ເນເຫມີຢາ 6 - ພຣະຄຳພີສັກສິການປອງຮ້າຍຕໍ່ສູ້ເນເຫມີຢາ 1 ສານບັນລັດ, ໂຕບີຢາ, ເກເຊມຊາວອາຣັບ ແລະເຫຼົ່າສັດຕູອື່ນໆຮູ້ຂ່າວວ່າ ພວກເຮົາໄດ້ສ້າງກຳແພງເມືອງສຳເລັດແລ້ວ ແລະບໍ່ມີປ່ອງບໍ່ມີຮູເຫຼືອຢູ່ເລີຍ; ເຖິງແມ່ນວ່າພວກເຮົາຍັງບໍ່ທັນໄດ້ຕັ້ງປະຕູຂຶ້ນຕາມວົງຂອງມັນກໍຕາມ. 2 ດັ່ງນັ້ນ ສານບັນລັດ ແລະເກເຊມຈຶ່ງສົ່ງຈົດໝາຍສະບັບໜຶ່ງມາຫາຂ້າພະເຈົ້າ ໂດຍຊັກຊວນໃຫ້ຂ້າພະເຈົ້າລົງໄປພົບພວກເຂົາ ໃນທົ່ງພຽງແຫ່ງໜຶ່ງຂອງໝູ່ບ້ານທີ່ເມືອງໂອໂນ. ອັນນີ້ ເປັນກົນອຸບາຍຂອງພວກເຂົາເພື່ອທຳຮ້າຍຂ້າພະເຈົ້າ. 3 ຂ້າພະເຈົ້າຈຶ່ງສົ່ງຜູ້ນຳຂ່າວໄປບອກພວກເຂົາວ່າ, “ຂ້າພະເຈົ້າກຳລັງເຮັດວຽກທີ່ສຳຄັນ ແລະຂ້າພະເຈົ້າໄປທີ່ນັ້ນບໍ່ໄດ້. ຂ້າພະເຈົ້າຈະບໍ່ຍອມຢຸດວຽກ ພຽງແຕ່ເພື່ອໄປຫາພວກທ່ານໄດ້ດອກ.” 4 ພວກເຂົາຍັງສົ່ງຈົດໝາຍແບບດຽວກັນນັ້ນ ມາຫາຂ້າພະເຈົ້າເຖິງສີ່ເທື່ອ ແລະທຸກເທື່ອຂ້າພະເຈົ້າກໍໄດ້ຕອບພວກເຂົາໄປແບບເກົ່າ. 5 ແລ້ວສານບັນລັດກໍສົ່ງຜູ້ຮັບໃຊ້ຂອງຕົນຜູ້ໜຶ່ງມາຫາຂ້າພະເຈົ້າອີກ ພ້ອມຈົດໝາຍສະບັບທີຫ້າ ຈົດໝາຍສະບັບນີ້ເປັນລັກສະນະຈົດໝາຍເປີດຊອງ 6 ໂດຍມີຖ້ອຍຄຳດັ່ງນີ້: “ເກເຊມບອກຂ້າພະເຈົ້າເຖິງຂ່າວທີ່ກຳລັງຊ່າລືກັນທົ່ວໄປ ຢູ່ໃນທ່າມກາງປະຊາຊົນທີ່ໃກ້ຄຽງວ່າ ທ່ານແລະປະຊາຊົນຊາວຢິວມີຄວາມຕັ້ງໃຈທີ່ຈະກໍ່ການກະບົດຂຶ້ນ; ດ້ວຍເຫດນີ້ ທ່ານຈຶ່ງສ້າງກຳແພງເມືອງຂຶ້ນໃໝ່. ລາວຍັງໄດ້ບອກຂ້າພະເຈົ້າອີກວ່າ ທ່ານເອງຈະຕັ້ງຕົວຂຶ້ນເປັນກະສັດ. 7 ເຂົາເວົ້າວ່າ, ‘ທ່ານໄດ້ຈັດໃຫ້ມີຜູ້ທຳນວາຍບາງຄົນ ປະກາດຢູ່ທີ່ນະຄອນເຢຣູຊາເລັມວ່າທ່ານແມ່ນກະສັດແຫ່ງຢູດາຍ.’ ພະຣາຊາຈະຕ້ອງຮູ້ຈັກເລື່ອງນີ້ແນ່ນອນ; ສະນັ້ນ ຂ້າພະເຈົ້າຈຶ່ງຂໍແນະນຳໃຫ້ທ່ານ ແລະຂ້າພະເຈົ້າມາພົບກັນ ເພື່ອປຶກສາຫາລືເຖິງສະຖານະການນີ້.” 8 ແລ້ວຂ້າພະເຈົ້າກໍຕອບລາວໄປວ່າ, “ສິ່ງທີ່ທ່ານໄດ້ເວົ້າມານັ້ນ ບໍ່ເປັນຄວາມຈິງແຕ່ປະການໃດເລີຍ. ທ່ານເອງເປັນຜູ້ປັ້ນແຕ່ງເລື່ອງທັງໝົດຂຶ້ນມາຕ່າງຫາກ.” 9 ພວກເຂົາພະຍາຍາມຂົ່ມຂູ່ພວກເຮົາໃຫ້ຢ້ານກົວ ແລະເຮັດໃຫ້ວຽກງານຢຸດສະງັກ. ຂ້າພະເຈົ້າພາວັນນາອະທິຖານວ່າ, “ຂ້າແດ່ພຣະເຈົ້າ ບັດນີ້ ໂຜດເຮັດໃຫ້ຂ້ານ້ອຍເຂັ້ມແຂງດ້ວຍເຖີດ.” 10 ໃນເວລານັ້ນເອງ ຂ້າພະເຈົ້າໄດ້ໄປຢ້ຽມຢາມເຊມາອີຢາລູກຊາຍຂອງເດລາອີຢາ ແລະຫລານຊາຍຂອງເມເຮຕາເບນ ຜູ້ທີ່ປະເຮືອນໄປໃສບໍ່ໄດ້. ລາວເວົ້າກັບຂ້າພະເຈົ້າວ່າ, “ທ່ານແລະຂ້າພະເຈົ້າຕ້ອງໄປລີ້ຢູ່ໃນວິຫານຂອງພຣະເຈົ້າໃນພຣະວິຫານ ແລະອັດປະຕູລົງໄລໄວ້ ເພາະພວກເຂົາຈະມາຂ້າທ່ານ. ບັດນີ້ ພວກເຂົາອາດຈະຂ້າທ່ານໃນຄືນໃດ ຫລືໃນຄືນໜຶ່ງກໍໄດ້.” 11 ຂ້າພະເຈົ້າຕອບວ່າ, “ຂ້ອຍບໍ່ແມ່ນຄົນຊະນິດທີ່ຈະແລ່ນໜີ ແລະໄປລີ້ຕົວຢູ່. ເຈົ້າຄິດວ່າຂ້ອຍຈະເອົາຊີວິດລອດ ໂດຍໄປລີ້ຢູ່ໃນພຣະວິຫານຊັ້ນບໍ? ຂ້ອຍຈະບໍ່ເຮັດເຊັ່ນນັ້ນດອກ.” 12 ເວລາຂ້າພະເຈົ້າມາຮິ່ນຕອງເບິ່ງແລ້ວ ຂ້າພະເຈົ້າຈຶ່ງຮູ້ວ່າພຣະເຈົ້າບໍ່ໄດ້ກ່າວຜ່ານທາງເຊມາອີຢາ; ແຕ່ໂຕບີຢາກັບສານບັນລັດໃຫ້ສິນຈ້າງລາງວັນແກ່ເຊມາອີຢາ ເພື່ອໃຫ້ຕັກເຕືອນຂ້າພະເຈົ້າເຊັ່ນນີ້. 13 ພວກເຂົາໄດ້ຈ້າງລາວຂົ່ມຂູ່ຂ້າພະເຈົ້າໃຫ້ຢ້ານແລະເຮັດບາບ ເພື່ອວ່າພວກເຂົາຈະໄດ້ທຳລາຍຊື່ສຽງຂອງຂ້າພະເຈົ້າ ແລະເຮັດໃຫ້ຂ້າພະເຈົ້າອັບອາຍ. 14 ຂ້າພະເຈົ້າພາວັນນາອະທິຖານວ່າ, “ຂ້າແດ່ພຣະເຈົ້າຂອງຂ້ານ້ອຍເອີຍ ໂຜດຈົດຈຳສິ່ງທີ່ໂຕບີຢາ ແລະສານບັນລັດເຮັດນັ້ນ ແລະໂຜດລົງໂທດພວກເຂົາດ້ວຍ. ໂຜດຈົດຈຳຜູ້ທຳນວາຍຍິງໂນອາດີຢາກັບຜູ້ທຳນວາຍຄົນອື່ນໆທີ່ພະຍາຍາມຂົ່ມຂູ່ຂ້ານ້ອຍໃຫ້ຢ້ານ.” ສະຫລຸບຜົນງານຂອງການສ້າງກຳແພງ 15 ຫລັງຈາກເຮັດວຽກໄປໄດ້ຫ້າສິບສອງວັນແລ້ວ ການສ້າງກຳແພງທັງໝົດກໍສຳເລັດລົງໃນວັນທີຊາວຫ້າຂອງເດືອນເອລູນ . 16 ເມື່ອພວກສັດຕູໃນຊົນຊາດອ້ອມແອ້ມໄດ້ຍິນເຊັ່ນນີ້ແລ້ວ ພວກເຂົາຈຶ່ງຮັບຮູ້ວ່າພວກຕົນເສຍໜ້າ ເພາະໃນເມື່ອທຸກຄົນຕ່າງກໍຮູ້ວ່າ ວຽກງານນີ້ໄດ້ສຳເລັດລົງໂດຍການຊ່ວຍເຫຼືອຂອງພຣະເຈົ້າຂອງພວກເຮົາ. 17 ໃນລະຫວ່າງສະໄໝນີ້ ພວກຜູ້ນຳຊາວຢິວໄດ້ຂຽນໜັງສືຕິດຕໍ່ກັບໂຕບີຢາ. 18 ປະຊາຊົນຫລາຍຄົນຢູ່ໃນແຂວງຢູດາຍເຂົ້າຂ້າງລາວ ຍ້ອນລາວມີພໍ່ເຖົ້າເປັນຊາດຢິວຄື: ເຊການີຢາລູກຊາຍຂອງອາຣາ. ນອກຈາກນີ້ ເຢໂຮຮານານລູກຊາຍຂອງລາວ ກໍໄດ້ແຕ່ງງານກັບລູກສາວຂອງເມຊູນລຳລູກຊາຍຂອງເບເຣກີຢາ. 19 ປະຊາຊົນເວົ້າຕໍ່ໜ້າຂ້າພະເຈົ້າເຖິງການດີທີ່ໂຕບີຢາໄດ້ເຮັດ ແລະເຂົາກໍໄປບອກລາວທຸກໆສິ່ງທີ່ຂ້າພະເຈົ້າໄດ້ເວົ້າ. ສ່ວນໂຕບີຢານັ້ນກໍສືບຕໍ່ສົ່ງຈົດໝາຍ ມາຂົ່ມຂູ່ຂ້າພະເຈົ້າໃຫ້ຢ້ານສະເໝີ. |
@ 2012 United Bible Societies. All Rights Reserved.