ພວກ^ຜູ້ປົກຄອງ 14 - ພຣະຄຳພີສັກສິແຊມຊັນມັກຜູ້ສາວຊາວຕິມນາ 1 ມື້ໜຶ່ງ ແຊມຊັນໄດ້ລົງໄປທີ່ເມືອງຕິມນາ ຊຶ່ງໃນເມືອງນີ້ລາວໄດ້ສັງເກດເຫັນຜູ້ສາວຊາວຟີລິດສະຕິນຄົນໜຶ່ງ. 2 ລາວຈຶ່ງກັບຄືນເມືອເຮືອນແລະເວົ້າສູ່ພໍ່ແມ່ຂອງຕົນຟັງວ່າ, “ລູກໄດ້ສັງເກດເຫັນຜູ້ສາວຊາວຟີລິດສະຕິນຄົນໜຶ່ງຢູ່ໃນເມືອງຕິມນາ. ລູກຢາກແຕ່ງງານກັບນາງ ກະລຸນາໄປສູ່ຂໍນາງໃຫ້ລູກແດ່.” 3 ແຕ່ພໍ່ແມ່ໄດ້ຖາມລາວວ່າ, “ເປັນຫຍັງລູກຈຶ່ງຢາກໄປເອົາເມຍຊາວຟີລິດສະຕິນ ຄົນບໍ່ນັບຖືພຣະເຈົ້າ? ລູກຊອກຫາຜູ້ສາວໃນຕະກຸນຂອງເຮົາເອງ ໃນທ່າມກາງປະຊາຊົນຂອງພວກເຮົານີ້ບໍ່ໄດ້ຊັ້ນບໍ?” ແຕ່ແຊມຊັນຕອບພໍ່ວ່າ, “ລູກພໍໃຈນຳນາງແຕ່ຄົນດຽວ ໄປສູ່ຂໍນາງໃຫ້ລູກແດ່.” 4 ພໍ່ແມ່ຂອງແຊມຊັນບໍ່ຮູ້ວ່າ ແມ່ນພຣະເຈົ້າຢາເວທີ່ນຳພາແຊມຊັນໃຫ້ເຮັດຢ່າງນີ້ ຍ້ອນພຣະອົງຊອກຫາໂອກາດທີ່ຈະສູ້ຮົບກັບຊາວຟີລິດສະຕິນຢູ່. ໃນເວລານັ້ນ ຊາດອິດສະຣາເອນໄດ້ຕົກຢູ່ໃຕ້ອຳນາດຂອງພວກຟີລິດສະຕິນ. 5 ຕໍ່ມາ ແຊມຊັນໄດ້ລົງໄປທີ່ເມືອງຕິມນາພ້ອມດ້ວຍພໍ່ແມ່ຂອງຕົນ. ເມື່ອພວກເຂົາຜ່ານສວນອະງຸ່ນຂອງເມືອງນັ້ນໄປ ແຊມຊັນກໍໄດ້ຍິນສຽງຮ້ອງຂອງສິງໜຸ່ມໂຕໜຶ່ງ. 6 ໃນທັນໃດ ພຣະວິນຍານຂອງພຣະເຈົ້າຢາເວໄດ້ບັນດານໃຫ້ແຊມຊັນມີກຳລັງຂຶ້ນ ລາວຈຶ່ງໃຊ້ມືຈີກສິງໂຕນັ້ນເໝືອນກັບຈີກແບ້ໂຕນ້ອຍໆ. ແຕ່ແຊມຊັນບໍ່ໄດ້ບອກສິ່ງທີ່ຕົນໄດ້ເຮັດໃຫ້ພໍ່ແມ່ຂອງຕົນຮູ້ນຳ. 7 ແລ້ວລາວກໍໄດ້ໄປລົມສາວຜູ້ນັ້ນ ແລະພໍໃຈນຳນາງຫລາຍ. 8 ບໍ່ພໍເທົ່າໃດວັນຕໍ່ມາ ແຊມຊັນກໍກັບມາແຕ່ງງານກັບນາງ. ໃນຕອນເດີນທາງນັ້ນ ລາວໄດ້ແວ່ໄປເບິ່ງຊາກສົບຂອງສິງທີ່ຕົນໄດ້ຂ້າ ລາວຈຶ່ງປະຫລາດໃຈທີ່ໄດ້ເຫັນຝູງໂຕເຜິ້ງ ແລະນໍ້າເຜິ້ງຢູ່ໃນຊາກສິງໂຕນັ້ນ. 9 ລາວບີບເອົານໍ້າເຜິ້ງໃສ່ມືແລະກິນໄປຕາມທາງ. ເມື່ອໄປທັນພໍ່ແມ່ແລ້ວ ລາວຈຶ່ງແບ່ງນໍ້າເຜິ້ງນັ້ນໃຫ້ພໍ່ແມ່ກິນນຳ. ພວກເພິ່ນກໍກິນ, ແຕ່ແຊມຊັນບໍ່ໄດ້ບອກວ່າ ລາວໄດ້ນໍ້າເຜິ້ງນັ້ນມາຈາກຊາກສິງ. 10 ພໍ່ຂອງແຊມຊັນໄດ້ໄປທີ່ເຮືອນຂອງຍິງສາວ ແລະແຊມຊັນໄດ້ຈັດງານກິນລ້ຽງຂຶ້ນຕາມທຳນຽມຂອງພວກໜຸ່ມສາວໃນທີ່ນັ້ນ. 11 ເມື່ອຊາວຟີລິດສະຕິນເຫັນລາວ ພວກເຂົາກໍໃຊ້ຊາຍໜຸ່ມສາມສິບຄົນ ໄປຢູ່ກັບລາວ. 12-13 ແຊມຊັນເວົ້າກັບພວກເຂົາວ່າ, “ຂໍໃຫ້ຂ້ອຍທວາຍພວກເຈົ້າບັນຫາໜຶ່ງ ຖ້າພວກເຈົ້າຕີຄວາມໝາຍຂອງບັນຫານັ້ນໄດ້ ຂ້ອຍຈະເອົາຜ້າປ່ານເນື້ອລະອຽດດີສາມສິບຊຸດ ແລະເສື້ອຜ້າໂຕງາມໆສາມສິບຊຸດ ໃຫ້ພວກເຈົ້າ. ຂ້ອຍຂໍພະນັນວ່າ, ພາຍໃນເຈັດວັນ ກ່ອນພິທີແຕ່ງງານສິ້ນສຸດລົງ ພວກເຈົ້າກໍຈະແກ້ບັນຫານັ້ນບໍ່ໄດ້.” ພວກເຂົາຈຶ່ງເວົ້າຕໍ່ແຊມຊັນວ່າ, “ໃຫ້ບອກບັນຫານັ້ນມາເບິ່ງດູ.” 14 ແຊມຊັນເວົ້າວ່າ, “ມີອາຫານເນື່ອງມາຈາກຜູ້ກິນ ມີຂອງຫວານກິນເນື່ອງມາຈາກຜູ້ມີແຮງ.” ສາມວັນຕໍ່ມາ ພວກເຂົາກໍຍັງຕີຄວາມໝາຍຂອງບັນຫານັ້ນບໍ່ໄດ້. 15 ໃນວັນທີສີ່ ພວກເຂົາເວົ້າຕໍ່ເມຍຂອງແຊມຊັນວ່າ, “ຈົ່ງຍົວະຖາມຜົວຂອງເຈົ້າ ບອກຄວາມໝາຍຂອງບັນຫາໃຫ້ພວກເຮົາຮູ້ແດ່. ຖ້າບໍ່ດັ່ງນັ້ນ ພວກເຮົາຈະຈູດເຮືອນພໍ່ຂອງເຈົ້າພ້ອມທັງເຈົ້າດ້ວຍ. ເຈົ້າທັງສອງເຊີນພວກເຮົາມາ ເພື່ອຈະປຸ້ນພວກເຮົາຊັ້ນບໍ?” 16 ດັ່ງນັ້ນ ເມຍຂອງແຊມຊັນຈຶ່ງໄປຫາຜົວຂອງຕົນທັງຮ້ອງໄຫ້ ແລະເວົ້າວ່າ, “ເຈົ້າບໍ່ຮັກຂ້ອຍ ເຈົ້າຊັງຂ້ອຍ. ເຈົ້າຕັ້ງບັນຫາໃຫ້ໝູ່ຂອງຂ້ອຍ ແຕ່ບໍ່ບອກຄວາມໝາຍໃຫ້ຂ້ອຍຮູ້ນຳ.” ແຊມຊັນເວົ້າຕໍ່ນາງວ່າ, “ແມ່ນແຕ່ພໍ່ແມ່ຂອງຂ້ອຍ, ຂ້ອຍກໍບໍ່ໄດ້ບອກເພິ່ນ. ເຫດໃດຂ້ອຍຈຶ່ງຈະບອກເຈົ້າໄດ້.” 17 ເມຍຂອງແຊມຊັນຈຶ່ງຮ້ອງໄຫ້ເພາະເລື່ອງນີ້ຢູ່ຕະຫລອດເຈັດວັນ ທີ່ມີງານກິນລ້ຽງ. ແຕ່ພໍຮອດວັນທີເຈັດແຊມຊັນຈຶ່ງບອກຄຳຕອບແກ່ນາງ ຍ້ອນວ່ານາງເປັນຄົນຊູຊີຫລາຍ. ແລ້ວນາງກໍນຳເອົາຄຳຕອບນັ້ນໄປບອກຊາວຟີລິດສະຕິນ. 18 ດັ່ງນັ້ນ ໃນວັນທີເຈັດກ່ອນແຊມຊັນເຂົ້າໄປຫ້ອງນອນ ພວກຜູ້ຊາຍໃນເມືອງຈຶ່ງເວົ້າຕໍ່ລາວວ່າ, “ບໍ່ມີສິ່ງໃດທີ່ຫວານກວ່ານໍ້າເຜິ້ງ ແລະບໍ່ມີສິ່ງໃດທີ່ແຮງກວ່າໂຕສິງ.” ແຕ່ແຊມຊັນຕອບຄືນວ່າ, “ຖ້າພວກເຈົ້າບໍ່ເອົາງົວແມ່ຂອງຂ້ອຍໄປໄຖນາ ຄົນໜ້າຄືພວກເຈົ້ານັ້ນຫວາ ຈະຮູ້ຄຳຕອບ.” 19 ໃນທັນໃດ ພຣະວິນຍານຂອງພຣະເຈົ້າຢາເວໄດ້ເຮັດໃຫ້ແຊມຊັນມີກຳລັງວັງຊາຂຶ້ນ; ດັ່ງນັ້ນ ລາວຈຶ່ງລົງໄປໃນເມືອງອາຊະເກໂລນ ຂ້າຊາຍໜຸ່ມສາມສິບຄົນ ຢູ່ໃນທີ່ນັ້ນ ແລະຢຶດເສື້ອຜ້າອັນຈົບງາມຂອງພວກເຂົາມາແຈກໃຫ້ຜູ້ທີ່ຕອບບັນຫາໄດ້. ຫລັງຈາກນັ້ນ ລາວຈຶ່ງກັບເມືອເຮືອນພໍ່ຂອງຕົນ ທັງໃຈຮ້າຍຕໍ່ເຫດການທີ່ໄດ້ເກີດຂຶ້ນ. 20 ສ່ວນເມຍຂອງລາວນັ້ນ ກໍຖືກຍົກໃຫ້ແກ່ຊາຍທີ່ເປັນເຈົ້າບ່າວລອງໃນມື້ແຕ່ງງານນັ້ນເອງ. |
@ 2012 United Bible Societies. All Rights Reserved.