ເອຊາຢາ 61 - ພຣະຄຳພີສັກສິຂ່າວດີເລື່ອງພຣະເຈົ້າຜູ້ໂຜດໃຫ້ພົ້ນ 1 ພຣະວິນຍານຂອງພຣະເຈົ້າຢາເວ ອົງພຣະຜູ້ເປັນເຈົ້າໄດ້ສະຖິດກັບເຮົາ. ເພາະພຣະເຈົ້າຢາເວໄດ້ຫົດສົງແຕ່ງຕັ້ງເຮົາໄວ້ ເພື່ອນຳເອົາຂ່າວປະເສີດໄປສູ່ຜູ້ຍາກຈົນ ເພື່ອປິ່ນປົວຄົນລະທົມໃຈແລະຊອກຊໍ້າ ເພື່ອປະກາດການປົດປ່ອຍແກ່ຊະເລີຍເສິກ ແລະເສລີພາບແກ່ຜູ້ທີ່ຖືກຂັງຄຸກ. 2 ພຣະອົງໃຊ້ເຮົາໄປປະກາດວ່າເວລາໄດ້ມາເຖິງ ເມື່ອພຣະອົງຈະຊ່ວຍປະຊາຊົນຂອງພຣະອົງໃຫ້ພົ້ນ ແລະເພື່ອເອົາຊະນະເຫຼົ່າສັດຕູຂອງພວກເຂົາ ພຣະອົງໄດ້ໃຊ້ເຮົາໄປອອຍໃຈຜູ້ເສົ້າໂສກ 3 ເພື່ອໃຫ້ພວກທີ່ໄວ້ທຸກທີ່ເທິງພູເຂົາຊີໂອນ ໄດ້ຊົມຊື່ນຍິນດີແທນທີ່ຈະໂສກເສົ້າ; ພວກເຂົາຈະຮ້ອງເພງສັນລະເສີນພຣະເຈົ້າໃດ ແທນທີ່ຈະເສົ້າໂສກເສຍໃຈຢູ່ເລື້ອຍໆ. ພວກເຂົາຈະເປັນດັ່ງຕົ້ນໄມ້ທີ່ພຣະເຈົ້າຢາເວໄດ້ປູກໄວ້ເອງ ພວກເຂົາທຸກຄົນຈະກະທຳແຕ່ສິ່ງທີ່ຖືກຕ້ອງ ແລະພຣະເຈົ້າກໍຈະໄດ້ຮັບຄຳຍ້ອງຍໍສັນລະເສີນ ສຳລັບສິ່ງທີ່ພຣະອົງໄດ້ກະທຳມານັ້ນ. 4 ພວກເຂົາຈະກໍ່ສ້າງເມືອງທັງຫລາຍຂຶ້ນໃໝ່ ຄືເມືອງທີ່ຮົກຮ້າງເພພັງແຕ່ດົນນານນັ້ນ. 5 ປະຊາຊົນຂອງເຮົາເອີຍ ຄົນຕ່າງດ້າວຈະຮັບໃຊ້ພວກເຈົ້າ ພວກເຂົາຈະເປັນຜູ້ລ້ຽງດູຝູງແກະຂອງພວກເຈົ້າ ແລະພວກເຂົາຈະຂຸດຄົ້ນທັງປູກຝັງໃນທີ່ດິນ ດູແລເບິ່ງແຍງສວນອະງຸ່ນໃຫ້ພວກເຈົ້າ. 6 ຄົນຈະຮູ້ວ່າພວກເຈົ້າເປັນປະໂຣຫິດຂອງພຣະເຈົ້າຢາເວ ເຂົາຈະກ່າວເຖິງພວກເຈົ້າວ່າ ເປັນຜູ້ຮັບໃຊ້ຂອງພຣະເຈົ້າຂອງພວກເຮົາ. ພວກເຈົ້າຈະມ່ວນຊື່ນຢູ່ກັບສົມບັດຊົນຊາດທັງຫລາຍ ແລະຈະພູມໃຈໃນຊັບສິນທີ່ເປັນຂອງພວກເຈົ້າ. 7 ຄວາມອັບອາຍຂາຍໜ້າຂອງພວກເຈົ້າກໍສິ້ນສຸດໄປ ແລະຈະໄດ້ອາໄສຢູ່ໃນດິນແດນຂອງພວກເຈົ້າ ແລະຊັບສົມບັດຂອງພວກເຈົ້າກໍຈະມີເທົ່າຕົວ ພວກເຈົ້າຈະຊົມຊື່ນຍິນດີຢູ່ຕະຫລອດ. 8 ພຣະເຈົ້າຢາເວກ່າວວ່າ, “ເຮົາຮັກຄວາມຍຸດຕິທຳ ເຮົາກຽດຊັງການກົດຂີ່ ແລະອາຊະຍາກຳດ້ວຍ. ເຮົາຈະໃຫ້ບຳເໜັດແກ່ປະຊາຊົນຂອງເຮົາຢ່າງສັດຊື່ ທັງຈະເຮັດສັນຍາອັນຖາວອນກັບພວກເຂົາ. 9 ພວກເຂົາຈະມີຊື່ສຽງໃນທ່າມກາງຊົນຊາດທັງຫລາຍ ທຸກໆຄົນທີ່ເຫັນພວກເຂົາກໍຈະຮູ້ຈັກກັນທັງນັ້ນ ວ່າພວກເຂົານັ້ນແມ່ນປະຊາຊົນຊາດໜຶ່ງ ທີ່ພຣະເຈົ້າຢາເວໄດ້ອວຍພອນພວກເຂົາ.” 10 ຂ້ານ້ອຍຈະຊົມຊື່ນຍິນດີໃນພຣະເຈົ້າຢາເວ ຈິດໃຈຂອງຂ້ານ້ອຍຈະຊື່ນບານໃນພຣະເຈົ້າຂອງຂ້ານ້ອຍ ເພາະພຣະອົງໄດ້ເອົາເສື້ອຜ້າແຫ່ງຄວາມພົ້ນມາໃຫ້ນຸ່ງ ພຣະອົງໄດ້ເອົາເສື້ອແຫ່ງຄວາມຊອບທຳໃຫ້ຂ້ານ້ອຍຮົ່ມໄວ້ ເໝືອນດັ່ງເຈົ້າບ່າວຕົບແຕ່ງຕົວຄືປະໂຣຫິດ ແລະເໝືອນດັ່ງເຈົ້າສາວປະດັບຕົວດ້ວຍເພັດພອຍ. 11 ສະນັ້ນ ດັ່ງພື້ນດິນເຮັດໃຫ້ພືດງອກຂຶ້ນມາ ດັ່ງສວນເຮັດໃຫ້ພືດທີ່ຫວ່ານລົງງອກຂຶ້ນນັ້ນ ອົງພຣະຜູ້ເປັນເຈົ້າ ພຣະເຈົ້າຈະໄດ້ຊ່ວຍຄົນຂອງພຣະອົງ ແລະທຸກຊົນຊາດກໍຈະຍ້ອງຍໍສັນລະເສີນພຣະອົງ. |
@ 2012 United Bible Societies. All Rights Reserved.