ອົບພະຍົບ 8 - ພຣະຄຳພີສັກສິຝູງກົບ 1 ແລ້ວພຣະເຈົ້າຢາເວກໍໄດ້ສັ່ງໂມເຊວ່າ, “ຈົ່ງໄປບອກກະສັດຟາໂຣວ່າ ພຣະເຈົ້າຢາເວສັ່ງດັ່ງນີ້: ‘ຈົ່ງປ່ອຍປະຊາຊົນຂອງເຮົາໄປນະມັດສະການເຮົາ. 2 ຖ້າເຈົ້າບໍ່ຍອມປ່ອຍໄປ ເຮົາຈະລົງໂທດປະເທດນີ້ ໂດຍຈະໃຫ້ມີຝູງກົບທົ່ວປະເທດ. 3 ແມ່ນໍ້ານິນຈະເຕັມໄປດ້ວຍຝູງກົບ. ມັນຈະເຂົ້າໄປໃນວັງ, ເຂົ້າໄປໃນຫ້ອງນອນ, ໃນເຮືອນຂອງບັນດາຂ້າຣາຊການ, ໃນເຮືອນຂອງປະຊາຊົນ ແລະແມ່ນແຕ່ໃນເຕົາອົບແລະໃນຮາງນວດແປ້ງ. 4 ມັນຈະເຕັ້ນຂຶ້ນເທິງຕົວທ່ານ, ເທິງປະຊາຊົນຂອງທ່ານ, ແລະເທິງຂ້າຣາຊການທັງໝົດຂອງທ່ານ.”’ 5 ແລ້ວພຣະເຈົ້າຢາເວກໍໄດ້ບອກໂມເຊວ່າ, “ຈົ່ງບອກອາໂຣນໃຫ້ເດ່ໄມ້ຄ້ອນເທົ້າໃສ່ແມ່ນໍ້າລຳຄອງ ແລະໜອງບຶງທັງຫລາຍ ເພື່ອເຮັດໃຫ້ຝູງກົບຂຶ້ນມາເຕັມທົ່ວໄປໃນດິນແດນເອຢິບ.” 6 ດັ່ງນັ້ນ ອາໂຣນຈຶ່ງເດ່ໄມ້ຄ້ອນເທົ້າຊີ້ໄປທາງແມ່ນໍ້າລຳຄອງທັງຫລາຍຢູ່ໃນປະເທດເອຢິບ ແລະຝູງກົບກໍຂຶ້ນມາທົ່ວປະເທດ. 7 ແຕ່ບັນດາໝໍມົນກໍໄດ້ໃຊ້ເວດມົນຄາຖາຂອງພວກເຂົາ ເຮັດໃຫ້ຝູງກົບຂຶ້ນມາເທິງໜ້າດິນໄດ້ເຊັ່ນດຽວກັນ. 8 ດັ່ງນັ້ນ ກະສັດຟາໂຣຈຶ່ງໃຊ້ຄົນໄປເອີ້ນໂມເຊ ແລະອາໂຣນມາພົບພ້ອມສັ່ງວ່າ, “ຈົ່ງພາວັນນາອະທິຖານຕໍ່ພຣະເຈົ້າຢາເວບອກຝູງກົບອອກໄປສາ ແລະເຮົາຈະປ່ອຍປະຊາຊົນຂອງພວກເຈົ້າໄປ ເພື່ອພວກເຂົາຈະໄດ້ເອົາເຄື່ອງບູຊາໄປຖວາຍແກ່ພຣະເຈົ້າຢາເວ.” 9 ໂມເຊຈຶ່ງຕອບກະສັດຟາໂຣວ່າ, “ຂ້ານ້ອຍເຕັມໃຈທີ່ຈະພາວັນນາອະທິຖານເພື່ອທ່ານ ຂໍທ່ານກຳນົດເວລາໃຫ້ຂ້ານ້ອຍມາພາວັນນາອະທິຖານສຳລັບທ່ານເອງ, ພວກຂ້າຣາຊການ ແລະປະຊາຊົນຂອງທ່ານໄວ້ເຖີດ ແລ້ວກົບກໍຈະຖືກໄລ່ໃຫ້ໜີໄປ, ມັນຈະໜີໄປໝົດ ແລະຈະຍັງເຫລືອຢູ່ແຕ່ໃນແມ່ນໍ້ານິນເທົ່ານັ້ນ.” 10 ກະສັດຟາໂຣບອກວ່າ, “ໃຫ້ພາວັນນາອະທິຖານເພື່ອເຮົາໃນມື້ອື່ນ.” ໂມເຊຕອບວ່າ, “ຂ້ານ້ອຍຈະເຮັດຕາມທີ່ທ່ານຂໍຮ້ອງມານັ້ນ ແລ້ວທ່ານກໍຈະໄດ້ຮູ້ວ່າ ບໍ່ມີພະອື່ນໃດເໝືອນພຣະເຈົ້າຢາເວ ພຣະເຈົ້າຂອງພວກຂ້ານ້ອຍ. 11 ຝູງກົບຈະໜີໄປຈາກທ່ານ, ຈາກວັງ, ຈາກບັນດາຂ້າຣາຊການ ແລະຈາກປະຊາຊົນຂອງທ່ານ ແລະມັນຈະຍັງເຫລືອຢູ່ແຕ່ໃນແມ່ນໍ້ານິນເທົ່ານັ້ນ.” 12 ແລ້ວໂມເຊກັບອາໂຣນກໍອຳລາກະສັດຟາໂຣກັບເມືອ. ໂມເຊໄດ້ພາວັນນາອະທິຖານຕໍ່ພຣະເຈົ້າຢາເວ ໃຫ້ເຊົາໃຊ້ຝູງກົບທໍລະມານກະສັດຟາໂຣ. 13 ພຣະເຈົ້າຢາເວໄດ້ເຮັດຕາມຄຳພາວັນນາອະທິຖານຂອງໂມເຊ ແລະຝູງກົບທີ່ຢູ່ໃນເຮືອນ, ໃນເດີ່ນບ້ານ ແລະໃນທົ່ງນາກໍຕາຍໄປຈົນໝົດສິ້ນ. 14 ຊາວເອຢິບເອົາກົບຕາຍມາໂຮມໄວ້ເປັນກອງໃຫຍ່ ອັນເປັນເຫດໃຫ້ປະເທດເອຢິບເນົ່າເໝັນທົ່ວໄປ. 15 ເມື່ອກະສັດຟາໂຣເຫັນວ່າຝູງກົບໄດ້ຕາຍໄປໝົດແລ້ວ ເພິ່ນຈຶ່ງມີໃຈແຂງກະດ້າງດື້ດຶງເໝືອນເດີມ ແລະບໍ່ຍອມຟັງໂມເຊ ແລະອາໂຣນອີກຕໍ່ໄປ ຕາມທີ່ພຣະເຈົ້າຢາເວໄດ້ກ່າວໄວ້ທຸກປະການ. ຝູງຮີ້ນ 16 ພຣະເຈົ້າຢາເວໄດ້ສັ່ງໂມເຊວ່າ, “ຈົ່ງບອກອາໂຣນເອົາໄມ້ຄ້ອນເທົ້າຕີດິນ ແລະຂີ້ຝຸ່ນກໍຈະກາຍເປັນຮີ້ນຢູ່ທົ່ວໄປໃນປະເທດເອຢິບ.” 17 ສະນັ້ນ ອາໂຣນຈຶ່ງເອົາໄມ້ຄ້ອນເທົ້າຕີດິນ ແລະຂີ້ຝຸ່ນດິນກໍກາຍເປັນຮີ້ນຢູ່ເຕັມທົ່ວໄປໃນປະເທດເອຢິບ. ມັນຕອມຄົນແລະສັດ. 18 ພວກໝໍມົນໄດ້ພະຍາຍາມໃຊ້ເວດມົນຄາຖາຂອງພວກເຂົາຂັບໄລ່ຮີ້ນໜີໄປ ແຕ່ເຮັດບໍ່ໄດ້. ຮີ້ນຈຶ່ງຕອມຢູ່ເຕັມທົ່ວທຸກບ່ອນ 19 ແລະພວກໝໍມົນຈຶ່ງໄປບອກກະສັດຟາໂຣວ່າ, “ແມ່ນພຣະເຈົ້າທີ່ເຮັດສິ່ງນີ້!” ແຕ່ກະສັດຟາໂຣຍັງໃຈແຂງກະດ້າງດື້ດຶງຄືເກົ່າ ແລະບໍ່ເຊື່ອຟັງໂມເຊ ແລະອາໂຣນ ຕາມທີ່ພຣະເຈົ້າຢາເວໄດ້ກ່າວໄວ້ທຸກປະການ. ຝູງເຫລືອກ 20 ພຣະເຈົ້າຢາເວໄດ້ສັ່ງໂມເຊວ່າ, “ມື້ອື່ນແຕ່ເຊົ້າມືດ ເຈົ້າຈົ່ງໄປພົບກະສັດຟາໂຣ ໃນຂະນະທີ່ລາວໄປຍັງແມ່ນໍ້ານິນ. ຈົ່ງບອກລາວວ່າ ພຣະເຈົ້າຢາເວໄດ້ສັ່ງໄວ້ດັ່ງນີ້: ‘ຈົ່ງປ່ອຍປະຊາຊົນຂອງເຮົາໄປ ເພື່ອພວກເຂົາຈະໄດ້ນະມັດສະການເຮົາ. 21 ຖ້າເຈົ້າບໍ່ຍອມປ່ອຍພວກເຂົາໄປ ເຮົາຈະລົງໂທດປະເທດນີ້ ໂດຍສົ່ງຝູງເຫລືອກມາຕອມຕົວເຈົ້າ, ບັນດາຂ້າຣາຊການຂອງເຈົ້າ, ປະຊາຊົນຂອງເຈົ້າ ແລະວັງຂອງເຈົ້າ. ຕາມບ້ານເຮືອນແລະຕາມໜ້າດິນຈະເຕັມໄປດ້ວຍຝູງເຫລືອກ. 22 ແຕ່ເຮົາຈະຍົກເວັ້ນເຂດໂກເຊັນ ບ່ອນທີ່ປະຊາຊົນຂອງເຮົາອາໄສຢູ່. ບ່ອນນີ້ຈະບໍ່ມີຝູງເຫລືອກ. ເຮົາຈະເຮັດເຊັ່ນນີ້ກໍເພື່ອເຈົ້າຈະຮູ້ວ່າ ເຮົາຄືພຣະເຈົ້າຢາເວກໍຢູ່ເໜືອທ່າມກາງດິນແດນນີ້. 23 ເຮົາຈະເຮັດໃຫ້ເຫັນຄວາມແຕກຕ່າງ ລະຫວ່າງປະຊາຊົນຂອງເຮົາ ແລະປະຊາຊົນຂອງເຈົ້າ. ໝາຍສຳຄັນການອັດສະຈັນນີ້ຈະເກີດຂຶ້ນໃນມື້ອື່ນ.”’ 24 ແລ້ວພຣະເຈົ້າຢາເວກໍໃຊ້ຝູງເຫລືອກອັນມະຫາສານ ເຂົ້າໄປໃນວັງຂອງກະສັດຟາໂຣພ້ອມທັງທີ່ພັກຂອງພວກຂ້າຣາຊການ. ທົ່ວປະເທດເອຢິບໄດ້ຮັບຜົນເສຍຫາຍຍ້ອນຝູງເຫລືອກນີ້. 25 ຕໍ່ມາ ກະສັດຟາໂຣໄດ້ເອີ້ນໂມເຊ ແລະອາໂຣນເຂົ້າມາພົບ ແລະບອກວ່າ, “ຈົ່ງອອກໄປສາ ຈົ່ງເອົາເຄື່ອງບູຊາໄປຖວາຍແກ່ພຣະເຈົ້າຂອງພວກເຈົ້າຢູ່ໃນເຂດແດນເອຢິບນີ້ສາ.” 26 ໂມເຊຕອບວ່າ, “ບໍ່ໄດ້ດອກ ເພາະວ່າຊາວເອຢິບຈະກຽດຊັງ ໂດຍການຂ້າສັດຖວາຍບູຊາຂອງພວກຂ້ານ້ອຍແກ່ພຣະເຈົ້າຢາເວ ພຣະເຈົ້າຂອງພວກຂ້ານ້ອຍ. ຖ້າພວກຂ້ານ້ອຍໃຊ້ສັດເຫຼົ່ານີ້ເປັນເຄື່ອງຖວາຍບູຊາ ໃນບ່ອນທີ່ພວກເຂົາເຫັນພວກຂ້ານ້ອຍ, ພວກເຂົາກໍຈະເອົາກ້ອນຫີນຄວ່າງໃສ່ພວກຂ້ານ້ອຍໃຫ້ຕາຍ. 27 ພວກຂ້ານ້ອຍຕ້ອງເດີນທາງສາມວັນ ເຂົ້າໄປໃນຖິ່ນແຫ້ງແລ້ງກັນດານ ເພື່ອຖວາຍເຄື່ອງບູຊາແກ່ພຣະເຈົ້າຢາເວ ພຣະເຈົ້າຂອງພວກຂ້ານ້ອຍ ຕາມທີ່ພຣະອົງໄດ້ສັ່ງໄວ້.” 28 ກະສັດຟາໂຣບອກວ່າ, “ເຮົາຈະປ່ອຍໃຫ້ພວກເຈົ້າໄປໃນຖິ່ນແຫ້ງແລ້ງກັນດານ ຖວາຍສັດບູຊາແກ່ພຣະເຈົ້າຢາເວ ພຣະເຈົ້າຂອງພວກເຈົ້າ ຖ້າພວກເຈົ້າບໍ່ໄປໄກ. ຈົ່ງພາວັນນາອະທິຖານເພື່ອເຮົາສາ.” 29 ໂມເຊຕອບວ່າ, “ເມື່ອຂ້ານ້ອຍກັບຄືນເມືອແລ້ວ ຂ້ານ້ອຍຈະພາວັນນາອະທິຖານຕໍ່ພຣະເຈົ້າຢາເວ ຂໍໃຫ້ຝູງເຫລືອກໜີໄປຈາກທ່ານ ຈາກຂ້າຣາຊການ ແລະຈາກປະຊາຊົນຂອງທ່ານໃນມື້ອື່ນ. ແຕ່ຂໍທ່ານຢ່າຫລອກລວງພວກຂ້ານ້ອຍຕໍ່ໄປ ແລະຢ່າຂັດຂວາງພວກຂ້ານ້ອຍ ເພື່ອໄປຖວາຍບູຊາແກ່ພຣະເຈົ້າຢາເວ.” 30 ໂມເຊອຳລາຈາກກະສັດຟາໂຣ ແລະໄປພາວັນນາອະທິຖານຕໍ່ພຣະເຈົ້າຢາເວ 31 ແລະພຣະເຈົ້າຢາເວກໍເຮັດຕາມທີ່ໂມເຊໄດ້ພາວັນນາອະທິຖານຂໍນັ້ນ. ຝູງເຫລືອກໄດ້ໜີໄປຈາກກະສັດຟາໂຣ ແລະບັນດາຂ້າຣາຊການຕະຫລອດທັງປະຊາຊົນດ້ວຍ; ບໍ່ມີເຫລືອກແມ່ນແຕ່ໂຕດຽວເຫຼືອຢູ່ເລີຍ. 32 ເຖິງປານນັ້ນກໍຕາມ ກະສັດຟາໂຣຍັງໃຈແຂງກະດ້າງດື້ດຶງຢູ່ ແລະບໍ່ຍອມປ່ອຍໃຫ້ຊາວອິດສະຣາເອນໄປ. |
@ 2012 United Bible Societies. All Rights Reserved.