ເຢເຣມີຢາ 45 - ພຣະຄຳພີສັກສິພຣະເຈົ້າສັນຍາຕໍ່ບາຣຸກ 1 ໃນຣາຊການປີທີສີ່ຂອງກະສັດເຢໂຮຍອາກິມແຫ່ງຢູດາຍ ລູກຊາຍເຈົ້າໂຢສີຢາ ບາຣຸກລູກຊາຍຂອງເນຣີຢາໄດ້ຈົດສິ່ງທີ່ຂ້າພະເຈົ້າໄດ້ບອກໃຫ້ລາວຂຽນໄວ້. 2 ແລ້ວຂ້າພະເຈົ້າກໍໄດ້ບອກລາວວ່າ, “ບາຣຸກເອີຍ ພຣະເຈົ້າຢາເວ ພຣະເຈົ້າຂອງຊາດອິດສະຣາເອນໄດ້ກ່າວດັ່ງນີ້ວ່າ, 3 ເຈົ້າກຳລັງເວົ້າວ່າ, ‘ຂ້ອຍຍອມແພ້ ຂ້ອຍເດືອດຮ້ອນຢູ່ແລ້ວ ແລະພຣະເຈົ້າຢາເວຍັງຕື່ມຄວາມທຸກໃຈໃຫ້ຂ້ອຍອີກ. ຂ້ອຍອິດອ່ອນເພາະການຮ້ອງໄຫ້ຄວນຄາງ ແລະຂ້ອຍກໍບໍ່ໄດ້ພົບການພັກຜ່ອນໃດໆເລີຍ.’ 4 ແຕ່ພຣະເຈົ້າຢາເວກ່າວຕໍ່ເຈົ້າວ່າ, ‘ເຮົາກຳລັງດຶງສິ່ງທີ່ເຮົາໄດ້ສ້າງຂຶ້ນນັ້ນລົງ ແລະຫລົກສິ່ງທີ່ເຮົາໄດ້ປູກໄວ້ນັ້ນຖິ້ມ. ເຮົາຈະກະທຳສິ່ງນີ້ແຫຼະ ແກ່ແຜ່ນດິນໂລກທັງໝົດ. 5 ເຈົ້າກຳລັງຊອກຫາຜົນປະໂຫຍດໃສ່ຕົວເຈົ້າບໍ? ຢ່າເຮັດເລີຍ. ເຮົາກຳລັງນຳໄພພິບັດມາສູ່ມະນຸດສະໂລກທັງໝົດ, ພຣະເຈົ້າຢາເວກ່າວວ່າ ແຕ່ຢ່າງໜ້ອຍບໍ່ວ່າເຈົ້າຈະໄປທີ່ໃດ ເຈົ້າກໍຈະໜີເອົາຊີວິດໃຫ້ພົ້ນໄດ້.”’ |
@ 2012 United Bible Societies. All Rights Reserved.