ອົບພະຍົບ 38 - ພຣະຄຳພີສັກສິເບຊາເລນເຮັດແທ່ນເຜົາເຄື່ອງບູຊາ ( ອພຍ 27:1-8 ) 1 ເພື່ອເຜົາເຄື່ອງຖວາຍບູຊາ ເບຊາເລນໄດ້ເຮັດແທ່ນດ້ວຍໄມ້ກະຖິນເທດ ໃຫ້ເປັນຮູບສີຫລ່ຽມມົນທົນ ຊຶ່ງແຕ່ລະຂ້າງນັ້ນວັດແທກໄດ້ 2,2 ແມັດ ແລະສູງ 1,3 ແມັດ. 2 ລາວໄດ້ເຮັດຍອດແທ່ນຕິດໄວ້ກັບແຈທັງສີ່ໃຫ້ເປັນເນື້ອດຽວກັນກັບແທ່ນບູຊາ ແລ້ວໂອບແທ່ນນັ້ນດ້ວຍທອງສຳຣິດ. 3 ສ່ວນເຄື່ອງໃຊ້ສຳລັບແທ່ນເຊັ່ນ: ໝໍ້, ຊ້ວນ, ຖ້ວຍ, ຂໍເກາະ ແລະຖາດຮອງຖ່ານໄຟນັ້ນ ເຮັດດ້ວຍທອງສຳຣິດ. 4 ແຕ່ທາງກາງແທ່ນລົງມາ ລາວໄດ້ເຮັດຕະຂ່າຍເປັນທອງສຳຣິດຕິດກັບຂອບຂອງແທ່ນ. 5 ແລ້ວລາວໄດ້ຫລໍ່ຫູຈັບເປັນທອງສຳຣິດໄວ້ທັງສີ່ຫລ່ຽມ. 6 ລາວເຮັດຄານຫາມດ້ວຍໄມ້ກະຖິນເທດໂດຍໃຊ້ທອງສຳຣິດໂອບ 7 ແລະສອດຄາໄວ້ທີ່ຫູຂອງແທ່ນແຕ່ລະເບື້ອງ. ສ່ວນແທ່ນນັ້ນເຮັດດ້ວຍໄມ້ກະດານ ໂດຍຄວັດລົງເປັນໝົ້ງທາງກາງ. ເບຊາເລນເຮັດຂັນທອງສຳຣິດ ( ອພຍ 30:18 ) 8 ເບຊາເລນເຮັດຂັນແລະພານຮອງຂັນ ດ້ວຍທອງສຳຣິດຈາກແວ່ນແຍງຂອງພວກຜູ້ຍິງທີ່ບົວລະບັດຮັບໃຊ້ທີ່ທາງເຂົ້າຫໍເຕັນບ່ອນຊຸມນຸມ. ເບຊາເລນເຮັດຜ້າອ້ອມຮອບຫໍເຕັນສັກສິດ ( ອພຍ 27:9-19 ) 9 ສຳລັບເດີ່ນຫໍເຕັນທາງດ້ານໃຕ້ ລາວໄດ້ເອົາຜ້າປ່ານເນື້ອລະອຽດດີ ຍາວ 44 ແມັດ ມາອ້ອມຮອບໄວ້. 10 ໂດຍໃຊ້ເສົາ 20 ຕົ້ນກັບຕີນຮອງເສົາ 20 ອັນ ເປັນທອງສຳຣິດຈັ້ງໄວ້ ພ້ອມທັງຂໍເກາະເຮັດດ້ວຍເງິນ ແລະເຊືອກຜູກຜ້າກັ້ງ ທີ່ຜ້າອ້ອມຮອບນັ້ນກໍເຮັດດ້ວຍເງິນ. 11 ແລະທາງດ້ານເໜືອ ຜ້າອ້ອມຮອບນັ້ນກໍມີຂະໜາດດຽວກັນ. 12 ທາງດ້ານຕາເວັນຕົກໄດ້ໃຊ້ຜ້າປ່ານ 22 ແມັດ ເສົາສິບຕົ້ນ ແລະຕີນຮອງເສົາສິບອັນ. ສ່ວນຂໍເກາະແລະຄັນສອດຜ້າກັ້ງນັ້ນໄດ້ເຮັດດ້ວຍເງິນ. 13 ທາງດ້ານຕາເວັນອອກຊຶ່ງເປັນທາງປະຕູເຂົ້ານັ້ນ ຜ້າອ້ອມຮອບຫໍເຕັນກວ້າງຊາວສອງແມັດ. 14-15 ແຕ່ລະຂ້າງທາງປະຕູເຂົ້າໄດ້ໃຊ້ຜ້າກັ້ງຍາວ 6,6 ແມັດ ແລະເສົາສາມຕົ້ນກັບຕີນຮອງເສົາສາມອັນ. 16 ຜ້າອ້ອມຮອບຫໍເຕັນສັກສິດທັງໝົດໄດ້ເຮັດດ້ວຍຜ້າປ່ານເນື້ອລະອຽດດີ. 17 ສຳລັບຕີນຮອງເສົາໄດ້ເຮັດດ້ວຍທອງສຳຣິດ. ສ່ວນຂໍເກາະ, ເຊືອກຜູກຜ້າກັ້ງ ແລະກຸບປົກເທິງເສົານັ້ນເຮັດດ້ວຍເງິນ. ເສົາຈັ້ງຜ້າອ້ອມຮອບທັງໝົດໄດ້ຕໍ່ເຂົ້າກັນດ້ວຍຄັນຜ້າກັ້ງທີ່ເຮັດດ້ວຍເງິນ. 18 ສຳລັບຜ້າກັ້ງທາງປະຕູເຂົ້ານັ້ນເຮັດດ້ວຍຜ້າປ່ານເນື້ອລະອຽດດີ ປົນກັບຜ້າຂົນແກະເປັນສີຟ້າ, ສີມ່ວງ ແລະສີແດງເຂັ້ມພ້ອມທັງໄດ້ຫຍິບແສ່ວຢ່າງຈົບດີ. ຜ້າກັ້ງນັ້ນຍາວເກົ້າແມັດ ແລະສູງສອງແມັດ ເທົ່າກັນກັບຜ້າກັ້ງອ້ອມຮອບຫໍເຕັນສັກສິດ. 19 ຜ້າກັ້ງທີ່ປະຕູເຂົ້ານັ້ນຖືກຈັ້ງດ້ວຍເສົາສີ່ຕົ້ນ ແລະຕີນຮອງເສົາສີ່ອັນເຮັດດ້ວຍທອງສຳຣິດ. ສ່ວນຂໍເກາະກັບກຸບປົກເສົາ ແລະເຊືອກຜູກຜ້າກັ້ງນັ້ນແມ່ນເຮັດດ້ວຍເງິນ. 20 ຫລັກສຽບທັງໝົດຂອງຫໍເຕັນສັກສິດ ແລະຂອງຜ້າກັ້ງອ້ອມຮອບຫໍເຕັນສັກສິດ ແມ່ນເຮັດດ້ວຍທອງສຳຣິດ. ໂລຫະທີ່ໃຊ້ສ້າງຫໍເຕັນສັກສິດ 21 ຕໍ່ໄປນີ້ແມ່ນບັນຊີຈຳນວນໂລຫະທີ່ໄດ້ໃຊ້ສ້າງຫໍເຕັນສັກສິດ, ຫໍເຕັນສັກສິດແຫ່ງຄຳພິຍານ ບ່ອນມີຫີນສອງແຜ່ນຈາລຶກຄຳສັ່ງຂອງພຣະເຈົ້າສິບຂໍ້ຖືກບັນຈຸໄວ້. ບັນຊີນີ້ໄດ້ຂຽນຂຶ້ນຕາມຄຳສັ່ງຂອງໂມເຊ ແລະຊາວເລວີ ເປັນຜູ້ລົງມືປະຕິບັດງານ ພາຍໃຕ້ການຊີ້ນຳຂອງອີທາມາ ລູກຊາຍຂອງປະໂຣຫິດອາໂຣນ. 22 ເບຊາເລນ ລູກຊາຍຂອງອູຣິ ແລະຫລານຊາຍຂອງຮູເຣຄົນໃນເຜົ່າຢູດາ ເປັນຜູ້ລົງມືເຮັດທຸກສິ່ງຕາມທີ່ພຣະເຈົ້າຢາເວໄດ້ສັ່ງໄວ້ນັ້ນທຸກປະການ. 23 ໂອໂຮລີອາບ ລູກຊາຍຂອງອາຮີສາມັກຄົນເຜົ່າດານ ແລະຜູ້ຊ່ວຍຂອງເບຊາເລນ ເປັນຜູ້ແກະສະຫລັກ, ອອກແບບ ແລະຕໍ່າຜ້າປ່ານເນື້ອລະອຽດດີກັບຜ້າຂົນແກະເປັນສີຟ້າ, ສີມ່ວງ ແລະສີແດງເຂັ້ມ. 24 ຄຳທັງໝົດທີ່ໄດ້ອຸທິດຖວາຍເພື່ອສ້າງຫໍເຕັນນີ້ ໜັກໜຶ່ງພັນກິໂລກຼາມ ຕາມອັດຕາຊັ່ງຂອງສຳນັກນະມັດສະການ. 25 ຈຳນວນເງິນທັງໝົດຈາກການຈົດທະບຽນສຳມະໂນຄົວນັ້ນໜັກສາມພັນສີ່ຮ້ອຍສາມສິບກິໂລກຼາມ ຕາມອັດຕາຊັ່ງຂອງສຳນັກນະມັດສະການ. 26 ເງິນຈຳນວນນີ້ໄດ້ເທົ່າກັບຈຳນວນເງິນ ທີ່ທຸກຄົນໄດ້ຈ່າຍໃຫ້ຕາມສຳມະໂນຄົວ ຄືແຕ່ລະຄົນໄດ້ຈ່າຍຕາມອັດຕາຂອງສຳນັກນະມັດສະການ. ເມື່ອສຳຫລວດເບິ່ງແລ້ວ ຕົວເລກຂອງການຈົດທະບຽນຄອບຄົວມີ 603.550 ຄົນ ທີ່ມີອາຍຸຊາວປີຂຶ້ນໄປ. 27 ຈາກເງິນທັງໝົດນັ້ນ ພວກເຂົາໄດ້ເອົາສາມພັນສີ່ຮ້ອຍກິໂລກຼາມ ໄປໃຊ້ເຮັດຕີນຮອງເສົາຂອງຫໍເຕັນແລະຂອງຜ້າກັ້ງຄື: ສາມສິບສີ່ກິໂລກຼາມຕໍ່ຕີນຮອງເສົາໜຶ່ງຕົ້ນ. 28 ສ່ວນເງິນທີ່ເຫຼືອສາມສິບກິໂລກຼາມນັ້ນ ເບຊາເລນໄດ້ເອົາເຮັດເຊືອກຜູກຜ້າກັ້ງ, ຂໍເກາະສຳລັບຈັບເສົາ ແລະກຸບປົກເທິງເສົາ. 29 ສ່ວນທອງສຳຣິດທີ່ໄດ້ອຸທິດຖວາຍນັ້ນ ເມື່ອຊັ່ງທັງໝົດແລ້ວໜັກໄດ້ 2.425 ກິໂລກຼາມ. 30 ທອງສຳຣິດຈຳນວນນີ້ໄດ້ເອົາເຮັດຕີນຮອງເສົາທາງປະຕູເຂົ້າຜ້າອ້ອມຫໍເຕັນບ່ອນຊຸມນຸມ, ເຮັດແທ່ນບູຊາ ແລະຕະຂ່າຍຂອງແທ່ນ, ເຄື່ອງໃຊ້ປະຈຳແທ່ນ, 31 ຕີນຮອງເສົາສຳລັບຜ້າອ້ອມຮອບ ແລະຕີນຮອງເສົາສຳລັບປະຕູເຂົ້າຜ້າອ້ອມຮອບຫໍເຕັນ ຫລັກສຽບທັງໝົດຂອງຫໍເຕັນສັກສິດ ແລະຫລັກສຽບທັງໝົດຂອງຜ້າອ້ອມຮອບເດີ່ນຫໍເຕັນ. |
@ 2012 United Bible Societies. All Rights Reserved.