ເອຊາຢາ 12 - ພຣະຄຳພີສັກສິບົດເພງແຫ່ງການໂມທະນາຂອບພຣະຄຸນ 1 ເມື່ອເຖິງມື້ນັ້ນ ປະຊາຊົນຈະຮ້ອງລຳທຳເພງວ່າ, “ຂ້າແດ່ພຣະເຈົ້າຢາເວ ຂ້ານ້ອຍຈະສັນລະເສີນພຣະອົງ ພຣະອົງໄດ້ໂກດຮ້າຍຂ້ານ້ອຍ ແຕ່ບັດນີ້ພຣະອົງເລົ້າໂລມໃຈ ແລະບໍ່ໂກດຮ້າຍຕໍ່ໄປອີກແລ້ວ 2 ພຣະເຈົ້າຄືພຣະຜູ້ໂຜດຊ່ວຍໃຫ້ພົ້ນຂອງຂ້ານ້ອຍ ຂ້ານ້ອຍຈະໄວ້ວາງໃຈໃນພຣະອົງ ແລະບໍ່ຢ້ານ. ເພາະພຣະເຈົ້າຢາເວ, ພຣະເຈົ້າຢາເວຊົງເປັນກຳລັງແລະບົດເພງຂອງຂ້ານ້ອຍ ແລະພຣະອົງຊົງເປັນຄວາມພົ້ນຂອງຂ້ານ້ອຍແລ້ວ. 3 ດັ່ງນໍ້າເຢັນໆຊ່ວຍໃຫ້ຜູ້ຫິວນໍ້າສົດຊື່ນສັນໃດ ຄວາມຊ່ວຍຊູຂອງພຣະອົງກໍໃຫ້ສົດຊື່ນສັນນັ້ນ.” 4 ເມື່ອເຖິງວັນນັ້ນ ປະຊາຊົນຈະຮ້ອງເພງວ່າ, “ຈົ່ງໂມທະນາຂອບພຣະຄຸນພຣະເຈົ້າຢາເວ ແລະຈົ່ງຮ້ອງອອກພຣະນາມຂອງພຣະອົງ ຈົ່ງບອກຊົນຊາດທັງຫລາຍສິ່ງທີ່ພຣະອົງໄດ້ກະທຳ ຈົ່ງບອກໃຫ້ພວກເຂົາຮູ້ວ່າພຣະນາມຂອງພຣະອົງ ເປັນທີ່ຍົກຍ້ອງຢ່າງສູງສຸດ 5 ຈົ່ງຮ້ອງເພງຍ້ອງຍໍສັນລະເສີນພຣະເຈົ້າຢາເວ ເພາະສິ່ງຍິ່ງໃຫຍ່ທີ່ພຣະອົງໄດ້ກະທຳ ຈົ່ງແຈ້ງໃຫ້ທົ່ວທັງໂລກໄດ້ຍິນໄດ້ຟັງ ເລື່ອງລາວທັງຫລາຍນີ້. 6 ຈົ່ງໃຫ້ທຸກຄົນທີ່ອາໄສຢູ່ເທິງພູເຂົາຊີໂອນ ຮ້ອງໂຮຍິນດີ ແລະຮ້ອງລຳທຳເພງເຖີດ ອົງຊົງຍິ່ງໃຫຍ່ແລະຊົງບໍຣິສຸດຂອງຊາດອິດສະຣາເອນ ຢູ່ທ່າມກາງພວກເຈົ້າແລ້ວ.” |
@ 2012 United Bible Societies. All Rights Reserved.