ປະຖົມມະການ 44 - ພຣະຄຳພີສັກສິຈອກເງິນເສຍ 1 ໂຢເຊັບໄດ້ສັ່ງຄົນຮັບໃຊ້ຜູ້ທີ່ຮັບຜິດຊອບໃນເຮືອນຂອງຕົນວ່າ, “ຈົ່ງເອົາອາຫານໃສ່ກະສອບຂອງຄົນເຫຼົ່ານີ້ ໃຫ້ຫລາຍເທົ່າທີ່ພວກເຂົາສາມາດເອົາເມືອໄດ້ ແລະໃຫ້ເອົາເງິນຂອງແຕ່ລະຄົນໃສ່ເທິງເຂົ້າໃນກະສອບຂອງແຕ່ລະຄົນ. 2 ໃຫ້ເອົາເງິນຄ່າເຂົ້າກັບຈອກເງິນຂອງເຮົາ ໃສ່ໃນກະສອບເຂົ້າຂອງນ້ອງຊາຍຫລ້າຂອງພວກເຂົາ.” ຄົນຮັບໃຊ້ກໍປະຕິບັດຕາມທີ່ໂຢເຊັບໄດ້ສັ່ງນັ້ນ. 3 ເມື່ອຮຸ່ງເຊົ້າຂຶ້ນມາ ພວກເຂົາຈຶ່ງອອກເດີນທາງກັບເມືອພ້ອມດ້ວຍລໍຂອງພວກເຂົາ. 4 ເມື່ອພວກເຂົາໄປບໍ່ໄກຈາກຕົວເມືອງພໍເທົ່າໃດ ໂຢເຊັບກໍກ່າວແກ່ຄົນຮັບໃຊ້ຜູ້ຮັບຜິດຊອບປະຈຳເຮືອນຂອງຕົນວ່າ, “ຈົ່ງຮີບອອກໄປຕິດຕາມຄົນເຫຼົ່ານັ້ນ. ເມື່ອເຈົ້າທັນພວກເຂົາແລ້ວ ໃຫ້ເຈົ້າຖາມພວກເຂົາວ່າ, ‘ເປັນຫຍັງພວກເຈົ້າຈຶ່ງປະພຶດການຊົ່ວຕອບແທນການດີ? 5 ເປັນຫຍັງຈຶ່ງລັກເອົາຈອກເງິນນາຍຂອງຂ້ອຍ ທີ່ເພິ່ນໃຊ້ດື່ມແລະໃຊ້ທຳນວາຍເບິ່ງເຫດການ? ພວກເຈົ້າເຮັດຜິດຢ່າງຮ້າຍແຮງຮູ້ບໍ່?”’ 6 ເມື່ອຄົນຮັບໃຊ້ຕາມພວກເຂົາໄປທັນແລ້ວ ລາວກໍເວົ້າດັ່ງທີ່ນາຍໄດ້ສັ່ງ. 7 ພວກເຂົາຈຶ່ງຕອບວ່າ, “ທ່ານເວົ້າເຊັ່ນນີ້ໝາຍຄວາມວ່າຢ່າງໃດ? ພວກເຮົາສາບານໄດ້ວ່າບໍ່ເຄີຍກະທຳຢ່າງນັ້ນຈັກເທື່ອ. 8 ທ່ານໄດ້ເຫັນແລ້ວວ່າ ພວກເຮົານຳເອົາເງິນທີ່ພົບຢູ່ໃນກະສອບເຂົ້າທີ່ການາອານນັ້ນມາສົ່ງຄືນ. ພວກເຮົາຈະມາລັກເອົາເງິນ ຫລືຄຳຂອງນາຍຂອງທ່ານເຮັດຫຍັງ? 9 ເອົາເທາະ ໃນຈຳນວນພວກເຮົານີ້ຖ້າຈອກເງິນຕົກຢູ່ນຳຜູ້ໃດ ໃຫ້ທ່ານຂ້າຜູ້ນັ້ນຖິ້ມໂລດ ແລະພວກເຮົາທຸກຄົນກໍຈະຍອມເປັນຄົນຮັບໃຊ້ຂອງທ່ານ.” 10 ຄົນຮັບໃຊ້ເວົ້າວ່າ, “ຕົກລົງ ແຕ່ຖ້າຂ້ອຍພົບຈອກນັ້ນຢູ່ນຳຜູ້ໃດ ຜູ້ນັ້ນຈະຕ້ອງເປັນຄົນຮັບໃຊ້ຂອງຂ້ອຍ ນອກນັ້ນໃຫ້ກັບໄປຢ່າງອິດສະຫລະ.” 11 ດັ່ງນັ້ນ ພວກເຂົາແຕ່ລະຄົນຈຶ່ງຟ້າວຍົກກະສອບຂອງຕົນວາງລົງເທິງດິນ ແລ້ວໄດ້ເປີດກະສອບຂອງຕົນອອກ. 12 ຄົນຮັບໃຊ້ຂອງໂຢເຊັບໄດ້ຄົ້ນເບິ່ງຢ່າງຄັກແນ່ ແຕ່ອ້າຍກົກຈົນຮອດນ້ອງຫລ້າ ແລະໃນທີ່ສຸດກໍພົບຈອກນັ້ນຢູ່ໃນກະສອບເຂົ້າຂອງເບັນຢາມິນ. 13 ດັ່ງນັ້ນ ພວກເຂົາຈຶ່ງຈີກເສື້ອຂອງຕົນດ້ວຍຄວາມເສຍໃຈ. ພວກເຂົາເອົາກະສອບຂຶ້ນຫລັງລໍຄືນ ແລະກັບຄືນເມືອໃນເມືອງ. 14 ເມື່ອຢູດາແລະອ້າຍນ້ອງຂອງລາວໄດ້ມາຮອດເຮືອນຂອງໂຢເຊັບ ພໍດີໃນຂະນະນັ້ນ ເພິ່ນເອງກໍຍັງຢູ່ເຮືອນ. ພວກເຂົາພາກັນກົ້ມຂາບລົງຕໍ່ໜ້າເພິ່ນ 15 ແລະໂຢເຊັບໄດ້ກ່າວຕໍ່ພວກເຂົາວ່າ, “ເປັນຫຍັງພວກເຈົ້າຈຶ່ງເຮັດເຊັ່ນນີ້? ພວກເຈົ້າບໍ່ຮູ້ບໍວ່າຄົນຄືຂ້ອຍນີ້ທຳນວາຍໄດ້?” 16 ຢູດາເວົ້າວ່າ, “ບໍ່ຮູ້ຈະເວົ້າກັບທ່ານຢ່າງໃດແລ້ວ ທ່ານເອີຍ? ບໍ່ມີທາງໂຕ້ຖຽງໄດ້ແລ້ວ? ແລະບໍ່ຮູ້ວ່າຈະພິສູດຄວາມບໍຣິສຸດໄດ້ຢ່າງໃດ? ພຣະເຈົ້າໄດ້ປະຈານຂາຍໜ້າຄວາມຜິດຂອງພວກເຮົາແລ້ວ. ບັດນີ້ ພວກເຮົາທຸກຄົນຕົກເປັນຄົນຮັບໃຊ້ຂອງທ່ານ ແລະບໍ່ແມ່ນແຕ່ຜູ້ດຽວທີ່ທ່ານໄດ້ພົບຈອກນຳ.” 17 ໂຢເຊັບເວົ້າວ່າ, “ໂອ ບໍ່! ຂ້ອຍຈະເຮັດເຊັ່ນນັ້ນບໍ່ໄດ້ດອກ ຂ້ອຍພົບຈອກນຳຜູ້ໃດ ແມ່ນຜູ້ນັ້ນ ທີ່ຈະຕົກເປັນຄົນຮັບໃຊ້ຂອງຂ້ອຍ. ນອກນັ້ນ ຈົ່ງກັບເມືອຫາພໍ່ຂອງພວກເຈົ້າຢ່າງປອດໄພສາເຖີດ.” ຢູດາວິງວອນຂໍເພື່ອເບັນຢາມິນ 18 ຢູດາໄດ້ເຂົ້າໄປຫາໂຢເຊັບ ແລະຂໍຮ້ອງວ່າ, “ທ່ານເອີຍ ກະລຸນາໃຫ້ຂ້ານ້ອຍໄດ້ເວົ້າກັບທ່ານຢ່າງກົງໄປກົງມາແດ່ທ້ອນ. ຢ່າຟ້າວຮ້າຍໃຫ້ຂ້ານ້ອຍເລີຍ; ທ່ານເອງກໍເປັນດັ່ງກະສັດ. 19 ທ່ານໄດ້ຖາມພວກຂ້ານ້ອຍວ່າ, ‘ເຈົ້າມີພໍ່ແລະນ້ອງອີກບໍ່?’ 20 ພວກຂ້ານ້ອຍກໍຕອບວ່າ, ‘ພວກຂ້ານ້ອຍມີພໍ່ທີ່ເຖົ້າແກ່ຫລາຍ ແລະຍັງມີນ້ອງຊາຍຜູ້ໜຶ່ງທີ່ເກີດມາເມື່ອເພິ່ນເຖົ້າແກ່ແລ້ວ. ອ້າຍຂອງເດັກຜູ້ນີ້ໄດ້ຕາຍໄປແລ້ວ ແລະລາວຜູ້ດຽວເທົ່ານັ້ນ ທີ່ເກີດຮ່ວມທ້ອງແມ່ດຽວກັນ ທີ່ຍັງມີຊີວິດຢູ່; ສະນັ້ນ ພໍ່ຈຶ່ງຮັກລາວຫລາຍ.’ 21 ທ່ານເອີຍ ທ່ານໄດ້ບອກໃຫ້ພວກຂ້ານ້ອຍເອົາລາວມາທີ່ນີ້ ເພື່ອທ່ານຈະໄດ້ເຫັນລາວ 22 ແລະພວກຂ້ານ້ອຍກໍໄດ້ຕອບທ່ານວ່າ ເດັກຜູ້ນີ້ຈາກພໍ່ຂອງລາວມາບໍ່ໄດ້. ຖ້າລາວຈາກມາເມື່ອໃດ ພໍ່ຂອງລາວຕ້ອງຕາຍເມື່ອນັ້ນ. 23 ແລ້ວທ່ານກໍເວົ້າວ່າ, ‘ພວກເຈົ້າຢ່າມາໃຫ້ຂ້ອຍເຫັນໜ້າອີກ ຖ້າບໍ່ມີນ້ອງຊາຍຂອງພວກເຈົ້າມານຳ.’ 24 ເມື່ອພວກຂ້ານ້ອຍກັບຄືນເມືອຫາພໍ່ ພວກຂ້ານ້ອຍກໍໄດ້ເລົ່າເລື່ອງທີ່ທ່ານໄດ້ເວົ້ານັ້ນສູ່ເພິ່ນຟັງ. 25 ແລ້ວເພິ່ນກໍບອກໃຫ້ພວກຂ້ານ້ອຍກັບມາຊື້ອາຫານອີກເລັກນ້ອຍ. 26 ພວກຂ້ານ້ອຍຈຶ່ງຕອບເພິ່ນວ່າ, ‘ພວກເຮົາກັບໄປບໍ່ໄດ້; ເພິ່ນຈະບໍ່ຮັບ ຖ້າບໍ່ມີນ້ອງຊາຍຂອງພວກເຮົາມານຳ. ພວກເຮົາຈະໄປຖ້າມີນ້ອງຊາຍຫລ້າໄປນຳ.’ 27 ພໍ່ຂອງພວກຂ້ານ້ອຍຈຶ່ງຕອບວ່າ, ‘ພວກເຈົ້າກໍຮູ້ແລ້ວວ່າຣາເຊັນ ເມຍຂອງຂ້ອຍ ໄດ້ເກີດລູກຊາຍສອງຄົນເທົ່ານັ້ນໃຫ້ຂ້ອຍ. 28 ຜູ້ທີໜຶ່ງໄດ້ຈາກຂ້ອຍໄປແລ້ວ. ຂ້ອຍຄາດວ່າລາວຄົງຖືກສັດຮ້າຍກັດກິນຕາຍ ເພາະຂ້ອຍບໍ່ໄດ້ເຫັນລາວນັບຕັ້ງແຕ່ມື້ລາວຈາກໄປ. 29 ຖ້າພວກເຈົ້າເອົາຜູ້ຫລ້າໄປຈາກຂ້ອຍແລະຖືກຂ້າອີກ ກໍເທົ່າກັບພວກເຈົ້າເຮັດໃຫ້ພໍ່ອຸກໃຈຕາຍໃນຍາມເຖົ້າແກ່ແລ້ວເຊັ່ນນີ້!”’ 30-31 ຢູດາເວົ້າຕໍ່ໄປວ່າ, “ທ່ານເອີຍ ຖ້າຂ້ານ້ອຍກັບເມືອຫາພໍ່ ໂດຍບໍ່ມີນ້ອງຄົນນີ້ກັບເມືອນຳແລ້ວ ພໍພໍ່ເຫັນວ່າບໍ່ມີລາວມານຳ ເພິ່ນກໍຈະທໍລະມານໃຈຕາຍ. ຊີວິດຂອງເພິ່ນແມ່ນຂຶ້ນຢູ່ກັບຊີວິດຂອງເດັກຄົນນີ້ ແລະເພິ່ນກໍເຖົ້າແກ່ຫລາຍແທ້ ທີ່ຈະທໍລະມານໃຈຕາຍຍ້ອນສິ່ງທີ່ພວກຂ້ານ້ອຍໄດ້ສ້າງຂຶ້ນ. 32 ຂ້ານ້ອຍໄດ້ເອົາຊີວິດຂອງຂ້ານ້ອຍເອງປະກັນແທນເດັກຄົນນີ້. ຂ້ານ້ອຍບອກເພິ່ນວ່າ, ‘ຖ້າຂ້ານ້ອຍບໍ່ນຳລາວກັບຄືນເມືອຫາເພິ່ນແລ້ວ ຂ້ານ້ອຍກໍຈະເປັນຜູ້ຮັບຜິດຊອບທຸກຢ່າງຈາກເພິ່ນຊົ່ວຊີວິດ.’ 33 ບັດນີ້ທ່ານເອີຍ ຂ້ານ້ອຍຈະຢູ່ທີ່ນີ້ເປັນຄົນຮັບໃຊ້ຂອງທ່ານແທນເດັກນ້ອຍຜູ້ນີ້; ກະລຸນາໃຫ້ລາວກັບຄືນເມືອພ້ອມກັບພວກອ້າຍຂອງລາວສາ. 34 ຂ້ານ້ອຍຈະກັບຄືນເມືອຫາພໍ່ໄດ້ຢ່າງໃດ ໃນເມື່ອບໍ່ມີເດັກຄົນນີ້ເມືອນຳ? ຂ້ານ້ອຍທົນເບິ່ງເພິ່ນທໍລະມານໃຈຕາຍບໍ່ໄດ້ດອກ.” |
@ 2012 United Bible Societies. All Rights Reserved.