ເພງ^ຄໍ່າຄວນ 1 - ພຣະຄຳພີສັກສິຄວາມໂສກເສົ້າຂອງນະຄອນເຢຣູຊາເລັມ 1 ນະຄອນເຢຣູຊາເລັມເອີຍ ບັດນີ້ນອນຢຽດຢູ່ດຽວດາຍ ຄັ້ງໜຶ່ງ ເປັນນະຄອນທີ່ມີປະຊາຊົນໜາແໜ້ນ ແລະຄັ້ງໜຶ່ງນັ້ນ ກໍໄດ້ຮັບກຽດຈາກຊາວໂລກາ ແຕ່ມາບັດນີ້ ເຈົ້າພັດເປັນດັ່ງແມ່ໝ້າຍ; ເຈົ້າເປັນເຈົ້າຍິງໃນທ່າມກາງເມືອງທັງຫລາຍ ແຕ່ບັດນີ້ ຖືກລົດກຽດລົງຕົກເປັນທາດສາແລ້ວ. 2 ນາງຈຶ່ງຮ້ອງໄຫ້ຕະຫລອດທັງຄືນ ນໍ້າຕາຫລັ່ງໄຫລຖ້ວມລົງອາບແກ້ມ. ເພື່ອນຝູງໃນອະດີດກໍບໍ່ເຫຼືອເພື່ອປອບໃຈ ບັດນີ້ ພັນທະມິດຕ່າງກໍຫັກຫລັງຕໍ່ສູ້ນາງແລ້ວ. 3 ຊາວຢູດາຕົກເປັນທາດຂາດຜູ້ຊ່ວຍເຫລືອ ທັງຖືກບັງຄັບໃຫ້ໜີຫ່າງໄກຈາກເມືອງບ້ານ. ພວກເຂົາອາໄສຢູ່ໃນແດນອື່ນບໍ່ມີບ່ອນເປັນຂອງຕົນເອງ ຖືກອ້ອມດ້ວຍສັດຕູ ບໍ່ມີທາງທີ່ຈະປົບໜີໄປໄດ້. 4 ບັດນີ້ ຈຶ່ງບໍ່ມີຜູ້ໃດມາເຝົ້າທີ່ພຣະວິຫານ ເພື່ອນະມັດສະການໃນວັນສັກສິດຕ່າງໆ. ຍິງສາວເຄີຍຮ້ອງເພງຢູ່ທີ່ນັ້ນກໍທົນທຸກຄືກັນ ບັນດາປະໂຣຫິດມີແຕ່ຮ້ອງຄວນຄາງທັງສິ້ນ. ປະຕູທາງເຂົ້ານະຄອນກໍຫວ່າງເປົ່າ ພູເຂົາຊີໂອນກໍໂສກເສົ້າເຈັບປວດໃນຊີວີ. 5 ພວກສັດຕູໄດ້ເປັນນາຍເໜືອນາງ ພວກເຂົາໄດ້ຢຶດເອົານາງໃຫ້ຢູ່ໃຕ້ອຳນາດ ຍ້ອນນາງເຮັດບາບ ພຣະເຈົ້າຢາເວຈຶ່ງໃຫ້ນາງທົນທຸກ ລູກໆຂອງນາງນັ້ນຕ່າງກໍຖືກຈັບໄປ. 6 ເປັນພຽງແຕ່ອະດີດທີ່ນະຄອນເຢຣູຊາເລັມຮຸ່ງເຮືອງ ພວກເຈົ້ານາຍຂອງນາງກໍອ່ອນແຮງດັ່ງກວາງທີ່ອຶດຢາກ ຊຶ່ງກຳລັງທີ່ຕົນມີຢູ່ນັ້ນກຳລັງຈະໝົດໄປ ໃນຂະນະທີ່ປົບໜີຈາກນາຍພານຕາມລ່າ. 7 ບັດນີ້ ເມື່ອຕົກຢູ່ໃນສະພາບຮົກຮ້າງເພພັງ ນະຄອນເຢຣູຊາເລັມກໍຄິດເຖິງສິ່ງຮຸ່ງເຮືອງໃນອະດີດ. ເມື່ອນາງຢູ່ໃນກຳມືຂອງສັດຕູນັ້ນກໍບໍ່ມີຜູ້ໃດຊ່ວຍເຫຼືອນາງ, ຜູ້ທີ່ຊະນະເພາະຕົນຫຼົ້ມຈົມກໍຫົວຂວັນໃສ່ຊໍ້າ. 8 ກຽດສັກສີທີ່ເຄີຍມີນັ້ນກໍສູນສິ້ນໝົດໄປ ນາງເປືອຍຕົວແລະຖືກຄົນດູໝິ່ນປະໝາດ. ນາງຄໍ່າຄວນແລະລີ້ໜ້າດ້ວຍຄວາມອັບອາຍ ນະຄອນເຢຣູຊາເລັມເປັນມົນທິນດ້ວຍຕົນເຮັດບາບ. 9 ມົນທິນຂອງນາງນັ້ນເບິ່ງເຫັນໄດ້ງ່າຍດາຍ ແຕ່ນາງບໍ່ຫ່ວງໃຍນຳຊາຕາກຳຂອງຕົນຈັກດີ້. ນາງລົ້ມແຮງໂພດຈົນບໍ່ມີຜູ້ໃດສາມາດປອບໃຈ ຂ້າແດ່ພຣະເຈົ້າຢາເວ ໂຜດເມດຕາ ເພາະສັດຕູຂອງນາງໄດ້ຊະນະ. 10 ພວກສັດຕູເຂົ້າມາປຸ້ນມາລັກເອົາ ຊັບສົມບັດທັງໝົດທີ່ນາງມີຢູ່ນັ້ນ. ນາງໄດ້ເຫັນພວກສັດຕູເຂົ້າໄປໃນພຣະວິຫານ ທີ່ພຣະເຈົ້າຫ້າມປາມບໍ່ໃຫ້ຄົນຕ່າງຊາດເຂົ້າ. 11 ປະຊາຊົນຄໍ່າຄວນຂະນະທີ່ຊອກຫາເຂົ້າຈີ່ກິນ ພວກເຂົາແລກປ່ຽນຊັບສິນກັບອາຫານ ເພື່ອໃຫ້ມີຊີວິດຢູ່. ຊາວເມືອງຮ້ອງຂຶ້ນວ່າ, “ຂ້າແດ່ພຣະເຈົ້າຢາເວ ຂໍຊົງໂຜດຫລຽວເບິ່ງດ້ວຍ! ເບິ່ງວ່າຍາກຈົນເທົ່າໃດ.” 12 ນາງຮ້ອງໃສ່ທຸກຄົນຜ່ານໄປວ່າ, “ເບິ່ງຂ້ອຍແດ່ ບໍ່ມີຜູ້ໃດທີ່ເຈັບປວດເໝືອນດັ່ງຂ້ອຍ ເປັນຄວາມເຈັບປວດທີ່ພຣະເຈົ້າຢາເວໄດ້ນຳມາ ໃຫ້ຂ້ອຍໄດ້ຮັບຄາວທີ່ພຣະອົງໂກດຮ້າຍ. 13 ພຣະອົງໄດ້ສົ່ງໄຟຈາກເບື້ອງເທິງລົງມາ ເປັນໄຟທີ່ລຸກໄໝ້ຢູ່ພາຍໃນຈິດໃຈຂ້ອຍ. ພຣະອົງໄດ້ຫ້າງແຮ້ວໃສ່ຂ້ອຍ ແລະເຮັດໃຫ້ລົ້ມລົງກັບພື້ນດິນ ປະຖິ້ມຂ້ອຍໃຫ້ເຈັບປວດຢູ່ຢ່າງນັ້ນ. 14 ພຣະອົງບັນທຶກທຸກການບາບທີ່ຂ້ອຍໄດ້ເຮັດມາ ແລ້ວກໍມັດທັງໝົດລວມເຂົ້າໃສ່ກັນໄວ້; ພຣະອົງຫ້ອຍບາບເຫຼົ່ານັ້ນໃສ່ໄວ້ເທິງຄໍ ຂ້ອຍຈຶ່ງອ່ອນເພຍເພາະບາບກຳນັ້ນໜັກຫຼາຍ. ພຣະເຈົ້າຢາເວມອບຂ້ອຍໃຫ້ເຫຼົ່າສັດຕູ ແລະຂ້ອຍກໍບໍ່ມີຜູ້ໃດຊ່ວຍຂ້ອຍຕໍ່ສູ້ພວກເຂົາໄດ້. 15 ອົງພຣະຜູ້ເປັນເຈົ້າໄດ້ຫົວເຍີ້ຍທະຫານຂອງຂ້ອຍທັງໝົດ ສົ່ງກອງທັບມາທຳລາຍພວກຊາຍໜຸ່ມຂອງຂ້ອຍ. ອົງພຣະຜູ້ເປັນເຈົ້າໄດ້ຢຽບຢໍ່າປະຊາຊົນຂອງຂ້ອຍລົງ ດັ່ງໝາກອະງຸ່ນຢູ່ໃນໂຮງບີບເຫຼົ້າອະງຸ່ນນັ້ນ. 16 ເຫດສະນັ້ນ ຂ້ອຍຈຶ່ງຮ້ອງໄຫ້ອອກມາ ຈົນເບົ້າຕາທັງສອງນອງດ້ວຍນໍ້າຕາທັງສິ້ນ. ບໍ່ມີຜູ້ໃດອອຍໃຈຂ້ອຍໄດ້ ບໍ່ມີຜູ້ໃດໃຫ້ກຳລັງໃຈ ສັດຕູໄດ້ຊະນະຂ້ອຍ ປະຊາຊົນບໍ່ເຫຼືອຫຍັງຈັກຢ່າງ. 17 ຂ້ອຍເດ່ມືອອກເພື່ອວິ້ງວອນໃຫ້ຄົນຊ່ວຍເຫລືອ ແຕ່ກໍບໍ່ມີຜູ້ໃດຊ່ວຍເຫລືອຂ້ອຍໄດ້. ພຣະເຈົ້າຢາເວໄດ້ເອີ້ນໃຫ້ສັດຕູມາຕໍ່ສູ້ຂ້ອຍທຸກທິດທາງ ພວກເຂົາເຮັດຕໍ່ຂ້ອຍດັ່ງເຮັດກັບສິ່ງທີ່ເປິເປື້ອນ. 18 ແຕ່ພຣະເຈົ້າຢາເວຊົງຊອບທຳ ເພາະຂ້ອຍບໍ່ໄດ້ເຊື່ອຟັງພຣະອົງຈຶ່ງເປັນຢູ່ຢ່າງນີ້. ຈົ່ງຟັງຂ້ອຍເທີ້ນ ປະຊາຊົນທົ່ວທຸກບ່ອນເອີຍ ຈົ່ງຫລຽວເບິ່ງດູຄວາມເຈັບປວດຂອງຂ້ອຍ. ຊາຍໜຸ່ມແລະຍິງສາວທີ່ຂ້ອຍມີຢູ່ທັງໝົດ ກໍຖືກຈັບໄປເປັນຊະເລີຍທັງສິ້ນ. 19 ຂ້ອຍໄດ້ເອີ້ນຫາໝູ່ເພື່ອນທີ່ເຄີຍຮັກແພງກັນ ແຕ່ພວກເຂົາບໍ່ຍອມໃຫ້ຄວາມຊ່ວຍເຫລືອແກ່ຂ້ອຍ. ພວກປະໂຣຫິດແລະຜູ້ນຳກໍລົ້ມຕາຍຢູ່ໃນເມືອງ ຂະນະທີ່ພວກເຂົາຊອກຫາອາຫານກິນໃຫ້ມີຊີວິດຢູ່. 20 ຂ້າແດ່ພຣະເຈົ້າຢາເວ ຂໍຊົງໂຜດເບິ່ງຂ້ານ້ອຍດ້ວຍ ເຈັບປວດແລະທຸກໃຈເຫຼືອທີ່ຈະກ່າວ ຫົວໃຈຂ້ານ້ອຍເຈັບປວດເພາະມີບາບໜາ ຄົນຂ້າກັນຕາມຖະໜົນ ມີຄົນຕາຍທີ່ເຮືອນດ້ວຍ. 21 ໂຜດຟັງ ຄຳຄໍ່າຄວນດ້ວຍເພາະຂາດຜູ້ອອຍໃຈ ສັດຕູຕ່າງກໍດີໃຈທີ່ພຣະອົງນຳໄພພິບັດມາຖືກຂ້ານ້ອຍ. ຂໍໂຜດນຳ ເອົາວັນທີ່ພຣະອົງສັນຍານັ້ນມາສາ ແລະໂຜດໃຫ້ພວກສັດຕູຖືກທໍລະມານດ້ວຍເຖີດ. 22 ໂຜດປະນາມຄວາມຊົ່ວຮ້າຍຂອງພວກເຂົາແດ່ ໂຜດລົງໂທດພວກເຂົາດັ່ງທີ່ໄດ້ລົງໂທດຂ້ານ້ອຍນັ້ນ ຍ້ອນການບາບທີ່ຂ້ານ້ອຍໄດ້ກະທຳມາ ຈຶ່ງທຸກຮ້ອນຫລາຍທັງຄໍ່າຄວນຢ່າງເຈັບປວດ.” |
@ 2012 United Bible Societies. All Rights Reserved.