ພວກ^ຜູ້ປົກຄອງ 19 - ພຣະຄຳພີສັກສິຄົນເລວີແລະເມຍນ້ອຍຂອງຕົນ 1 ໃນສະໄໝທີ່ຊາດອິດສະຣາເອນຍັງບໍ່ທັນມີກະສັດເທື່ອນັ້ນ ໄດ້ມີຄົນເລວີຄົນໜຶ່ງທີ່ອາໄສຢູ່ບ່ອນໄກທີ່ສຸດ ທາງແຖບເນີນພູເອຟຣາອິມ. ລາວໄດ້ຍິງຜູ້ໜຶ່ງຈາກເມືອງເບັດເລເຮັມແຂວງຢູດາຍມາເປັນເມຍນ້ອຍຂອງຕົນ. 2 ແຕ່ຍິງຄົນນີ້ຄຽດໃຫ້ລາວ. ສະນັ້ນ ນາງຈຶ່ງກັບຄືນໄປຢູ່ນຳພໍ່ຂອງຕົນທີ່ເບັດເລເຮັມ ເປັນເວລາສີ່ເດືອນ. 3 ຕໍ່ມາຄົນເລວີຜູ້ນີ້ກໍຕັດສິນໃຈຕາມນາງໄປ ແລະພະຍາຍາມຊັກຊວນນາງໃຫ້ຄືນເມືອຢູ່ກັບຕົນ. ລາວພາຄົນຮັບໃຊ້ກັບລໍສອງໂຕຂອງຕົນໄປນຳ. ນາງໄດ້ພາຜົວທີ່ເປັນຄົນເລວີເຂົ້າໄປໃນເຮືອນ. ເມື່ອພໍ່ຂອງນາງເຫັນຄົນເລວີຜູ້ນີ້ ເພິ່ນກໍຮັບຕ້ອນລາວດ້ວຍຄວາມຈິງໃຈ. 4 ຜູ້ເປັນພໍ່ເຖົ້າໄດ້ໜ່ວງໜ່ຽວຢາກໃຫ້ລູກເຂີຍຢູ່ນຳຕົນເປັນເວລາສາມວັນ. ຄູ່ຜົວເມຍຈຶ່ງໄດ້ກິນເຂົ້າແລະນອນຄ້າງຄືນຢູ່ທີ່ນັ້ນ. 5 ຕົກມາໃນຕອນເຊົ້າຂອງວັນທີສີ່ ພວກເຂົາກໍລຸກແຕ່ເຊົ້າໆ ແລະຕຽມຕົວຈະກັບຄືນເມືອ, ແຕ່ພໍ່ຂອງຍິງນັ້ນໄດ້ເວົ້າກັບຄົນເລວີຜູ້ນີ້ວ່າ, “ກິນຫຍັງຈັກໜ້ອຍກ່ອນສາ ເພື່ອເຈົ້າຈະໄດ້ມີແຮງແລ້ວຈຶ່ງໄປ.” 6 ດັ່ງນັ້ນ ຊາຍທັງສອງຈຶ່ງນັ່ງລົງກິນແລະດື່ມນຳກັນ. ແລ້ວຜູ້ເປັນພໍ່ຂອງຍິງນັ້ນກໍເວົ້າກັບລາວອີກວ່າ, “ນອນຄ້າງຄືນຢູ່ທີ່ນີ້ອີກສາ ເຮັດໃຫ້ສະບາຍໃຈກ່ອນຈຶ່ງກັບເມືອ.” 7 ຊາຍເລວີຈຶ່ງລຸກຂຶ້ນວ່າຈະອອກໄປ ແຕ່ຜູ້ເປັນພໍ່ເຖົ້າຍັງຊັກຊວນໃຫ້ລາວຢູ່ອີກ ລາວຈຶ່ງຄ້າງຄືນຢູ່ທີ່ນັ້ນ. 8 ໃນຕອນເຊົ້າແຕ່ເດິກໆຂອງມື້ທີຫ້າ ລາວກຳລັງຈະອອກໄປ ແຕ່ຜູ້ເປັນພໍ່ເຖົ້າເວົ້າອີກວ່າ, “ກິນຫຍັງກ່ອນສາ ແລະຖ້າໃຫ້ມັນສວຍສາກ່ອນຈຶ່ງຄ່ອຍໄປ.” ດັ່ງນັ້ນ ທັງສອງຈຶ່ງນັ່ງລົງກິນເຂົ້ານຳກັນອີກ. 9 ເທື່ອໜຶ່ງອີກ ເມື່ອຊາຍເລວີກັບເມຍນ້ອຍ ແລະຄົນຮັບໃຊ້ຂອງຕົນກຳລັງຈະອອກໄປນັ້ນ ຜູ້ເປັນພໍ່ເຖົ້າຈຶ່ງເວົ້າວ່າ, “ເບິ່ງດູ ດຽວນີ້ມັນກໍໃກ້ຈະຄໍ່າຢູ່ແລ້ວ ເຈົ້າພັກຢູ່ນີ້ອີກຈັກຄືນຄົງຈະເປັນການດີກວ່າ ເພາະມັນໃກ້ຈະມືດແລ້ວ. ຈົ່ງຢູ່ທີ່ນີ້ແລະເຮັດໃຫ້ໃຈສະບາຍກ່ອນ ແລະມື້ອື່ນຈຶ່ງກັບເມືອແຕ່ເດິກໆກໍໄດ້.” 10-11 ແຕ່ຊາຍຄົນນີ້ບໍ່ຢາກຄ້າງຄືນອີກຕໍ່ໄປ. ສະນັ້ນ ລາວແລະເມຍນ້ອຍຂອງຕົນຈຶ່ງອອກເດີນທາງ ພ້ອມກັບຄົນຮັບໃຊ້ ແລະລໍສອງໂຕທີ່ມີອານພາດເທິງຫລັງ. ເມື່ອພວກເຂົາໄດ້ເດີນທາງມາໃກ້ຈະຮອດເມືອງເຢບູ (ຊຶ່ງແມ່ນເຢຣູຊາເລັມ) ກໍຂ້ອນຄໍ່າແລ້ວ. ຄົນຮັບໃຊ້ຈຶ່ງເວົ້າກັບນາຍຂອງຕົນວ່າ, “ພວກເຮົາຄ້າງຄືນຢູ່ທີ່ເມືອງຂອງຊາວເຢບຸດນີ້ສາກ່ອນ ບໍ່ດີບໍ?” 12-13 ແຕ່ນາຍຂອງລາວຕອບວ່າ, “ພວກເຮົາຈະບໍ່ຢຸດພັກຢູ່ໃນເມືອງທີ່ບໍ່ເປັນຂອງຄົນອິດສະຣາເອນ. ໃຫ້ພວກເຮົາຜ່ານເມືອງນີ້ໄປໄກຈັກໜ້ອຍ ແລະຄ້າງຄືນຢູ່ທີ່ກີເບອາຫລືທີ່ຣາມາ.” 14 ດັ່ງນັ້ນ ພວກເຂົາຈຶ່ງກາຍເມືອງເຢບູແລະເດີນທາງຕໍ່ໄປ. ເມື່ອພວກເຂົາມາເຖິງເມືອງກີເບອາໃນເຂດແດນຂອງເຜົ່າເບັນຢາມິນ ກໍເປັນເວລາຕາເວັນຕົກດິນແລ້ວ. 15 ພວກເຂົາຈຶ່ງແວ່ເຂົ້າໄປຄ້າງຄືນໃນເມືອງນີ້. ພວກເຂົາໄດ້ເຂົ້າໄປໃນເມືອງແລະນັ່ງຢູ່ທີ່ສີ່ແຍກກາງເມືອງ; ແຕ່ບໍ່ມີໃຜເຊີນພວກເຂົາໃຫ້ເຂົ້າໄປພັກຄ້າງຄືນຢູ່ໃນເຮືອນ. 16 ໃນຂະນະນັ້ນ ຍັງມີຊາຍແກ່ຜູ້ໜຶ່ງທີ່ຫາກໍເລີກຈາກວຽກໄຮ່ການນາຂອງຕົນ ກຳລັງຍ່າງຜ່ານມາທາງນັ້ນ. ລາວເປັນຄົນມາຈາກແຖບເນີນພູເອຟຣາອິມ ແຕ່ດຽວນີ້ອາໄສຢູ່ໃນເມືອງກີເບອາ (ສ່ວນຄົນອື່ນທີ່ຢູ່ໃນເມືອງນີ້ເປັນຊາວເຜົ່າເບັນຢາມິນ). 17 ເມື່ອຊາຍແກ່ຜູ້ນີ້ສັງເກດເຫັນຄົນແປກໜ້າ ທີ່ສີ່ແຍກກາງເມືອງ ລາວຈຶ່ງຖາມວ່າ, “ພວກເຈົ້າມາແຕ່ໃສ? ແລະພວກເຈົ້າຈະໄປໃສ?” 18 ຄົນເລວີຈຶ່ງຕອບວ່າ, “ພວກຂ້ອຍມາຈາກເມືອງເບັດເລເຮັມແຂວງຢູດາຍ; ດຽວນີ້ພວກຂ້ອຍກຳລັງກັບເມືອເຮືອນ ທີ່ຢູ່ໄກອອກໄປທາງແຖບເນີນພູເອຟຣາອິມພຸ້ນ ແຕ່ບໍ່ມີໃຜເຊີນພວກຂ້ອຍໃຫ້ເຂົ້າໄປຄ້າງຄືນໃນເຮືອນ. 19 ເຖິງແມ່ນວ່າພວກຂ້ອຍມີອາຫານ, ມີເຟືອງໃຫ້ລໍ, ມີເຂົ້າຈີ່ ແລະນໍ້າອະງຸ່ນສຳລັບຂ້ອຍກັບເມຍແລະຄົນຮັບໃຊ້ຂອງຂ້ອຍກໍດີ. ພວກຂ້ອຍມີທຸກສິ່ງມາພ້ອມ.” 20 ຊາຍແກ່ຄົນນັ້ນຈຶ່ງເວົ້າວ່າ, “ຂ້ອຍເອງຍິນດີຕ້ອນຮັບພວກເຈົ້າ ໃຫ້ເຂົ້າໄປໃນເຮືອນຂອງຂ້ອຍ. ຂ້ອຍຈະເບິ່ງແຍງພວກເຈົ້າ ພວກເຈົ້າບໍ່ຕ້ອງຄ້າງຄືນຢູ່ທີ່ສີ່ແຍກກາງເມືອງນີ້ດອກ.” 21 ແລ້ວລາວກໍພາພວກເຂົາເມືອເຮືອນຂອງຕົນ ແລະເອົາເຟືອງໃຫ້ລໍກິນ. ແຂກຂອງຊາຍແກ່ໄດ້ພາກັນລ້າງຕີນແລະກິນເຂົ້າແລງ. 22 ໃນຂະນະທີ່ພວກເຂົາກຳລັງລົມກັນຢ່າງມ່ວນຊື່ນຢູ່ນັ້ນ ໄດ້ມີພວກນັກເລງມາລ້ອມເຮືອນໄວ້ແລະໃຊ້ກຳປັ້ນຕີປະຕູເຮືອນ. ພວກເຂົາຮ້ອງບອກຊາຍແກ່ຜູ້ນັ້ນວ່າ, “ຈົ່ງນຳເອົາຊາຍທີ່ມາຄ້າງຢູ່ໃນເຮືອນຂອງເຈົ້າອອກມາ ເພາະພວກຂ້ອຍຢາກຮ່ວມເພດກັບລາວ.” 23 ແຕ່ຊາຍແກ່ຄົນນີ້ໄດ້ອອກໄປຂ້າງນອກ ແລະເວົ້າຕໍ່ພວກເຂົາວ່າ, “ພີ່ນ້ອງເອີຍ ຢ່າເຮັດເທາະ ຂ້ອຍຮ້ອງຂໍນຳ. ຢ່າເຮັດໃນສິ່ງທີ່ຜິດສິນທຳອັນຊົ່ວຊ້ານີ້ເລີຍ ຊາຍຄົນນີ້ເປັນແຂກຂອງຂ້ອຍ. 24 ຫັ້ນເດ ລູກສາວຂອງຂ້ອຍທີ່ຍັງບໍຣິສຸດຢູ່ແລະເມຍຂອງລາວ. ຂ້ອຍຈະພາພວກເຂົາອອກມາໃຫ້ພວກເຈົ້າດຽວນີ້ ແລະໃຫ້ເປັນຂອງພວກເຈົ້າ. ພວກເຈົ້າຢາກເຮັດຢ່າງໃດກັບພວກເຂົາກໍຈົ່ງເຮັດຕາມຊອບໃຈເຖີດ ແຕ່ຢ່າເຮັດແບບຮ້າຍກາດຕໍ່ຊາຍຄົນນີ້ເລີຍ.” 25 ພວກນັກເລງນັ້ນບໍ່ຍອມຟັງຊາຍແກ່ຄົນນັ້ນເລີຍ. ສະນັ້ນ ຄົນເລວີຈຶ່ງເອົາເມຍນ້ອຍຂອງຕົນອອກໄປປະໄວ້ຢູ່ຂ້າງນອກກັບພວກເຂົາ. ພວກເຂົາພາກັນກຸມ ແລະຂົ່ມຂືນນາງຢ່າງບໍ່ຢຸດຢັ້ງ ຈົນເຖິງມື້ເຊົ້າ. 26 ພໍຮຸ່ງເຊົ້າມາ ຍິງຄົນນີ້ກໍມາລົ້ມຢູ່ທີ່ປະຕູເຮືອນຂອງຊາຍແກ່ຜູ້ນີ້ ຄືບ່ອນທີ່ຜົວຂອງຕົນພັກຢູ່ນັ້ນ. ເມື່ອເວລາເຊົ້າມາ ນາງກໍຍັງຢູ່ທີ່ນັ້ນ. 27 ເມື່ອຜົວຂອງນາງລຸກຂຶ້ນມາໃນຕອນເຊົ້າ ແລະເປີດປະຕູວ່າຈະອອກເດີນທາງໄປ ລາວກໍພົບເມຍນ້ອຍຂອງຕົນຢູ່ຕໍ່ໜ້າເຮືອນ ໂດຍນອນຢຽດມືຈຸກັບປະຕູເຮືອນ. 28 ລາວເວົ້າວ່າ, “ລຸກຂຶ້ນໄປກັນເທາະ.” ແຕ່ບໍ່ມີສຽງຕອບໃດໆໝົດ. ດັ່ງນັ້ນ ລາວຈຶ່ງເອົາຊາກສົບຂອງນາງພາດໃສ່ຫລັງລໍ ແລະອອກເດີນທາງກັບເມືອເຮືອນ. 29 ເມື່ອມາເຖິງເຮືອນແລ້ວ ລາວກໍໃຊ້ພ້າຕັດຮ່າງກາຍຂອງເມຍນ້ອຍນັ້ນ ອອກເປັນສິບສອງຕ່ອນ ແລະຈັດສົ່ງໃຫ້ແຕ່ລະເຜົ່າໃນສິບສອງເຜົ່າຂອງຊາດອິດສະຣາເອນ. 30 ທຸກຄົນທີ່ໄດ້ເຫັນເຫດການນີ້ຈຶ່ງພາກັນເວົ້າວ່າ, “ພວກເຮົາບໍ່ເຄີຍເຫັນຢ່າງນີ້ມາກ່ອນ. ຕັ້ງແຕ່ຊາວອິດສະຣາເອນອອກມາຈາກປະເທດເອຢິບ ບໍ່ເຄີຍມີເຫດການຢ່າງນີ້ເກີດຂຶ້ນເລີຍ. ພວກເຮົາຄວນເຮັດຢ່າງໃດກ່ຽວກັບເລື່ອງນີ້?” |
@ 2012 United Bible Societies. All Rights Reserved.