ປັນຍາຈານ 3 - ພຣະຄຳພີສັກສິມີເວລາສຳລັບທຸກສິ່ງ 1 ທຸກສິ່ງທີ່ເກີດຂຶ້ນຢູ່ໃນໂລກນີ້ ເປັນໄປຕາມລະດູການ ແລະເວລາທີ່ພຣະເຈົ້າກຳນົດໄວ້. 2 ພຣະອົງຕັ້ງໄວ້ເວລາສຳລັບເກີດ ແລະເວລາສຳລັບຕາຍ ເວລາສຳລັບປູກ ແລະເວລາສຳລັບຫລົກ 3 ເວລາສຳລັບຂ້າ ແລະເວລາສຳລັບປິ່ນປົວໃຫ້ດີ ເວລາສຳລັບມ້າງລົງ ແລະເວລາສຳລັບກໍ່ສ້າງຂຶ້ນ. 4 ພຣະອົງຕັ້ງເວລາສຳລັບໂສກເສົ້າ ແລະເວລາສຳລັບຊົມຊື່ນຍິນດີ ເວລາສຳລັບໄວ້ທຸກ ແລະເວລາສຳລັບຟ້ອນລຳ 5 ເວລາສຳລັບໂຍນຫີນຖິ້ມ ແລະເວລາສຳລັບກອງຫີນໄວ້ຄືນ ເວລາສຳລັບກອດຈູບ ແລະເວລາສຳລັບບໍ່ກອດຈູບ. 6 ພຣະອົງຕັ້ງເວລາສຳລັບພົບພໍ້ ແລະເວລາສຳລັບສູນເສຍໄປ ເວລາສຳລັບເກັບຮັກສາໄວ້ ແລະເວລາສຳລັບໂຍນຖິ້ມໄປ 7 ເວລາສຳລັບຈີກ ແລະເວລາສຳລັບຫຍິບ ເວລາສຳລັບມິດງຽບ ແລະເວລາສຳລັບເວົ້າຈາ. 8 ພຣະອົງຕັ້ງເວລາສຳລັບຮັກ ແລະເວລາສຳລັບຊັງ ເວລາສຳລັບເຮັດເສິກ ແລະເວລາສຳລັບສ້າງສັນຕິພາບ. 9 ຄົນເຮົາໄດ້ຜົນປະໂຫຍດຫຍັງແດ່ ຈາກວຽກງານທັງໝົດທີ່ຕົນເຮັດ? 10 ຂ້າພະເຈົ້າຮູ້ຈັກພາລະອັນໜັກໜ່ວງທີ່ພຣະເຈົ້າວາງໄວ້ເທິງມະນຸດ. 11 ພຣະອົງໄດ້ຕັ້ງເວລາອັນເໝາະສົມໄວ້ສຳລັບທຸກສິ່ງ. ພຣະອົງຢາກໃຫ້ມະນຸດຮູ້ຈັກອະດີດ ແລະອະນາຄົດ, ແຕ່ມະນຸດເຂົ້າໃຈບໍ່ໄດ້ຢ່າງເຕັມປ່ຽມຕໍ່ສິ່ງທີ່ພຣະອົງໄດ້ຊົງກະທຳ ຕັ້ງແຕ່ອະດີດຕະການເຖິງອະວະສານ. 12 ສະນັ້ນ ຂ້າພະເຈົ້າຈຶ່ງສຳນຶກໄດ້ວ່າສິ່ງທີ່ມະນຸດພໍກະທຳໄດ້ນັ້ນ ແມ່ນເຮັດໃຫ້ຈິດໃຈເປັນສຸກ ແລະເຮັດດີທີ່ສຸດເທົ່າທີ່ຈະເຮັດໄດ້ ເມື່ອຕົນຍັງມີຊີວິດຢູ່. 13 ມະນຸດທຸກຄົນຄວນກິນແລະດື່ມ ແລະສະໜຸກຢູ່ກັບສິ່ງທີ່ຕົນຫາມາໄດ້. ອັນນີ້ແມ່ນຂອງຂວັນທີ່ມາຈາກພຣະເຈົ້າ. 14 ຂ້າພະເຈົ້າຮູ້ວ່າ ທຸກສິ່ງທີ່ພຣະເຈົ້າກະທຳນັ້ນດຳລົງຢູ່ຕະຫລອດໄປ. ທ່ານຕື່ມສິ່ງໃດສິ່ງໜຶ່ງໃສ່ບໍ່ໄດ້ ຫລືເອົາສິ່ງໃດສິ່ງໜຶ່ງອອກໄປຈາກນັ້ນບໍ່ໄດ້. ມີສິ່ງໜຶ່ງທີ່ພຣະເຈົ້າໄດ້ກະທຳ ແມ່ນເຮັດໃຫ້ມະນຸດຢຳເກງພຣະອົງ. 15 ສິ່ງໃດກໍຕາມທີ່ເຄີຍໄດ້ເກີດຂຶ້ນແລ້ວ ກໍຈະເກີດຂຶ້ນໃນເວລາຕໍ່ມາ ແລະໄດ້ເກີດຂຶ້ນມາກ່ອນແລ້ວທັງສິ້ນ. ພຣະເຈົ້າເຮັດໃຫ້ເຫດການເຊັ່ນດຽວກັນນັ້ນ ເກີດຂຶ້ນຊໍ້າແລ້ວຊໍ້າອີກ. ຄວາມຍຸດຕິທຳຂອງໂລກນີ້ 16 ນອກຈາກນີ້ ຂ້າພະເຈົ້າຍັງໄດ້ສັງເກດເຫັນວ່າ ຢູ່ໃຕ້ດວງຕາເວັນທ່ານໄດ້ພົບເຫັນຄວາມຊົ່ວຊ້າ ໃນບ່ອນທີ່ຄວນມີຄວາມຍຸດຕິທຳ ແລະຄວາມຊອບທຳ. 17 ຂ້າພະເຈົ້າໄດ້ເວົ້າກັບຕົນເອງວ່າ, “ພຣະເຈົ້າຈະຕັດສິນຄົນຊອບທຳ ແລະຄົນຊົ່ວຊ້າເໝືອນກັນ ເພາະທຸກສິ່ງແລະທຸກການກະທຳຈະເກີດຂຶ້ນ ຕາມກຳນົດເວລາຂອງມັນເອງ.” 18 ເມື່ອເວົ້າເຖິງມະນຸດແລ້ວ ຂ້າພະເຈົ້າຄິດວ່າພຣະເຈົ້າໄດ້ທົດສອບເບິ່ງພວກເຂົາ ເພື່ອສະແດງໃຫ້ພວກເຂົາຮູ້ວ່າມະນຸດບໍ່ໄດ້ດີໄປກວ່າສັດເລີຍ. 19 ແລ້ວຊາຕາກຳຢ່າງດຽວກັນກໍລໍຄອຍທັງຄົນ ແລະສັດຢູ່ຄື: ຕ່າງກໍຕ້ອງຕາຍໄປທັງໝົດ ຕ່າງກໍຖືກສ້າງຂຶ້ນມາຄືກັນ ແລະມະນຸດຄົນໜຶ່ງບໍ່ໄດ້ດີໄປກວ່າສັດໂຕໜຶ່ງ ເພາະທຸກສິ່ງແມ່ນອະນິຈັງ. 20 ທັງສອງກຳລັງຈະໄປສູ່ບ່ອນດຽວກັນຄືສູ່ຂີ້ຝຸ່ນດິນ ທັງສອງມາຈາກຂີ້ຝຸ່ນດິນສັນໃດ ທັງສອງຈະຕ້ອງຄືນໄປສູ່ຂີ້ຝຸ່ນດິນສັນນັ້ນ. 21 ຜູ້ໃດຢັ້ງຢືນໄດ້ວ່າ ວິນຍານຂອງມະນຸດນັ້ນຂຶ້ນໄປສູ່ເທິງຟ້າ ແລະວິນຍານຂອງສັດລົງໄປສູ່ພື້ນດິນ? 22 ສະນັ້ນ ຂ້າພະເຈົ້າຈຶ່ງສຳນຶກໄດ້ວ່າ ສິ່ງດີທີ່ສຸດທີ່ມະນຸດເຮັດໄດ້ ແມ່ນສະໜຸກຢູ່ກັບສິ່ງທີ່ຕົນຫາມາໄດ້ ເຂົາເຮັດສິ່ງໃດບໍ່ໄດ້ອີກແລ້ວ. ບໍ່ມີທາງທີ່ມະນຸດຈະຮູ້ໄດ້ວ່າ ມີສິ່ງໃດແດ່ຈະເກີດຂຶ້ນຫລັງຈາກຕົນຕາຍໄປແລ້ວ. |
@ 2012 United Bible Societies. All Rights Reserved.