ເອເຊກຽນ 23 - ພຣະຄຳພີສັກສິສອງເອື້ອຍນ້ອງທີ່ເຮັດບາບ 1 ຖ້ອຍຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ, 2 “ມະນຸດເອີຍ ໃນຄັ້ງໜຶ່ງນັ້ນມີເອື້ອຍນ້ອງຢູ່ສອງຄົນ. 3 ເມື່ອພວກເຂົາຍັງເປັນສາວຢູ່ໃນເອຢິບນັ້ນ ພວກເຂົາໄດ້ເສຍຕົວຈົນກາຍເປັນຍິງໂສເພນີ. 4 ເອື້ອຍກົກຊື່ວ່າ ໂອໂຮລາ (ນາງເປັນຕົວແທນໃຫ້ຊາມາເຣຍ) ແລະນ້ອງສາວຊື່ວ່າໂອໂຮລີບາ (ນາງເປັນຕົວແທນໃຫ້ນະຄອນເຢຣູຊາເລັມ). ເຮົາໄດ້ແຕ່ງງານກັບພວກເຂົາທັງສອງ ແລະພວກເຂົາກໍໄດ້ເກີດລູກໃຫ້ແກ່ເຮົາ. 5 ເຖິງແມ່ນວ່າ ໂອໂຮລາເປັນຂອງເຮົາກໍຕາມ ແຕ່ນາງຍັງໄດ້ສືບຕໍ່ເປັນຍິງໂສເພນີ ບ້າຕັນຫາ ໄຝ່ຫາແຕ່ບັນດາຄູ່ຮັກຂອງນາງທີ່ມາຈາກປະເທດອັດຊີເຣຍ. 6 ພວກເຂົານຸ່ງເຄື່ອງແບບສີມ່ວງ ເປັນພວກເຈົ້ານາຍຂຸນນາງ ແລະນາຍທະຫານຊັ້ນຜູ້ໃຫຍ່; ພວກເຂົາລ້ວນແຕ່ເປັນຊາຍໜຸ່ມທີ່ໜຸ່ມແໜ້ນຮູບຮ່າງງາມຂີ່ມ້າ. 7 ນາງຫຼິ້ນຊູ້ກັບຄົນເຫຼົ່ານີ້ ຊຶ່ງເປັນບຸກຄົນທີ່ຄັດເລືອກແລ້ວຂອງອັດຊີເຣຍທຸກຄົນ ແລະນາງກໍໄດ້ເຮັດໃຫ້ນາງເປັນມົນທິນ ໂດຍຂາບໄຫວ້ບັນດາຮູບເຄົາຣົບຂອງຊາວອັດຊີເຣຍ. 8 ນາງຍັງບໍ່ເລີກການຫຼິ້ນຊູ້ທີ່ນາງເຄີຍເປັນມາແລ້ວໃນປະເທດເອຢິບ ບ່ອນທີ່ນາງໄດ້ເສຍຕົວນັ້ນ. ນັບຕັ້ງແຕ່ນາງໄດ້ເປັນສາວ ຜູ້ຊາຍໄດ້ຫລັບນອນນຳນາງທັງເຮັດກັບນາງດັ່ງຍິງໂສເພນີຜູ້ໜຶ່ງ. 9 ສະນັ້ນ ເຮົາຈຶ່ງມອບນາງໃຫ້ແກ່ຄູ່ຮັກຂອງນາງ ຄືຊາວອັດຊີເຣຍ ທີ່ນາງຕ້ອງການຫລາຍທີ່ສຸດນັ້ນ. 10 ພວກເຂົາໄດ້ແກ້ເຄື່ອງນຸ່ງຂອງນາງອອກ, ຈັບເອົາລູກຊາຍຍິງຂອງນາງໄປ ແລະໃຊ້ດາບຂ້ານາງຖິ້ມ. ພວກຜູ້ຍິງທົ່ວໄປຊຸບຊິບກັນເຖິງຊາຕາກຳຂອງນາງ. 11 ເຖິງແມ່ນວ່າ ໂອໂຮລີບາ ຜູ້ເປັນນ້ອງສາວໄດ້ເຫັນເຫດການນີ້ແລ້ວ ນາງກໍຍິ່ງຊົ່ວຊ້າແລະຫຼິ້ນຊູ້ຫລາຍກວ່າເອື້ອຍຂອງນາງອີກ. 12 ນາງກໍເໝືອນກັນ ນາງເປັນບ້າຕັນຫານຳພວກເຈົ້ານາຍຂຸນນາງຊາວອັດຊີເຣຍ ແລະພວກນາຍທະຫານ ຄືພວກທີ່ໃສ່ເຄື່ອງແບບອັນສະຫງ່າງາມ ແລະນຳບັນດານາຍທະຫານມ້າ ຕະຫລອດທັງຊາຍໜຸ່ມທີ່ມີຮູບຮ່າງສະຫງ່າງາມທຸກຄົນ. 13 ເຮົາໄດ້ເຫັນວ່ານາງບໍ່ມີສິນທຳໝົດສິ້ນ ແລະນ້ອງສາວຂອງນາງກໍຊົ່ວຊ້າພໍໆກັນກັບເອື້ອຍ. 14 ແຕ່ນາງໄດ້ເຮັດຜິດສິນທຳເລິກລົງໄປທຸກເທື່ອ. ນາງຫລົງໄຫລໄປນຳຮູບຊົງຂອງບັນດາຂ້າຣາຊການຊັ້ນສູງຊາວບາບີໂລນ ທີ່ໄດ້ແກະສະຫລັກໄວ້ຕາມຝາແລະທາສີແດງແຈດ 15 ທັງມີສາຍຮັດແອວແລະຜ້າຄຽນຫົວແບບແປກໆດ້ວຍ. 16 ພໍແຕ່ໄດ້ເຫັນພວກເຂົາ ນາງກໍເຕັມໄປດ້ວຍຕັນຫາ ແລະໄດ້ສົ່ງພວກນຳຂ່າວໄປຫາພວກເຂົາໃນບາບີໂລນ. 17 ຊາວບາບີໂລນໄດ້ອອກມາສົມສູ່ກັບນາງ. ພວກເຂົາໄດ້ໃຊ້ນາງແລະເຮັດໃຫ້ນາງເປັນມົນທິນ ຈົນໃນທີ່ສຸດ ນາງຈຶ່ງເກີດເບື່ອໜ່າຍພວກເຂົາ. 18 ນາງເປືອຍກາຍໃນທີ່ສາທາລະນະ ໃຫ້ທຸກຄົນຮູ້ວ່ານາງເປັນຍິງໂສເພນີ. ເຮົາກຽດຊັງນາງເຊັ່ນດຽວກັບເອື້ອຍຂອງນາງ. 19 ນາງໄດ້ກາຍເປັນຍິງໂສເພນີຫລາຍກວ່າແຕ່ກ່ອນ ໂດຍປະພຶດຕົນດັ່ງສະໄໝຍັງເປັນສາວຢູ່ ຄືເມື່ອຄາວທີ່ນາງໄດ້ເປັນຍິງໂສເພນີຢູ່ໃນປະເທດເອຢິບນັ້ນ. 20 ນາງຢາກສົມສູ່ກັບຜູ້ຊາຍທີ່ມີຣາຄະຕັນຫາຫລາຍ ຄືຜູ້ຊາຍທີ່ມີຣາຄະຕັນຫາດັ່ງລໍແລະມ້າເຖິກ.” ( 21 ນາງໂອໂຮລີບາເອີຍ ເຈົ້າຢາກເຮັດຜິດສິນທຳຊໍ້າແລ້ວຊໍ້າອີກ ດັ່ງຄາວທີ່ເຈົ້າເປັນສາວໃນປະເທດເອຢິບບ່ອນທີ່ພວກຜູ້ຊາຍຄັ້ນນົມເຈົ້າ ຈົນເຈົ້າສູນເສຍຄວາມເປັນສາວ.) ພຣະເຈົ້າຕັດສິນຜູ້ເປັນນ້ອງສາວ 22 ບັດນີ້ໂອໂຮລີບາເອີຍ ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ເຈົ້າໄດ້ເບື່ອໜ່າຍຕໍ່ຄູ່ຮັກເຫຼົ່ານີ້ຂອງເຈົ້າ ແຕ່ເຮົາຈະເຮັດໃຫ້ພວກເຂົາໂກດຮ້າຍເຈົ້າ ແລະນຳພວກເຂົາໄປປິດລ້ອມເຈົ້າໄວ້. 23 ເຮົາຈະນຳຊາວບາບີໂລນແລະຊາວກັນດາທັງໝົດມາ ຄືບັນດາຜູ້ຊາຍຈາກເມືອງເປໂກດ, ໂຊອາ, ໂກອາ ແລະອັດຊີເຣຍທັງໝົດ. ເຮົາຈະເຕົ້າໂຮມພວກເຈົ້ານາຍຂຸນນາງທີ່ໜຸ່ມແໜ້ນ ແລະຮູບຮ່າງສະຫງ່າງາມມາ ພ້ອມພວກນາຍທະຫານ, ບັນດາຂ້າຣາຊການຜູ້ສຳຄັນ ແລະນາຍທະຫານມ້າຊັ້ນຜູ້ໃຫຍ່ທັງໝົດ. 24 ພວກເຂົາຈະໂຈມຕີເຈົ້າຈາກທາງທິດເໜືອ ໂດຍນຳກອງທັບໃຫຍ່ ພ້ອມທັງລົດຮົບກັບກອງກວຽນສະບຽງອາຫານມາດ້ວຍ. ທະຫານເຫຼົ່ານີ້ມີທັງໂລ້ແລະໝວກເຫຼັກປ້ອງກັນ ພວກເຂົາຈະປິດລ້ອມເຈົ້າໄວ້. ເຮົາຈະມອບເຈົ້າໃຫ້ແກ່ພວກເຂົາ ແລະພວກເຂົາຈະຕັດສິນເຈົ້າຕາມກົດໝາຍຂອງພວກເຂົາເອງ. 25 ຍ້ອນເຮົາໂກດຮ້າຍເຈົ້າ ເຮົາຈະປ່ອຍໃຫ້ພວກເຂົາຈັດການກັບເຈົ້າຕາມຄວາມໂກດຮ້າຍຂອງພວກເຂົາ. ພວກເຂົາຈະຕັດດັງແລະຫູເຈົ້າຖິ້ມ ແລະສັງຫານພວກລູກຂອງເຈົ້າ. ແມ່ນແລ້ວ ພວກເຂົາຈະເອົາບັນດາລູກຊາຍຍິງຂອງເຈົ້າໄປຈາກເຈົ້າ ແລະເຜົາພວກເຂົາທັງເປັນ. 26 ພວກເຂົາຈະຈີກເຄື່ອງນຸ່ງ ແລະຢຶດເຄື່ອງເພັດພອຍຂອງເຈົ້າໄປ. 27 ເຮົາຈະເຮັດໃຫ້ຣາຄະຕັນຫາກັບການຊົ່ວຊ້າຕ່າງໆທີ່ເຈົ້າໄດ້ເຮັດ ແຕ່ຄາວເຈົ້າຢູ່ປະເທດເອຢິບນັ້ນສິ້ນສຸດໄປ. ເຈົ້າຈະບໍ່ໄດ້ແນມເບິ່ງຮູບເຄົາຣົບ ຫລືຄິດເຖິງປະເທດເອຢິບອີກຕໍ່ໄປ.” 28 ອັນນີ້ແມ່ນສິ່ງທີ່ອົງພຣະຜູ້ເປັນເຈົ້າ ພຣະເຈົ້າກ່າວ: “ເຮົາຈະມອບເຈົ້າໃຫ້ແກ່ຜູ້ທີ່ເຈົ້າກຽດຊັງແລະລັງກຽດ. 29 ຍ້ອນພວກເຂົາກຽດຊັງເຈົ້າ ພວກເຂົາຈະເອົາທຸກສິ່ງທີ່ເຈົ້າຫາມາໄດ້ນັ້ນໄປ ແລະປ່ອຍໃຫ້ເຈົ້າເປືອຍກາຍຢູ່ດັ່ງຍິງໂສເພນີ. 30 ຣາຄະຕັນຫາແລະການເປັນຍິງໂສເພນີຂອງເຈົ້ານັ້ນ ໄດ້ນຳສິ່ງເຫຼົ່ານີ້ມາສູ່ເຈົ້າ. ເຈົ້າເຄີຍເປັນຍິງໂສເພນີໃຫ້ຊົນຊາດທັງຫລາຍ ແລະເຈົ້າເອງປະພຶດໃຫ້ເປັນມົນທິນເພາະຮູບເຄົາຣົບຂອງພວກເຂົາ. 31 ເຈົ້າໄດ້ກະທຳຕາມແບບຢ່າງຂອງເອື້ອຍເຈົ້າ; ເພາະສະນັ້ນ ເຮົາຈຶ່ງຈະມອບຈອກແຫ່ງການລົງໂທດຢ່າງດຽວກັນນັ້ນໃຫ້ເຈົ້າໄດ້ດື່ມ.” 32 ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ເຈົ້າຈະດື່ມຈາກຈອກຂອງເອື້ອຍເຈົ້າຄືກັນໃດ ເປັນຈອກໃຫຍ່ທັງກົ້ນເລິກແລະໂກນດ້ວຍ. ທຸກໆຄົນຈະດູຖູກແລະເຍາະເຍີ້ຍເຈົ້າເດີ ເພາະຈອກນັ້ນເຕັມຈົນວ່າມັນລົ້ນອອກ. 33 ມັນຈະເຮັດໃຫ້ເຈົ້າທຸກໂສກແລະມືນເມົາ ເປັນຈອກຄວາມຢ້ານກົວແລະການຈິບຫາຍດ້ວຍ ແລະຈອກນັ້ນເປັນຈອກຂອງຊາມາເຣຍ ຄືຜູ້ທີ່ເປັນເອື້ອຍເຈົ້າເອງນັ້ນ. 34 ເຈົ້າຈະດື່ມຈາກຈອກຈົນກ້ຽງບໍ່ເຫຼືອຫຍັງ ແລະປ່ຽງແຕກຈະເຮັດໃຫ້ນົມເຈົ້າເປັນບາດ. ເພາະເຮົາໄດ້ກ່າວໄວ້ແລ້ວ, ອົງພຣະຜູ້ເປັນເຈົ້າ ພຣະເຈົ້າ ກ່າວດັ່ງນີ້ແຫຼະ.” 35 ເພາະສະນັ້ນ ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ເພາະເຈົ້າໄດ້ລືມໄລເຮົາແລະຫັນຫລັງໃຫ້ເຮົາ ເຈົ້າຈະທົນທຸກຍ້ອນຣາຄະຕັນຫາແລະການເປັນແມ່ຈ້າງຂອງເຈົ້າ.” ພຣະເຈົ້າຕັດສິນສອງເອື້ອຍນ້ອງ 36 ພຣະເຈົ້າຢາເວໄດ້ກ່າວແກ່ຂ້າພະເຈົ້າວ່າ, “ມະນຸດເອີຍ ເຈົ້າພ້ອມທີ່ຈະຕັດສິນໂອໂຮລາ ແລະໂອໂຮລີບາແລ້ວຫລື? ຈົ່ງກ່າວໂທດພວກເຂົາຍ້ອນສິ່ງອັນໜ້າກຽດຊັງທີ່ພວກເຂົາໄດ້ເຮັດນັ້ນ. 37 ພວກເຂົາໄດ້ຫລີ້ນຊູ້ແລະໄດ້ຂ້າຄົນ ຄືຫລີ້ນຊູ້ກັບບັນດາຮູບເຄົາຣົບ ແລະຂ້າລູກຊາຍທັງຫລາຍທີ່ພວກເຂົາໄດ້ເກີດໃຫ້ເຮົາ. ພວກເຂົາໄດ້ເຜົາບູຊາບັນດາລູກຊາຍຂອງເຮົາໃຫ້ບັນດາຮູບເຄົາຣົບ. 38 ບໍ່ແລ້ວເທົ່ານັ້ນ ພວກເຂົາຍັງໄດ້ເຮັດໃຫ້ພຣະວິຫານຂອງເຮົາເປັນມົນທິນ ທັງໄດ້ຝ່າຝືນວັນຊະບາໂຕ ຊຶ່ງເຮົາໄດ້ຕັ້ງໄວ້ດ້ວຍ. 39 ໃນມື້ດຽວກັນທີ່ພວກເຂົາໄດ້ຂ້າພວກລູກຂອງເຮົາບູຊາໃຫ້ແກ່ບັນດາຮູບເຄົາຣົບນັ້ນ ພວກເຂົາໄດ້ເຂົ້າມາໃນພຣະວິຫານຂອງເຮົາ ແລະເຮັດໃຫ້ພຣະວິຫານເປັນມົນທິນ. 40 ຊໍ້າແລ້ວຊໍ້າອີກ ພວກເຂົາໄດ້ສົ່ງບັນດາຜູ້ນຳຂ່າວໄປເຊີນຜູ້ຊາຍມາຈາກແດນໄກແສນໄກ ແລະພວກເຂົາກໍມາ. ສອງເອື້ອຍນ້ອງຈະອາບນໍ້າ, ທາຂົນຕາ ແລະໃສ່ເຄື່ອງເອ້. 41 ພວກເຂົາເຄີຍນັ່ງຕັ່ງອີ້ນວມອັນສວຍງາມ ແລະເທິງໂຕະຕໍ່ໜ້າພວກເຂົາກໍມີແຕ່ສິ່ງທີ່ດີໆ ລວມທັງເຄື່ອງຫອມແລະນໍ້າມັນໝາກກອກເທດທີ່ເຮົາໄດ້ມອບໃຫ້ພວກເຂົາ. 42 ສຽງຜູ້ຄົນທີ່ປ່ອຍຕົວກໍດັງຢູ່ກັບພວກເຂົາ ເປັນສຽງຂອງຊາຍໝວດໜຶ່ງທີ່ຖືກນຳມາແຕ່ຖິ່ນແຫ້ງແລ້ງກັນດານ. ພວກເຂົາໄດ້ໃສ່ປອກແຂນໃຫ້ພວກຜູ້ຍິງ ແລະສວມມົງກຸດໃສ່ຫົວຂອງພວກເຂົາ. 43 ແລະເຮົາກໍຄິດໃນໃຈວ່າພວກເຂົາກຳລັງສວຍໃຊ້ຍິງທີ່ມັກຫລີ້ນຊູ້ໃຫ້ເປັນແມ່ຈ້າງ. 44 ພວກເຂົາໄດ້ກັບຄືນມາຫາແມ່ຈ້າງເຫຼົ່ານີ້ເທື່ອແລ້ວເທື່ອອີກ. ພວກເຂົາໄດ້ກັບຄືນມາຫາໂອໂຮລາ ແລະ ໂອໂຮລີບາ ຍິງບໍ່ມີສິນທຳເຫຼົ່ານັ້ນ. 45 ບັນດາຄົນຊອບທຳຈະກ່າວໂທດພວກເຂົາ ຖານຫລີ້ນຊູ້ແລະຖານເປັນຄາດຕະກອນຍ້ອນພວກເຂົາຫລີ້ນຊູ້ ແລະມືພວກເຂົາກໍເປິເປື້ອນໄປດ້ວຍເລືອດ.” 46 ນີ້ແຫຼະແມ່ນສິ່ງທີ່ອົງພຣະຜູ້ເປັນເຈົ້າ ພຣະເຈົ້າກ່າວ: “ຈົ່ງນຳປະຊາຊົນມາເຮັດໃຫ້ພວກເຂົາສະທ້ານຢ້ານກົວແລະປຸ້ນພວກເຂົາສາ. 47 ຈົ່ງໃຫ້ປະຊາຊົນເອົາກ້ອນຫີນແກວ່ງໃສ່ພວກເຂົາແລະໃຊ້ດາບຟັນພວກເຂົາ, ຂ້າບັນດາລູກຊາຍຍິງຂອງພວກເຂົາ ແລະຈູດເຮືອນຂອງພວກເຂົາຖິ້ມ. 48 ເຮົາຈະເຮັດໃຫ້ການຜິດສິນທຳນີ້ສິ້ນສຸດຢູ່ໃນທົ່ວດິນແດນ; ເປັນການເຕືອນຜູ້ຍິງທຸກຄົນບໍ່ໃຫ້ຫລີ້ນຊູ້ ແລະບໍ່ປະຕິບັດດັ່ງທີ່ພວກເຈົ້າໄດ້ເຮັດນັ້ນ. 49 ສ່ວນສອງເອື້ອຍນ້ອງພວກເຈົ້າ ເຮົາຈະລົງໂທດເນື່ອງຈາກພວກເຈົ້າໄດ້ເຮັດຜິດສິນທຳ ແລະເຮັດບາບໂດຍຂາບໄຫວ້ບັນດາຮູບເຄົາຣົບ. ແລ້ວພວກເຈົ້າກໍຈະຮູ້ວ່າ ເຮົາແມ່ນອົງພຣະຜູ້ເປັນເຈົ້າ ພຣະເຈົ້າ.” |
@ 2012 United Bible Societies. All Rights Reserved.