ເພງ^ຄໍ່າຄວນ 4 - ພຣະຄຳພີສັກສິນະຄອນເຢຣູຊາເລັມຫລັງຈາກຫຼົ້ມຈົມ 1 ຄຳທີ່ເຫຼື້ອມໃສແວວວັບໄດ້ຖືກມົວໝອງໄປ ຫີນຂອງພຣະວິຫານກໍແຕກກະຈາຍໄປເຕັມຫົນທາງ. 2 ພວກຊາຍໜຸ່ມທີ່ເມືອງຊີໂອນນັ້ນ ປະເສີດເລີດລໍ້າດັ່ງຄຳແກ່ພວກເຮົາ ແຕ່ບັດນີ້ ພວກເຂົາກໍນັບເປັນເໝືອນ ໝໍ້ດິນທຳມະດາເທົ່ານັ້ນ. 3 ແມ່ນແຕ່ແມ່ໝາປ່າກໍຍັງລ້ຽງລູກມັນ ແຕ່ຄົນຂອງຂ້ອຍໂຫດຮ້າຍຕໍ່ລູກດັ່ງນົກກະຈອກເທດ. 4 ພວກເຂົາປ່ອຍໃຫ້ລູກນ້ອຍອຶດເຂົ້າຫິວນໍ້າຈົນຕາຍ ເດັກນ້ອຍຂໍທານແຕ່ບໍ່ມີຜູ້ໃດເອົາອາຫານໃຫ້. 5 ຄົນທີ່ເຄີຍກິນອາຫານອັນດີນັ້ນ ກໍຕາຍຫິວຢູ່ຕາມຖະໜົນຫົນທາງ ຄົນທີ່ໃຫຍ່ຂຶ້ນມາຢ່າງຟຸມເຟືອຍ ກໍຄົ້ນກິນອາຫານໃນກອງຂີ້ເຫຍື້ອ. 6 ຄົນຂ້ອຍຖືກລົງໂທດໜັກກວ່າຊາວເມືອງໂຊໂດມ ຄືຜູ້ທີ່ລົ້ມຕາຍກະທັນຫັນໂດຍສີມືພຣະເຈົ້າ. 7 ພວກເຈົ້າຊາຍ ທີ່ບໍຣິສຸດຜຸດຜ່ອງດັ່ງຫິມະຂາວ ມີແຮງແລະເຂັ້ມແຂງ ສຸຂະພາບດີເດັ່ນ. 8 ບັດນີ້ ພວກເຂົານອນຢຽດຢູ່ຕາມຖະໜົນບໍ່ມີຜູ້ຮູ້ຈັກ ໜ້າຕາຂອງພວກເຂົາກໍ່າດຳຢູ່ໃນຄວາມຕາຍ; ສ່ວນເນື້ອໜັງຂອງພວກເຂົາກໍຫ່ຽວແຫ້ງສໍ່າກັບຟືນ ຈ່ອຍຜອມຫລາຍຈົນເຫັນໜັງຕິດກະດູກ. 9 ພວກທີ່ຕາຍໃນການສູ້ຮົບກໍດີກວ່າຕາຍທີຫລັງ ທີ່ຄ່ອຍໆຫິວຕາຍຂາດອາຫານກິນໃຫ້ມີຊີວິດຢູ່. 10 ໄພພິບັດທີ່ມາເຖິງຄົນຂອງຂ້ອຍ ມີແຕ່ສິ່ງຢ້ານກົວ ແມ່ຜູ້ທີ່ຮັກລູກຮັກຜົວ ກໍຕົ້ມລູກຂອງຕົນເອງກິນໄດ້. 11 ພຣະເຈົ້າຢາເວໄດ້ປ່ອຍໃຫ້ຄວາມໂກດຮ້າຍ ຂອງພຣະອົງອອກມາຢ່າງເຕັມກຳລັງ ໂດຍໄດ້ດັງໄຟຈູດພູເຂົາຊີໂອນ ຈົນເມືອງໄໝ້ເຜົາຜານຈຸພື້ນ. 12 ແມ່ນແຕ່ຜູ້ປົກຄອງຄົນຕ່າງຊາດທັງຄົນອື່ນໆກໍດີ ກໍບໍ່ເຊື່ອວ່າມີນັກຮຸກຮານບຸປະຕູນະຄອນເຢຣູຊາເລັມໄດ້. 13 ແຕ່ເຫດການນີ້ໄດ້ເກີດຂຶ້ນແລ້ວ ເພາະບາບຂອງຜູ້ທຳນວາຍໃນນະຄອນ ແລະບັນດາປະໂຣຫິດກໍມີຄວາມຜິດ ໃນຖານເຮັດໃຫ້ຄົນບໍ່ຜິດຕ້ອງຕາຍຍ້ອນ. 14 ພວກຜູ້ຄົນຍ່າງເຕະຝຸ່ນຕາມທາງໃນນະຄອນ ດັ່ງຄົນຕາບອດຍ່າງໄປມາລ້າໆ ຊຶ່ງມີຮອຍເລືອດຕິດຢູ່ຕາມເຄື່ອງນຸ່ງ ຈົນບໍ່ມີຜູ້ໃດກ້າຈັບບາຍພວກເຂົາ. 15 ປະຊາຊົນຮ້ອງໃສ່ພວກເຂົາວ່າ, “ໜີໄປສາ ພວກເຈົ້າເປັນມົນທິນ ຢ່າສູ່ແຕະຕ້ອງຂ້ອຍ.” ສະນັ້ນ ພວກເຂົາຈຶ່ງໄດ້ຊັດເຊພະເນຈອນໄປ ຈາກປະເທດນີ້ສູ່ທີ່ອື່ນໄກຂາດການຕ້ອນຮັບ. 16 ພຣະເຈົ້າຢາເວບໍ່ໄດ້ເປັນຫ່ວງພວກເຂົາອີກຕໍ່ໄປ ພຣະອົງເອງເປັນຜູ້ໃຫ້ພວກເຂົາແຕກກະຈັດກະຈາຍ. ພຣະອົງບໍ່ໄດ້ເຫັນແກ່ໜ້າພວກປະໂຣຫິດ ທັງບໍ່ໃຫ້ຄວາມນັບຖືຕໍ່ພວກຜູ້ປົກຄອງຂອງພວກເຂົາດ້ວຍ. 17 ພວກເຮົາຫລຽວເບິ່ງຈົນອິດເມື່ອຍ ແຕ່ບໍ່ເຫັນຄວາມຊ່ວຍເຫລືອໃດໆ ພວກເຮົາຄອງຄອຍຖ້າຄວາມຊ່ວຍຊູ ຈາກປະເທດທີ່ບໍ່ມີຫຍັງຊ່ວຍໄດ້. 18 ສັດຕູກຳລັງຈອບເບິ່ງບາດຍ່າງພວກເຮົາ, ພວກເຮົາຍ່າງໄປມາແມ່ນແຕ່ຕາມຫົນທາງກໍບໍ່ໄດ້. ວັນຂອງພວກເຮົານັ້ນມັນກໍສັ້ນເຂົ້າທຸກທີ, ວາລະສຸດທ້າຍຂອງພວກເຮົາມາເຖິງສາແລ້ວ. 19 ພວກເຂົາໄດ້ໄລ່ຕິດຕາມພວກເຮົາວ່ອງໄວດັ່ງນົກອິນຊີໃນທ້ອງຟ້າ, ພວກມັນບິນລົງມາສະກົດຮອຍຕາມພວກເຮົາຢູ່. ພວກມັນໄລ່ຕິດຕາມເທິງພູທັງຫຼາຍເພື່ອຄອຍຈັບເອົາພວກເຮົາ ຢ່າງບໍ່ຮູ້ຕົວໃນຖິ່ນແຫ້ງແລ້ງກັນດານນັ້ນ. 20 ພວກເຂົາຈັບເອົາຜູ້ທີ່ຊີ້ຂາດຊີວິດຂອງພວກເຮົາ ຄືກະສັດຜູ້ທີ່ພຣະເຈົ້າຢາເວເອງໄດ້ຊົງເຈີມໄວ້ນັ້ນ ຄືຜູ້ທີ່ພວກເຮົາໄດ້ໄວ້ວາງໃຈໃນຕົວເພິ່ນ ເພື່ອປົກປ້ອງພວກເຮົາຈາກພວກຮຸກຮານ. 21 ຊາວເອໂດມແລະອູເຊ ຈົ່ງຫົວເຍາະເຍີ້ຍຕໍ່ໄປ ຈົ່ງພາກັນດີໃຈໃນຍາມທີ່ພວກເຈົ້າດີໃຈໄດ້. ໄພພິບັດຂອງພວກເຈົ້າກໍກຳລັງມາເຖິງຄືກັນ ພວກເຈົ້າຈະເປືອຍຕົວຍ່າງໂຊເຊອັບອາຍຄືກັນດອກ. 22 ພູເຂົາຊີໂອນໄດ້ຊົດໃຊ້ຄ່າບາບທີ່ຕົນໄດ້ກະທຳ ພຣະເຈົ້າຈະບໍ່ໃຫ້ພວກເຮົາເປັນຊະເລີຍຕໍ່ໄປອີກ; ແຕ່ພຣະອົງຈະລົງໂທດເຈົ້າ ເອໂດມເອີຍ ພຣະອົງຈະເປີດເຜີຍການກະທຳຜິດຂອງເຈົ້າ. |
@ 2012 United Bible Societies. All Rights Reserved.