ປັນຍາຈານ 7 - ພຣະຄຳພີສັກສິຂໍ້ຄິດກ່ຽວກັບຊີວິດ 1 ຊື່ສຽງດີກໍດີກວ່ານໍ້າຫອມທີ່ດີເລີດ ແລະມື້ຕາຍກໍດີກວ່າມື້ເກີດ. 2 ໄປເຮືອນທີ່ມີການໄວ້ທຸກກໍດີກວ່າໄປເຮືອນທີ່ມີການກິນລ້ຽງ ເພາະຜູ້ທີ່ຍັງມີຊີວິດຢູ່ຈະໄດ້ສຳນຶກສະເໝີວ່າ ຄວາມຕາຍພວມລໍຖ້າທຸກຄົນຢູ່. 3 ການໂສກເສົ້າກໍດີກວ່າການຫົວເລາະ ມັນອາດເຮັດໃຫ້ໜ້າເສົ້າໝອງ, ແຕ່ເຮັດໃຫ້ເກີດຄວາມເຂົ້າໃຈຢ່າງເລິກເຊິ່ງ. 4 ຜູ້ໃດທີ່ຄິດເຖິງແຕ່ຄວາມສຸກຢູ່ເລື້ອຍ ຜູ້ນັ້ນກໍເປັນຄົນໂງ່ຈ້າ. ຄົນມີປັນຍາຍ່ອມຄິດເຖິງຄວາມຕາຍ. 5 ຟັງຄຳຕຳໜິຂອງຄົນມີປັນຍາ ກໍດີກວ່າຟັງເພງຂອງຄົນໂງ່ຈ້າ. 6 ເມື່ອຄົນໂງ່ຈ້າຫົວເລາະ ກໍສໍ່າກັບສຽງໜາມແຕກຢູ່ໃນແປວໄຟ. ມັນບໍ່ມີຄວາມໝາຍຫຍັງເລີຍ. 7 ເມື່ອຄົນມີປັນຍາສໍ້ໂກງຜູ້ໃດຜູ້ໜຶ່ງ ລາວກໍເຮັດດັ່ງຄົນໂງ່ຈ້າໄດ້ເຮັດ. ຖ້າເຈົ້າຮັບສິນຈ້າງລາງວັນ ເຈົ້າກໍທຳລາຍອຸປະນິໄສຂອງເຈົ້າເສຍແລ້ວ. 8 ບັ້ນປາຍຂອງທຸກສິ່ງກໍດີກວ່າບັ້ນຕົ້ນ. ໃຈອົດທົນກໍດີກວ່າໃຈຈອງຫອງ. 9 ຈົ່ງລະງັບຄວາມໂມໂຫຂອງເຈົ້າໄວ້ ເພາະຄົນໂງ່ຈ້ານັ້ນມີຄວາມໂກດແຄ້ນຢູ່ໃນໃຈ. 10 ຢ່າຖາມເລີຍວ່າ, “ເປັນຫຍັງສະໄໝກ່ອນຈຶ່ງດີກວ່າສະໄໝນີ້?” ມັນບໍ່ແມ່ນຄຳຖາມທີ່ສະຫລາດ. 11 ທຸກຄົນທີ່ມີຊີວິດຢູ່ຄວນເປັນຄົນມີປັນຍາ ມັນເປັນການດີເທົ່າກັບການໄດ້ຮັບມໍຣະດົກຕົກທອດ 12 ເງິນເປັນເຄື່ອງປ້ອງກັນສັນໃດ ສະຕິປັນຍາກໍເປັນເຄື່ອງປ້ອງກັນສັນນັ້ນ. ປັນຍາຮັກສາເຈົ້າໃຫ້ປອດໄພ ອັນນີ້ ແມ່ນຜົນດີແຫ່ງຄວາມຮູ້. 13 ຈົ່ງຄິດເຖິງສິ່ງທີ່ພຣະເຈົ້າໄດ້ສ້າງ ສິ່ງທີ່ພຣະເຈົ້າໄດ້ສ້າງໃຫ້ຄົດແລ້ວ ຜູ້ໃດເຮັດໃຫ້ຊື່ໄດ້ແດ່? 14 ເມື່ອທຸກສິ່ງເປັນໄປໂດຍດີ ຈົ່ງຍິນດີເຖີດ, ແຕ່ເມື່ອຄວາມເດືອດຮ້ອນມາເຖິງ ຈົ່ງລະນຶກວ່າ ພຣະເຈົ້າໃຫ້ທັງຄວາມເດືອດຮ້ອນແລະຄວາມຍິນດີ ດັ່ງນັ້ນ ເຈົ້າຈະຮູ້ບໍ່ໄດ້ຈັກເທື່ອວ່າ ອະນາຄົດຈະມີເຫດການຫຍັງເກີດຂຶ້ນ. 15 ຊີວິດຂ້າພະເຈົ້າກໍອະນິຈັງດ້ວຍ, ແຕ່ຂ້າພະເຈົ້າໄດ້ເຫັນທຸກສິ່ງໃນຊີວິດຄື ຄົນຊອບທຳຜູ້ໜຶ່ງຕາຍໄປໃນຄວາມຊອບທຳຂອງຕົນ ແລະຄົນຊົ່ວຮ້າຍມີຊີວິດຍືນຍາວໃນການກະທຳຊົ່ວຂອງເຂົາ. 16 ສະນັ້ນ ຢ່າສູ່ເປັນຄົນຊອບທຳໂພດຫລືເປັນຄົນມີປັນຍາເກີນໄປ ເປັນຫຍັງຈຶ່ງຢາກທຳລາຍຕົນເອງ? 17 ແຕ່ຢ່າສູ່ເປັນຄົນຊົ່ວຊ້າຫລືໂງ່ຈ້າເກີນໄປຄືກັນ ເປັນຫຍັງຈຶ່ງຕ້ອງຕາຍກ່ອນກຳນົດ? 18 ຈົ່ງຫລີກລ້ຽງທັງສອງຢ່າງນີ້ ຖ້າເຈົ້າຢຳເກງພຣະເຈົ້າ ເຈົ້າກໍຈະພົ້ນຈາກສອງສິ່ງທີ່ກ່າວມາ. 19 ປັນຍາເຮັດໃຫ້ຄົນສະຫລາດຜູ້ໜຶ່ງມີອຳນາດລື່ນກວ່າຜູ້ປົກຄອງສິບຄົນທີ່ຢູ່ໃນເມືອງໜຶ່ງ. 20 ຢູ່ໃນໂລກນີ້ ບໍ່ມີຜູ້ໃດທີ່ເຮັດຖືກຕ້ອງສະເໝີໄປ ໂດຍບໍ່ໄດ້ເຮັດບາບຈັກເທື່ອ. 21 ຢ່າສູ່ສົນໃຈນຳທຸກເລື່ອງທີ່ຄົນເວົ້າ ເຈົ້າອາດໄດ້ຍິນຄົນຮັບໃຊ້ຂອງເຈົ້າປ້ອຍດ່າເຈົ້າກໍໄດ້ 22 ແລະເຈົ້າຮູ້ວ່າ ເຈົ້າເອງກໍເຄີຍໄດ້ປ້ອຍດ່າຄົນອື່ນຕັ້ງຫລາຍເທື່ອ. 23 ຂ້າພະເຈົ້າໄດ້ໃຊ້ປັນຍາຂອງຂ້າພະເຈົ້າ ເພື່ອທົດສອບເບິ່ງສິ່ງທັງໝົດນີ້. ຂ້າພະເຈົ້າຕັ້ງໃຈວ່າຈະເປັນຄົນມີປັນຍາ, ແຕ່ປັນຍາພັດຢູ່ເໜືອຄວາມເຂົ້າໃຈຂອງຂ້າພະເຈົ້າ. 24 ຜູ້ໃດແດ່ຄົ້ນພົບຄວາມໝາຍຂອງຊີວິດໄດ້? ຊ່າງເລິກເກີນໄປສຳລັບພວກເຮົາ ແລະຊ່າງຍາກເກີນກວ່າທີ່ພວກເຮົາຈະເຂົ້າໃຈໄດ້. 25 ແຕ່ຂ້າພະເຈົ້າໄດ້ອຸທິດຊີວິດໃສ່ການສຶກສາແລະການຫາຄວາມຮູ້; ຂ້າພະເຈົ້າຕັ້ງໃຈຄົ້ນຄ້ວາຊອກຫາປັນຍາ ແລະຕອບບັນຫາຕ່າງໆທັງຊອກຮຽນຮູ້ວ່າ ຄວາມໂງ່ຈ້ານັ້ນມັນຊົ່ວຊ້າແລະບ້າບໍ່ມີສະຕິສໍ່າໃດ. 26 ຂ້າພະເຈົ້າໄດ້ຄົ້ນພົບສິ່ງໜຶ່ງທີ່ຂົມຂື່ນຫລາຍກວ່າຄວາມຕາຍຄື: ແມ່ຍິງທີ່ມີຈິດໃຈເປັນບ້ວງແຮ້ວແລະຕະຂ່າຍ ແຂນຂອງນາງເປັນເໝືອນສາຍໂສ້. ຜູ້ຊາຍທີ່ພຣະເຈົ້າພໍໃຈນຳຈະໜີພົ້ນໄປໄດ້, ແຕ່ນາງຈະດັກຈັບຄົນບາບໄວ້. 27 ແມ່ນແລ້ວ ປັນຍາຈານກ່າວຈາ ຂ້າພະເຈົ້າໄດ້ຄົ້ນພົບເລື່ອງນີ້ ເທື່ອລະເລັກລະໜ້ອຍໃນຂະນະທີ່ຂ້າພະເຈົ້າກຳລັງຊອກຫາຄຳຕອບ. 28 ຂ້າພະເຈົ້າໄດ້ຊອກຫາຄຳຕອບທາງອື່ນ, ແຕ່ກໍບໍ່ພົບ. ຂ້າພະເຈົ້າໄດ້ພົບຊາຍຄົນໜຶ່ງທີ່ທ່ຽງຕົງໃນຈຳນວນຜູ້ຊາຍພັນຄົນ, ແຕ່ບໍ່ໄດ້ພົບຜູ້ຍິງຈັກຄົນດຽວ. 29 ສິ່ງທັງໝົດນີ້ແຫຼະ ທີ່ຂ້າພະເຈົ້າໄດ້ຮຽນຮູ້ຄື: ພຣະເຈົ້າໄດ້ສ້າງມະນຸດໃຫ້ເປັນຄົນທ່ຽງທຳ ແຕ່ມະນຸດໄດ້ຄົ້ນຄ້ວາກົນອຸບາຍຕ່າງໆອອກມາ. |
@ 2012 United Bible Societies. All Rights Reserved.