ເຢເຣມີຢາ 47 - ພຣະຄຳພີສັກສິອົງພຣະຜູ້ເປັນເຈົ້າກ່າວເຖິງຟີລິດສະຕິນ 1 ກ່ອນກະສັດແຫ່ງເອຢິບໄດ້ໂຈມຕີເມືອງກາຊາ ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່ຽວກັບຟີລິດສະຕິນ. 2 ພຣະເຈົ້າຢາເວກ່າວວ່າ, “ເບິ່ງແມ! ນໍ້າກຳລັງນອງຢູ່ທາງທິດເໜືອ ແລະຈະໄຫລແຮງດັ່ງນໍ້າຫ້ວຍຖ້ວມລົ້ນຕາຝັ່ງ. ນໍ້ານັ້ນຈະຖ້ວມທຸກໆສິ່ງທົ່ວທັງດິນແດນ ລວມທັງເມືອງກັບປະຊາຊົນທີ່ອາໄສຢູ່ໃນທີ່ນັ້ນ. ປະຊາຊົນຈະໂຮຮ້ອງຂໍໃຫ້ຊ່ວຍເຫລືອ ທຸກຄົນໃນແຜ່ນດິນຈະຮ້ອງໄຫ້ຢ່າງຂົມຂື່ນ. 3 ພວກເຂົາຈະໄດ້ຍິນສຽງຕີນມ້າແລ່ນກະທືບພື້ນດິນ ສຽງລົດຮົບຈະກະທົບດິນ ແລະລໍ້ລົດກໍຈະດັງກ້ອງ. ພໍ່ບໍ່ໄດ້ຫລຽວຫລັງເບິ່ງລູກໆຂອງຕົນ ມືຂອງພວກເຂົາຈະຈັບຂ້າງພໍ່ຕົນຢ່າງອ່ອນເພຍເປ້ຍຫລ່ອຍ. 4 ເຖິງເວລາແລ້ວ ທີ່ຈະທຳລາຍຟີລິດສະຕິນ ຕັດທຸກການຊ່ວຍເຫລືອແຕ່ຕີເຣ ແລະຊີໂດນຖິ້ມ ພຣະເຈົ້າຢາເວຈະທຳລາຍພວກຟີລິດສະຕິນ ຄືຄົນທີ່ມາຈາກເກາະກະເຣເຕນັ້ນ. 5 ຄວາມເສົ້າໂສກໜັກໄດ້ມາສູ່ປະຊາຊົນກາຊາ ປະຊາຊົນອາຊະເກໂລນກໍພາກັນມິດງຽບ. ພວກເຈົ້າຜູ້ລອດຕາຍຈາກພວກຄົນຮ່າງໃຫຍ່ ຕ່າງກໍຈະໄວ້ທຸກດົນນານປານໃດ? 6 ພວກເຈົ້າຜູ້ຮ້ອງວ່າ, ‘ດາບຂອງພຣະເຈົ້າຢາເວເອີຍ ຈະສືບຕໍ່ຂ້າຟັນເຫິງນານປານໃດແທ້? ຈົ່ງສອດດາບນັ້ນເຂົ້າໄວ້ໃນຝັກຂອງມັນສາ ແລະໃຫ້ມັນພັກຜ່ອນນອນຢູ່ໃນຝັກນັ້ນ.’ 7 ແຕ່ຈະໃຫ້ພັກຜ່ອນໄດ້ຢ່າງໃດ ໃນເມື່ອພຣະເຈົ້າຢາເວໄດ້ມອບໝາຍວຽກໃຫ້ມັນເຮັດ? ພຣະອົງໄດ້ສັ່ງມັນໃຫ້ໂຈມຕີເມືອງອາຊະເກໂລນ ທັງປະຊາຊົນທີ່ອາໄສຢູ່ຕາມແຄມທະເລນັ້ນ.” |
@ 2012 United Bible Societies. All Rights Reserved.