ເຢເຣມີຢາ 50 - ພຣະຄຳພີສັກສິຊາວນະຄອນບາບີໂລນຕົກເປັນຊະເລີຍ 1 ຕໍ່ໄປນີ້ແມ່ນຖ້ອຍຄຳທີ່ພຣະເຈົ້າຢາເວໄດ້ບອກຂ້າພະເຈົ້າ ກ່ຽວກັບນະຄອນບາບີໂລນແລະຊາວນະຄອນວ່າ, 2 “ຈົ່ງປະກາດຂ່າວໃຫ້ຊົນຊາດທັງຫລາຍ ຈົ່ງຖະແຫລງຂ່າວນັ້ນສາເຖີດ ຈົ່ງແຈ້ງຂ່າວນັ້ນແລະໃຫ້ບອກເປັນສັນຍານ ຢ່າຮັກສາຂ່າວໄວ້ເປັນຄວາມລັບ ນະຄອນບາບີໂລນຫຼົ້ມຈົມແລ້ວ, ພະມັກດຸກຂອງນະຄອນບາບີໂລນແຕກກະຈັດກະຈາຍແລ້ວ, ບັນດາຮູບເຄົາຣົບຕ່າງກໍໄດ້ຖືກອັບອາຍ; ຮູບພະໜ້າກຽດຊັງຖືກທຳລາຍຈົນໝຸ່ນ. 3 ມີຊົນຊາດໜຶ່ງຈາກທາງທິດເໜືອໄດ້ມາໂຈມຕີບາບີໂລນ ແລະຈະເຮັດໃຫ້ເປັນຖິ່ນແຫ້ງແລ້ງກັນດານ. ມະນຸດແລະຝູງສັດຈະແລ່ນໜີໄປ ແລະຈະບໍ່ມີຜູ້ໃດອາໄສຢູ່ໃນທີ່ນັ້ນເລີຍ.” ຊາວອິດສະຣາເອນຈະກັບຄືນສູ່ດິນແດນ 4 ພຣະເຈົ້າຢາເວກ່າວວ່າ, “ເມື່ອເວລານັ້ນມາເຖິງ ທັງອິດສະຣາເອນ ແລະຢູດາຈະຮ້ອງໄຫ້ ສະແຫວງຫາພຣະເຈົ້າຢາເວ ພຣະເຈົ້າຂອງພວກເຂົາ. 5 ພວກເຂົາຈະຖາມຫາຫົນທາງໄປສູ່ພູເຂົາຊີໂອນ ແລະຈະເດີນໄປຕາມຫົນທາງນັ້ນ. ພວກເຂົາຈະເຮັດພັນທະສັນຍາອັນຕະຫລອດໄປກັບພຣະເຈົ້າຢາເວ ແລະພວກເຂົາຈະບໍ່ຝ່າຝືນພັນທະສັນຍານັ້ນຈັກເທື່ອ. 6 ປະຊາຊົນຂອງເຮົາເປັນດັ່ງຝູງແກະທີ່ຜູ້ລ້ຽງໄດ້ປະປ່ອຍໃຫ້ເສຍໄປຕາມພູ. ພວກເຂົາເປັນດັ່ງແກະທີ່ເລາະໄປເລາະມາຈາກພູໜ່ວຍນີ້ຫາພູໜ່ວຍອື່ນ ແລະພວກເຂົາກໍລືມວ່າບ້ານຂອງພວກເຂົານັ້ນຢູ່ໃສ. 7 ພວກເຂົາຖືກທຳລາຍຈາກທຸກໆຄົນທີ່ໄດ້ພົບເຫັນພວກເຂົາ. ເຫຼົ່າສັດຕູຂອງພວກເຂົາເວົ້າວ່າ, ‘ສິ່ງທີ່ພວກເຮົາໄດ້ເຮັດບໍ່ຜິດ ເພາະພວກເຂົາໄດ້ເຮັດບາບຕໍ່ສູ້ພຣະເຈົ້າຢາເວ ອົງເປັນທີ່ຢູ່ອັນແທ້ຈິງ; ຕໍ່ສູ້ພຣະເຈົ້າຢາເວ ອົງເປັນຄວາມຫວັງຂອງບັນພະບຸລຸດຂອງພວກເຂົາ.’ 8 ປະຊາຊົນອິດສະຣາເອນເອີຍ ຈົ່ງແລ່ນໜີຈາກບາບີໂລນສາ ຈົ່ງໜີອອກມາຈາກປະເທດສາ ຈົ່ງໜີໄປເປັນຜູ້ທຳອິດເຖີດ 9 ເຮົາຈະປຸກປັ່ນໝວດໜຶ່ງໃນບັນດາຊົນຊາດທີ່ເຂັ້ມແຂງທາງທິດເໜືອໃຫ້ມາໂຈມຕີບາບີໂລນ. ພວກເຂົາຈະລຽນແຖວກັນເຮັດເສິກ ແລະຕີເອົາປະເທດນີ້. ພວກເຂົາເປັນນັກໂຫ່ເນື້ອທີ່ຊຳນິຊຳນານ ໂດຍຍິງລູກທະນູບໍ່ຜິດພາດເປົ້າໝາຍຈັກເທື່ອ. 10 ບາບີໂລນຈະຖືກປຸ້ນ ແລະພວກທີ່ປຸ້ນນັ້ນຈະຢຶດເອົາທຸກໆສິ່ງທີ່ພວກເຂົາຕ້ອງການ.” ພຣະເຈົ້າຢາເວກ່າວດັ່ງນີ້ແຫຼະ. ນະຄອນບາບີໂລນຫຼົ້ມຈົມ 11 ພຣະເຈົ້າຢາເວກ່າວວ່າ, “ປະຊາຊົນແຫ່ງບາບີໂລນເອີຍ ພວກເຈົ້າໄດ້ປຸ້ນສະດົມຊົນຊາດຂອງເຮົາ. ພວກເຈົ້າມີຄວາມສຸກ ແລະມ່ວນຊື່ນເບີກບານ ດັ່ງງົວແມ່ທີ່ກຳລັງຢຽບເຂົ້າຫລືດັ່ງມ້າທີ່ກຳລັງຮ້ອງ 12 ແຕ່ເມືອງອັນໃຫຍ່ໂຕຂອງພວກເຈົ້ານັ້ນຈະຖືກລົດກຽດ ແລະຖືກອັບອາຍຂາຍໜ້າ. ບາບີໂລນຈະເປັນຊົນຊາດໜຶ່ງ ທີ່ມີຄວາມສຳຄັນໜ້ອຍທີ່ສຸດໃນບັນດາຊົນຊາດທັງໝົດ ຄືຈະກາຍເປັນຖິ່ນແຫ້ງແລ້ງກັນດານທີ່ເຫືອດແຫ້ງແລະຂາດນໍ້າ. 13 ດ້ວຍຄວາມໂກດຮ້າຍຂອງພຣະເຈົ້າຢາເວໃນນະຄອນບາບີໂລນຈະບໍ່ມີຜູ້ໃດອາໄສຢູ່; ມັນຈະຖືກປະປ່ອຍໃຫ້ເປັນທີ່ຮົກຮ້າງເພພັງ ແລະທຸກຄົນທີ່ໄດ້ຜ່ານໄປມາທີ່ນັ້ນ ຈະສະດຸ້ງຕົກໃຈແລະໜ້າງຶດງໍ້. 14 ພວກນັກຍິງທະນູເອີຍ ຈົ່ງລຽນແຖວເຂົ້າເຮັດເສິກຕໍ່ສູ້ນະຄອນບາບີໂລນແລະອ້ອມໄວ້. ຈົ່ງຍິງລູກທະນູທັງໝົດຂອງພວກເຈົ້າສຸມໃສ່ນະຄອນບາບີໂລນຍ້ອນເມືອງນີ້ໄດ້ເຮັດບາບຕໍ່ສູ້ພຣະເຈົ້າຢາເວ. 15 ຈົ່ງເປັ່ງສຽງສູ້ຮົບອ້ອມເມືອງເຖີດ ບັດນີ້ນະຄອນບາບີໂລນໄດ້ຍອມຈຳນົນແລ້ວ. ກຳແພງເມືອງຖືກພັງລົງ. ອົງພຣະຜູ້ເປັນເຈົ້າກຳລັງແກ້ແຄ້ນຊາວບາບີໂລນ. ສະນັ້ນ ຈົ່ງແກ້ແຄ້ນ ແລະເຮັດຕໍ່ພວກເຂົາດັ່ງທີ່ພວກເຂົາໄດ້ເຮັດກັບຄົນອື່ນນັ້ນສາ. 16 ຢ່າໃຫ້ມີການເພາະປູກ ຫລືການເກັບກ່ຽວໃນປະເທດນີ້. ຊາວຕ່າງດ້າວທຸກໆຄົນທີ່ກຳລັງອາໄສຢູ່ໃນທີ່ນັ້ນຈະຢ້ານກອງທັບໂຈມຕີ ແລະຈະກັບຄືນເມືອບ້ານເກີດເມືອງນອນຂອງໃຜລາວ.” ຊາວອິດສະຣາເອນກັບຄືນສູ່ດິນແດນ 17 “ປະຊາຊົນອິດສະຣາເອນປຽບດັ່ງຝູງແກະ ທີ່ຖືກໂຕສິງໄລ່ໃຫ້ກະຈັດກະຈາຍໄປ. ທຳອິດ ພວກເຂົາຖືກຈັກກະພັດອັດຊີເຣຍໂຈມຕີ; ຕໍ່ມາ ກະສັດເນບູກາດເນັດຊາແຫ່ງບາບີໂລນໄດ້ຫັກກະດູກພວກເຂົາ.” 18 ດ້ວຍເຫດນີ້ ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ພຣະເຈົ້າຂອງຊາດອິດສະຣາເອນຈຶ່ງກ່າວວ່າ, “ເຮົາຈະລົງໂທດກະສັດເນບູກາດເນັດຊາ ແລະດິນແດນຂອງລາວດັ່ງທີ່ເຮົາໄດ້ລົງໂທດກະສັດແຫ່ງອັດຊີເຣຍ. 19 ເຮົາຈະປົວແປງປະຊາຊົນອິດສະຣາເອນຂຶ້ນໃໝ່ໃນດິນແດນຂອງພວກເຂົາ. ພວກເຂົາຈະມີອາຫານການກິນເກີດຂຶ້ນທີ່ເທິງພູກາເມນ ແລະໃນຂົງເຂດບາຊານ ແລະພວກເຂົາຈະກິນຜົນລະປູກທີ່ເກີດຂຶ້ນໃນເຂດແດນຂອງເອຟຣາອິມກັບກີເລອາດ ຕາມຄວາມຕ້ອງການ. 20 ເມື່ອເວລານັ້ນມາເຖິງ ຈະບໍ່ພົບການບາບໃນອິດສະຣາເອນ ແລະຄວາມຜິດໃນຢູດາ ເພາະເຮົາຈະຍົກໂທດໃຫ້ປະຊາຊົນທີ່ເຮົາໄດ້ໄວ້ຊີວິດ.” ພຣະເຈົ້າຢາເວກ່າວດັ່ງນີ້ແຫຼະ. ພຣະເຈົ້າຕັດສິນລົງໂທດບາບີໂລນ 21 “ຈົ່ງໂຈມຕີປະຊາຊົນໃນຂົງເຂດ ມາຣາທາອິມ ແລະເປໂກດ. ຈົ່ງຂ້າ ແລະທຳລາຍພວກເຂົາ. ຈົ່ງເຮັດທຸກສິ່ງທີ່ເຮົາໄດ້ສັ່ງພວກເຈົ້າ.” ພຣະເຈົ້າຢາເວກ່າວດັ່ງນີ້ແຫຼະ. 22 “ສຽງສູ້ຮົບໄດ້ດັງຂຶ້ນໃນດິນແດນ ແລະການທຳລາຍກໍໜັກໜ່ວງຫລາຍ. 23 ບາບີໂລນໄດ້ໃຊ້ຄ້ອນຕີໂລກທັງໝົດແຕກເປັນປ່ຽງສັນໃດ; ບັດນີ້ ຄ້ອນຕີນັ້ນກໍໄດ້ແຕກເປັນປ່ຽງສັນນັ້ນ ບັນດາຊົນຊາດທັງໝົດສະດຸ້ງຕົກໃຈ ຕໍ່ສິ່ງທີ່ໄດ້ເກີດຂຶ້ນໃນປະເທດນັ້ນ. 24 ບາບີໂລນເອີຍ ເຈົ້າໄດ້ຖືກແຮ້ວດັກຈັບ ຊຶ່ງເຮົາໄດ້ວາງໃສ່ເຈົ້າແລ້ວ ເຖິງແມ່ນເຈົ້າບໍ່ຮູ້ກໍຕາມ ເພາະເຈົ້າໄດ້ສູ້ຮົບພຣະເຈົ້າຢາເວ. 25 ພຣະເຈົ້າຢາເວໄດ້ໄຂສາງອາວຸດຂອງພຣະອົງອອກ ແລະດ້ວຍຄວາມໂກດຮ້າຍພຣະອົງໄດ້ເອົາອາວຸດນັ້ນອອກມາ ເພາະອົງພຣະຜູ້ເປັນເຈົ້າ ພຣະເຈົ້າອົງຊົງຣິດອຳນາດຍິ່ງໃຫຍ່ ມີພາລະກິດທີ່ຈະເຮັດໃນບາບີໂລນ. 26 ຈົ່ງໂຈມຕີປະເທດນີ້ຮອບດ້ານທັງເປີດສາງທີ່ໄດ້ສະສົມເຂົ້າໄວ້ ຈົ່ງກອງເຄື່ອງທີ່ປຸ້ນມານັ້ນດັ່ງທີ່ໄດ້ກອງເຂົ້າໄວ້ ຈົ່ງທຳລາຍປະເທດຖິ້ມ ຢ່າປະປ່ອຍຫຍັງໄວ້ເລີຍ 27 ຈົ່ງຂ້າທະຫານທັງໝົດສາ ຈົ່ງສັງຫານພວກເຂົາໃຫ້ກ້ຽງ ເຄາະກຳເປັນຂອງປະຊາຊົນແຫ່ງບາບີໂລນສາແລ້ວ ເວລາທີ່ພວກເຂົາໄດ້ຖືກລົງໂທດກໍມາເຖິງແລ້ວ.” ( 28 ພວກອົບພະຍົບປົບໜີຈາກບາບີໂລນມາສູ່ນະຄອນເຢຣູຊາເລັມ ແລະພວກເຂົາບອກວ່າ, ພຣະເຈົ້າຢາເວ ພຣະເຈົ້າຂອງພວກເຮົາ ແກ້ແຄ້ນຊາວບາບີໂລນໃນສິ່ງທີ່ພວກເຂົາໄດ້ເຮັດຕໍ່ພຣະວິຫານຂອງພຣະອົງ.) 29 “ຈົ່ງບອກພວກນັກຍິງທະນູໃຫ້ໂຈມຕີນະຄອນບາບີໂລນ. ຈົ່ງສົ່ງທຸກຄົນທີ່ຮູ້ຈັກຍິງໜ້າທະນູອອກໄປ. ຈົ່ງອ້ອມເມືອງໄວ້ ແລະຢ່າໃຫ້ຜູ້ໃດປົບໜີໄປໄດ້. ຈົ່ງແກ້ແຄ້ນໃຫ້ສົມກັບສິ່ງທີ່ພວກເຂົາໄດ້ເຮັດລົງໄປ ຍ້ອນເມືອງນັ້ນໄດ້ອວດດີກັບພຣະເຈົ້າຢາເວ ອົງບໍຣິສຸດຂອງຊາດອິດສະຣາເອນ. 30 ສະນັ້ນ ພວກຊາວໜຸ່ມໃນເມືອງນີ້ຈຶ່ງຈະຖືກຂ້າຕາມທ້ອງຖະໜົນຫົນທາງ ພວກທະຫານທັງໝົດກໍຈະຖືກທຳລາຍໃນມື້ນັ້ນ.” ພຣະເຈົ້າຢາເວກ່າວດັ່ງນີ້ແຫຼະ. 31 ອົງພຣະຜູ້ເປັນເຈົ້າ ພຣະເຈົ້າອົງຊົງຣິດອຳນາດຍິ່ງໃຫຍ່ກ່າວວ່າ, “ບາບີໂລນເອີຍ ເຈົ້ານັ້ນຈອງຫອງຫລາຍ; ສະນັ້ນ ເຮົາຈຶ່ງຕໍ່ສູ້ເຈົ້າ ເວລາທີ່ເຮົາຈະລົງໂທດເຈົ້າມາເຖິງແລ້ວ. 32 ຊົນຊາດທີ່ຈອງຫອງຂອງເຈົ້ານັ້ນຈະຕຳສະດຸດ ແລະລົ້ມລົງ ທັງຈະບໍ່ມີຜູ້ໃດຊ່ວຍຍົກພວກເຈົ້າຂຶ້ນ. ເຮົາຈະຈູດໄຟເຜົາເມືອງຕ່າງໆຂອງພວກເຈົ້າ; ແລະທຸກໆສິ່ງທີ່ອ້ອມເມືອງນັ້ນຈະຖືກທຳລາຍໝົດ.” 33 ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ກ່າວວ່າ, “ປະຊາຊົນອິດສະຣາເອນ ແລະຢູດາໄດ້ຖືກກົດຂີ່. ຄົນທັງໝົດທີ່ໄດ້ຈັບພວກເຂົາໄປນັ້ນ ກຳລັງເຝົ້າເບິ່ງພວກເຂົາຢ່າງໃກ້ຊິດ ແລະບໍ່ຍອມປ່ອຍໃຫ້ພວກເຂົາໜີໄປ. 34 ແຕ່ພຣະຜູ້ໄຖ່ຂອງພວກເຂົານັ້ນເຂັ້ມແຂງຫລາຍ ແລະນາມຂອງພຣະອົງຄືພຣະເຈົ້າຢາເວອົງຊົງຣິດອຳນາດຍິ່ງໃຫຍ່. ພຣະອົງຈະຍົກຄະດີຂອງພວກເຂົາຂຶ້ນພິຈາລະນາ ທັງຈະນຳສັນຕິສຸກມາສູ່ແຜ່ນດິນໂລກ; ແຕ່ປະຊາຊົນແຫ່ງບາບີໂລນຈະເດືອດຮ້ອນ.” 35 ພຣະເຈົ້າຢາເວກ່າວວ່າ, “ບາບີໂລນຕາຍ ປະຊາຊົນຕາຍ ນັກປົກຄອງ ແລະນັກປາດດ້ວຍ. 36 ໃຫ້ຄວາມຕາຍມາສູ່ຜູ້ທຳນວາຍຂີ້ຕົວະ ພວກເຂົາຊ່າງພາກັນໂງ່ຈ້າແທ້ໆ ຈົ່ງໃຫ້ຄວາມຕາຍມາສູ່ທະຫານທຸກຄົນສາ ພວກເຂົາຊ່າງຢ້ານກົວຫລາຍແທ້ໆ 37 ຈົ່ງທຳລາຍຝູງມ້າ ແລະລົດຮົບປະເທດນີ້ສາ ຈົ່ງໃຫ້ຄວາມຕາຍມາສູ່ພວກທະຫານຮັບຈ້າງ. ພວກເຂົາຊ່າງອິດອ່ອນເມື່ອຍຫລາຍແທ້ໆນໍ ຈົ່ງທຳລາຍຂຸມຊັບໂດຍໃຫ້ຖືກປຸ້ນເອົາຈົນກ້ຽງ. 38 ໃຫ້ຄວາມແຫ້ງແລ້ງມາສູ່ດິນແດນນີ້ສາ ໃຫ້ແມ່ນໍ້າໃນປະເທດນີ້ບົກແຫ້ງໝົດ. ບາບີໂລນມີຮູບເຄົາຣົບໜ້າຢ້ານຫລວງຫລາຍ ຊຶ່ງເຮັດໃຫ້ຄົນຫລົງໄຫລພາກັນເປັນບ້າຍ້ອນ. 39 ເພາະສະນັ້ນ ນະຄອນບາບີໂລນຈຶ່ງຈະຖືກຜີສາດ ແລະວິນຍານຊົ່ວຫລອກຫລອນ ແລະດ້ວຍຝູງນົກກະຈອກເທດທີ່ເປັນມົນທິນ. ຈະບໍ່ມີຜູ້ໃດອາໄສຢູ່ໃນທີ່ນັ້ນອີກຕໍ່ໄປ. 40 ເຫດການນີ້ຈະເກີດຂຶ້ນແກ່ນະຄອນບາບີໂລນ ດັ່ງທີ່ໄດ້ເກີດຂຶ້ນກັບເມືອງໂຊໂດມ ແລະໂກໂມຣາ ເມື່ອເຮົາໄດ້ທຳລາຍສອງເມືອງນີ້ ແລະເມືອງທີ່ອ້ອມແອ້ມນັ້ນ. ຈະບໍ່ມີຜູ້ໃດອາໄສຢູ່ທີ່ນັ້ນອີກຕໍ່ໄປ.” ພຣະເຈົ້າຢາເວກ່າວດັ່ງນີ້ແຫຼະ. 41 “ປະຊາຊົນກຳລັງມາແຕ່ປະເທດທາງທິດເໜືອ ຄືຊົນຊາດໜຶ່ງທີ່ຢູ່ຫ່າງໄກ ແລະຍິ່ງໃຫຍ່ດ້ວຍ; ກະສັດທັງຫລາຍຕ່າງກໍໄດ້ຕຽມຕົວ ເພື່ອຈະເຮັດເສິກທັງນັ້ນ. 42 ພວກເຂົາຢຶດໜ້າທະນູ ແລະດາບໄດ້ຫລວງຫລາຍ ພວກເຂົາໂຫດຮ້າຍຫລາຍໄຮ້ຄວາມເມດຕາທັງນັ້ນ. ພວກເຂົາຮ້ອງສຽງດັງກ້ອງດັ່ງຄື້ນທະເລ ເມື່ອພວກເຂົາຂີ່ມ້າຂອງຕົນແລ່ນຫອບໄປນັ້ນ. ພວກເຂົາຕ່າງກໍຕຽມພ້ອມເຂົ້າສູ່ສະໜາມ ຕຽມເຮັດສົງຄາມຕໍ່ສູ້ບາບີໂລນທັງນັ້ນ. 43 ເມື່ອກະສັດບາບີໂລນໄດ້ຍິນຂ່າວທີ່ຄົນນຳມາ ມືຂອງເພິ່ນກໍອ່ອນເພຍເປ້ຍຫລ່ອຍລົງໂລດ. ເພິ່ນຈຶ່ງຂົມຂື່ນແລະເປັນທຸກໃນຈິດໃຈ ເຈັບປວດຢ່າງໜັກດັ່ງຍິງກຳລັງຈະຄອດລູກ. 44 ສິງກຳລັງອອກມາຈາກປ່າຕຶບຂອງແຄມແມ່ນໍ້າຈໍແດນ ສູ່ທົ່ງຫຍ້າຂຽວສັນໃດ; ເຮົາກໍກຳລັງອອກມາເຮັດໃຫ້ຊາວບາບີໂລນ ແລ່ນໜີຈາກເມືອງຂອງພວກເຂົາຢ່າງກະທັນຫັນສັນນັ້ນ. ແລ້ວພວກເຈົ້ານາຍທີ່ເຮົາເລືອກໄວ້ກໍຈະປົກຄອງປະເທດ. ຜູ້ໃດປຽບທຽບກັບເຮົາໄດ້ແດ່? ຜູ້ໃດທ້າທາຍກັບເຮົາໄດ້ແດ່? ມີຜູ້ປົກຄອງຄົນໃດຕ້ານທານເຮົາໄດ້? 45 ສະນັ້ນ ຈົ່ງຟັງແຜນການທີ່ພຣະເຈົ້າຢາເວໄດ້ຕຽມໄວ້ເພື່ອຕໍ່ສູ້ນະຄອນບາບີໂລນ ແລະສິ່ງທີ່ເຮົາຕັ້ງໃຈເຮັດຕໍ່ປະຊາຊົນຂອງເມືອງນີ້. ແມ່ນແຕ່ບັນດາລູກຂອງພວກເຂົາກໍຈະຖືກລາກໄປ ແລະທຸກຄົນຈະເກີດຢ້ານກົວໃຫຍ່. 46 ເມື່ອນະຄອນບາບີໂລນຫຼົ້ມຈົມນັ້ນຈະມີສຽງດັງຂຶ້ນ ຈົນແຜ່ນດິນໂລກທັງໝົດສັ່ນສະເທືອນ ແລະສຽງແຕກຕື່ນກໍຈະໄດ້ຍິນໄປຮອດຊົນຊາດທັງຫລາຍ.” |
@ 2012 United Bible Societies. All Rights Reserved.