ໂຢຊວຍ 4 - ພຣະຄຳພີສັກສິຫີນສິບສອງກ້ອນຖືກຕັ້ງໄວ້ເປັນອະນຸສອນ 1 ເມື່ອປະຊາຊົນອິດສະຣາເອນທຸກຄົນໄດ້ຂ້າມແມ່ນໍ້າຈໍແດນໄປໝົດແລ້ວ ພຣະເຈົ້າຢາເວໄດ້ກ່າວແກ່ໂຢຊວຍວ່າ, 2 “ຈົ່ງເລືອກເອົາຊາຍສິບສອງຄົນຄືເຜົ່າລະຄົນ 3 ແລະສັ່ງພວກເຂົາໃຫ້ຍົກເອົາຫີນສິບສອງກ້ອນຈາກແມ່ນໍ້າຈໍແດນ ໃນບ່ອນທີ່ພວກປະໂຣຫິດຢືນຢູ່ນັ້ນ ແລະຂົນໄປວາງໄວ້ໃນບ່ອນທີ່ເຈົ້າຈະຕັ້ງຄ້າຍພັກຄືນນີ້.” 4-5 ດັ່ງນັ້ນ ໂຢຊວຍຈຶ່ງເອີ້ນເອົາສິບສອງຄົນທີ່ເພິ່ນໄດ້ເລືອກນັ້ນມາ ແລະບອກພວກເຂົາວ່າ, “ຈົ່ງໄປທີ່ແມ່ນໍ້າຈໍແດນ ທາງດ້ານໜ້າຫີບພັນທະສັນຍາຂອງພຣະເຈົ້າຢາເວ ພຣະເຈົ້າຂອງພວກເຈົ້າ. ໃຫ້ແຕ່ລະຄົນໃນພວກເຈົ້າແບກເອົາຫີນໜຶ່ງກ້ອນ ຄືກ້ອນໜຶ່ງສຳລັບເຜົ່າໜຶ່ງຂອງຊາດອິດສະຣາເອນ. 6 ກ້ອນຫີນເຫຼົ່ານີ້ຈະເປັນໝາຍສຳຄັນໃຫ້ປະຊາຊົນຮູ້ເຖິງສິ່ງທີ່ພຣະອົງໄດ້ກະທຳ ໃນພາຍຄັ້ງໜ້າ ເມື່ອລູກຫລານຂອງພວກເຈົ້າຖາມວ່າ, ‘ກ້ອນຫີນເຫຼົ່ານີ້ມີຄວາມໝາຍຢ່າງໃດຕໍ່ພວກເຈົ້າ?’ 7 ກໍໃຫ້ພວກເຈົ້າບອກວ່າ, ເມື່ອຫາມຫີບພັນທະສັນຍາຂອງພຣະເຈົ້າຢາເວຂ້າມແມ່ນໍ້ານັ້ນ ແມ່ນໍ້າຈໍແດນໄດ້ເຊົາໄຫລ. ກ້ອນຫີນເຫຼົ່ານີ້ຈະເປັນສິ່ງເຕືອນປະຊາຊົນອິດສະຣາເອນຢູ່ສະເໝີ ເຖິງເຫດການທີ່ໄດ້ເກີດຂຶ້ນນັ້ນ.” 8 ຄົນເຫຼົ່ານັ້ນກໍເຮັດຕາມຄຳສັ່ງຂອງໂຢຊວຍ. ຕາມທີ່ພຣະເຈົ້າຢາເວໄດ້ສັ່ງໂຢຊວຍນັ້ນ ພວກເຂົາໄດ້ແບກເອົາຫີນສິບສອງກ້ອນຈາກກາງແມ່ນໍ້າຈໍແດນ ຄືກ້ອນໜຶ່ງສຳລັບເຜົ່າໜຶ່ງຂອງຊາດອິດສະຣາເອນ ນຳໄປວາງໄວ້ໃນບ່ອນທີ່ພວກເຂົາຕັ້ງຄ້າຍພັກ. 9 ແລ້ວໂຢຊວຍກໍຍັງໄດ້ຕັ້ງຫີນອື່ນອີກສິບສອງກ້ອນ ໄວ້ທີ່ກາງແມ່ນໍ້າຈໍແດນ ໃນບ່ອນທີ່ພວກປະໂຣຫິດຫາມຫີບພັນທະສັນຍາຢືນຢູ່ນັ້ນ. (ຫີນນັ້ນຍັງມີຢູ່ຈົນເຖິງທຸກວັນນີ້.) 10 ພວກປະໂຣຫິດຢືນຢູ່ໃນກາງແມ່ນໍ້າຈໍແດນ ຈົນກວ່າປະຊາຊົນກະທຳທຸກສິ່ງສຳເລັດ ຕາມທີ່ພຣະເຈົ້າຢາເວໄດ້ສັ່ງພວກເຂົາຜ່ານທາງໂຢຊວຍ. ເລື່ອງນີ້ແມ່ນສິ່ງທີ່ໂມເຊໄດ້ສັ່ງໄວ້. ປະຊາຊົນຈຶ່ງຟ້າວຂ້າມແມ່ນໍ້າໄປ. 11 ເມື່ອທຸກຄົນໄດ້ຂ້າມໄປເຖິງຝັ່ງໝົດແລ້ວ ພວກປະໂຣຫິດພ້ອມດ້ວຍຫີບຂອງພຣະເຈົ້າຢາເວ ກໍອອກນຳໜ້າປະຊາຊົນໄປ. 12 ສ່ວນພວກຜູ້ຊາຍໃນເຜົ່າຣູເບັນ, ເຜົ່າກາດ ແລະເຜົ່າມານາເຊເຄິ່ງເຜົ່າທີ່ຕຽມພ້ອມໃນການສູ້ຮົບ ກໍໄດ້ຂ້າມແມ່ນໍ້າໄປກ່ອນໝູ່ຕາມທີ່ໂມເຊໄດ້ສັ່ງ. 13 ຊ້ອງໜ້າພຣະເຈົ້າຢາເວ ມີຊາຍທັງໝົດປະມານສີ່ສິບພັນຄົນທີ່ຕຽມພ້ອມເຮັດເສິກ ໄດ້ຂ້າມໄປສູ່ທົ່ງຮາບພຽງໃກ້ເມືອງເຢຣິໂກ. 14 ສິ່ງທີ່ພຣະເຈົ້າຢາເວໄດ້ກະທຳໃນມື້ນັ້ນ ເຮັດໃຫ້ຊາວອິດສະຣາເອນຖືໂຢຊວຍເປັນຜູ້ຍິ່ງໃຫຍ່ຄົນໜຶ່ງ. ພວກເຂົາໃຫ້ກຽດໂຢຊວຍຕະຫລອດຊົ່ວຊີວິດຂອງເພິ່ນ ເໝືອນດັ່ງທີ່ພວກເຂົາໄດ້ໃຫ້ກຽດໂມເຊ. 15 ແລ້ວພຣະເຈົ້າຢາເວກໍໄດ້ບອກໂຢຊວຍ 16 ໃຫ້ສັ່ງພວກປະໂຣຫິດທີ່ຫາມຫີບພັນທະສັນຍານັ້ນ ຂຶ້ນມາຈາກແມ່ນໍ້າຈໍແດນ. 17 ໂຢຊວຍກໍໄດ້ປະຕິບັດຕາມ. 18 ເມື່ອພວກປະໂຣຫິດທີ່ໄດ້ຫາມຫີບພັນທະສັນຍາຂອງພຣະເຈົ້າຢາເວໄດ້ຂຶ້ນມາຮອດຕາຝັ່ງແລ້ວ ນໍ້າກໍໄດ້ໄຫລເຂົ້າກັນຖ້ວມເຕັມຕາຝັ່ງອີກຄືເກົ່າ. 19 ໃນມື້ທີ່ປະຊາຊົນໄດ້ຂ້າມແມ່ນໍ້ານັ້ນ ເປັນມື້ທີສິບຂອງເດືອນທີໜຶ່ງ. ພວກເຂົາໄດ້ຕັ້ງຄ້າຍພັກຢູ່ທີ່ກິນການ ຊຶ່ງຢູ່ທາງທິດຕາເວັນອອກຂອງເມືອງເຢຣິໂກ. 20 ສ່ວນໂຢຊວຍກໍໄດ້ເອົາຫີນສິບສອງກ້ອນ ທີ່ນຳຂຶ້ນມາແຕ່ແມ່ນໍ້າຈໍແດນຕັ້ງໄວ້ຢູ່ທີ່ນັ້ນ. 21 ເພິ່ນໄດ້ກ່າວແກ່ປະຊາຊົນອິດສະຣາເອນວ່າ, “ໃນອະນາຄົດເມື່ອພວກລູກຫລານຖາມວ່າຫີນນີ້ໝາຍເຖິງຫຍັງ? 22 ໃຫ້ພວກເຈົ້າບອກພວກເຂົາເຖິງເວລາທີ່ຊາວອິດສະຣາເອນ ໄດ້ຂ້າມແມ່ນໍ້າຈໍແດນເທິງພື້ນດິນແຫ້ງ. 23 ໃຫ້ບອກພວກເຂົາວ່າ ພຣະເຈົ້າຢາເວ ພຣະເຈົ້າຂອງພວກເຈົ້າ ໄດ້ເຮັດໃຫ້ແມ່ນໍ້າຈໍແດນແຫ້ງສຳລັບພວກເຈົ້າ ຈົນກວ່າພວກເຈົ້າທຸກໆຄົນຂ້າມໄປໄດ້ໝົດ ເໝືອນດັ່ງທີ່ພຣະເຈົ້າຢາເວ ພຣະເຈົ້າຂອງພວກເຈົ້າ ໄດ້ເຮັດໃຫ້ນໍ້າທະເລແດງແຫ້ງລົງສຳລັບພວກເຮົາ. 24 ເພາະເລື່ອງນີ້ທຸກໆຄົນທີ່ເທິງແຜ່ນດິນໂລກຈະຮູ້ວ່າ ພຣະຫັດຂອງພຣະເຈົ້າຢາເວຊົງຣິດອຳນາດຍິ່ງໃຫຍ່ເທົ່າໃດ ແລະພວກເຈົ້າກໍຈະຢຳເກງພຣະເຈົ້າຢາເວ ພຣະເຈົ້າຂອງພວກເຈົ້າສືບໄປ.” |
@ 2012 United Bible Societies. All Rights Reserved.