືນສູ່ປະເທດເອຢິບໄປເປັນທາດ. ແຕ່ພຣະອົງເປັນພຣະເຈົ້າທີ່ໃຫ້ອະໄພ ຊົງເມດຕາເອັນດູ ແລະມີຄວາມຮັກ; ພຣະອົງໂກດຮ້າຍຊ້າເພາະເມດຕາພວກເພິ່ນ ພຣະອົງຈຶ່ງບໍ່ໄດ້ປະຖິ້ມພວກເພິ່ນ. 18 ພວກເພິ່ນເຮັດຮູບງົວນ້ອຍຂາບໄຫວ້ບູຊາ ແລະເວົ້າວ່າ, ພະນີ້ແຫລະ ທີ່ນຳພາພວກເພິ່ນ; ຄືນຳພາພວກເພິ່ນທັງໝົດອອກມາຈາກປະເທດເອຢິບ. ພວກເພິ່ນດູຖູກພຣະອົງແທ້ໆ 19 ແຕ່ພຣະອົງບໍ່ໄດ້ປະຖິ້ມພວກເພິ່ນໃນຖິ່ນແຫ້ງແລ້ງກັນດານ ຍ້ອນຄວາມເມດຕາຂອງພຣະອົງຍິ່ງໃຫຍ່. ພຣະອົງບໍ່ໄດ້ເອົາເສົາເມກກັບເສົາໄຟ ທີ່ເຍືອງທາງທັງເວັນ ແລະຄືນໜີໄປຈາກພວກເພິ່ນ. 20 ດ້ວຍຄຸນງາມຄວາມດີຂອງພຣະອົງນັ້ນ ພຣະອົງຈຶ່ງບອກສິ່ງທີ່ພວກເພິ່ນຄວນກະທຳ; ພຣະອົງໄດ້ລ້ຽງດູພວກເພິ່ນດ້ວຍມານາ ແລະໃຫ້ພວກເພິ່ນໄດ້ມີນໍ້າດື່ມ. 21 ຕະຫລອດສີ່ສິບປີໃນຖິ່ນແຫ້ງແລ້ງກັນດານ ພຣະອົງໄດ້ຈັດຫາສິ່ງຈຳເປັນໃຫ້ແກ່ພວກເພິ່ນ; ຕົນຕົວ ເຄື່ອງນຸ່ງບໍ່ໄດ້ຂາດສ້ອຍຈັກເທື່ອ ແລະຕີນ ກໍບໍ່ໄດ້ບວມຊໍ້າແຕ່ປະການໃດ. 22 ພຣະອົງໃຫ້ພວກເພິ່ນຊະນະເໜືອຊົນຊາດກັບອານາຈັກ ຄືດິນແດນທີ່ເປັນຊາຍແດນຂອງພວກເພິ່ນ. ພວກເພິ່ນຕີຊະນະເຮັດຊະໂບນຂອງເຈົ້າສີໂຫນ ແລະບາຊານທີ່ເຈົ້າໂອກຄອງອຳນາດ. 23 ພຣະອົງໃຫ້ພວກເພິ່ນມີລູກຫລານຢ່າງຫລວງຫລາຍ ດັ່ງໝູ່ດວງດາວຢູ່ໃນທ້ອງຟ້າ ໃຫ້ຕີເອົາດິນແດນໄດ້ຄືບ່ອນພວກເພິ່ນອາໄສຢູ່ ທີ່ຊົງໄດ້ສັນຍາໄວ້ກັບບັນພະບຸລຸດຂອງພວກເພິ່ນ. 24 ພວກເພິ່ນຕີເອົາໄດ້ດິນແດນການາອານ ພຣະອົງໄດ້ໄຊຊະນະປະຊາຊົນທີ່ຢູ່ທີ່ນັ້ນ. ພຣະອົງໃຫ້ພວກເພິ່ນມີອຳນາດເຮັດຕາມຊອບໃຈ ຈັດການກັບປະຊາຊົນແລະກະສັດການາອານໄດ້ຕາມໃຈຊອບ. 25 ພວກເພິ່ນຢຶດເມືອງຕ່າງໆທີ່ມີປ້ອມປ້ອງກັນ ທັງດິນແດນທີ່ອຸດົມຮັ່ງມີ ເຮືອນກັບຊັບສິນດ້ວຍ ມີອ່າງນໍ້າຂຸດໄວ້ ແລະຕົ້ນໝາກກອກເທດກໍມີຄືກັນ ຕົ້ນໝາກໄມ້ນາໆຊະນິດ ແລະສວນອະງຸ່ນພ້ອມ. ພວກເພິ່ນກິນທຸກສິ່ງຕາມຄວາມຕ້ອງການ ແລະເຮັດໃຫ້ພວກເພິ່ນຕຸ້ຍພີດີ; ແລະພວກເພິ່ນພໍໃຈກັບທຸກສິ່ງ ທີ່ຊົງຈັດຫາໃຫ້ພວກເພິ່ນ. 26 ແຕ່ພວກເພິ່ນພັດຄິດຄົດ ແລະບໍ່ເຊື່ອຟັງ ກົດບັນຍັດ ແລະໄດ້ຫັນຫລັງໃຫ້ພຣະເຈົ້າ. ພວກເພິ່ນຂ້າຜູ້ທຳນວາຍທີ່ໄດ້ກ່າວຕັກເຕືອນ ໃຫ້ພວກເພິ່ນຕ່າວຄືນມາຫາພຣະອົງ. ແຕ່ພວກເພິ່ນຊໍ້າປະໝາດດູຖູກພຣະອົງ ຫລາຍຄັ້ງຫລາຍຄາວສືບມາເລື້ອຍໆ. 27 ສະນັ້ນ ພຣະອົງຈຶ່ງປ່ອຍໃຫ້ເຫຼົ່າສັດຕູ ເອົາຊະນະພວກເພິ່ນແລະປົກຄອງເໜືອພວກເພິ່ນ. ເມື່ອຖືກເດືອດຮ້ອນຈຶ່ງຮ້ອງຫາພຣະອົງໃຫ້ຊ່ວຍເຫລືອ ຈາກສະຫວັນຊົງຕອບຄຳພາວັນນາອະທິຖານຂອງພວກເພິ່ນ. ເພາະຊົງເມດຕາພວກເພິ່ນແທ້ໆຈຶ່ງສົ່ງຜູ້ນຳມາ ເພື່ອຊ່ວຍເອົາພວກເພິ່ນໃຫ້ພົ້ນຈາກເຫຼົ່າສັດຕູນັ້ນ. 28 ເມື່ອມີສັນຕິສຸກພັດກັບເຮັດບາບຄືນອີກ ພຣະອົງຈຶ່ງໃຫ້ເຫຼົ່າສັດຕູເອົາຊະນະພວກເພິ່ນ. ແຕ່ເມື່ອພວກເພິ່ນກັບໃຈໃໝ່ແລ້ວ ແລະຂໍພຣະອົງໃຫ້ຄວາມຊ່ວຍເຫລືອ ທີ່ສະຫວັນພຣະອົງໄດ້ຮັບຟັງ ຄຳຂໍຮ້ອງຂອງພວກເພິ່ນອີກ. ພຣະອົງໄດ້ຊ່ວຍເຫລືອຫລາຍຄັ້ງຫລາຍຄາວ ໂດຍຊ່ວຍກູ້ເອົາພວກເພິ່ນດ້ວຍຄວາມເມດຕາຍິ່ງໃຫຍ່. 29 ພຣະອົງເຕືອນພວກເພິ່ນໃຫ້ເຊື່ອຟັງຄຳສັ່ງສອນ ແຕ່ເພາະພວກເພິ່ນຈອງຫອງຈຶ່ງບໍ່ຍອມເຮັດຕາມນັ້ນ ເຖິງແມ່ນວ່າການຢຶດຖືກົດບັນຍັດໄດ້ຊີວິດກໍດີ ຍ້ອນພວກເພິ່ນດື້ດຶງຈຶ່ງບໍ່ເຊື່ອຟັງພຣະອົງ. 30 ເປັນເວລາຫລາຍປີແລ້ວ ທີ່ພຣະອົງໄດ້ຕັກເຕືອນພວກເພິ່ນ ໂດຍບັນດານໃຈຜູ້ທຳນວາຍໃຫ້ກ່າວຕັກເຕືອນພວກເພິ່ນ; ແຕ່ປະຊາຊົນຂອງພຣະອົງຫູໜວກ ແລະຫູຕຶງ ສະນັ້ນ ພຣະອົງຈຶ່ງປ່ອຍໃຫ້ພວກເພິ່ນຖືກພ່າຍແພ້. 31 ແຕ່ຍ້ອນພຣະເມດຕາຊົງຍິ່ງໃຫຍ່ຫລາຍ ຈຶ່ງບໍ່ໄດ້ປະຖິ້ມພວກເພິ່ນ ແລະທຳລາຍພວກເພິ່ນ. ພຣະອົງເປັນພຣະເຈົ້າທີ່ຊົງຄຸນງາມຄວາມດີ ທັງຊົງເມດຕາແລະເອັນດູດ້ວຍ. 32 ໂອ ພຣະເຈົ້າຂອງພວກຂ້ານ້ອຍເອີຍ ພຮະເຈົ້າຊົງຣິດ ແລະອຳນາດຍິ່ງໃຫຍ່ ຊົງກະທຳໃຫ້ຢ້ານກົວແລະຊົງຍິ່ງໃຫຍ່ແທ້ ພຣະອົງຮັກສາພັນທະສັນຍາຢ່າງສັດຊື່ ຄາວກະສັດອັດຊີເຣຍໄດ້ຂົ່ມເຫັງພວກຂ້ານ້ອຍ. ຈົນເຖິງບັດນີ້ພວກຂ້ານ້ອຍຍັງໄດ້ທົນທຸກໜັກ ລວມກະສັດ ແລະຜູ້ນຳຂອງພວກຂ້ານ້ອຍດ້ວຍ ພວກປະໂຣຫິດ ແລະທັງພວກຜູ້ທຳນວາຍ ກັບບັນພະບຸລຸດ ແລະປະຊາຊົນອີກດ້ວຍ. ທຸກຄົນຕ່າງກໍໄດ້ຮັບຄວາມທົນທຸກທໍລະມານ ຂໍໂຜດລະນຶກເຖິງພວກຂ້ານ້ອຍແດ່ທ້ອນ 33 ຖືກຕ້ອງແລ້ວທີ່ຊົງລົງໂທດພວກຂ້ານ້ອຍ ເພາະພຣະອົງສັດຊື່ ໃນຂະນະທີ່ພວກຂ້ານ້ອຍເຮັດບາບ. 34 ພວກກະສັດ, ພວກຜູ້ນຳ, ພວກປະໂຣຫິດ ແລະພວກປູ່ຍ່າຕາຍາຍຂອງພວກຂ້ານ້ອຍ ຕ່າງກໍບໍ່ຖືຮັກສາກົດບັນຍັດຂອງພຣະອົງທັງນັ້ນ. ພວກເພິ່ນບໍ່ຍອມຟັງຂໍ້ຄຳສັ່ງຂອງພຣະອົງ ຕະຫລອດທັງຄຳເຕືອນຂອງພຣະອົງດ້ວຍ. 35 ດ້ວຍພຣະພອນກະສັດໄດ້ປົກຄອງປະຊາຊົນ ເມື່ອພວກເພິ່ນອາໄສຢູ່ໃນດິນແດນອັນໃຫຍ່ກວ້າງ ຄືເປັນດິນແດນທີ່ອຸດົມແລະຮັ່ງມີ ຊຶ່ງພຣະອົງໄດ້ມອບໝາຍໃຫ້ແກ່ພວກເພິ່ນ. ແຕ່ພວກເພິ່ນບໍ່ຍອມເລີກ ແລະເຮັບບາບຕໍ່ໄປ ແລະບໍ່ໄດ້ຫັນມາບົວລະບັດຮັບໃຊ້ພຣະເຈົ້າ. 36 ບັດນີ້ ພວກຂ້ານ້ອຍເປັນທາດຮັບໃຊ້ໃນດິນແດນ ເປັນບ່ອນທີ່ພຣະອົງໄດ້ມອບໝາຍໃຫ້ຢູ່ນັ້ນ. ດິນແດນແຫ່ງນີ້ເປັນທີ່ອຸດົມແລະຮັ່ງມີ ໃຫ້ອາຫານແກ່ພວກຂ້ານ້ອຍໄດ້ຮັບ. 37 ສິ່ງທີ່ພື້ນດິນຜະລິດກໍຖືກນຳໄປໃຫ້ກະສັດ ຜູ້ທີ່ຢູ່ເໜືອ ເພາະພວກຂ້ານ້ອຍໄດ້ເຮັດບາບ ເພິ່ນເຮັດຕາມໃຈຕໍ່ພວກຂ້ານ້ອຍແລະຝູງສັດຂອງພວກຂ້ານ້ອຍ ພວກຂ້ານ້ອຍຈຶ່ງເປັນທຸກໜັກຫລາຍແທ້ໆ.” ປະຊາຊົນເຊັນຂໍ້ຕົກລົງ 38 ຍ້ອນສິ່ງທັງໝົດທີ່ໄດ້ເກີດຂຶ້ນນັ້ນ; ພວກເຮົາຜູ້ເປັນປະຊາຊົນອິດສະຣາເອນ ຈຶ່ງໄດ້ເຊັນຂໍ້ຕົກລົງຢ່າງແທ້ຈິງໄວ້ໃນທີ່ນີ້ ແລະບັນດາຜູ້ນຳ, ຊາວເລວີ ແລະບັນດາປະໂຣຫິດຂອງພວກເຮົາກໍໄດ້ປະທັບຕາໄວ້ດ້ວຍ. |
@ 2012 United Bible Societies. All Rights Reserved.