ເອຊາຢາ 62 - ພຣະຄຳພີສັກສິ1 ນະຄອນເຢຣູຊາເລັມເອີຍ ດ້ວຍຄວາມຮັກທີ່ມີຕໍ່ເຈົ້າ ເຮົາຈະບໍ່ຍອມມິດງຽບໄປຈັກເທື່ອ ຈົນກວ່ານະຄອນນີ້ຈະໄດ້ມີໄຊແລະພົ້ນໄພ ຄືຄວາມມີໄຊສ່ອງແຈ້ງດັ່ງໂຄມໄຟຍາມຄໍ່າມືດ. 2 ນະຄອນເຢຣູຊາເລັມເອີຍ ທຸກຊົນຊາດຈະເຫັນເຈົ້າມີໄຊ ກະສັດຂອງທຸກຊົນຊາດຈະເຫັນສະຫງ່າຣາສີຂອງເຈົ້າ. ຄົນຈະເອີ້ນເຈົ້າຕາມຊື່ໃໝ່ຂອງເຈົ້າ ຄືຊື່ທີ່ປາກຂອງພຣະເຈົ້າຢາເວຈະໃຫ້ໄວ້. 3 ເຈົ້າຈະເປັນດັ່ງມົງກຸດອັນງົດງາມໃນມືຂອງພຣະເຈົ້າຢາເວ ແລະເປັນມົງກຸດໃນມືຂອງພຣະເຈົ້າຂອງເຈົ້າ, 4 ຄົນຈະບໍ່ເອີ້ນເຈົ້າອີກຕໍ່ໄປວ່າ, “ຜູ້ຖືກປະຖິ້ມ.” ຄົນຈະບໍ່ເອີ້ນຢ່າງນີ້ອີກວ່າ, “ເມຍທີ່ຜົວໜີປະ.” ສຳລັບດິນແດນຂອງເຈົ້າຄົນຈະເວົ້າກັນວ່າ, “ພຣະເຈົ້າພໍໃຈນຳນາງ” ຄືຊື່ໃໝ່ຂອງເຈົ້າ. ຄົນຈະເອີ້ນວ່າ, “ຜູ້ແຕ່ງງານທີ່ມີຄວາມສຸກ”. ສຳລັບກ່າວເຖິງດິນແດນຂອງເຈົ້າ ເພາະພຣະເຈົ້າຢາເວພໍໃຈນຳເຈົ້າໃດ ພຣະອົງຈະເປັນຜົວສຳລັບດິນແດນຂອງເຈົ້າ. 5 ດັ່ງຊາຍໜຸ່ມທີ່ໄດ້ຍິງບໍຣິສຸດເປັນເມຍຂອງຕົນ ພຣະອົງຜູ້ຫລໍ່ຫລອມເຈົ້າຈະແຕ່ງງານກັບເຈົ້າ. ເຈົ້າບ່າວຊົມຊື່ນຍິນດີນຳເຈົ້າສາວຂອງຕົນສັນໃດ ພຣະເຈົ້າຂອງເຈົ້າກໍຈະຊົມຊື່ນຍິນດີນຳເຈົ້າສັນນັ້ນ. 6 ນະຄອນເຢຣູຊາເລັມເອີຍ ເທິງກຳແພງເມືອງຂອງເຈົ້າ ເຮົາໄດ້ວາງຄົນຍາມຫລາຍໆຄົນໄວ້; ພວກເຂົາບໍ່ຕ້ອງມິດງຽບໃນກາງເວັນຫລືກາງຄືນ ພວກເຂົາຕ້ອງບອກພຣະເຈົ້າຢາເວໃຫ້ຈົດຈຳເລື້ອຍໆ ຄືໃຫ້ລະນຶກເຖິງຄຳສັນຍາຂອງພຣະອົງ ແລະບໍ່ປ່ອຍໃຫ້ພຣະອົງລືມໄລຈັກເທື່ອ. 7 ພວກເຂົາຈະບໍ່ໃຫ້ພຣະອົງໄດ້ພັກຜ່ອນຫລັບນອນ ຈົນກວ່າພຣະອົງໄດ້ສ້າງນະຄອນເຢຣູຊາເລັມຂຶ້ນໃໝ່ ຈົນກວ່າໄດ້ເຮັດໃຫ້ນະຄອນນີ້ກາຍເປັນພຣະນະຄອນ ຊຶ່ງເປັນທີ່ຍົກຍໍຂອງຄົນທົ່ວທຸກມຸມໂລກ. 8 ພຣະເຈົ້າຢາເວໄດ້ເຮັດສັນຍາໜຶ່ງອັນໜັກແໜ້ນໄວ້ ແລະຈະເຮັດຕາມນັ້ນດ້ວຍຣິດອຳນາດຂອງພຣະອົງ: “ເຂົ້າຂອງເຈົ້າຈະບໍ່ເປັນອາຫານແກ່ສັດຕູອີກຕໍ່ໄປ ຄົນຕ່າງດ້າວຈະບໍ່ໄດ້ດື່ມເຫຼົ້າອະງຸ່ນຂອງເຈົ້າອີກ. 9 ແຕ່ເຈົ້າຜູ້ທີ່ໄດ້ປູກແລະເກັບກ່ຽວເຂົ້າມານັ້ນ ກໍຈະໄດ້ກິນເຂົ້າຈີ່ ແລະສັນລະເສີນພຣະເຈົ້າຢາເວ. ເຈົ້າຜູ້ທີ່ໄດ້ດູແລທັງເກັບໂຮມເອົາໝາກອະງຸ່ນ ຈະໄດ້ດື່ມເຫຼົ້າອະງຸ່ນທີ່ເດີ່ນພຣະວິຫານນັ້ນ.” 10 ຊາວເຢຣູຊາເລັມເອີຍ ຈົ່ງອອກໄປຈາກນະຄອນ ແລະສ້າງທາງສຳລັບປະຊາຊົນທີ່ກຳລັງກັບມານັ້ນ. ຈົ່ງຕຽມທາງຫລວງໄວ້ ແລະເກັບຫີນອອກໃຫ້ໝົດ ເຮັດເຄື່ອງໝາຍເພື່ອຊົນຊາດທັງຫລາຍຈະໄດ້ຮູ້ 11 ພຣະເຈົ້າຢາເວໄດ້ປະກາດຈົນສຸດປາຍແຜ່ນດິນໂລກທັງໝົດວ່າ, “ຈົ່ງບອກລູກສາວຂອງຊີໂອນວ່າ ຈົ່ງເບິ່ງຄວາມພົ້ນຂອງເຈົ້າກຳລັງມາ ລາງວັນຂອງພຣະອົງກໍຢູ່ກັບພຣະອົງ ແລະບຳເໜັດຂອງພຣະອົງກໍຢູ່ກ່ອນໜ້າພຣະອົງ.” 12 ຄົນຈະເອີ້ນຊື່ພວກເຂົາວ່າ, “ປະຊາຊົນບໍຣິສຸດ” “ຜູ້ທີ່ພຣະເຈົ້າຢາເວໄດ້ຊົງໄຖ່ໄວ້ແລ້ວ.” ເຈົ້າຈະມີຊື່ວ່າ, “ເມືອງທີ່ພຣະເຈົ້າຊົງຮັກ” “ນະຄອນທີ່ພຣະເຈົ້າບໍ່ຍອມປະຖິ້ມຈັກເທື່ອ.” |
@ 2012 United Bible Societies. All Rights Reserved.