ພຣະທຳໂຢບ 9 - ພຣະຄຳພີສັກສິໂຢບ 1-2 “ແມ່ນແລ້ວ ຂ້ອຍກໍຮູ້ທຸກສິ່ງທີ່ເຈົ້າເວົ້າມານັ້ນ ແຕ່ຈະຫາເຫດຜົນຫຍັງສູ້ຄະດີຕໍ່ໜ້າພຣະເຈົ້າໄດ້? 3 ມີຜູ້ໃດແດ່ບໍ ທີ່ຖົກຖຽງກັບພຣະອົງໄດ້ເດ? ພຣະອົງຖາມພັນໆບັນຫາແລະບໍ່ມີຜູ້ໃດຕອບໄດ້. 4 ພຣະເຈົ້າແສນສະຫລາດແລະຊົງຣິດອຳນາດຍິ່ງ ບໍ່ມີມະນຸດຄົນໃດສູ້ຄະດີກັບພຣະອົງໄດ້ດອກ. 5 ພຣະອົງບໍ່ໄດ້ເຕືອນກ່ອນເມື່ອຊົງຍົກຍ້າຍພູເຂົາ, ພຣະອົງທຳລາຍພູຜາໃນຄວາມໂກດຮ້າຍ. 6 ພຣະອົງໃຫ້ໂລກໄຫວຫວັ່ນທັງພື້ນດິນສະເທືອນ ແລະໂງ່ນຫີນທີ່ອູ້ມຊູໂລກກໍຄອນແຄນດ້ວຍ. 7 ພຣະອົງດຶງຕາເວັນໄວ້ໄດ້ບໍ່ໃຫ້ມັນຂຶ້ນມາ ແລະໝູ່ດວງດາວບໍ່ໃຫ້ສ່ອງແສງຮຸ່ງແຈ້ງ. 8 ບໍ່ມີຜູ້ໃດຊ່ວຍພຣະເຈົ້າຄຶງຟ້າສະຫວັນອອກ ຫລືຢຽບຢໍ່າມັງກອນກັບຄືນສູ່ທະເລໄດ້. 9 ພຣະເຈົ້າແຂວນດວງດາວໃຫ້ສ່ອງແສງ: ດາວແຂ້ ດາວໄຖ ດາວລູກໄກ່ ແລະດາວທິດໃຕ້. 10 ພວກເຮົາເຂົ້າໃຈບໍ່ໄດ້ສິ່ງຍິ່ງໃຫຍ່ທີ່ຊົງກະທຳ ແລະການອັດສະຈັນອັນບໍ່ມີທີ່ສິ້ນສຸດເປັນໄດ້. 11 ຖ້າພຣະເຈົ້າກາຍໄປໃກ້ໆ ເຮົາກໍບໍ່ເຫັນພຣະອົງ ຖ້າພຣະອົງມາຈົນຈຸ ເຮົາກໍແນມເຫັນພຣະອົງບໍ່ໄດ້. 12 ພຣະອົງເອົາສິ່ງທີ່ຊົງຢາກໄດ້ ຜູ້ໃດຢຸດຢັ້ງໄດ້ນໍ; ບໍ່ມີຜູ້ໃດກ້າຖາມວ່າ, ‘ກຳລັງເຮັດຫຍັງ?’ 13 ພຣະເຈົ້າບໍ່ຢຸດຢັ້ງໃນຄວາມໂກດຮ້າຍຂອງພຣະອົງ ຜູ້ທີ່ຍິນດີໃນຄວາມຈອງຫອງຈະຖືກປາບລົງ 14 ດັ່ງນັ້ນ ຂ້ອຍຈະຫາຄຳຕອບພຣະອົງໄດ້ຢ່າງໃດ? ຈະເອົາຄຳໂຕ້ຖຽງຫຍັງມາຕໍ່ສູ້ພຣະອົງໄດ້. 15 ສິ່ງທີ່ຂ້ອຍພໍເຮັດໄດ້ເຖິງແມ່ນບໍ່ມີຄວາມຜິດ ຄືຂໍຄວາມເມດຕາຈາກພຣະເຈົ້າຜູ້ພິພາກສາຂ້ອຍ. 16 ເຖິງແມ່ນວ່າຖ້າພຣະອົງປ່ອຍໃຫ້ຂ້ອຍເວົ້າຈາ ຂ້ອຍບໍ່ເຊື່ອວ່າພຣະອົງຈະຟັງຄຳຮ້ອງຂໍຂອງຂ້ອຍ. 17 ພຣະອົງໃຊ້ພະຍຸມາທຸບຕີຂ້ອຍໃຫ້ເຈັບຊໍ້າທັງຕົວ ໂດຍປາສະຈາກເຫດຜົນໃດໆທັງນັ້ນ. 18 ພຣະອົງບໍ່ປ່ອຍຂ້ອຍ ແມ່ນແຕ່ໃຫ້ໄດ້ຫາຍໃຈ, ໃຫ້ຊີວິດຂ້ອຍເຕັມແຕ່ຄວາມລະທົມຂົມຂື່ນ. 19 ຂ້ອຍຈະລອງໃຊ້ກຳລັງກັບພຣະເຈົ້າຊັ້ນບໍ? ຜູ້ໃດນໍ ຈະຊອກຫາບັງຄັບພຣະອົງໄດ້? ຂ້ອຍຈະນຳພຣະອົງຂຶ້ນສານສູ້ຄວາມກັນບໍ່ໄດ້ຕີ້? ຜູ້ໃດແດ່ຊອກນຳພຣະອົງໃຫ້ໄປຂຶ້ນສານໄດ້? 20 ຂ້ອຍບໍຣິສຸດແລະສັດຊື່ ແຕ່ຄຳເວົ້າຂອງຂ້ອຍຄືມີຄວາມຜິດ ທຸກໆສິ່ງທີ່ຂ້ອຍເວົ້າ ກໍປາກົດວ່າປະນາມຂ້ອຍ. 21 ຂ້ອຍບໍ່ຜິດແທ້, ສະນັ້ນ ຂ້ອຍຈຶ່ງບໍ່ຫ່ວງຫຍັງ ຂ້ອຍເບື່ອໜ່າຍຊີວິດຂ້ອຍເອງ. 22 ເປັນຜູ້ຜິດຫລືຜູ້ຖືກ ມັນກໍບໍ່ສຳຄັນຫຍັງ ເຖິງຢ່າງໃດພຣະເຈົ້າກໍຈະທຳລາຍຖິ້ມ. 23 ເມື່ອຄວາມຕາຍມາເຖິງຄົນທີ່ບໍ່ມີຄວາມຜິດ ພຣະອົງກໍຊົງຫົວເຢາະເຢີ້ຍໃສ່ເຂົາ. 24 ພຣະເຈົ້າມອບໂລກນີ້ໃຫ້ແກ່ຄົນຊົ່ວປົກຄອງ ແລະເຮັດໃຫ້ຜູ້ຕັດສິນຄວາມຕາບອດໝົດແລ້ວ. ຖ້າບໍ່ແມ່ນພຣະອົງເຮັດສິ່ງເຫຼົ່ານີ້ທັງໝົດ ແມ່ນຜູ້ໃດເດນໍທີ່ໄດ້ເຮັດສິ່ງເຫຼົ່ານີ້. 25 ວັນຂອງຂ້ອຍຜ່ານໄປໄວ ດັ່ງນັກແລ່ນແຂ່ງ ຜ່ານໄປແຮງຢ່າງນັ້ນຫາອັນດີໄວ້ບໍ່ມີເລີຍ. 26 ຊີວິດຂ້ອຍຜ່ານໄປໄວ ດັ່ງຖືກລົມພັດເຮືອໃບ ໄວກວ່ານົກອິນຊີເຈີດລົງຂຸບກິນກະຕ່າຍ. 27 ຂ້ອຍຄິດວ່າເມື່ອຂ້ອຍຍິ້ມຫົວໄດ້ກໍເປັນສິ່ງທີ່ດີ ນັ້ນຄືວິທີຊອກຫາລືມໄລຄວາມເຈັບປວດ; 28 ຂ້ອຍຕົກໃຈຢ້ານຕໍ່ຄວາມທຸກທັງໝົດຂອງຂ້ອຍ ເພາະຂ້ອຍຮູ້ວ່າພຣະອົງຈະຈົດຈຳວ່າຂ້ອຍເປັນຄົນຜິດ. 29 ຖ້າວ່າຂ້ອຍນີ້ຄືຄົນຜິດສຳລັບພຣະອົງ ເປັນຫຍັງຈຶ່ງຕ້ອງມາລົບກວນຂ້ອຍຢ່າງນີ້? 30 ເຖິງແມ່ນຂ້ອຍລ້າງຕົນເອງດ້ວຍສະບູ ຫລືຊຳລະລ້າງຕົນຈາກການບາບ. 31 ພຣະເຈົ້າກໍຈະໂຍນຂ້ອຍໃສ່ໃນຫລຸມຂີ້ຕົມ, ເສື້ອຜ້າຂ້ອຍເອງກໍອັບອາຍຕົນຕົວຂ້ອຍ. 32 ຖ້າພຣະເຈົ້າເປັນມະນຸດ ຂ້ອຍອາດຕອບພຣະອົງ ແລະພາກັນໄປສູ້ຄວາມ ຢູ່ສານຕັດສິນໄດ້. 33 ແຕ່ອັນນີ້ບໍ່ມີຜູ້ໃດກ້າເປັນຄົນກາງໃຫ້ພວກເຮົາ ບໍ່ມີຜູ້ໃດຕັດສິນຄວາມໃຫ້ຂ້ອຍກັບພຣະເຈົ້າໄດ້. 34 ຂ້າແດ່ພຣະເຈົ້າ ຂໍໂຜດຢຸດລົງໂທດຂ້ານ້ອຍສາ ເອົາຄວາມຢ້ານໃຫຍ່ໄປຈາກຂ້ານ້ອຍສາ 35 ຂ້ານ້ອຍບໍ່ຢ້ານທີ່ຈະເວົ້າຢູ່ຢ່າງນີ້ອີກຕໍ່ໄປ ເພາະຂ້ານ້ອຍຮູ້ຈິດໃຈຂອງຕົນເອງດີຢູ່ແລ້ວ. |
@ 2012 United Bible Societies. All Rights Reserved.