ເອຊາຢາ 6 - ພຣະຄຳພີສັກສິພຣະເຈົ້າເອີ້ນເອຊາຢາໃຫ້ເປັນຜູ້ທຳນວາຍ 1 ໃນປີທີ່ກະສັດອຸດຊີຢາຕາຍໄປນັ້ນ ໃນນິມິດຂ້າພະເຈົ້າໄດ້ເຫັນພຣະເຈົ້າຢາເວ ກຳລັງນັ່ງຢູ່ເທິງບັນລັງອັນສູງສົ່ງຂອງພຣະອົງ ແລະເຄື່ອງນຸ່ງຂອງພຣະອົງກໍຄຸມຢູ່ເຕັມພຣະວິຫານ. 2 ຢູ່ຮອບພຣະອົງນັ້ນ ມີເສຣາຟິມມີປີກຫລາຍຕົນກຳລັງຢືນຢູ່ ແຕ່ລະຕົນມີປີກຫົກປີກ. ແຕ່ລະຕົນນັ້ນໄດ້ໃຊ້ສອງປີກປົກໜ້າ ສອງປີກປົກໂຕ ແລະອີກສອງປີກສຳລັບໃຊ້ບິນ. 3 ເສຣາຟິມເຫຼົ່ານີ້ເອີ້ນໃສ່ກັນແລະກັນວ່າ, “ບໍຣິສຸດ ບໍຣິສຸດ ບໍຣິສຸດ ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ຊົງບໍຣິສຸດ ພຣະສະຫງ່າຣາສີກໍແຜ່ກະຈາຍໄປທົ່ວໂລກ.” 4 ສັດເຫຼົ່ານັ້ນຮ້ອງ ຈົນຮາກຖານຂອງພຣະວິຫານສັ່ນສະເທືອນ ແລະມີຄວັນຄຸມຢູ່ເຕັມພຣະວິຫານ. 5 ຂ້າພະເຈົ້າເວົ້າຂຶ້ນວ່າ, “ຂ້ານ້ອຍໝົດຫວັງສາແລ້ວ ເຄາະກຳເປັນຂອງຂ້ານ້ອຍສາແລ້ວ ຍ້ອນຄຳເວົ້າທຸກຄຳທີ່ອອກຈາກປາກຂອງຂ້ານ້ອຍນັ້ນລ້ວນແຕ່ຊົ່ວມົວໝອງ ຂ້ານ້ອຍໄດ້ອາໄສຢູ່ນຳຊົນຊາດທີ່ເວົ້າແຕ່ສິ່ງຊົ່ວຊ້າ. ບັດນີ້ຂ້ານ້ອຍໄດ້ເຫັນກະສັດ ຄືພຣະເຈົ້າຢາເວອົງຊົງຣິດອຳນາດຍິ່ງໃຫຍ່ກັບຕາຂອງຂ້ານ້ອຍເອງແລ້ວ.” 6 ຕໍ່ມາ ໄດ້ມີເສຣາຟິມຕົນໜຶ່ງບິນລົງມາຫາຂ້າພະເຈົ້າ ໂດຍໃຊ້ເຫຼັກຄີບເອົາຖ່ານໄຟແດງມາຈາກແທ່ນບູຊາ. 7 ເສຣາຟິມຕົນນັ້ນໄດ້ເອົາຖ່ານໄຟແປະໃສ່ທີ່ຮີມສົບຂອງຂ້າພະເຈົ້າ ພ້ອມທັງກ່າວວ່າ, “ຖ່ານໄຟນີ້ໄດ້ຖືກຮີມສົບເຈົ້າ ບັດນີ້ຄວາມຜິດຂອງເຈົ້າໄດ້ໝົດໄປແລ້ວ ແລະບາບຂອງເຈົ້າກໍໄດ້ຮັບການອະໄພ.” 8 ແລ້ວຂ້າພະເຈົ້າກໍໄດ້ຍິນອົງພຣະຜູ້ເປັນເຈົ້າຖາມວ່າ, “ເຮົາຈະໃຊ້ຜູ້ໃດໄປ? ຜູ້ໃດຈະເປັນຜູ້ນຳຖ້ອຍຄຳຂອງເຮົາໄປກ່າວຕາງເຮົາ?” ຂ້າພະເຈົ້າຈຶ່ງຕອບວ່າ, “ຂ້ານ້ອຍຢູ່ທີ່ນີ້ ໂຜດໃຊ້ຂ້ານ້ອຍໄປເຖີດ.” 9 ສະນັ້ນ ພຣະອົງຈຶ່ງສັ່ງຂ້າພະເຈົ້າໄປບອກປະຊາຊົນດັ່ງນີ້: “ແມ່ນວ່າພວກເຈົ້າຈະຟັງຫລາຍປານໃດ ພວກເຈົ້າກໍຈະບໍ່ເຂົ້າໃຈ. ແມ່ນວ່າພວກເຈົ້າຈະເບິ່ງຄັກປານໃດ ພວກເຈົ້າກໍຈະບໍ່ຮູ້ເຫັນວ່າ ແມ່ນຫຍັງກຳລັງເກີດຂຶ້ນ.” 10 ແລ້ວພຣະອົງກໍບອກຂ້າພະເຈົ້າວ່າ, “ຈົ່ງເຮັດໃຫ້ຈິດໃຈຂອງຊົນຊາດນີ້ມືດມົນ, ຫູຂອງພວກເຂົາໜວກ ແລະຕາຂອງພວກເຂົາບອດ ເພື່ອບໍ່ໃຫ້ພວກເຂົາເຫັນ ຫລືໄດ້ຍິນ ຫລືເຂົ້າໃຈໄດ້. ຖ້າພວກເຂົາເຫັນ ຫລືໄດ້ຍິນ ຫລືເຂົ້າໃຈໄດ້ ພວກເຂົາຈະກັບມາຫາເຮົາແລະຮັບການປິ່ນປົວໃຫ້ດີ.” 11 ຂ້າພະເຈົ້າຈຶ່ງຖາມວ່າ, “ຂ້າແດ່ອົງພຣະຜູ້ເປັນເຈົ້າ ເຫດການເຊັ່ນນັ້ນຈະເປັນຢູ່ຢ່າງນີ້ເຫິງນານປານໃດ?” ພຣະອົງຕອບວ່າ, “ຈົນກວ່າເມືອງຕ່າງໆຖືກທຳລາຍແລະຮ້າງເປົ່າ ໝູ່ບ້ານທັງຫລາຍບໍ່ມີຄົນຢູ່ອາໄສແລະຜືນແຜ່ນດິນງຽບເຫງົາເປົ່າປ່ຽວ. 12 ພຣະເຈົ້າຢາເວຈະກວາດຕ້ອນເອົາຝູງຄົນໃຫ້ໜີໄປໄກ ແລະຈະໃຫ້ດິນດອນຕ່ອນຫຍ້າໂສກເສົ້າຫງອຍເຫງົາ. 13 ເຖິງແມ່ນວ່າໜຶ່ງໃນສິບຄົນຈະຍັງເຫລືອຢູ່ກໍຕາມ ເຂົາກໍຈະຖືກທຳລາຍຄືກັນ ເຂົາຈະເປັນດັ່ງກົກແປກທີ່ຖືກຕັດເຫຼືອແຕ່ຕໍ.” (ຕໍນັ້ນໝາຍເຖິງການເລີ່ມຕົ້ນໃໝ່ຂອງປະຊາຊົນຂອງພຣະເຈົ້າ.) |
@ 2012 United Bible Societies. All Rights Reserved.