ພວກ^ຜູ້ປົກຄອງ 16 - ພຣະຄຳພີສັກສິແຊມຊັນທີ່ກາຊາ 1 ຕໍ່ມາ ແຊມຊັນໄດ້ຈາກເມືອງເລຮີໄປທີ່ເມືອງກາຊາ. ໃນເມືອງນີ້ ລາວໄດ້ພົບຍິງໂສເພນີຜູ້ໜຶ່ງຈຶ່ງເຂົ້າໄປນອນນຳນາງ. 2 ເມື່ອປະຊາຊົນຊາວກາຊາຮູ້ວ່າແຊມຊັນຢູ່ໃນທີ່ນັ້ນ ພວກເຂົາກໍມາອ້ອມບ່ອນນັ້ນໄວ້ ແລະຄອຍຖ້າຈັບລາວຢູ່ທີ່ປະຕູເມືອງຕະຫລອດຄືນ. ພວກເຂົາມິດງຽບຢູ່ຕະຫລອດຄືນ ແລະຄິດວ່າ, “ພວກເຮົາຕ້ອງຄອຍຖ້າຈົນເຖິງມື້ເຊົ້າ ແລ້ວຈະຂ້າມັນຖິ້ມ.” 3 ແຕ່ແຊມຊັນນອນຮອດທ່ຽງຄືນເທົ່ານັ້ນ ແລ້ວລາວກໍໄປດຶງເອົາປະຕູເມືອງ ທີ່ມີທັງບານແລະຂອບປະຕູ ຕະຫລອດທັງໄລໃນນັ້ນແບກໃສ່ບ່າ ອອກໄປເທິງຍອດພູທີ່ຢູ່ໃກ້ກັບເມືອງເຮັບໂຣນ. ແຊມຊັນແລະນາງເດລີລາ 4 ຫລັງຈາກນັ້ນ ແຊມຊັນກໍໄດ້ຮັກກັບຍິງຄົນໜຶ່ງຊື່ວ່າ ເດລີລາ. ນາງອາໄສຢູ່ໃນຮ່ອມພູໂສເຣັກ. 5 ກະສັດຊາວຟີລິດສະຕິນຫ້າຄົນໄດ້ໄປຫາຍິງນີ້ ແລະເວົ້າວ່າ, “ໃຫ້ເຈົ້າຍົວະຖາມແຊມຊັນວ່າເປັນຫຍັງລາວຈຶ່ງແຮງແທ້? ພວກຂ້ອຍຈະຊະນະລາວ, ມັດລາວ ແລະເຮັດໃຫ້ລາວອ່ອນແຮງໄດ້ຢ່າງໃດ? ແລ້ວພວກຂ້ອຍແຕ່ລະຄົນກໍຈະເອົາເງິນໃຫ້ເຈົ້າຜູ້ລະໜຶ່ງພັນໜຶ່ງຮ້ອຍຫລຽນ.” 6 ດັ່ງນັ້ນ ນາງເດລີລາຈຶ່ງເວົ້າກັບແຊມຊັນວ່າ, “ກະລຸນາບອກໃຫ້ຂ້ອຍຮູ້ແດ່ວ່າ ແມ່ນຫຍັງທີ່ເຮັດໃຫ້ເຈົ້າແຂງແຮງແທ້? ຖ້າຄົນໃດຄົນໜຶ່ງຢາກມັດເຈົ້າແລະຢາກເຮັດໃຫ້ເຈົ້າບໍ່ແຂງແຮງ ເຂົາຈະຕ້ອງເຮັດຢ່າງໃດ?” 7 ແຊມຊັນຕອບວ່າ, “ຖ້າພວກເຂົາມັດຂ້ອຍດ້ວຍເຊືອກໜ້າທະນູໃໝ່ໆເຈັດເສັ້ນທີ່ບໍ່ທັນແຫ້ງ ຂ້ອຍກໍຈະກາຍເປັນຄົນບໍ່ແຂງແຮງດັ່ງຄົນທົ່ວໄປ.” 8 ເມື່ອຮູ້ດັ່ງນັ້ນ ບັນດາກະສັດຟີລິດສະຕິນຈຶ່ງນຳເອົາເຊືອກໜ້າທະນູໃໝ່ໆ ທີ່ບໍ່ທັນແຫ້ງເຈັດເສັ້ນມາໃຫ້ເດລີລາ. 9 ນາງຈຶ່ງໃຫ້ຄົນພວກໜຶ່ງຄອຍຖ້າຢູ່ໃນຫ້ອງອື່ນ ສ່ວນນາງເອງໄດ້ເອົາເຊືອກນັ້ນມັດແຊມຊັນ ແລະຮ້ອງຂຶ້ນວ່າ, “ແຊມຊັນ ພວກຟີລິດສະຕິນກຳລັງມາ.” ແຕ່ແຊມຊັນຟຶດເຊືອກທີ່ມັດແຂນນັ້ນຂາດດັ່ງໄຟໄໝ້ເສັ້ນດ້າຍ. ດ້ວຍເຫດນີ້ ພວກຟີລິດສະຕິນຈຶ່ງຍັງບໍ່ຮູ້ຄວາມເລິກລັບກ່ຽວກັບກຳລັງຂອງແຊມຊັນໄດ້ເທື່ອ. 10 ຕໍ່ມາ ນາງເດລີລາກໍເວົ້າຕໍ່ແຊມຊັນອີກວ່າ, “ເຈົ້າຫລອກລວງແລະຕົວະຂ້ອຍ ບອກຂ້ອຍແດ່ໄດ້ບໍວ່າ ເຂົາຈະມັດເຈົ້າໄດ້ດ້ວຍວິທີໃດ?” 11 ແຊມຊັນຈຶ່ງບອກນາງວ່າ, “ຖ້າພວກເຂົາມັດຂ້ອຍດ້ວຍເຊືອກໃໝ່ໆທີ່ບໍ່ທັນໃຊ້ ຂ້ອຍຈະບໍ່ແຂງແຮງດັ່ງຄົນທົ່ວໄປ.” 12 ນາງເດລີລາຈຶ່ງເອົາເຊືອກໃໝ່ໆມາມັດແຊມຊັນ ທັງຮ້ອງຂຶ້ນວ່າ, “ແຊມຊັນ ພວກຟີລິດສະຕິນກຳລັງມາ.” ສ່ວນພວກທີ່ລໍຄອຍຈັບແຊມຊັນນັ້ນກໍຖ້າຢູ່ໃນຫ້ອງອື່ນ. ແຊມຊັນຟຶດເຊືອກທີ່ມັດແຂນຢູ່ນັ້ນຂາດດັ່ງທຸດເສັ້ນດ້າຍ. 13 ແລ້ວເດລີລາກໍໄດ້ເວົ້າຕໍ່ແຊມຊັນວ່າ, “ເຈົ້າຍັງຫລອກລວງຂ້ອຍຢູ່ ບອກຂ້ອຍແດ່ວ່າ ເຂົາຈະມັດເຈົ້າໄດ້ດ້ວຍວິທີໃດ?” ແຊມຊັນບອກນາງວ່າ, “ຖ້າເຈົ້າເອົາຜົມຂອງຂ້ອຍເຈັດປອຍໄປຕໍ່າໃສ່ຫູກ ທັງຖົກຟືມໃຫ້ແໜ້ນ ຂ້ອຍກໍຈະກາຍເປັນຄົນບໍ່ແຂງແຮງດັ່ງຄົນທົ່ວໄປ.” 14 ເດລີລາຈຶ່ງກ່ອມແຊມຊັນໃຫ້ນອນ ແລ້ວນາງກໍເອົາຜົມຂອງແຊມຊັນເຈັດປອຍຕໍ່າໃສ່ຫູກ ແລະຖົກຟືມໃຫ້ແໜ້ນ ແລະຮ້ອງຂຶ້ນວ່າ, “ແຊມຊັນ ພວກຟີລິດສະຕິນກຳລັງມາ” ແຊມຊັນລຸກຂຶ້ນຖອດຟືມອອກແລະດຶງເຄືອຫູກຂາດ. 15 ດັ່ງນັ້ນ ນາງເດລີລາຈຶ່ງເວົ້າຕໍ່ແຊມຊັນວ່າ, “ເຈົ້າເວົ້າວ່າເຈົ້າຮັກຂ້ອຍໄດ້ຢ່າງໃດ ໃນເມື່ອເຈົ້າບໍ່ຮັກຂ້ອຍເລີຍ? ເຈົ້າຫລອກລວງຂ້ອຍເຖິງສາມເທື່ອ ແລະເຈົ້າຍັງບໍ່ທັນບອກຂ້ອຍເລີຍວ່າ ດ້ວຍເຫດໃດເຈົ້າຈຶ່ງແຂງແຮງແທ້?” 16 ນາງເດລີລາໄດ້ຖາມຢູ່ທຸກມື້ ຈົນແຊມຊັນເບື່ອໜ່າຍທີ່ຈະຟັງ ຍ້ອນນາງລົບກວນ. 17 ໃນທີ່ສຸດ ແຊມຊັນຈຶ່ງບອກນາງຕາມຄວາມຈິງວ່າ, “ຂ້ອຍບໍ່ເຄີຍຕັດຜົມຈັກເທື່ອ ເພາະຂ້ອຍອຸທິດຕົວແກ່ພຣະເຈົ້າເປັນຄົນນາຊີຣີ ນັບຕັ້ງແຕ່ມື້ທີ່ຂ້ອຍໄດ້ເກີດມາ. ຖ້າຂ້ອຍຕັດຜົມເມື່ອໃດ ຂ້ອຍຈະສູນເສຍແຮງເມື່ອນັ້ນ ແລະຂ້ອຍຈະບໍ່ແຂງແຮງດັ່ງຄົນທົ່ວໄປ.” 18 ເມື່ອນາງເດລີລາແນ່ໃຈວ່າແຊມຊັນໄດ້ບອກຄວາມຈິງແລ້ວ ນາງກໍສົ່ງຂ່າວໄປບອກພວກກະສັດຟີລິດສະຕິນວ່າ, “ເຊີນກັບມາອີກເທື່ອໜຶ່ງເຖີດ ແຊມຊັນໄດ້ບອກຄວາມຈິງໃຫ້ຂ້ອຍຮູ້ແລ້ວ.” ພວກເຂົາຈຶ່ງມາພ້ອມທັງຖືເງິນມານຳດ້ວຍ. 19 ເດລີລາໄດ້ກ່ອມແຊມຊັນໃຫ້ນອນເທິງຕັກຂອງນາງ ແລະເອີ້ນໃຫ້ຜູ້ໜຶ່ງມາຕັດຜົມຂອງລາວອອກເຈັດປອຍ. ແລ້ວນາງກໍໄດ້ຊຸກແຊມຊັນໃຫ້ຕື່ນ ແຕ່ລາວບໍ່ມີແຮງສາແລ້ວ. 20 ນາງເດລີລາຮ້ອງຂຶ້ນວ່າ, “ແຊມຊັນ ພວກຟີລິດສະຕິນກຳລັງມາ.” ແຊມຊັນຈຶ່ງລຸກຂຶ້ນແລະຄິດວ່າ, “ຂ້ອຍຈະໄປໄດ້ຢ່າງສະບາຍດັ່ງແຕ່ກ່ອນ.” ລາວບໍ່ຮູ້ເລີຍວ່າພຣະເຈົ້າຢາເວບໍ່ໄດ້ຢູ່ນຳລາວແລ້ວ. 21 ຕໍ່ມາ ພວກຟີລິດສະຕິນກໍຈັບແຊມຊັນໄດ້ ແລະເຈາະແກ່ນຕາທັງສອງຂອງລາວ. ພວກເຂົາໄດ້ນຳລາວໄປທີ່ເມືອງກາຊາ ແລະໃຊ້ໂສ້ທີ່ເປັນທອງສຳຣິດລ່າມລາວໄວ້ ແລະທັງບັງຄັບລາວໃຫ້ໂມ້ແປ້ງຢູ່ໃນຄຸກ. 22 ແຕ່ຜົມຂອງແຊມຊັນໄດ້ເລີ່ມປົ່ງຂຶ້ນອີກ. ແຊມຊັນຕາຍ 23 ພວກກະສັດຂອງຊາວຟີລິດສະຕິນໄດ້ພາກັນມາສະເຫລີມສະຫລອງ ງານຖວາຍບູຊາຄັ້ງຍິ່ງໃຫຍ່ແກ່ພະດາໂກນຂອງພວກເຂົາ. ພວກເຂົາຮ້ອງເພງວ່າ, “ພະຂອງພວກເຮົາໃຫ້ພວກເຮົາມີໄຊເໜືອແຊມຊັນ ສັດຕູຄູ່ອາຄາດ.” 24-25 ພວກເຂົາກຳລັງມ່ວນຊື່ນ ແລະເວົ້າວ່າ, “ຈົ່ງນຳແຊມຊັນອອກມາ ແລະບັງຄັບມັນເຮັດຕະຫລົກໃຫ້ພວກເຮົາເບິ່ງ.” ເມື່ອພວກເຂົາໄດ້ນຳແຊມຊັນອອກມາຈາກຄຸກແລ້ວ ພວກເຂົາກໍໃຫ້ລາວຢືນຢູ່ລະຫວ່າງເສົາຂອງຕຶກ ແລະບັງຄັບລາວເຮັດຕະຫລົກໃຫ້ພວກເຂົາເບິ່ງ. ເມື່ອປະຊາຊົນເຫັນແຊມຊັນ ຈຶ່ງພາກັນສັນລະເສີນພະຂອງພວກຕົນວ່າ, “ພະຂອງພວກເຮົາໃຫ້ພວກເຮົາມີໄຊຊະນະເໜືອເຫຼົ່າສັດຕູ ຜູ້ທີ່ທຳລາຍດິນແດນແລະຂ້າຄົນຂອງພວກເຮົາຫລາຍຄົນ.” 26 ແຊມຊັນເວົ້າກັບເດັກນ້ອຍຜູ້ທີ່ຈູງມືຂອງລາວນັ້ນວ່າ, “ພາຂ້ອຍໄປຢືນຢູ່ແປະກັບເສົາຄໍ້າຕຶກນີ້ແດ່ ເພາະຂ້ອຍຢາກອີງເສົາ.” 27 ຫໍໂຮງນີ້ເຕັມໄປດ້ວຍປະຊາຊົນທັງຊາຍແລະຍິງ. ກະສັດຟີລິດສະຕິນທັງຫ້າຄົນກໍຢູ່ໃນບ່ອນນັ້ນດ້ວຍ. ທີ່ເທິງຫລັງຄາພຽງມີປະຊາຊົນທັງຊາຍແລະຍິງປະມານສາມພັນຄົນ; ພວກເຂົາຕ່າງກໍກຳລັງຈ້ອງຕາເບິ່ງແຊມຊັນຕະຫລົກໃຫ້ພວກເຂົາເບິ່ງ. 28 ແລ້ວແຊມຊັນກໍພາວັນນາອະທິຖານຕໍ່ພຣະເຈົ້າຢາເວວ່າ, “ຂ້າແດ່ອົງພຣະຜູ້ເປັນເຈົ້າ ພຣະເຈົ້າເອີຍ ຂໍໂຜດຈື່ຈຳຂ້ານ້ອຍດ້ວຍເຖີດ. ໂອ ພຣະເຈົ້າເອີຍ ໂຜດໃຫ້ກຳລັງວັງຊາແກ່ຂ້ານ້ອຍອີກພຽງຄັ້ງດຽວເທົ່ານັ້ນ ເພື່ອຂ້ານ້ອຍຈະລ້າງແຄ້ນພວກຟີລິດສະຕິນ ເພາະພວກເຂົາເຈາະແກ່ນຕາທັງສອງເບື້ອງຂອງຂ້ານ້ອຍ.” 29 ສະນັ້ນ ແຊມຊັນຈຶ່ງຈັບສອງເສົາກາງທີ່ຄໍ້າຫໍໂຮງ ແລະທຸ້ມເທກຳລັງທັງໝົດທີ່ຕົນມີຢູ່ຊຸກເສົາທັງສອງນັ້ນ 30 ພ້ອມທັງຮ້ອງຂຶ້ນວ່າ, “ຂໍໃຫ້ຂ້ານ້ອຍຕາຍພ້ອມກັບຊາວຟີລິດສະຕິນນີ້ເຖີດ.” ລາວຊຸກເສົາຈົນຫໍໂຮງເຈື່ອນລົງທັບກະສັດທັງຫ້າແລະຄົນອື່ນໆອີກ. ແຊມຊັນໄດ້ຂ້າຄົນໃນເວລາທີ່ລາວຕາຍນີ້ ຫລາຍກວ່າຂະນະທີ່ລາວຍັງມີຊີວິດຢູ່. 31 ພວກຍາດຕິພີ່ນ້ອງກັບຄອບຄົວຂອງແຊມຊັນໄດ້ມາເອົາຊາກສົບຂອງລາວກັບເມືອ ແລະນຳໄປຝັງໄວ້ຢູ່ໃນບ່ອນຝັງສົບຂອງມາໂນອາພໍ່ຂອງລາວ ທີ່ຢູ່ລະຫວ່າງເມືອງໂຊຣາ ແລະເມືອງເອຊະຕາໂອນ. ແຊມຊັນໄດ້ປົກຄອງຊາດອິດສະຣາເອນເປັນເວລາຊາວປີ. |
@ 2012 United Bible Societies. All Rights Reserved.