ລູກາ 4 - ພຣະຄຳພີສັກສິມານທົດລອງພຣະເຢຊູເຈົ້າ ( ມທ 4:1-11 ; ມຣກ 1:12-13 ) 1 ພຣະເຢຊູເຈົ້າໄດ້ກັບມາຈາກແມ່ນໍ້າຈໍແດນ ໂດຍເຕັມໄປດ້ວຍພຣະວິນຍານບໍຣິສຸດເຈົ້າ ແລະພຣະວິນຍານບໍຣິສຸດເຈົ້າ ໄດ້ນຳພຣະອົງເຂົ້າໄປໃນຖິ່ນແຫ້ງແລ້ງກັນດານ. 2 ໃນທີ່ນັ້ນ ພຣະອົງໄດ້ຖືກມານຮ້າຍທົດລອງເປັນເວລາສີ່ສິບວັນ ໃນວັນເຫຼົ່ານັ້ນ ພຣະອົງບໍ່ໄດ້ກິນຫຍັງເລີຍ ເມື່ອວັນເຫຼົ່ານັ້ນຜ່ານພົ້ນໄປແລ້ວ ພຣະອົງກໍຢາກອາຫານ. 3 ມານຮ້າຍໄດ້ເວົ້າຕໍ່ພຣະອົງວ່າ, “ຖ້າທ່ານເປັນພຣະບຸດຂອງພຣະເຈົ້າ ຈົ່ງສັ່ງກ້ອນຫີນນີ້ໃຫ້ກາຍເປັນອາຫານເບິ່ງດູ.” 4 ແຕ່ພຣະເຢຊູເຈົ້າຕອບມັນວ່າ, “ມີຄຳຂຽນໄວ້ໃນພຣະຄຳພີວ່າ, ‘ມະນຸດຈະບໍ່ລ້ຽງຊີວິດ ພຽງແຕ່ອາຫານຢ່າງດຽວ.”’ 5 ແລ້ວມານຮ້າຍກໍໄດ້ນຳພຣະອົງຂຶ້ນໄປ ແລະສະແດງໃຫ້ເຫັນໃນພິບຕາດຽວ ເຖິງອານາຈັກທັງໝົດແຫ່ງໂລກນີ້. 6 ມານຮ້າຍໄດ້ບອກພຣະອົງວ່າ, “ເຮົາຈະໃຫ້ອຳນາດທັງໝົດນີ້ ກັບສະຫງ່າຣາສີແຫ່ງແຜ່ນດິນທັງໝົດແກ່ທ່ານ. ເພາະສິ່ງທັງໝົດເຫຼົ່ານັ້ນຖືກມອບໃຫ້ແກ່ເຮົາແລ້ວ ແລະເຮົາຢາກມອບໃຫ້ແກ່ຜູ້ໃດກໍໄດ້ ຕາມທີ່ເຮົາຕ້ອງການ. 7 ດັ່ງນັ້ນ ສິ່ງທັງໝົດເຫຼົ່ານີ້ ຈະເປັນຂອງທ່ານ ຖ້າທ່ານນະມັດສະການເຮົາ.” 8 ພຣະເຢຊູເຈົ້າຕອບມັນວ່າ, “ມີຄຳຂຽນໄວ້ໃນພຣະຄຳພີວ່າ, ‘ຈົ່ງນະມັດສະການອົງພຣະຜູ້ເປັນເຈົ້າ ພຣະເຈົ້າຂອງເຈົ້າ ແລະບົວລະບັດຮັບໃຊ້ແຕ່ພຣະອົງເທົ່ານັ້ນ.”’ 9 ແລ້ວມານຮ້າຍກໍໄດ້ນຳພຣະອົງໄປທີ່ນະຄອນເຢຣູຊາເລັມ ໃຫ້ພຣະອົງຢືນຢູ່ເທິງຍອດຂອງພຣະວິຫານ ແລະເວົ້າຕໍ່ພຣະອົງວ່າ, “ຖ້າທ່ານເປັນພຣະບຸດຂອງພຣະເຈົ້າ ຈົ່ງໂຕນລົງຈາກທີ່ນີ້ເບິ່ງດູ. 10 ເພາະມີຄຳຂຽນໄວ້ໃນພຣະຄຳພີວ່າ, ‘ພຣະເຈົ້າຈະສັ່ງໃຫ້ຝູງເທວະດາຂອງພຣະອົງ ມາພິທັກຮັກສາທ່ານໄວ້.’ 11 ແລະ ຍັງມີຄຳຂຽນໄວ້ອີກວ່າ, ‘ຝູງເທວະດາຈະໃຊ້ມືຂອງຕົນຫອບອູ້ມທ່ານໄວ້ ເພື່ອບໍ່ໃຫ້ຕີນຂອງທ່ານຕຳກ້ອນຫີນ.”’ 12 ແຕ່ພຣະເຢຊູເຈົ້າຕອບວ່າ, “ມີຄຳຂຽນໄວ້ໃນພຣະຄຳພີວ່າ, ‘ຢ່າທົດລອງອົງພຣະຜູ້ເປັນເຈົ້າ ພຣະເຈົ້າຂອງເຈົ້າ.”’ 13 ເມື່ອມານຮ້າຍທົດລອງພຣະເຢຊູເຈົ້າທຸກປະການແລ້ວ ມັນກໍໜີຈາກພຣະອົງໄປ ຈົນເຖິງເວລາທີ່ມັນມີໂອກາດອີກ. ພຣະເຢຊູເຈົ້າເລີ່ມປະຕິບັດພາລະກິດຂອງພຣະອົງໃນຄາລີເລ ( ມທ 4:12-17 ; ມຣກ 1:14-15 ) 14 ແລ້ວພຣະເຢຊູເຈົ້າ ກໍໄດ້ກັບຄືນມາແຂວງຄາລີເລ ດ້ວຍຣິດອຳນາດຂອງພຣະວິນຍານບໍຣິສຸດເຈົ້າ ຂ່າວເລື່ອງຂອງພຣະອົງໄດ້ຊ່າລືໄປທົ່ວຂົງເຂດນັ້ນ. 15 ພຣະອົງໄດ້ສັ່ງສອນໃນທຳມະສາລາຂອງພວກເຂົາ ແລະໄດ້ຮັບຄຳສັນລະເສີນຈາກທຸກຄົນ. ຊາວນາຊາເຣັດບໍ່ຍອມຮັບພຣະເຢຊູເຈົ້າ ( ມທ 13:53-58 ; ມຣກ 6:1-6 ) 16 ແລ້ວພຣະເຢຊູເຈົ້າ ກໍໄດ້ມາຍັງນາຊາເຣັດ ຊຶ່ງເປັນເມືອງທີ່ພຣະອົງໄດ້ຈະເລີນເຕີບໃຫຍ່ຂຶ້ນນັ້ນ ແລະໃນວັນຊະບາໂຕ ພຣະອົງໄດ້ໄປທີ່ທຳມະສາລາຕາມປົກກະຕິ ພຣະອົງໄດ້ຢືນຂຶ້ນເພື່ອຈະອ່ານພຣະຄຳພີ. 17 ແລະ ເຂົາກໍໄດ້ຍື່ນໜັງສືມ້ວນຂອງຜູ້ທຳນວາຍເອຊາຢາ ໃຫ້ພຣະອົງອ່ານ ເມື່ອພຣະອົງພືໜັງສືມ້ວນອອກ ກໍພົບຂໍ້ຄວາມທີ່ຂຽນໄວ້ວ່າ, 18 “ພຣະວິນຍານຂອງອົງພຣະຜູ້ເປັນເຈົ້າ ຊົງສະຖິດຢູ່ເທິງຂ້ານ້ອຍ ເພາະພຣະອົງໄດ້ຫົດສົງແຕ່ງຕັ້ງຂ້ານ້ອຍໄວ້ ໃຫ້ປະກາດຂ່າວປະເສີດແກ່ຄົນຍາກຈົນ. ພຣະອົງໃຊ້ຂ້ານ້ອຍໄປປະກາດ ອິດສະຫລະພາບ ແກ່ຄົນທັງຫລາຍທີ່ຖືກຈຳຈອງ ແລະ ຄົນຕາບອດຈະເຫັນຮຸ່ງອີກ ປົດປ່ອຍຜູ້ຖືກກົດຂີ່ໃຫ້ເປັນອິດສະຫລະ 19 ແລະ ໃຫ້ປະກາດປີທີ່ອົງພຣະຜູ້ເປັນເຈົ້າ ຈະເມດຕານັ້ນ.” 20 ແລ້ວພຣະເຢຊູເຈົ້າກໍໄດ້ກໍ້ໜັງສືມ້ວນ ຍື່ນຄືນໃຫ້ແກ່ຜູ້ທີ່ມີໜ້າທີ່ເກັບຮັກສາໄວ້ ແລະນັ່ງລົງ ທຸກຄົນໃນທຳມະສາລາຕ່າງກໍຈ້ອງຕາເບິ່ງພຣະອົງ 21 ແລະ ພຣະອົງກ່າວແກ່ພວກເຂົາວ່າ, “ພຣະທຳຕອນນີ້ໄດ້ສຳເລັດເປັນຈິງໃນວັນນີ້ ຕາມທີ່ພວກເຈົ້າໄດ້ຍິນນັ້ນແຫຼະ.” 22 ທຸກຄົນກໍກ່າວຊົມເຊີຍພຣະອົງ ແລະປະທັບໃຈໃນຖ້ອຍຄຳອັນອ່ອນຫວານ ຊຶ່ງອອກມາຈາກປາກຂອງພຣະອົງ ພວກເຂົາຈຶ່ງເວົ້າວ່າ, “ລາວບໍ່ແມ່ນລູກຊາຍຂອງໂຢເຊັບບໍ?” 23 ພຣະອົງຊົງກ່າວແກ່ພວກເຂົາວ່າ, “ພວກເຈົ້າຄົງຈະກ່າວຄຳສຸພາສິດຂໍ້ນີ້ ຕໍ່ເຮົາເປັນແນ່ຄືວ່າ, ‘ທ່ານໝໍເອີຍ, ຈົ່ງປົວຕົວເອງໃຫ້ດີ’ ຄື ‘ບັນດາການ ຊຶ່ງພວກເຮົາໄດ້ຍິນວ່າ ທ່ານໄດ້ກະທຳໃນເມືອງກາເປນາອູມ ຈົ່ງເຮັດໃນເມືອງຂອງຕົນທີ່ນີ້ເໝືອນກັນ.”’ 24 ແລ້ວພຣະອົງກໍກ່າວອີກວ່າ, “ເຮົາບອກພວກເຈົ້າຕາມຄວາມຈິງວ່າ ບໍ່ມີຜູ້ທຳນວາຍຄົນໃດດອກ ທີ່ໄດ້ຮັບຄວາມເຄົາຣົບນັບຖືໃນບ້ານເມືອງຂອງຕົນ.” 25 “ເຮົາບອກພວກເຈົ້າຕາມຄວາມຈິງວ່າ, ໃນສະໄໝຂອງເອລີຢາ ເມື່ອຝົນບໍ່ຕົກສາມປີເຄິ່ງ ຊຶ່ງເປັນເຫດໃຫ້ເກີດການອຶດຢາກຢ່າງຮ້າຍແຮງທົ່ວດິນແດນນັ້ນ ໄດ້ມີແມ່ໝ້າຍຫລາຍຄົນໃນຊາດອິດສະຣາເອນ. 26 ແຕ່ເອລີຢາບໍ່ໄດ້ຖືກໃຊ້ໄປຫາໃຜຈັກຄົນ ໃນພວກແມ່ໝ້າຍເຫຼົ່ານີ້ ນອກຈາກແມ່ໝ້າຍຜູ້ໜຶ່ງ ຢູ່ທີ່ເມືອງຊາເຣຟັດແຂວງຊີໂດນແຕ່ເທົ່ານັ້ນ. 27 ໃນສະໄໝຂອງຜູ້ທຳນວາຍເອລີຊາ ໄດ້ມີຄົນຂີ້ທູດຕັ້ງຫລາຍຄົນໃນຊາດອິດສະຣາເອນ, ແຕ່ບໍ່ມີຜູ້ໃດໃນພວກເຂົາ ໄດ້ຮັບການຊຳລະໃຫ້ສະອາດດີ ນອກຈາກນາອາມານ ຊາວຊີເຣຍແຕ່ເທົ່ານັ້ນ.” 28 ເມື່ອປະຊາຊົນໃນທຳມະສາລາໄດ້ຍິນເຊັ່ນນີ້ ພວກເຂົາກໍຄຽດຮ້າຍທີ່ສຸດ. 29 ພວກເຂົາໄດ້ລຸກຂຶ້ນ ຊຸກພຣະເຢຊູເຈົ້າອອກໄປຈາກເມືອງ ແລະນຳພຣະອົງໄປຍັງແງ່ຜາຊັນ ທີ່ເມືອງຂອງພວກເຂົາຕັ້ງຢູ່ນັ້ນ ເພື່ອໝາຍຈະຊຸກພຣະອົງລົງ. 30 ແຕ່ພຣະອົງຍ່າງຜ່ານທ່າມກາງປະຊາຊົນໜີໄປໄດ້. ຊາຍຄົນໜຶ່ງທີ່ຜີຊົ່ວຮ້າຍເຂົ້າສິງ ( ມຣກ 1:21-28 ) 31 ແລ້ວພຣະເຢຊູຄຣິດເຈົ້າ ກໍໄດ້ໄປທີ່ເມືອງກາເປນາອູມ ໃນແຂວງຄາລີເລ ແລະຢູ່ໃນເມືອງນີ້ ພຣະອົງໄດ້ສັ່ງສອນປະຊາຊົນໃນວັນຊະບາໂຕ. 32 ພວກເຂົາທຸກຄົນຕ່າງກໍປະຫລາດໃຈ ໃນຄຳສອນຂອງພຣະອົງ ເພາະພຣະອົງສອນດ້ວຍຣິດອຳນາດ. 33 ໃນທຳມະສາລານັ້ນ ໄດ້ມີຊາຍທີ່ຜີມານຮ້າຍເຂົ້າສິງຢູ່ຄົນໜຶ່ງ ມັນຮ້ອງຂຶ້ນດ້ວຍສຽງດັງວ່າ, 34 “ເຢຊູໄທນາຊາເຣັດເອີຍ, ທ່ານມາຫຍຸ້ງກ່ຽວກັບພວກເຮົາເຮັດຫຍັງ? ທ່ານມາທຳລາຍພວກເຮົາຊັ້ນບໍ? ພວກເຮົາຮູ້ແລ້ວວ່າທ່ານແມ່ນຜູ້ໃດ ກໍແມ່ນຜູ້ບໍຣິສຸດຂອງພຣະເຈົ້າ.” 35 ພຣະເຢຊູເຈົ້າສັ່ງຫ້າມມັນວ່າ, “ມິດແມ ອອກຈາກຄົນນີ້ສາ” ຜີມານຮ້າຍໄດ້ເຮັດໃຫ້ຊາຍຄົນນີ້ລົ້ມລົງຕໍ່ໜ້າພວກເຂົາ ແລະອອກໄປຈາກລາວໂດຍບໍ່ໄດ້ທຳຮ້າຍແຕ່ຢ່າງໃດ. 36 ປະຊາຊົນທຸກຄົນຕ່າງກໍງຶດປະຫລາດໃຈ ແລະເວົ້າກັນວ່າ, “ຄຳເວົ້ານີ້ເປັນຢ່າງໃດໜໍ ເພາະວ່າເພິ່ນໄດ້ສັ່ງຜີຊົ່ວຮ້າຍເຫຼົ່ານີ້ດ້ວຍອຳນາດແລະຣິດເດດ ແລ້ວພວກມັນກໍອອກໜີໄປ.” 37 ແລ້ວຊື່ສຽງຂອງພຣະເຢຊູເຈົ້າ ກໍຊ່າລືໄປທົ່ວທຸກບ່ອນໃນຂົງເຂດນັ້ນ. ພຣະເຢຊູເຈົ້າຊົງໂຜດແມ່ເມຍຂອງເປໂຕໃຫ້ດີໄຂ້ ( ມທ 8:14-17 ; ມຣກ 1:29-34 ) 38 ແລ້ວພຣະເຢຊູເຈົ້າ ກໍຈາກທຳມະສາລາ ແລະເຂົ້າໄປເຮືອນຂອງຊີໂມນ ແມ່ເມຍຂອງຊີໂມນບໍ່ສະບາຍເພາະໄຂ້ຂຶ້ນສູງ ແລະພວກເຂົາກໍໄດ້ອ້ອນວອນພຣະເຢຊູເຈົ້າໃຫ້ຊົງໂຜດຮັກສານາງ. 39 ພຣະອົງມາຢືນຢູ່ຂ້າງນາງ ແລະສັ່ງໄຂ້ນັ້ນໃຫ້ໜີໄປ, ໄຂ້ກໍຫາຍໜີໄປຈາກນາງ ແລະທັນໃດນັ້ນ ນາງກໍລຸກຂຶ້ນບົວລະບັດຮັບໃຊ້ພຣະອົງກັບພວກສາວົກ. 40 ພໍຕາເວັນຕົກດິນ ຜູ້ທີ່ມີໝູ່ເພື່ອນບໍ່ສະບາຍຍ້ອນພະຍາດໂຣຄາຕ່າງໆ ກໍໄດ້ນຳຄົນເຫຼົ່ານັ້ນມາຫາພຣະເຢຊູເຈົ້າ ພຣະອົງວາງມືໃສ່ເທິງພວກເຂົາທຸກຄົນ ແລະຊົງໂຜດໃຫ້ພວກເຂົາຫາຍດີ. 41 ບັນດາຜີມານຮ້າຍກໍອອກໄປຈາກຫລາຍຄົນໂດຍຮ້ອງແຜດສຽງວ່າ, “ທ່ານເປັນພຣະບຸດຂອງພຣະເຈົ້າ.” ແຕ່ພຣະເຢຊູເຈົ້າຫ້າມເດັດຂາດບໍ່ໃຫ້ພວກມັນເວົ້າອີກຕໍ່ໄປ ເພາະພວກມັນຮູ້ດີວ່າ ພຣະອົງເປັນພຣະຄຣິດ. ພຣະເຢຊູເຈົ້າເທດສະໜາໃນທຳມະສາລາ ( ມຣກ 1:35-39 ) 42 ພໍຮຸ່ງເຊົ້າມາ ພຣະເຢຊູເຈົ້າກໍຈາກເມືອງໄປຖິ່ນແຫ້ງແລ້ງກັນດານ ບ່ອນທີ່ງຽບສະຫງັດ ຝ່າຍປະຊາຊົນຕ່າງກໍຊອກຫາພຣະອົງ ແລະເມື່ອພົບພຣະອົງແລ້ວ ພວກເຂົາກໍໜ່ວງໜ່ຽວພຣະອົງໄວ້ບໍ່ໃຫ້ຈາກພວກເຂົາໄປ. 43 ແຕ່ພຣະອົງກ່າວແກ່ພວກເຂົາວ່າ, “ເຮົາຕ້ອງປະກາດຂ່າວປະເສີດແຫ່ງອານາຈັກຂອງພຣະເຈົ້າໃນເມືອງອື່ນເໝືອນກັນ ທີ່ພຣະເຈົ້າຊົງໃຊ້ເຮົາມາ ກໍເພາະພາລະກິດນີ້ແຫຼະ.” 44 ແລ້ວພຣະອົງໄດ້ເທດສະໜາປ່າວປະກາດ ຕາມທຳມະສາລາຕ່າງໆໃນແຂວງຢູດາຍ. |
@ 2012 United Bible Societies. All Rights Reserved.