ເອຊະຣາ 4 - ພຣະຄຳພີສັກສິການສ້າງພຣະວິຫານຂຶ້ນໃໝ່ຖືກຂັດຂວາງ 1 ພວກສັດຕູຂອງຊາວຢູດາແລະຊາວເບັນຢາມິນໄດ້ຍິນວ່າ ພວກທີ່ເປັນຊະເລີຍໃນຕ່າງຖິ່ນໄດ້ກັບຄືນມາ ແລະກຳລັງສ້າງພຣະວິຫານຂອງພຣະເຈົ້າຢາເວ ພຣະເຈົ້າຂອງຊາດອິດສະຣາເອນຂຶ້ນໃໝ່. 2 ດັ່ງນັ້ນ ພວກເຂົາຈຶ່ງໄປຫາເຊຣຸບບາເບນ ແລະພວກຫົວໜ້າຂອງຕະກຸນຕ່າງໆ ແລະກ່າວວ່າ, “ຂໍໃຫ້ພວກເຮົາໄດ້ຮ່ວມຊ່ວຍສ້າງພຣະວິຫານດ້ວຍ. ພວກເຮົາແລະພວກທ່ານກໍນະມັດສະການພຣະເຈົ້າອົງດຽວກັນ ແລະເຄີຍໄດ້ເຜົາເຄື່ອງບູຊາແກ່ພຣະອົງ ຕັ້ງແຕ່ຄາວທີ່ກະສັດເອສາຮັດໂດນແຫ່ງອັດຊີເຣຍໄດ້ສົ່ງພວກເຮົາມາຢູ່ທີ່ນີ້.” 3 ເຊຣຸບບາເບນ, ເຢຊູອາ ແລະພວກຫົວໜ້າຂອງຕະກຸນຕ່າງໆ ໄດ້ຕອບພວກເຂົາວ່າ, “ພວກເຮົາບໍ່ຕ້ອງການໃຫ້ພວກເຈົ້າຊ່ວຍສ້າງວິຫານສຳລັບພຣະເຈົ້າຂອງພວກເຮົາດອກ. ພວກເຮົາຈະສ້າງວິຫານຂອງພຣະເຈົ້າຢາເວ ພຣະເຈົ້າຂອງຊາດອິດສະຣາເອນຂຶ້ນເອງ ຕາມຄຳສັ່ງຂອງກະສັດໄຊຣັດກະສັດແຫ່ງເປີເຊຍ.” 4 ແລ້ວປະຊາຊົນທີ່ໄດ້ຢູ່ໃນດິນແດນນັ້ນ ກໍພະຍາຍາມເຮັດໃຫ້ຊາວຢິວຢ້ານກົວ ແລະທໍ້ຖອຍໃຈ ເພື່ອໃຫ້ພວກເຂົາເຊົາສ້າງພຣະວິຫານ. 5 ພວກເຂົາຍັງໄດ້ໃຫ້ສິນບົນແກ່ພວກຂ້າຣາຊການເປີເຊຍ ເພື່ອໃຫ້ດຳເນີນການຕໍ່ຕ້ານພວກຢິວ. ພວກເຂົາສືບຕໍ່ເຮັດຢູ່ຢ່າງນີ້ ຕະຫລອດຣາຊການຂອງກະສັດໄຊຣັດແຫ່ງເປີເຊຍ ຈົນເຖິງຣາຊການຂອງກະສັດດາຣິອຸດ ແຫ່ງເປີເຊຍ. ການກໍ່ສ້າງນະຄອນເຢຣູຊາເລັມຂຶ້ນໃໝ່ຖືກຂັດຂວາງ 6 ໃນຣາຊການຂອງກະສັດເຊເຊັດ ເຫຼົ່າສັດຕູຂອງປະຊາຊົນທີ່ຢູ່ໃນຢູດາຍແລະນະຄອນເຢຣູຊາເລັມ ໄດ້ນຳຂໍ້ກ່າວຫາຂຽນເປັນລາຍລັກອັກສອນມາຕໍ່ສູ້ພວກເຂົາ. 7 ແລະຕໍ່ມາອີກ ໃນຣາຊການຂອງກະສັດອາກຕາເຊເຊັດແຫ່ງເປີເຊຍ. ບີຊະລາມ, ມິດເຣດາດ, ຕາເບເອນ ແລະຜູ້ຮ່ວມງານຂອງພວກເຂົາ ໄດ້ຂຽນຈົດໝາຍໄປຫາກະສັດອາກຕາເຊເຊັດ. ຈົດໝາຍສະບັບນີ້ຂຽນຂຶ້ນເປັນພາສາອາຣາມິກ ແລະກໍຕ້ອງມີຜູ້ແປໃນເວລາອ່ານ. 8 ເຊັ່ນດຽວກັນ ເຣຮູມຜູ້ປົກຄອງແຂວງ ແລະຊິມໄຊເລຂາທິການປະຈຳແຂວງ ກໍໄດ້ຂຽນຈົດໝາຍຕໍ່ໄປນີ້ຫາກະສັດອາກຕາເຊເຊັດກ່ຽວກັບນະຄອນເຢຣູຊາເລັມ ໂດຍມີຂໍ້ຄວາມດັ່ງນີ້: 9 “ຈາກເຣຮູມຜູ້ປົກຄອງແຂວງ, ຈາກຊິມໄຊເລຂາທິການປະຈຳແຂວງ, ຈາກຜູ້ຮ່ວມງານຂອງພວກເຂົາ, ຈາກພວກຜູ້ຕັດສິນ ແລະຈາກບັນດາຂ້າຣາຊການຄົນອື່ນໆ ທັງໝົດທີ່ມາຈາກຖິ່ນຖານເອເຣັກ, ບາບີໂລນ ແລະຊູຊາທີ່ດິນແດນເອລາມ, 10 ພ້ອມທັງປະຊາຊົນອື່ນໆທີ່ຖືກເຈົ້າອາຊູບານີປານ ຜູ້ຍິ່ງໃຫຍ່ແລະມີອຳນາດ ໄດ້ຍົກຍ້າຍພວກເຂົາອອກຈາກບ້ານເກີດເມືອງນອນໃຫ້ມາຕັ້ງຫຼັກແຫຼ່ງຢູ່ໃນນະຄອນຊາມາເຣຍ ແລະຕາມບ່ອນອື່ນໆໃນແຂວງທາງພາກຕາເວັນຕົກຂອງແມ່ນໍ້າເອີຟຣັດ.” 11 ໃຈຄວາມຂອງຈົດໝາຍນັ້ນມີຖ້ອຍຄຳດັ່ງຕໍ່ໄປນີ້: “ຈາກ ບັນດາຜູ້ຮັບໃຊ້ຂອງທ່ານທີ່ຢູ່ທາງພາກຕາເວັນຕົກຂອງແມ່ນໍ້າເອີຟຣັດ ຂໍຮຽນກະສັດອາກຕາເຊເຊັດ. 12 ພວກຂ້ານ້ອຍຂໍຮຽນໃຫ້ທ່ານຊາບວ່າ ຊາວຢິວແຕ່ແຄວ້ນອື່ນໆຂອງທ່ານທີ່ໄດ້ມາຢູ່ໃນບ່ອນນີ້ ໄດ້ຕັ້ງຖິ່ນຖານຢູ່ໃນນະຄອນເຢຣູຊາເລັມ ແລະທັງໄດ້ສ້າງເມືອງຊົ່ວຊ້າ ແລະເມືອງຂອງພວກກະບົດຂຶ້ນໃໝ່. ພວກເຂົາເລີ່ມສ້າງກຳແພງເມືອງຂຶ້ນໃໝ່ ແລະອີກບໍ່ດົນກໍຈະສຳເລັດ. 13 ຂ້າແດ່ພະຣາຊາ ຖ້າເມືອງນີ້ຖືກສ້າງຂຶ້ນໃໝ່ແລະກຳແພງເມືອງຖືກສ້າງສຳເລັດແລ້ວປະຊາຊົນຈະຢຸດເສຍສ່ວຍ ແລະລາຍໄດ້ຂອງຫລວງກໍຈະລົດໜ້ອຍຖອຍລົງ. 14 ດຽວນີ້ຍ້ອນພວກຂ້ານ້ອຍຢູ່ໃຕ້ບັງຄັບຂອງທ່ານ ພວກຂ້ານ້ອຍຈຶ່ງບໍ່ຢາກຈະເຫັນເຫດການນີ້ເກີດຂຶ້ນ; ດັ່ງນັ້ນ ພວກຂ້ານ້ອຍຈຶ່ງຂໍໃຫ້ຄຳແນະນຳວ່າ: 15 ທ່ານຈົ່ງອອກຄຳສັ່ງໃຫ້ຄົ້ນຫາເອກະສານ ຊຶ່ງບັນພະບຸລຸດຂອງທ່ານໄດ້ເກັບມ້ຽນໄວ້. ຖ້າທ່ານຄົ້ນເບິ່ງ ທ່ານກໍຈະເຫັນວ່າ ເມືອງນີ້ໄດ້ເກີດມີການກະບົດຢູ່ເລື້ອຍໆ ແລະຕັ້ງແຕ່ສະໄໝກ່ອນເປັນຕົ້ນມາ ບັນດາກະສັດແລະບັນດາຜູ້ປົກຄອງແຂວງໄດັຮັບຄວາມເດືອດຮ້ອນຢູ່ສະເໝີ. ປະຊາຊົນກໍເປັນຜູ້ທີ່ປົກຄອງຍາກ. ດ້ວຍເຫດນີ້ ເມືອງນີ້ຈຶ່ງຖືກທຳລາຍ. 16 ສະນັ້ນ ພວກຂ້ານ້ອຍຈຶ່ງຂໍຢືນຢັນວ່າ, ຖ້າເມືອງນີ້ຖືກສ້າງຂຶ້ນໃໝ່ແລະກຳແພງຖືກສ້າງສຳເລັດແລ້ວ ທ່ານກໍຈະບໍ່ສາມາດຄວບຄຸມ ເຂດທາງພາກທິດຕາເວັນຕົກຂອງແມ່ນໍ້າເອີຟຣັດໄດ້ອີກຕໍ່ໄປ.” 17 ກະສັດຈຶ່ງສົ່ງຈົດໝາຍຕອບມາ ໂດຍມີຖ້ອຍຄຳດັ່ງນີ້: “ຂໍຄຳນັບມາເຖິງເຣຮູມ ຜູ້ປົກຄອງແຂວງ, ຊິມໄຊ ເລຂາປະຈຳແຂວງ, ພ້ອມດ້ວຍຜູ້ຮ່ວມງານທີ່ຢູ່ໃນນະຄອນຊາມາເຣຍແລະໃນດິນແດນອື່ນໆ ທາງພາກຕາເວັນຕົກຂອງແມ່ນໍ້າເອີຟຣັດ. 18 ຈົດໝາຍທີ່ພວກທ່ານໄດ້ສົ່ງມານັ້ນ ກໍໄດ້ມີຜູ້ອ່ານ ແລະແປຕໍ່ໜ້າຂ້າພະເຈົ້າແລ້ວ. 19 ຂ້າພະເຈົ້າຈຶ່ງອອກຄຳສັ່ງໃຫ້ທຳການສອບສວນ ແລະໄດ້ພົບໂດຍແທ້ຈິງວ່າ ຕັ້ງແຕ່ບູຮານມາ ນະຄອນເຢຣູຊາເລັມໄດ້ກະບົດຕໍ່ສິດອຳນາດຂອງກະສັດ ແລະກໍເຄີຍເປັນບ່ອນທີ່ເຕັມໄປດ້ວຍພວກກະບົດ ແລະພວກທີ່ສ້າງຄວາມເດືອດຮ້ອນ. 20 ບັນດາກະສັດຜູ້ມີອຳນາດໃຫຍ່ໄດ້ຂຶ້ນຄອງຢູ່ທີ່ນັ້ນ ແລະໄດ້ປົກຄອງທົ່ວແຂວງທັງໝົດທາງພາກຕາເວັນຕົກຂອງແມ່ນໍ້າເອີຟຣັດ ໂດຍໃຊ້ອິດທິພົນເກັບພາສີ ແລະຫາລາຍໄດ້. 21 ສະນັ້ນ ຈົ່ງໃຫ້ທ່ານອອກຄຳສັ່ງແກ່ຄົນເຫຼົ່ານັ້ນ ໃຫ້ຢຸດສ້າງເມືອງຂຶ້ນໃໝ່ ຈົນກວ່າຂ້າພະເຈົ້າຈະໃຫ້ຄຳສັ່ງໃໝ່ອີກ. 22 ໃຫ້ປະຕິບັດຕາມນີ້ໃນທັນທີທັນໃດໂລດ ເພື່ອວ່າຂ້າພະເຈົ້າຈະບໍ່ເສຍຜົນປະໂຫຍດກ່ຽວກັບເລື່ອງນີ້ຕໍ່ໄປ.” 23 ພໍຈົດໝາຍຂອງກະສັດອາກຕາເຊເຊັດຖືກອ່ານສູ່ເຣຮູມ, ຊິມໄຊ ແລະຜູ້ຮ່ວມງານຂອງພວກເຂົາ; ພວກເຂົາກໍຟ້າວໄປທີ່ນະຄອນເຢຣູຊາເລັມ ແລະໃຊ້ອຳນາດບັງຄັບຊາວຢິວໃຫ້ຢຸດເຊົາການກໍ່ສ້າງເມືອງ. ການກໍ່ສ້າງພຣະວິຫານເລີ່ມຂຶ້ນອີກ 24 ການກໍ່ສ້າງວິຫານຂອງພຣະເຈົ້າໄດ້ຢຸດສະຫງັກລົງ ແລະຄ້າງຄາຢູ່ຢ່າງນັ້ນ ຈົນເຖິງຣາຊການປີທີສອງຂອງກະສັດດາຣິອຸດແຫ່ງເປີເຊຍ. |
@ 2012 United Bible Societies. All Rights Reserved.