ເພງ^ຄໍ່າຄວນ 5 - ພຣະຄຳພີສັກສິການພາວັນນາອະທິຖານຂໍຄວາມເມດຕາ 1 ຂ້າແດ່ພຣະເຈົ້າຢາເວ ໂຜດຈົດຈຳສິ່ງທີ່ໄດ້ເກີດຂຶ້ນກັບພວກຂ້ານ້ອຍ ໂຜດຫລຽວເບິ່ງສາວ່າຖືກເສື່ອມເສຍຢ່າງໃດແລ້ວ. 2 ຊັບສິນຂອງພວກຂ້ານ້ອຍກໍຢູ່ໃນກຳມືຂອງຄົນແປກໜ້າໝົດ ຄົນຕ່າງຊາດອາໄສຢູ່ໃນເຮືອນຂອງພວກຂ້ານ້ອຍດ້ວຍ. 3 ພໍ່ຂອງພວກຂ້ານ້ອຍໄດ້ຖືກສັດຕູສັງຫານ ບັດນີ້ ແມ່ຂອງພວກຂ້ານ້ອຍຕ່າງກໍເປັນໝ້າຍ. 4 ພວກຂ້ານ້ອຍຕ້ອງຈ່າຍຄ່ານໍ້າທີ່ພວກຂ້ານ້ອຍດື່ມ ແລະຕ້ອງຊື້ຟືນທີ່ເອົາມາດັງໄຟນັ້ນ. 5 ຖືກໄລ່ໄປດັ່ງລໍຫລືອູດທີ່ແບກຂອງໜັກ ອິດເມື່ອຍອ່ອນແຮງແຕ່ກໍບໍ່ໄດ້ພັກຜ່ອນ. 6 ເພື່ອຢາກມີອາຫານລ້ຽງຊີບໃຫ້ມີຊີວິດຢູ່ຕໍ່ໄປ ຕ້ອງໄປຂໍທານນຳເອຢິບແລະອັດຊີເຣຍພຸ້ນ. 7 ບັນພະບຸລຸດໄດ້ເຮັດບາບ ແຕ່ບັດນີ້ເພິ່ນຕາຍໄປ ພວກຂ້ານ້ອຍທົນທຸກຍ້ອນການບາບຂອງພວກເພິ່ນ. 8 ພວກຂ້ານ້ອຍຖືກປົກຄອງໂດຍຄົນຊົ່ວ ຄືພວກທີ່ບໍ່ດີກວ່າທາດຮັບໃຊ້ທັງຫລາຍ ແລະບໍ່ມີຜູ້ໃດຊ່ວຍພວກຂ້ານ້ອຍໃຫ້ພົ້ນໄພ ຈາກອຳນາດຂອງພວກເຂົາໄດ້. 9 ພວກຂ້າຄົນກໍທ່ອງທ່ຽວໄປມາຕາມຊົນນະບົດ; ພວກຂ້ານ້ອຍສ່ຽງຊີວິດຫາອາຫານມາລ້ຽງທ້ອງ. 10 ຄວາມອຶດຫິວເຮັດໃຫ້ເຈັບໄຂ້ຮ້ອນທົ່ວທັງຕົວ ຈົນໜັງແດງດັ່ງເຕົາອົບທີ່ກຳລັງຮ້ອນ. 11 ເມຍພວກຂ້ານ້ອຍຖືກຂົ່ມຂືນທີ່ພູເຂົາຊີໂອນ ທັງພວກຜູ້ສາວທີ່ຢູ່ຕາມບ້ານຂອງຢູດາຍດ້ວຍ. 12 ພວກເຈົ້ານາຍທັງຫລາຍກໍໄດ້ຖືກພວກເຂົາຈັບໄປແຂວນຄໍ ແມ່ນແຕ່ຜູ້ເຖົ້າຜູ້ແກ່ກໍບໍ່ມີຄົນນັບຖືດ້ວຍ. 13 ຊາຍໜຸ່ມຕົກເປັນທາດຮັບໃຊ້ ແລະໂມ້ແປ້ງໃຫ້ພວກເຂົາ ເດັກຊາຍຍ່າງໂຊເຊຍ້ອນແບກມັດຟືນໜັກໜ່ວງ. 14 ພວກເຖົ້າແກ່ກໍບໍ່ໄດ້ນັ່ງທີ່ປະຕູເມືອງຕໍ່ໄປ ພວກຄົນໜຸ່ມກໍບໍ່ໄດ້ຫລິ້ນດົນຕຼີອີກດ້ວຍ. 15 ການຟ້ອນລຳຂອງພວກຂ້ານ້ອຍ ໄດ້ກາຍມາເປັນການຮ້ອງໄຫ້ໂສກເສົ້າ. 16 ບໍ່ມີສິ່ງໃດເຫລືອໄວ້ໃຫ້ອວດອ້າງໄດ້ເລີຍ ພວກຂ້ານ້ອຍເຄີຍສ້າງບາບ ຈຶ່ງນຳສະໜອງບັດນີ້. 17 ຈິດໃຈພວກຂ້ານ້ອຍຈຶ່ງອິດອ່ອນຍ້ອນ ສິ່ງເຫຼົ່ານີ້ທັງໝົດທີ່ໄດ້ເກີດມາ ສາຍຕາພວກຂ້ານ້ອຍຈຶ່ງມົວລົງ ເບິ່ງຫຍັງເກືອບເຫັນບໍ່ໄດ້. 18 ກໍຍ້ອນພູເຂົາຊີໂອນຕັ້ງຢູ່ເປົ່າປ່ຽວວ່າງຄົນ ແລະເປັນບ່ອນພັກເຊົາຂອງພວກໝາປ່າ. 19 ຂ້າແດ່ພຣະເຈົ້າຢາເວ ແຕ່ພຣະອົງເປັນກະສັດສືບໄປ ພຣະອົງຈະປົກຄອງຕະຫລອດໄປເປັນນິດ. 20 ເຫດໃດຈຶ່ງໄດ້ປະຖິ້ມພວກຂ້ານ້ອຍຢ່າງດົນນານ? ພຣະອົງຈະບໍ່ຈົດຈຳພວກຂ້ານ້ອຍເລີຍບໍ? 21 ຂ້າແດ່ພຣະເຈົ້າຢາເວ ໂຜດນຳພວກຂ້ານ້ອຍດ້ວຍ ໃຫ້ກັບມາຫາພຣະອົງອີກແດ່ ແລະໂຜດປົວແປງຖານະເກົ່ານັ້ນ ໃຫ້ຄືນສູ່ສະພາບເດີມແດ່ທ້ອນ. 22 ຫລືພຣະອົງໄດ້ປະຖິ້ມພວກຂ້ານ້ອຍສືບໄປຊັ້ນບໍ່? ຄວາມໂກດຮ້າຍຂອງພຣະອົງບໍ່ມີຂອບເຂດເລີຍບໍ? |
@ 2012 United Bible Societies. All Rights Reserved.