ເອເຊກຽນ 20 - ພຣະຄຳພີສັກສິພຣະປະສົງກັບການທ້າທາຍຂອງມະນຸດ 1 ໃນວັນທີສິບຂອງເດືອນທີຫ້າ ອັນກົງກັບປີທີເຈັດ ແຫ່ງການເປັນຊະເລີຍໃນຕ່າງຖິ່ນຂອງພວກເຮົາ ບັນດາຜູ້ປົກຄອງບາງຄົນຂອງຊຸມນຸມປະຊາຊົນອິດສະຣາເອນໄດ້ມາປຶກສາກັບຂ້າພະເຈົ້າ ເຖິງຄວາມປະສົງຂອງພຣະເຈົ້າຢາເວ. ພວກເຂົາໄດ້ມານັ່ງລົງຕໍ່ໜ້າຂ້າພະເຈົ້າ. 2 ແລ້ວຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ, 3 “ມະນຸດເອີຍ ຈົ່ງກ່າວແກ່ຄົນເຫຼົ່ານີ້ແລະບອກພວກເຂົາວ່າ ອົງພຣະຜູ້ເປັນເຈົ້າ ພຣະເຈົ້າກຳລັງຖາມວ່າ: ພວກເຈົ້າມາຖາມເຖິງຄວາມປະສົງຂອງເຮົາແມ່ນບໍ? ເຮົາມີຊີວິດຢູ່ຢ່າງແນ່ແທ້ສັນໃດ ເຮົາຈະບໍ່ອະນຸຍາດໃຫ້ພວກເຈົ້າຖາມເຮົາເຖິງສິ່ງໃດໆໝົດສັນນັ້ນ. ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ. 4 ມະນຸດເອີຍ ເຈົ້າພ້ອມແລ້ວຫລື ທີ່ຈະຕັດສິນລົງໂທດພວກເຂົາ? ຖ້າດັ່ງນັ້ນ ລົງໂທດພວກເຂົາສາ. ຈົ່ງເຕືອນພວກເຂົາໃຫ້ລະນຶກເຖິງ ສິ່ງອັນໜ້າກຽດຊັງທີ່ບັນພະບຸລຸດຂອງພວກເຂົາໄດ້ເຮັດ. 5 ຈົ່ງບອກພວກເຂົາເຖິງສິ່ງທີ່ອົງພຣະຜູ້ເປັນເຈົ້າ ພຣະເຈົ້າກຳລັງກ່າວ. ເມື່ອເຮົາໄດ້ເລືອກເອົາຊາດອິດສະຣາເອນນັ້ນ ເຮົາໄດ້ເຮັດຄຳສັນຍາກັບພວກເຂົາ. ເຮົາໄດ້ປາກົດເຮົາເອງຕໍ່ພວກເຂົາໃນເອຢິບແລະໄດ້ບອກພວກເຂົາວ່າ: ‘ເຮົາແມ່ນພຣະເຈົ້າຢາເວ ພຣະເຈົ້າຂອງເຈົ້າ.’ 6 ໃນເວລານັ້ນ ເຮົາໄດ້ສັນຍາກັບພວກເຂົາວ່າເຮົາຈະເອົາພວກເຂົາອອກມາຈາກປະເທດເອຢິບ ແລະນຳພວກເຂົາໄປສູ່ດິນແດນໜຶ່ງທີ່ເຮົາໄດ້ເລືອກໄວ້ໃຫ້ພວກເຂົາ ເປັນດິນແດນທີ່ອຸດົມສົມບູນແລະຮັ່ງມີ ທັງເປັນດິນແດນດີທີ່ສຸດໃນດິນແດນທັງໝົດດ້ວຍ. 7 ເຮົາບອກພວກເຂົາໃຫ້ໂຍນຮູບເຄົາຣົບອັນໜ້າກຽດຊັງ ຊຶ່ງພວກເຂົາຮັກນັ້ນຖິ້ມ ແລະຢ່າປະພຶດຕົນໃຫ້ເປັນມົນທິນກັບພະປອມຂອງເອຢິບ ເພາະເຮົາແມ່ນພຣະເຈົ້າຢາເວ ພຣະເຈົ້າຂອງພວກເຂົາ. 8 ແຕ່ພວກເຂົາໄດ້ທ້າທາຍເຮົາແລະບໍ່ຍອມເຊື່ອຟັງເຮົາ. ພວກເຂົາບໍ່ໄດ້ໂຍນບັນດາຮູບເຄົາຣົບອັນໜ້າກຽດຊັງຂອງພວກເຂົາຖິ້ມ ຫລືບໍ່ໄດ້ຍອມປະຖິ້ມພະຕ່າງໆຂອງຊາວເອຢິບ. ເຮົາຈຶ່ງພ້ອມແລ້ວທີ່ຈະໃຫ້ພວກເຂົາໄດ້ຊີມຣິດແຫ່ງຄວາມໂກດຮ້າຍ ອັນເຕັມຂະໜາດຂອງເຮົາໃນເອຢິບ. 9 ແຕ່ເຮົາບໍ່ໄດ້ເຮັດ ເພາະການເຮັດເຊັ່ນນັ້ນ ອາດລົດກຽດໃຫ້ແກ່ນາມຂອງເຮົາ ໃນເມື່ອເຮົາໄດ້ປະກາດຕໍ່ຊາດອິດສະຣາເອນໃນທ່າມກາງປະຊາຊົນ ທີ່ພວກເຂົາໄດ້ອາໄສຢູ່ນັ້ນວ່າ ເຮົາຈະນຳພວກເຂົາອອກໄປຈາກປະເທດເອຢິບ. 10 ດັ່ງນັ້ນ ເຮົາຈຶ່ງໄດ້ນຳພວກເຂົາອອກຈາກປະເທດເອຢິບ ໄປສູ່ຖິ່ນແຫ້ງແລ້ງກັນດານ. 11 ເຮົາໄດ້ມອບຂໍ້ຄຳສັ່ງຂອງເຮົາໃຫ້ແກ່ພວກເຂົາ ແລະໄດ້ສັ່ງສອນພວກເຂົາເຖິງບັນດາກົດບັນຍັດຂອງເຮົາ ຊຶ່ງນຳຊີວິດມາສູ່ທຸກໆຄົນທີ່ປະຕິບັດຕາມ. 12 ເຮົາໄດ້ເຮັດໃຫ້ພວກເຂົາຮັກສາວັນຊະບາໂຕ ເປັນໝາຍສຳຄັນແຫ່ງການຕົກລົງລະຫວ່າງສອງຝ່າຍ ກໍເພື່ອຕັກເຕືອນພວກເຂົາໃຫ້ລະນຶກເຖິງວ່າ ເຮົາຄືພຣະເຈົ້າຢາເວທີ່ເຮັດໃຫ້ພວກເຂົາບໍຣິສຸດ. 13 ແຕ່ປະຊາຊົນອິດສະຣາເອນຊໍ້າພັດທ້າທາຍເຮົາແມ່ນແຕ່ໃນຖິ່ນແຫ້ງແລ້ງກັນດານ. ພວກເຂົາໄດ້ຝ່າຝືນບັນດາກົດບັນຍັດຂອງເຮົາ ແລະປະຖິ້ມຂໍ້ຄຳສັ່ງຂອງເຮົາ ຊຶ່ງນຳຊີວິດມາສູ່ທຸກໆຄົນທີ່ປະຕິບັດຕາມ. ພວກເຂົາໄດ້ເຮັດໃຫ້ວັນຊະບາໂຕເປັນມົນທິນ. ສະນັ້ນ ເຮົາຈຶ່ງພ້ອມແລ້ວ ທີ່ຈະໃຫ້ພວກເຂົາໄດ້ຊີມຣິດແຫ່ງຄວາມໂກດຮ້າຍອັນເຕັມຂະໜາດຂອງເຮົາ ໃນຖິ່ນແຫ້ງແລ້ງກັນດານນັ້ນແລະທຳລາຍພວກເຂົາຖິ້ມ. 14 ແຕ່ເຮົາບໍ່ໄດ້ກະທຳ ເພາະມັນອາດລົດກຽດໃຫ້ແກ່ນາມຂອງເຮົາ ໃນທ່າມກາງຊົນຊາດທັງຫລາຍທີ່ໄດ້ເຫັນເຮົາ ນຳພາຊາດອິດສະຣາເອນອອກມາຈາກປະເທດເອຢິບ. 15 ສະນັ້ນ ເຮົາຈຶ່ງໄດ້ສັນຍາໄວ້ໃນຖິ່ນແຫ້ງແລ້ງກັນດານວ່າ ເຮົາຈະບໍ່ນຳພວກເຂົາເຂົ້າໄປໃນດິນແດນທີ່ເຮົາໄດ້ມອບໃຫ້ແກ່ພວກເຂົາ ຄືດິນແດນໜຶ່ງທີ່ອຸດົມສົມບູນແລະຮັ່ງມີແລະດີເລີດ. 16 ເຮົາໄດ້ເຮັດຄຳສັນຍາໄວ້ກໍເພາະພວກເຂົາໄດ້ປະຖິ້ມຂໍ້ຄຳສັ່ງຂອງເຮົາ, ໄດ້ຝ່າຝືນບັນດາກົດບັນຍັດຂອງເຮົາ ແລະໄດ້ເຮັດໃຫ້ວັນຊະບາໂຕເປັນມົນທິນ ຄືພວກເຂົາມັກຂາບໄຫວ້ບັນດາຮູບເຄົາຣົບຂອງພວກເຂົາຫລາຍກວ່າ. 17 ແຕ່ແລ້ວເຮົາກໍເມດຕາພວກເຂົາ. ເຮົາໄດ້ຕັດສິນໃຈບໍ່ປະຫານພວກເຂົາໃນທີ່ນັ້ນ ຄືທີ່ຖິ່ນແຫ້ງແລ້ງກັນດານ. 18 ແຕ່ເຮົາກັບໄດ້ເຕືອນພວກຊາວໜຸ່ມໃນທ່າມກາງພວກເຂົາວ່າ: ຢ່າຢຶດຖືບັນດາກົດບັນຍັດທີ່ບັນພະບຸລຸດຂອງພວກເຈົ້າໄດ້ເຮັດຂຶ້ນ; ຢ່າເຮັດຕາມປະເພນີຂອງເຂົາ ຫລືຢ່າປະພຶດຕົນໃຫ້ເປັນມົນທິນ ເພາະບັນດາຮູບເຄົາຣົບຂອງພວກເຂົາ. 19 ເຮົາແມ່ນພຣະເຈົ້າຢາເວ ພຣະເຈົ້າຂອງພວກເຈົ້າ. ຈົ່ງເຊື່ອຟັງບັນດາກົດບັນຍັດແລະຂໍ້ຄຳສັ່ງຂອງເຮົາ. 20 ຈົ່ງເຮັດໃຫ້ວັນຊະບາໂຕເປັນວັນສັກສິດ ເພື່ອວ່າວັນນັ້ນຈະເປັນໝາຍສຳຄັນແຫ່ງພັນທະສັນຍາທີ່ສອງຝ່າຍໄດ້ເຮັດຕໍ່ກັນ ແລະວັນນັ້ນຈະເຕືອນພວກເຈົ້າວ່າ ເຮົາແມ່ນພຣະເຈົ້າຢາເວ ພຣະເຈົ້າຂອງພວກເຈົ້າ. 21 ແຕ່ຄົນລຸ້ນນີ້ໄດ້ທ້າທາຍເຮົາຄືກັນ. ພວກເຂົາໄດ້ຝ່າຝືນບັນດາກົດບັນຍັດຂອງເຮົາ ແລະບໍ່ໄດ້ຢຶດຖືຂໍ້ຄຳສັ່ງຂອງເຮົາ ຊຶ່ງໃຫ້ຊີວິດແກ່ທຸກໆຄົນທີ່ປະຕິບັດຕາມ. ພວກເຂົາໄດ້ເຮັດໃຫ້ວັນຊະບາໂຕເປັນມົນທິນ. ສະນັ້ນ ເຮົາຈຶ່ງພ້ອມແລ້ວທີ່ຈະໃຫ້ພວກເຂົາໄດ້ຊີມຣິດແຫ່ງຄວາມໂກດຮ້າຍອັນເຕັມຂະໜາດຂອງເຮົາໃນຖິ່ນແຫ້ງແລ້ງກັນດານນັ້ນ ແລະສັງຫານພວກເຂົາທັງໝົດຖິ້ມ. 22 ແຕ່ເຮົາບໍ່ໄດ້ເຮັດ ເພາະການເຮັດເຊັ່ນນັ້ນອາດເປັນການລົດກຽດໃຫ້ແກ່ນາມຂອງເຮົາ ໃນທ່າມກາງຊົນຊາດທັງຫລາຍ ທີ່ໄດ້ເຫັນເຮົານຳຊາດອິດສະຣາເອນອອກມາຈາກປະເທດເອຢິບ. 23 ສະນັ້ນ ເຮົາຈຶ່ງໄດ້ເຮັດຄຳສັນຍາຢ່າງອື່ນອີກໃນຖິ່ນແຫ້ງແລ້ງກັນດານ. ເຮົາໄດ້ສາບານວ່າເຮົາຈະກະຈັດກະຈາຍພວກເຂົາໄປທົ່ວໂລກ. 24 ເຮົາໄດ້ເຮັດເຊັ່ນນີ້ ກໍເພາະພວກເຂົາໄດ້ປະຖິ້ມຂໍ້ຄຳສັ່ງຂອງເຮົາ, ໄດ້ຝ່າຝືນບັນດາກົດບັນຍັດຂອງເຮົາ, ໄດ້ເຮັດໃຫ້ວັນຊະບາໂຕເປັນມົນທິນ ແລະໄດ້ຂາບໄຫວ້ບັນດາຮູບເຄົາຣົບຢ່າງດຽວກັບທີ່ບັນພະບຸລຸດຂອງພວກເຂົາໄດ້ຮັບໃຊ້ມານັ້ນ. 25 ແລ້ວເຮົາກໍໄດ້ໃຫ້ບັນດາກົດບັນຍັດທີ່ບໍ່ດີ ແລະຂໍ້ຄຳສັ່ງທີ່ບໍ່ໃຫ້ຊີວິດແກ່ພວກເຂົາ. 26 ເຮົາໄດ້ປ່ອຍໃຫ້ພວກເຂົາເປັນມົນທິນກັບເຄື່ອງຖວາຍຕ່າງໆຂອງພວກເຂົາເອງ; ແລະເຮົາໄດ້ປ່ອຍໃຫ້ພວກເຂົາຖວາຍບູຊາລູກຊາຍກົກຂອງພວກເຂົາ. ອັນນີ້ແມ່ນເພື່ອລົງໂທດພວກເຂົາ ແລະສະແດງໃຫ້ພວກເຂົາຮູ້ວ່າເຮົາແມ່ນພຣະເຈົ້າຢາເວ. 27 ບັດນີ້ມະນຸດເອີຍ ຈົ່ງບອກຊາວອິດສະຣາເອນສິ່ງທີ່ອົງພຣະຜູ້ເປັນເຈົ້າ ພຣະເຈົ້າກຳລັງກ່າວແກ່ພວກເຂົາ. ນີ້ເປັນວິທີໜຶ່ງອີກທີ່ບັນພະບຸລຸດຂອງພວກເຂົາດູຖູກເຮົາ ຍ້ອນການບໍ່ສັດຊື່ຂອງພວກເຂົາ. 28 ເຮົາໄດ້ນຳພວກເຂົາໄປສູ່ດິນແດນ ຊຶ່ງເຮົາໄດ້ສັນຍາວ່າຈະມອບໃຫ້. ເມື່ອພວກເຂົາໄດ້ເຫັນເນີນພູສູງ ແລະຕົ້ນໄມ້ໃບຂຽວ ພວກເຂົາໄດ້ຖວາຍເຄື່ອງບູຊາແກ່ສິ່ງເຫຼົ່ານັ້ນ. ພວກເຂົາເຮັດໃຫ້ເຮົາໂກດຮ້າຍດ້ວຍເຄື່ອງບູຊາຕ່າງໆທີ່ພວກເຂົາໄດ້ເຜົາ ແລະດ້ວຍເຫຼົ້າອະງຸ່ນທີ່ພວກເຂົາໄດ້ເທລົງເປັນເຄື່ອງບູຊາ. 29 ເຮົາໄດ້ຖາມພວກເຂົາວ່າ: ສະຖານທີ່ສູງເຫຼົ່ານີ້ທີ່ພວກເຈົ້າໄປນັ້ນແມ່ນຫຍັງ? ສະນັ້ນ ພວກເຂົາຈຶ່ງໄດ້ເອີ້ນບ່ອນນັ້ນວ່າ ‘ສະຖານທີ່ສູງ’ ຕະຫລອດມາ. 30 ບັດນີ້ ຈົ່ງບອກຊາວອິດສະຣາເອນສິ່ງທີ່ອົງພຣະຜູ້ເປັນເຈົ້າ ພຣະເຈົ້າກຳລັງກ່າວ: ເປັນຫຍັງພວກເຈົ້າຈຶ່ງເຮັດບາບຢ່າງດຽວກັນກັບທີ່ບັນພະບຸລຸດຂອງພວກເຈົ້າໄດ້ເຮັດ ໂດຍແລ່ນໄປຕາມບັນດາຮູບເຄົາຣົບຂອງພວກເຂົາ? 31 ແມ່ນແຕ່ທຸກວັນນີ້ ພວກເຈົ້າກໍຍັງໄດ້ຖວາຍເຄື່ອງບູຊາແບບດຽວກັນ ແລະພວກເຈົ້າເອງໄດ້ເຮັດໃຫ້ຕົນເອງເປັນມົນທິນ ໂດຍຖວາຍລູກຂອງພວກເຈົ້າເຜົາໄຟໃຫ້ແກ່ພວກມັນ. ແຕ່ບັດນີ້ ພວກເຈົ້າຊາວອິດສະຣາເອນຍັງຖາມວ່າ ຄວາມປະສົງຂອງເຮົາແມ່ນຫຍັງ? ອົງພຣະຜູ້ເປັນເຈົ້າ ພຣະເຈົ້າກ່າວວ່າ ເຮົາມີຊີວິດຢູ່ຢ່າງແນ່ແທ້ສັນໃດ ເຮົາຈະບໍ່ໃຫ້ພວກເຈົ້າຖາມເຮົາສິ່ງໃດໆສັນນັ້ນ. 32 ພວກເຈົ້າຕັ້ງໃຈໂດຍຕົນເອງທີ່ຢາກຈະເປັນດັ່ງຊົນຊາດອື່ນໆ ຄືດັ່ງປະຊາຊົນທີ່ອາໄສຢູ່ໃນປະເທດອື່ນທີ່ຂາບໄຫວ້ຕົ້ນໄມ້ ແລະໂງ່ນຫີນ, ແຕ່ຈະເປັນເຊັ່ນນັ້ນບໍ່ໄດ້ຈັກເທື່ອ.” ພຣະເຈົ້າລົງໂທດແລະຍົກໂທດໃຫ້ 33 ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ເຮົາມີຊີວິດຢູ່ຢ່າງແນ່ແທ້ສັນໃດ ເຮົາຂໍເຕືອນວ່າ ເມື່ອເຮົາໂກດຮ້າຍພວກເຈົ້າ ເຮົາຈະປົກຄອງພວກເຈົ້າດ້ວຍມືອັນເຂັ້ມແຂງ ແລະດ້ວຍຣິດອຳນາດທຸກຢ່າງຂອງເຮົາສັນນັ້ນ. 34 ເຮົາຈະໃຫ້ພວກເຈົ້າໄດ້ເຫັນຣິດອຳນາດ ແລະໄດ້ຊີມຣິດແຫ່ງຄວາມໂກດຮ້າຍຂອງເຮົາ ເມື່ອເຮົາໂຮມພວກເຈົ້າເຂົ້າກັນ ແລະນຳກັບຄືນມາຈາກປະເທດທັງຫລາຍ ທີ່ເຮົາໄດ້ກະຈັດກະຈາຍພວກເຈົ້າໄປນັ້ນ. 35 ເຮົາຈະນຳພວກເຈົ້າໄປໃນ ຖິ່ນແຫ້ງແລ້ງກັນດານຂອງຊົນຊາດທັງຫລາຍ ແລະໃນບ່ອນນັ້ນເຮົາຈະກ່າວໂທດພວກເຈົ້າຕໍ່ໜ້າຕໍ່ຕາ. 36 ບັດນີ້ ເຮົາຈະກ່າວໂທດພວກເຈົ້າ ດັ່ງທີ່ເຮົາໄດ້ເຮັດຕໍ່ບັນພະບຸລຸດຂອງພວກເຈົ້າ ໃນຖິ່ນແຫ້ງແລ້ງກັນດານຊີນາຍ.” ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ. 37 “ເຮົາຈະຄວບຄຸມພວກເຈົ້າຢ່າງເຂັ້ມງວດ ແລະຈະເຮັດໃຫ້ພວກເຈົ້າເຊື່ອຟັງພັນທະສັນຍາຂອງເຮົາ. 38 ເຮົາຈະນຳຄົນທີ່ກະບົດ ແລະເຮັດບາບໃນທ່າມກາງພວກເຈົ້າໜີໄປ. ເຮົາຈະນຳພວກເຂົາອອກໄປຈາກດິນແດນຕ່າງໆທີ່ພວກເຂົາກຳລັງຢູ່ດຽວນີ້; ແຕ່ເຮົາຈະບໍ່ໃຫ້ພວກເຂົາກັບຄືນມາສູ່ດິນແດນອິດສະຣາເອນອີກ. ແລ້ວພວກເຈົ້າກໍຈະຮູ້ວ່າເຮົາແມ່ນພຣະເຈົ້າຢາເວ.” 39 ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ບັດນີ້ ຊາວອິດສະຣາເອນທັງໝົດເອີຍ ຈົ່ງປະພຶດຕົນໃຫ້ເໝາະສົມສາ ຈົ່ງຮັບໃຊ້ບັນດາຮູບເຄົາຣົບຂອງພວກເຈົ້າຕໍ່ໄປ ແຕ່ເຮົາຂໍເຕືອນພວກເຈົ້າວ່າ ຫລັງຈາກນີ້ແລ້ວພວກເຈົ້າຈະຕ້ອງເຊື່ອຟັງເຮົາ ແລະເຊົາລົບຫລູ່ນາມອັນສັກສິດຂອງເຮົາ ໂດຍຢຸດຖວາຍບູຊາແກ່ບັນດາຮູບເຄົາຣົບຂອງພວກເຈົ້າ. 40 ໃນດິນແດນນັ້ນ ຄືທີ່ເທິງພູເຂົາສັກສິດຂອງເຮົາ ທີ່ເທິງພູເຂົາສູງຂອງຊາດອິດສະຣາເອນ ຊາວອິດສະຣາເອນທຸກທົ່ວໜ້າຕ່າງກໍຈະຮັບໃຊ້ອົງພຣະຜູ້ເປັນເຈົ້າ ພຣະເຈົ້າ. ເຮົາຈະພໍໃຈກັບພວກເຈົ້າແລະຫວັງວ່າ ຈະໃຫ້ພວກເຈົ້ານຳເຄື່ອງບູຊາມາຖວາຍແກ່ເຮົາ ຄືເຄື່ອງອັນດີທີ່ສຸດແລະເຄື່ອງອັນສັກສິດຂອງພວກເຈົ້າ. 41 ຫລັງຈາກເຮົານຳພວກເຈົ້າອອກມາຈາກປະເທດທັງຫລາຍ ທີ່ພວກເຈົ້າຖືກກະຈັດກະຈາຍໄປນັ້ນ ແລະໂຮມພວກເຈົ້າເຂົ້າກັນແລ້ວ; ເຮົາຈະຮັບເຄື່ອງຖວາຍບູຊາຕ່າງໆທີ່ພວກເຈົ້ານຳມາເຜົາ ແລະຊົນຊາດທັງຫລາຍຈະເຫັນວ່າເຮົາບໍຣິສຸດ. 42 ເມື່ອເຮົານຳພວກເຈົ້າກັບຄືນມາສູ່ອິດສະຣາເອນ ຄືດິນແດນທີ່ເຮົາໄດ້ສັນຍາໄວ້ກັບບັນພະບຸລຸດຂອງພວກເຈົ້ານັ້ນ ພວກເຈົ້າກໍຈະຮູ້ວ່າເຮົາແມ່ນພຣະເຈົ້າຢາເວ. 43 ແລ້ວພວກເຈົ້າກໍຈະລະນຶກເຖິງສິ່ງອັນໜ້າລະອາຍທີ່ພວກເຈົ້າໄດ້ເຮັດ ແລະການທີ່ພວກເຈົ້າໄດ້ປະພຶດຕົນໃຫ້ເປັນມົນທິນ. ພວກເຈົ້າຈະກຽດຊັງພວກເຈົ້າເອງຍ້ອນສິ່ງຊົ່ວຊ້າທີ່ພວກເຈົ້າໄດ້ເຮັດ. 44 ເມື່ອເຮົາລົງມືປ້ອງກັນກຽດຂອງເຮົາ ພວກເຈົ້າຊາວອິດສະຣາເອນກໍຈະຮູ້ວ່າເຮົາແມ່ນພຣະເຈົ້າຢາເວ ຍ້ອນເຮົາບໍ່ໄດ້ຈັດການກັບພວກເຈົ້າໃຫ້ສົມກັບການຊົ່ວຮ້າຍຕ່າງໆ ທີ່ພວກເຈົ້າໄດ້ເຮັດ.” ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ. ໄຟໃນທິດໃຕ້ 45 ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ, 46 “ມະນຸດເອີຍ ເບິ່ງໄປທາງໃຕ້ພຸ້ນແມ. 47 ຈົ່ງບອກປ່າທາງທິດໃຕ້ໃຫ້ຟັງຖ້ອຍຄຳທີ່ອົງພຣະຜູ້ເປັນເຈົ້າ ພຣະເຈົ້າກ່າວວ່າ: ເບິ່ງແມ! ເຮົາກຳລັງກໍ່ໄຟຂຶ້ນ ແລະມັນຈະໄໝ້ຕົ້ນໄມ້ທຸກຕົ້ນໃນປ່າ ບໍ່ວ່າຕົ້ນເປັນຫລືຕົ້ນຕາຍ. ບໍ່ມີສິ່ງໃດຈະສາມາດມອດມັນໄດ້. ມັນຈະລຸກລາມແຕ່ທິດໃຕ້ຂຶ້ນໄປຫາທິດເໜືອ ແລະທຸກຄົນຈະຮູ້ສຶກເຖິງຄວາມຮ້ອນຂອງໄຟນີ້. 48 ພວກເຂົາທຸກຄົນຈະຮູ້ວ່າເຮົາຄືພຣະເຈົ້າຢາເວ ຜູ້ກໍ່ໄຟຂຶ້ນແລະບໍ່ມີຜູ້ໃດມອດມັນໄດ້.” 49 ແຕ່ຂ້າພະເຈົ້າໄດ້ຂັດຄ້ານຂຶ້ນວ່າ, “ອົງພຣະຜູ້ເປັນເຈົ້າ ພຣະເຈົ້າເອີຍ ຢ່າສູ່ບັງຄັບໃຫ້ຂ້ານ້ອຍຕ້ອງເຮັດສິ່ງນີ້ເລີຍ ຜູ້ໃດກໍພາກັນຈົ່ມວ່າ ຂ້ານ້ອຍມັກເວົ້າເປັນຄຳປິດສະໜາສະເໝີ.” |
@ 2012 United Bible Societies. All Rights Reserved.