ເອສະເທີ 9 - ພຣະຄຳພີສັກສິຊາວຢິວທຳລາຍເຫຼົ່າສັດຕູຂອງພວກຕົນ 1 ເມື່ອຮອດວັນທີສິບສາມຂອງເດືອນອາດາກ ຄືວັນທີ່ປະກາດເປັນທາງການຂອງກະສັດມີຜົນໃຊ້ໄດ້ ແມ່ນວັນທີ່ເຫຼົ່າສັດຕູຂອງພວກຢິວຫວັງຈະມີອຳນາດເໜືອພວກເຂົາ. ແຕ່ພວກຢິວກັບມີອຳນາດເໜືອພວກສັດຕູ. 2 ໃນຄຸ້ມຂອງຊາວຢິວຢູ່ຕາມທຸກໆເມືອງ ໃນອານາຈັກ ຊາວຢິວກໍໄດ້ຈັດຕຽມໂຈມຕີທຸກຄົນທີ່ພະຍາຍາມທຳຮ້າຍພວກຕົນ. ປະຊາຊົນທຸກທີ່ທຸກບ່ອນເກີດຢ້ານກົວພວກເຂົາ ແລະບໍ່ມີຜູ້ໃດກ້າທຳອັນຕະລາຍແກ່ພວກເຂົາ. 3 ຕາມທີ່ຈິງແລ້ວ ບັນດາຂ້າຣາຊການປະຈຳແຂວງທຸກຄົນຄື: ພວກຜູ້ປົກຄອງແຂວງ, ພວກຜູ້ປົກຄອງເມືອງ ແລະພວກຜູ້ຕາງໜ້າຂອງກະສັດ ຕ່າງກໍໄດ້ຊ່ວຍເຫລືອຊາວຢິວ ເພາະທຸກຄົນຕ່າງກໍຢ້ານກົວມໍເດໄກ. 4 ບັດນີ້ ກໍເປັນທີ່ຮູ້ຈັກກັນດີທົ່ວທັງອານາຈັກແລ້ວວ່າ ມໍເດໄກມີອຳນາດໃນຣາຊວັງ ແລະມີອຳນາດຫລາຍຂຶ້ນເລື້ອຍໆ. 5 ດັ່ງນັ້ນ ຊາວຢິວຈຶ່ງປະຕິບັດຕໍ່ສັດຕູຕາມໃຈມັກ. ພວກເຂົາໄດ້ໃຊ້ດາບໂຈມຕີພວກສັດຕູ ແລະສັງຫານພວກເຂົາ. 6 ຢູ່ພາຍໃນເມືອງເອກຊູຊາເອງ ຊາວຢິວໄດ້ຂ້າຫ້າຮ້ອຍຄົນ. 7 ສັດຕູຂອງຊາວຢິວຖືກຂ້າ ມີດັ່ງນີ້: ປາກຊານດາທາ, ດານໂຟນ, ອາຊະປາທາ, 8 ໂປຣາທາ, ອາດາລີອາ, ອາຣີດາທາ, 9 ປາກມາຊະຕາ, ອາຣີໄສ, ອາຣີໄດ ແລະໄວຊາທາ. 10 ລວມຢູ່ໃນພວກນີ້ ມີລູກຊາຍສິບຄົນຂອງຮາມານ ຜູ້ເປັນລູກຊາຍຂອງຮາມເມດາທາ. ແຕ່ການປຸ້ນສະດົມບໍ່ມີເກີດຂຶ້ນເລີຍ. 11 ໃນມື້ດຽວກັນນັ້ນ ໄດ້ມີຄົນມາລາຍງານຕໍ່ກະສັດ ເຖິງຈຳນວນຜູ້ທີ່ຖືກຂ້າໃນເມືອງເອກຊູຊາ. 12 ແລ້ວກະສັດກໍໄດ້ບອກຣາຊີນີເອສະເທີວ່າ, “ພຽງແຕ່ໃນເມືອງຊູຊາ ພວກຢິວໄດ້ຂ້າຫ້າຮ້ອຍຄົນ ລວມທັງລູກຊາຍສິບຄົນຂອງຮາມານດ້ວຍ ແລະຢູ່ຕາມແຂວງຕ່າງໆ ພວກເຂົາຈະເຮັດຢ່າງໃດນໍ ບັດນີ້ເຈົ້າຢາກໄດ້ຫຍັງແດ່? ແລະເຈົ້າກໍຈະໄດ້ຕາມໃຈມັກ. ບອກເຮົາມາອີກດູວ່າເຈົ້າຢາກໄດ້ຫຍັງ ແລະເຈົ້າກໍຈະໄດ້ສິ່ງນັ້ນ.” 13 ຣາຊີນີເອສະເທີຕອບວ່າ, “ຂ້າແດ່ພະຣາຊາ ຖ້າທ່ານພໍໃຈ ຂໍໂຜດອະນຸຍາດໃຫ້ຊາວຢິວໃນເມືອງຊູຊາເຮັດໃນມື້ອື່ນ ສິ່ງທີ່ພວກເຂົາໄດ້ຮັບອະນຸຍາດໃຫ້ເຮັດໃນວັນນີ້ ແລະຂໍສັ່ງໃຫ້ແຂວນຊາກສົບລູກຊາຍຂອງຮາມານສິບຄົນໄວ້ທີ່ບ່ອນແຂວນຄໍ.” 14 ກະສັດໄດ້ສັ່ງໃຫ້ປະຕິບັດຕາມນັ້ນ ແລະຄຳປະກາດກໍຖືກນຳອອກໃຊ້ທີ່ເມືອງຊູຊາ. ຊາກສົບລູກຊາຍຂອງຮາມານສິບຄົນຖືກແຂວນໄວ້ໃຫ້ຄົນເຫັນ. 15 ແລະໃນວັນທີສິບສີ່ຂອງເດືອນອາດາກ ຊາວຢິວຢູ່ໃນເມືອງຊູຊາໄດ້ຮ່ວມປະຊຸມກັນອີກ ແລະໄດ້ຂ້າຄົນໃນເມືອງຕື່ມສາມຮ້ອຍຄົນ. ແຕ່ພວກເຂົາບໍ່ໄດ້ປຸ້ນສະດົມເອົາສິ່ງຂອງໃດໆເລີຍ. 16 ໃນລະຫວ່າງນັ້ນ ຝ່າຍຊາວຢິວທີ່ຢູ່ຕາມແຂວງຕ່າງໆກໍໄດ້ຈັດລະບຽບການປ້ອງກັນຕົວເອງ. ພວກເຂົາກຳຈັດລ້າງຜານສັດຕູໂດຍໄດ້ຂ້າພວກທີ່ກຽດຊັງພວກຕົນເຈັດສິບຫ້າພັນຄົນ. ແຕ່ພວກເຂົາບໍ່ໄດ້ປຸ້ນສະດົມເອົາສິ່ງຂອງໃດໆເລີຍ. 17 ເຫດການນີ້ໄດ້ເກີດຂຶ້ນໃນວັນທີສິບສາມຂອງເດືອນອາດາກ. ວັນຕໍ່ມາເປັນວັນທີສິບສີ່; ໃນວັນນີ້ບໍ່ມີການຂ້າຟັນກັນອີກ ແລ້ວພວກເຂົາກໍກິນລ້ຽງສະຫລອງກັນຢ່າງຊົມຊື່ນຍິນດີ. 18 ແຕ່ຊາວຢິວໃນນະຄອນຊູຊາໄດ້ຖືເອົາວັນທີສິບຫ້າເປັນວັນພັກ ເພາະໃນວັນທີສິບສາມແລະສິບສີ່ ພວກເຂົາໄດ້ຂ້າສັດຕູ ແລະຢຸດການຂ້າໃນວັນທີສິບຫ້າ. 19 ດ້ວຍເຫດນີ້ ຊາວຢິວທີ່ຢູ່ໃນເມືອງນ້ອຍຕ່າງໆ ຈຶ່ງຖືເອົາວັນທີສິບສີ່ຂອງເດືອນອາດາກ ເປັນວັນພັກຢ່າງເບີກບານໃຈ ຄືເປັນເວລາງານລ້ຽງ ແລະເອົາອາຫານໃຫ້ເປັນຂອງຂວັນແກ່ກັນແລະກັນ. ວັນເທດສະການປູຣິມ 20 ແລ້ວມໍເດໄກກໍໄດ້ບັນທຶກເຫດການທັງຫລາຍນີ້ໄວ້ ແລະສົ່ງຈົດໝາຍໄປຫາຊາວຢິວທຸກຄົນ ບໍ່ວ່າຢູ່ໃກ້ ຫລືຢູ່ໄກ ທົ່ວທັງອານາຈັກເປີເຊຍ. 21 ເພິ່ນໄດ້ສັ່ງໃຫ້ພວກເຂົາຖືເອົາວັນທີສິບສີ່ແລະສິບຫ້າ ຂອງເດືອນອາດາກ ເປັນວັນພັກໃນແຕ່ລະປີ. 22 ວັນເຫຼົ່ານີ້ເປັນວັນທີ່ຊາວຢິວໄດ້ກຳຈັດລ້າງຜານສັດຕູຂອງພວກເຂົາ; ເປັນເດືອນທີ່ປ່ຽນຈາກເວລາແຫ່ງຄວາມໂສກເສົ້າແລະການສູນເສຍຄວາມຫວັງ ມາເປັນຄວາມປິຕິຍິນດີແລະຄວາມເບີກບານໃຈ. ພວກເຂົາໄດ້ຮັບເອົາຄຳສັ່ງນັ້ນ ແລະຖືເອົາວັນເຫຼົ່ານີ້ເປັນວັນກິນລ້ຽງສັງສັນ ໃຫ້ອາຫານເປັນຂອງຂວັນແກ່ກັນແລະກັນ ແລະແກ່ຄົນຍາກຈົນ. 23 ດັ່ງນັ້ນ ຊາວຢິວຈຶ່ງປະຕິບັດຕາມຄຳແນະນຳຂອງມໍເດໄກ ແລະການສະຫລອງນີ້ຈຶ່ງກາຍເປັນທຳນຽມປະຈຳປີ. 24 ຮາມານລູກຊາຍຂອງຮາມເມດາທາເປັນເຊື້ອສາຍຂອງອາກັກ ແລະເປັນສັດຕູຂອງຊາວຢິວ. ລາວໄດ້ໃຊ້ສະຫລາກ (ຊຶ່ງເອີ້ນກັນວ່າ ປູຣິມ) ເພື່ອຊອກຫາວັນທຳລາຍລ້າງຜານຊາວຢິວ; ລາວວາງແຜນທຳລາຍລ້າງຜານພວກເຂົາໃຫ້ດັບສິ້ນໄປ. 25 ແຕ່ເອສະເທີໄດ້ເຂົ້າໄປຫາກະສັດ ແລະກະສັດໄດ້ອອກຄຳສັ່ງເປັນລາຍລັກອັກສອນ ໃຫ້ຮາມານໄດ້ຮັບໂທດດ້ວຍເຄາະກຳທີ່ລາວໄດ້ວາງແຜນການໄວ້ສຳລັບຊາວຢິວ ຄືລາວພ້ອມດ້ວຍລູກຊາຍສິບຄົນຂອງລາວຖືກແຂວນຄໍເທິງຫລັກ. 26 ດ້ວຍເຫດນີ້ ຄົນຈຶ່ງເອີ້ນວັນພັກນີ້ວ່າ ປູຣິມ. ຍ້ອນຈົດໝາຍຂອງມໍເດໄກ ແລະຍ້ອນເຫດການທຸກຢ່າງທີ່ໄດ້ເກີດຂຶ້ນກັບພວກເຂົາ 27 ຊາວຢິວຈຶ່ງໄດ້ຕັ້ງກົດລະບຽບໄວ້ສຳລັບພວກເຂົາເອງ, ສຳລັບເຊື້ອສາຍຂອງພວກເຂົາ ແລະສຳລັບຜູ້ທີ່ໄດ້ເຂົ້າຮ່ວມກັບພວກເຂົາ ໃນທຸກປີໃດ ເມື່ອເຖິງກຳນົດຂອງສອງວັນນີ້ແລ້ວ ໃຫ້ມີການຢຶດຖືຢ່າງສະໝໍ່າສະເໝີ ຕາມຄຳແນະນຳຂອງມໍເດໄກ. 28 ໄດ້ມີການລົງມະຕິກັນວ່າ ໃຫ້ຊາວຢິວທຸກໆຄອບຄົວແຕ່ລະຍຸກສະໄໝ ໃນທຸກໆແຂວງແລະທຸກໆເມືອງ ຈົດຈຳແລະຢຶດຖືວັນປູຣິມນີ້ຕະຫລອດໄປ. 29 ແລ້ວຣາຊີນີເອສະເທີລູກສາວຂອງອາບີໄຮພ້ອມທັງມໍເດໄກ ກໍຍັງໄດ້ຂຽນຈົດໝາຍສະບັບໜຶ່ງອີກເປັນທາງການ ໃຊ້ສິດຂອງຣາຊີນີຢ່າງເຕັມສ່ວນ ຮັບຮອງຈົດໝາຍກ່ຽວກັບປູຣິມ ຊຶ່ງມໍເດໄກໄດ້ຂຽນໄປກ່ອນນັ້ນ. 30 ຈົດໝາຍນີ້ຖືກສົ່ງໄປເຖິງຊາວຢິວທຸກຄົນ ແລະທັງສົ່ງສຳເນົາໄປໃຫ້ໜຶ່ງຮ້ອຍຊາວເຈັດແຂວງ ໃນອານາຈັກເປີເຊຍ. ຈົດໝາຍນັ້ນໄດ້ມີຄຳອວຍພອນຄວາມສະຫງົບສຸກແລະຄວາມປອດໄພແກ່ຊາວຢິວ 31 ແລະທັງແນະນຳພວກເຂົາພ້ອມທັງເຊື້ອສາຍ ໃຫ້ຢຶດຖືປູຣິມຕາມວັນທີ່ໄດ້ກຳນົດໄວ້ ໃຫ້ເປັນກົດລະບຽບໃນການຖືສິນອົດອາຫານ ແລະເວລາໂສກເສົ້າໄວ້ທຸກ. ຄຳສັ່ງນີ້ແມ່ນຖືກປະກາດໃຫ້ໃຊ້ ໂດຍມໍເດໄກແລະຣາຊີນີເອສະເທີ. 32 ຄຳສັ່ງຂອງຣາຊີນີເອສະເທີເປັນການຢືນຢັນ ຮັບຮອງກົດລະບຽບຂອງເທດສະການປູຣິມ ຕາມທີ່ໄດ້ມີບັນທຶກໄວ້ໃນໜັງສືມ້ວນ. |
@ 2012 United Bible Societies. All Rights Reserved.