ເອສະເທີ 2 - ພຣະຄຳພີສັກສິນາງເອສະເທີຂຶ້ນເປັນຣາຊີນີ 1 ຕໍ່ມາ ເຖິງແມ່ນຄວາມຄຽດຮ້າຍຂອງກະສັດໄດ້ເຢັນລົງແລ້ວກໍຕາມ ແຕ່ເພິ່ນຍັງຄິດເຖິງຄວາມປະພຶດຂອງຣາຊີນີວາຊະຕີ ແລະທັງຄິດເຖິງຄຳປະກາດຕໍ່ຕ້ານນາງດ້ວຍ. 2 ສະນັ້ນ ທີ່ປຶກສາຜູ້ໃກ້ຊິດຂອງກະສັດບາງຄົນຈຶ່ງແນະນຳເພິ່ນວ່າ, “ເຫດໃດທ່ານຈຶ່ງບໍ່ໃຫ້ຄົນອອກໄປຊອກຫາຍິງສາວບາງຄົນຜູ້ບໍຣິສຸດ ແລະສວຍງາມ? 3 ທ່ານອາດແຕ່ງຕັ້ງພວກຂ້າຣາຊການໃນທຸກໆແຂວງຂອງອານາຈັກນີ້ ແລະສັ່ງໃຫ້ພວກເຂົານຳເອົາຍິງສາວທັງຫລາຍທີ່ສວຍງາມກວ່າໝູ່ ມາທີ່ບ່ອນຢູ່ຂອງພວກນາງສະໜົມ ທີ່ນະຄອນຊູຊາ ເມືອງເອກນີ້. ເຮໄກ ຊາຍຕອນຈະເປັນຜູ້ເບິ່ງແຍງພວກເຂົາ ແລະໃຫ້ພວກເຂົາແຕ່ງໜ້ານວດຕົວຢ່າງສວຍງາມ. 4 ແລ້ວກໍໃຫ້ທ່ານເອົາຍິງຜູ້ໜຶ່ງທີ່ທ່ານມັກທີ່ສຸດ ມາເປັນຣາຊີນີແທນນາງວາຊະຕີ.” ກະສັດເຫັນວ່າເປັນການແນະນຳທີ່ດີ; ສະນັ້ນ ເພິ່ນຈຶ່ງປະຕິບັດຕາມ. 5 ໃນນະຄອນຊູຊານີ້ ມີຄົນຢິວຜູ້ໜຶ່ງຊື່ວ່າມໍເດໄກລູກຊາຍຂອງຢາອີ; ລາວເປັນຄົນມາຈາກເຜົ່າເບັນຢາມິນ ແລະເປັນເຊື້ອສາຍຂອງກີເຊແລະຊີເມອີ. 6 ເມື່ອກະສັດເນບູກາດເນັດຊາແຫ່ງບາບີໂລນໄດ້ຈັບເຈົ້າເຢໂຮຍອາກິນ ກະສັດແຫ່ງຢູດາຍຈາກນະຄອນເຢຣູຊາເລັມ ມາເປັນຊະເລີຍພ້ອມທັງກຸ່ມຊະເລີຍອື່ນນັ້ນ ມໍເດໄກກໍຖືກຈັບມາກັບພວກເຂົາດ້ວຍ. 7 ລາວມີພີ່ນ້ອງຄົນໜຶ່ງຊື່ວ່າ ເອສະເທີ ແລະນາງມີຊື່ເປັນພາສາເຮັບເຣີວ່າ ຮາດາສາ; ນາງເປັນຍິງສາວທີ່ມີຮູບຮ່າງສວຍງາມ. ເມື່ອພໍ່ແມ່ນາງຕາຍໄປ ມໍເດໄກໄດ້ຮັບເອົານາງມາລ້ຽງເປັນດັ່ງລູກສາວຂອງຕົນເອງ. 8 ເມື່ອກະສັດໄດ້ອອກດຳລັດໃໝ່ແລ້ວ ກໍໄດ້ມີຍິງສາວຫລາຍຄົນຖືກນຳຕົວມາທີ່ນະຄອນຊູຊາ ແລະເອສະເທີກໍຮ່ວມຢູ່ກັບພວກເຂົາດ້ວຍ. ນາງຖືກພາມາຢູ່ໃນວັງ ພາຍໃຕ້ຄວາມດູແລຂອງເຮໄກ ຜູ້ຮັບຜິດຊອບໂຮງຂອງພວກນາງສະໜົມ. 9 ເຮໄກພໍໃຈໃນຕົວນາງເອສະເທີ ແລະໃຫ້ຄວາມກະລຸນາແກ່ນາງ. ເຮໄກຈຶ່ງເລີ່ມຕົບແຕ່ງຄວາມງາມຂອງນາງໂດຍການນວດຮ່າງກາຍ ແລະໃຫ້ນາງກິນອາຫານພິເສດ. ລາວໃຫ້ນາງຢູ່ໃນບ່ອນດີທີ່ສຸດໃນໂຮງຂອງພວກນາງສະໜົມ ແລະແຕ່ງຕັ້ງຜູ້ຍິງເຈັດຄົນເປັນພິເສດຈາກວັງໃຫ້ເປັນຜູ້ຮັບໃຊ້ນາງ. 10 ສ່ວນມໍເດໄກກໍໄດ້ແນະນຳນາງເອສະເທີ ໃຫ້ປິດເປັນຄວາມລັບເລື່ອງທີ່ຕົນເປັນຄົນຢິວ. 11 ທຸກມື້ໃດ ມໍເດໄກໄດ້ຍ່າງໄປມາຕໍ່ໜ້າເດີ່ນຂອງໂຮງພວກນາງສະໜົມ ເພື່ອຢາກຮູ້ວ່າເອສະເທີເປັນຢູ່ຢ່າງໃດ ແລະຈະມີຫຍັງເກີດຂຶ້ນກັບນາງ. 12 ຕາມທຳມະດາແລ້ວ ການຕົບແຕ່ງຄວາມງາມຂອງຜູ້ຍິງມີກຳນົດໄດ້ໜຶ່ງປີຄື: ຫົກເດືອນເປັນການນວດກາຍດ້ວຍນໍ້າມັນກຳຍານ ແລະອີກຫົກເດືອນຕໍ່ມາ ເປັນການນວດດ້ວຍນໍ້າມັນຫອມ. ຫລັງຈາກນີ້ ຍິງແຕ່ລະຄົນແມ່ນຈະຖືກນຳຕົວເປັນຜຽນເຂົ້າໄປຫາກະສັດເຊເຊັດ. 13 ຕອນທີ່ນາງອອກຈາກໂຮງຂອງພວກນາງສະໜົມໄປທີ່ວັງນັ້ນ ນາງນຸ່ງຫຍັງກໍໄດ້ຕາມໃຈ. 14 ນາງໄປທີ່ນັ້ນໃນເວລາຄໍ່າ ແລະເຊົ້າມື້ໃໝ່ມາ ນາງຖືກນຳຕົວກັບໄປທີ່ໂຮງຂອງນາງສະໜົມແຫ່ງອື່ນ ແລະໃຫ້ຢູ່ພາຍໃຕ້ການດູແລຂອງຊາອາຊະກາດ ຊາຍຕອນຜູ້ກຳກັບບັນດາເມຍນ້ອຍຂອງກະສັດ. ນາງຈະບໍ່ໄດ້ເຂົ້າໄປຫາກະສັດອີກ ນອກຈາກວ່າກະສັດພໍໃຈໃນຕົວນາງ ແລະເອີ້ນຊື່ຂອງນາງໃຫ້ເຂົ້າໄປຫາ. 15 ເວລາຂອງເອສະເທີທີ່ຈະເຂົ້າໄປຫາກະສັດກໍໄດ້ມາເຖິງ. ເອສະເທີເປັນລູກສາວຂອງອາບີໄຮ ແລະເປັນຍາດຕິພີ່ນ້ອງຂອງມໍເດໄກ ພໍ່ລ້ຽງຂອງນາງ. ເມື່ອທຸກຄົນເຫັນເອສະເທີຕ່າງກໍຊົມເຊີຍນາງ. ເມື່ອຜຽນຂອງນາງມາເຖິງ ນາງໄດ້ນຸ່ງເຄື່ອງຕາມຄຳແນະນຳຂອງເຮໄກ ຊາຍຕອນຜູ້ທີ່ຮັບຜິດຊອບໂຮງຂອງພວກນາງສະໜົມ. 16 ສະນັ້ນ ໃນຣາຊການປີທີເຈັດຂອງກະສັດເຊເຊັດ ໃນເດືອນທີສິບອັນກົງກັບເດືອນເຕເບັດ ນາງເອສະເທີກໍໄດ້ຖືກນຳຕົວເຂົ້າໄປໃນວັງເພື່ອພົບກະສັດ. 17 ກະສັດພໍໃຈນາງຫລາຍກວ່າຍິງສາວຄົນອື່ນໆ ແລະນາງໄດ້ຮັບຄວາມກະລຸນາ ແລະຄວາມຮັກຈາກກະສັດ ຫລາຍກວ່າຍິງສາວຄົນອື່ນໆ. ເພິ່ນສວມມົງກຸດໃສ່ຫົວນາງ ແລະແຕ່ງຕັ້ງນາງໃຫ້ເປັນຣາຊີນີແທນຣາຊີນີວາຊະຕີ. 18 ແລ້ວກະສັດກໍຈັດງານກິນລ້ຽງຢ່າງໃຫຍ່ໂຕຂຶ້ນ ເພື່ອເປັນກຽດແກ່ນາງເອສະເທີ ແລະໄດ້ເຊີນບັນດາຂ້າຣາຊການພ້ອມທັງພວກບໍລິຫານທຸກຄົນຂອງຕົນ ມາຮ່ວມໃນງານນີ້. ເພິ່ນໄດ້ປະກາດໃຫ້ມື້ນັ້ນເປັນມື້ຢຸດພັກ ໃນທຸກແຂວງ ແລະເພິ່ນໄດ້ແຈກຂອງຂວັນໃຫ້ຄົນຢ່າງໃຈກວ້າງຂວາງ ສົມກັບເປັນກະສັດ. ມໍເດໄກຊ່ວຍຊີວິດຂອງກະສັດ 19 ໃນເວລາດຽວກັນນັ້ນ ກະສັດກໍແຕ່ງຕັ້ງມໍເດໄກໃຫ້ຮັບຕຳແໜ່ງບໍລິຫານຣາຊການ. 20 ສ່ວນເອສະເທີ ນາງຍັງບໍ່ທັນໄດ້ໃຫ້ຜູ້ໃດຮູ້ວ່າຕົນເປັນຄົນຢິວ. ມໍເດໄກບອກນາງບໍ່ໃຫ້ບອກຜູ້ໃດໝົດ ແລະນາງກໍຟັງຄວາມຂອງມໍເດໄກໃນເລື່ອງນີ້ ດັ່ງນາງໄດ້ເຄີຍຟັງຄວາມຂອງລາວມາຕັ້ງແຕ່ຍັງນ້ອຍ ໃນຄາວທີ່ຢູ່ໃຕ້ຄວາມດູແລຂອງລາວນັ້ນ. 21 ໃນລະຫວ່າງທີ່ມໍເດໄກຮັບຕຳແໜ່ງຢູ່ໃນວັງນັ້ນກໍມີຊາຍຕອນສອງຄົນຄື: ບິກທານ ແລະເຕເຣເຊ ເປັນຄົນເຝົ້າປະຕູຫ້ອງນອນຂອງກະສັດ. ພວກເຂົາເປັນສັດຕູຕໍ່ກະສັດເຊເຊັດ ແລະວາງແຜນທີ່ຈະຂ້າເພິ່ນ. 22 ມໍເດໄກຮູ້ເລື່ອງນີ້ຈຶ່ງບອກໃຫ້ຣາຊີນີເອສະເທີຮູ້ນຳ ນາງໄດ້ບອກກະສັດໃນເລື່ອງທີ່ມໍເດໄກໄດ້ຮູ້ນັ້ນ. 23 ກະສັດໄດ້ສັ່ງໃຫ້ມີການສືບສວນ ແລະພົບວ່າຄຳລາຍງານນັ້ນເປັນຄວາມຈິງ; ສະນັ້ນ ຊາຍທັງສອງຈຶ່ງຖືກແຂວນຄໍທີ່ເທິງຫລັກໄມ້. ແລ້ວກະສັດກໍໄດ້ສັ່ງໃຫ້ຈົດເຫດການນີ້ໄວ້ ເປັນທາງການໃນປຶ້ມບັນທຶກຂອງກະສັດ. |
@ 2012 United Bible Societies. All Rights Reserved.