ພຣະບັນຍັດສອງ 4 - ພຣະຄຳພີສັກສິໂມເຊຕັກເຕືອນຊາວອິດສະຣາເອນໃຫ້ເຊື່ອຟັງ 1 ແລ້ວໂມເຊກໍໄດ້ກ່າວແກ່ປະຊາຊົນວ່າ, “ຈົ່ງເຊື່ອຟັງກົດບັນຍັດທຸກຂໍ້ ທີ່ຂ້າພະເຈົ້າກຳລັງສອນພວກເຈົ້າ ແລະພວກເຈົ້າຈະມີຊີວິດ ແລະຢຶດຄອງດິນແດນ ທີ່ພຣະເຈົ້າຢາເວ ພຣະເຈົ້າຂອງປູ່ຍ່າຕາຍາຍຂອງພວກເຈົ້າ ກຳລັງຈະມອບໃຫ້ພວກເຈົ້າ. 2 ຢ່າຕື່ມສິ່ງໃດສິ່ງໜຶ່ງໃສ່ສິ່ງທີ່ຂ້າພະເຈົ້າສັ່ງ ແລະຢ່າຕັດສິ່ງໃດສິ່ງໜຶ່ງອອກ. ຈົ່ງຖືຮັກສາຂໍ້ຄຳສັ່ງຂອງພຣະເຈົ້າຢາເວ ພຣະເຈົ້າຂອງພວກເຈົ້າ ຊຶ່ງຂ້າພະເຈົ້າໄດ້ມອບໃຫ້ແກ່ພວກເຈົ້າ. 3 ພວກເຈົ້າໄດ້ເຫັນດ້ວຍຕົນເອງ ໃນສິ່ງທີ່ພຣະເຈົ້າຢາເວໄດ້ເຮັດທີ່ພູເປອໍ. ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ທຳລາຍທຸກຄົນທີ່ຂາບໄຫວ້ພະບາອານໃນທີ່ນັ້ນ 4 ແຕ່ພວກທີ່ສັດຊື່ຕໍ່ພຣະເຈົ້າຢາເວ ພຣະເຈົ້າຂອງພວກເຈົ້າກໍຍັງມີຊີວິດຢູ່ເທົ່າເຖິງທຸກວັນນີ້. 5 ຂ້າພະເຈົ້າໄດ້ສັ່ງສອນກົດບັນຍັດທຸກຂໍ້ແກ່ພວກເຈົ້າ ຕາມທີ່ພຣະເຈົ້າຢາເວພຣະເຈົ້າຂອງຂ້າພະເຈົ້າໄດ້ບອກ. ຈົ່ງປະຕິບັດຕາມກົດບັນຍັດເຫຼົ່ານີ້ຢູ່ໃນດິນແດນ ທີ່ພວກເຈົ້າກຳລັງຈະບຸກຮຸກເຂົ້າໄປຢຶດຄອງ. 6 ຈົ່ງປະຕິບັດຕາມກົດບັນຍັດນັ້ນຢ່າງສັດຊື່ ເພາະການກະທຳເຊັ່ນນັ້ນ ຈະສະແດງໃຫ້ຊົນຊາດອື່ນເຫັນວ່າ ພວກເຈົ້າສະຫລຽວສະຫລາດພຽງໃດ. ເມື່ອເຂົາໄດ້ຍິນເຖິງກົດບັນຍັດເຫຼົ່ານີ້ແລ້ວ ເຂົາກໍຈະເວົ້າວ່າ ‘ຊົນຊາດທີ່ຍິ່ງໃຫຍ່ນີ້ຊ່າງມີປັນຍາແລະຄວາມຮອບຮູ້ແທ້ນໍ.’ 7 ບໍ່ມີຊົນຊາດອື່ນໃດ ເຖິງວ່າຍິ່ງໃຫຍ່ພຽງໃດກໍຕາມ ທີ່ມີພຣະເຈົ້າຢູ່ໃກ້ຊິດເມື່ອພວກເຂົາຕ້ອງການຄວາມຊ່ວຍເຫລືອ ເໝືອນດັ່ງທີ່ພວກເຮົາມີພຣະເຈົ້າຢາເວ ພຣະເຈົ້າຂອງພວກເຮົາ. ພວກເຮົາຮ້ອງຫາພຣະອົງໃຫ້ຊ່ວຍເຫລືອເມື່ອໃດ ພຣະອົງກໍຕອບພວກເຮົາເມື່ອນັ້ນ. 8 ບໍ່ມີຊົນຊາດອື່ນໃດ ເຖິງວ່າຍິ່ງໃຫຍ່ພຽງໃດກໍຕາມທີ່ມີກົດບັນຍັດອັນຍຸດຕິທຳ ເໝືອນດັ່ງທີ່ຂ້າພະເຈົ້າໄດ້ສັ່ງສອນພວກເຈົ້າໃນວັນນີ້. 9 ຈົ່ງເຝົ້າລະວັງໃຫ້ດີ! ຕາບໃດທີ່ພວກເຈົ້າມີຊີວິດຢູ່ ຈົ່ງແນ່ໃຈວ່າພວກເຈົ້າບໍ່ໄດ້ລືມໄລ ສິ່ງທີ່ພວກເຈົ້າໄດ້ເຫັນກັບຕາມາແລ້ວ. ຈົ່ງບອກພວກລູກຫລານຂອງພວກເຈົ້າໃຫ້ຮູ້ເຖິງສິ່ງເຫຼົ່ານີ້ 10 ມື້ທີ່ພວກເຈົ້າໄດ້ຢືນຢູ່ຊ້ອງໜ້າພຣະເຈົ້າຢາເວ ພຣະເຈົ້າຂອງພວກເຈົ້າ ທີ່ພູເຂົາຊີນາຍ ເມື່ອພຣະເຈົ້າຢາເວໄດ້ສັ່ງຂ້າພະເຈົ້າວ່າ ‘ຈົ່ງເຕົ້າໂຮມປະຊາຊົນ ເຮົາຕ້ອງການໃຫ້ພວກເຂົາໄດ້ຍິນສິ່ງທີ່ເຮົາຕ້ອງກ່າວ ເພື່ອວ່າພວກເຂົາຈະໄດ້ຮຽນຮູ້ເຊື່ອຟັງເຮົາຊົ່ວຊີວິດຂອງພວກເຂົາ ແລະເພື່ອວ່າພວກເຂົາຈະໄດ້ສັ່ງສອນລູກຫລານຂອງພວກເຂົາໃຫ້ເຮັດຢ່າງດຽວກັນ.’ 11 ຈົ່ງບອກລູກຫລານຂອງພວກເຈົ້າວ່າ ພວກເຈົ້າໄດ້ໄປແລະຢືນເຝົ້າຢູ່ຢ່າງໃດຢູ່ທີ່ຕີນພູ ທີ່ມີເມກອັນໜາແໜ້ນແລະມີຄວັນອັນມືດຕຶບປົກຄຸມຢູ່ ພ້ອມທັງມີໄຟລຸກພຸ່ງຂຶ້ນສູ່ຟ້າສະຫວັນ. 12 ຈົ່ງບອກພວກເຂົາວ່າ, ພຣະເຈົ້າຢາເວໄດ້ກ່າວແກ່ພວກເຈົ້າ ອອກມາຈາກແປວໄຟຢ່າງໃດ; ພວກເຈົ້າໄດ້ຍິນພຣະອົງກ່າວ ແຕ່ບໍ່ໄດ້ເຫັນພຣະອົງປາກົດໃນຮູບຮ່າງໃດໆເລີຍ. 13 ພຣະອົງໄດ້ບອກພວກເຈົ້າວ່າຕ້ອງເຮັດຢ່າງໃດ ເພື່ອຖືຮັກສາພັນທະສັນຍາ ທີ່ພຣະອົງໄດ້ເຮັດໄວ້ກັບພວກເຈົ້າ ຄືໃຫ້ພວກເຈົ້າປະຕິບັດຕາມພຣະຄຳສັ່ງສິບຂໍ້ ທີ່ພຣະອົງໄດ້ຈາລຶກໄວ້ໃນຫີນສອງແຜ່ນ. 14 ພຣະເຈົ້າຢາເວໄດ້ບອກຂ້າພະເຈົ້າໃຫ້ສັ່ງສອນກົດບັນຍັດທຸກຂໍ້ນັ້ນແກ່ພວກເຈົ້າ ເພື່ອວ່າພວກເຈົ້າຈະໄດ້ນຳໄປປະຕິບັດໃນດິນແດນ ທີ່ພວກເຈົ້າກຳລັງຈະບຸກເຂົ້າໄປຢຶດຄອງນັ້ນ.” ໂມເຊຕັກເຕືອນບໍ່ໃຫ້ຂາບໄຫວ້ຮູບເຄົາຣົບ 15 “ເມື່ອພຣະເຈົ້າຢາເວໄດ້ກ່າວແກ່ພວກເຈົ້າຈາກແປວໄຟ ທີ່ເທິງພູເຂົາຊີນາຍນັ້ນ ພວກເຈົ້າບໍ່ໄດ້ເຫັນພຣະອົງ. ສະນັ້ນ ເພື່ອຜົນປະໂຫຍດຂອງພວກເຈົ້າເອງ 16 ຈົ່ງໃຫ້ແນ່ໃຈວ່າພວກເຈົ້າບໍ່ເຮັດບາບ ໂດຍສ້າງຮູບເຄົາຣົບໃດໆສຳລັບພວກເຈົ້າເອງ ບໍ່ວ່າຈະເປັນຮູບພະຊາຍຫລືພະຍິງ 17 ຫລືຮູບສັດສີ່ຕີນຫລືຮູບນົກ 18 ຫລືຮູບສັດຍ່າງຍ້າຍເລືອຄານຫລືປາກໍຕາມ. 19 ຢ່າໃຫ້ຖືກລໍ້ລວງໄປຂາບໄຫວ້ແລະຮັບໃຊ້ ສິ່ງທີ່ພວກເຈົ້າເຫັນໃນຈັກກະວານ ເຊັ່ນ: ຕາເວັນ, ດວງເດືອນ ແລະດວງດາວຕ່າງໆ. ພຣະເຈົ້າຢາເວ ພຣະເຈົ້າຂອງພວກເຈົ້າ ໄດ້ໃຫ້ໝົດທຸກຊົນຊາດອື່ນໆຂາບໄຫວ້ສິ່ງເຫຼົ່ານີ້. 20 ແຕ່ສຳລັບພວກເຈົ້າແລ້ວ ພວກເຈົ້າເປັນປະຊາຊົນທີ່ພຣະເຈົ້າຢາເວໄດ້ຊ່ວຍກອບກູ້ ອອກມາຈາກຂຸມນະຣົກຂອງເອຢິບ. ພຣະອົງໄດ້ນຳພວກເຈົ້າອອກມາ ເພື່ອຫລໍ່ຫລອມໃຫ້ເປັນໄພ່ພົນຂອງພຣະອົງ ເໝືອນດັ່ງທີ່ພວກເຈົ້າເປັນຢູ່ໃນວັນນີ້. 21 ຍ້ອນພວກເຈົ້າ ພຣະເຈົ້າຢາເວຈຶ່ງໂກດຮ້າຍຂ້າພະເຈົ້າແລະປະກາດຢ່າງໜັກແໜ້ນວ່າ, ຂ້າພະເຈົ້າຈະບໍ່ໄດ້ຂ້າມແມ່ນໍ້າຈໍແດນເຂົ້າໄປໃນດິນແດນອັນອຸດົມສົມບູນແລະຮັ່ງມີ ທີ່ພຣະເຈົ້າຢາເວ ພຣະເຈົ້າຂອງພວກເຈົ້າກຳລັງຈະມອບໃຫ້ພວກເຈົ້າ. 22 ຂ້າພະເຈົ້າຈະຕາຍຢູ່ໃນດິນແດນນີ້ ແລະຈະບໍ່ໄດ້ຂ້າມແມ່ນໍ້າໄປ; ແຕ່ພວກເຈົ້າກຳລັງຈະຂ້າມແມ່ນໍ້າ ເຂົ້າໄປຢຶດຄອງດິນແດນອັນອູດົມສົມບູນແລະຮັ່ງມີ. 23 ສະນັ້ນ ຈົ່ງແນ່ໃຈວ່າພວກເຈົ້າຈະບໍ່ລືມໄລພັນທະສັນຍາ ທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ເຮັດໄວ້ກັບພວກເຈົ້າ. ຈົ່ງເຮັດຕາມພຣະຂໍ້ຄຳສັ່ງຂອງພຣະເຈົ້າຢາເວ ພຣະເຈົ້າຂອງພວກເຈົ້າ ແລະຢ່າເຮັດຮູບເຄົາຣົບໃດໆສຳລັບຕົນ 24 ເພາະພຣະເຈົ້າຢາເວ ພຣະເຈົ້າຂອງພວກເຈົ້າ ເປັນເໝືອນດັ່ງໄຟທີ່ເຜົາຜານ; ພຣະອົງແມ່ນພຣະເຈົ້າຜູ້ຫວງແຫນ. 25 ເຖິງແມ່ນວ່າ ເມື່ອພວກເຈົ້າໄດ້ອາໄສຢູ່ໃນດິນແດນດົນນານ ແລະມີລູກຫລານເຫຼັນກໍຕາມ ຢ່າເຮັດບາບໂດຍສ້າງຮູບເຄົາຣົບໃດໆເພື່ອຂາບໄຫວ້. ອັນນີ້ເປັນສິ່ງຊົ່ວຮ້າຍຕໍ່ສາຍຕາຂອງພຣະເຈົ້າຢາເວ ພຣະເຈົ້າຂອງພວກເຈົ້າ ຊຶ່ງເຮັດໃຫ້ພຣະອົງໂກດຮ້າຍ. 26 ຖ້າເປັນເຊັ່ນນັ້ນ ຂ້າພະເຈົ້າຂໍໃຫ້ສະຫວັນກັບແຜ່ນດິນໂລກ ຈົ່ງເປັນພະຍານຕໍ່ສູ້ພວກເຈົ້າໃນວັນນີ້ ແລະພວກເຈົ້າຈະດັບສູນຈາກດິນແດນນີ້ໃນບໍ່ຊ້າ. ພວກເຈົ້າຈະບໍ່ໄດ້ຢູ່ຍາວນານໃນດິນແດນທີ່ພວກເຈົ້າກຳລັງຈະຂ້າມແມ່ນໍ້າຈໍແດນໄປຢຶດຄອງນັ້ນ ແລະພວກເຈົ້າຈະຖືກທຳລາຍຈົນໝົດສິ້ນ. 27 ພຣະເຈົ້າຢາເວຈະເຮັດໃຫ້ພວກເຈົ້າ ກະຈັດກະຈາຍໄປຢູ່ໃນຊົນຊາດອື່ນໆ ບ່ອນທີ່ພວກເຈົ້າພຽງແຕ່ໜ້ອຍຄົນເທົ່ານັ້ນຈະຍັງມີຊີວິດຢູ່. 28 ໃນທີ່ນັ້ນ ພວກເຈົ້າຈະຮັບໃຊ້ພະໄມ້ ແລະພະຫີນຊຶ່ງມະນຸດໄດ້ປະດິດຂຶ້ນ ຄືພະທີ່ເບິ່ງບໍ່ເຫັນ ແລະຟັງບໍ່ໄດ້ຍິນ ທັງກິນຫລືດົມກິ່ນບໍ່ໄດ້ດ້ວຍ. 29 ໃນທີ່ນັ້ນ ພວກເຈົ້າຈະສະແຫວງຫາພຣະເຈົ້າຢາເວ ພຣະເຈົ້າຂອງພວກເຈົ້າ; ຖ້າພວກເຈົ້າສະແຫວງຫາພຣະອົງດ້ວຍສຸດໃຈ ພວກເຈົ້າກໍຈະໄດ້ພົບພຣະອົງ. 30 ເມື່ອພວກເຈົ້າເດືອດຮ້ອນແລະປະເຊີນກັບສິ່ງທັງໝົດເຫຼົ່ານີ້ແລ້ວ; ໃນທີ່ສຸດ ພວກເຈົ້າກໍຈະກັບຄືນມາຫາພຣະເຈົ້າຢາເວ ພຣະເຈົ້າຂອງພວກເຈົ້າ ແລະເຊື່ອຟັງພຣະອົງ. 31 ດ້ວຍວ່າ, ພຣະເຈົ້າຢາເວ ພຣະເຈົ້າຂອງພວກເຈົ້າ ເປັນພຣະເຈົ້າອົງຊົງເມດຕາ ພຣະອົງຈະບໍ່ປະຖິ້ມຫລືທຳລາຍພວກເຈົ້າ ພຣະອົງຈະບໍ່ລືມພັນທະສັນຍາທີ່ພຣະອົງໄດ້ເຮັດໄວ້ກັບປູ່ຍ່າຕາຍາຍຂອງພວກເຈົ້າ. 32 ຈົ່ງຄົ້ນເບິ່ງໃນອະດີດ ເວລາກ່ອນພວກເຈົ້າເກີດມາ ຕະຫລອດທັງຢ້ອນກັບຄືນໄປຫາເວລາ ເມື່ອພຣະເຈົ້າໄດ້ສ້າງມະນຸດເທິງແຜ່ນດິນໂລກ. ຈົ່ງຄົ້ນເບິ່ງແຜ່ນດິນໂລກທັງໝົດນີ້ເບິ່ງດູ ມີສິ່ງໃດທີ່ຍິ່ງໃຫຍ່ກວ່າ ທີ່ເຄີຍເກີດຂຶ້ນມາກ່ອນແດ່? ມີຜູ້ໃດຜູ້ໜຶ່ງທີ່ເຄີຍໄດ້ຍິນເລື່ອງຢ່າງນີ້ຫລືບໍ່? 33 ມີປະຊາຊົນຊາດໃດໆຍັງມີຊີວິດຢູ່ເໝືອນດັ່ງພວກເຈົ້າແດ່ ຫລັງຈາກທີ່ໄດ້ຍິນພຣະເຈົ້າກ່າວແກ່ພວກເຂົາອອກມາຈາກແປວໄຟ. 34 ມີພຣະເຈົ້າອົງໃດອີກທີ່ກ້າໄປເອົາປະຊາຊົນຈາກຊາດອື່ນ ແລະເອົາມາຫລໍ່ຫລອມໃຫ້ເປັນປະຊາຊົນຂອງຕົນ ເໝືອນດັ່ງພຣະເຈົ້າຢາເວ ພຣະເຈົ້າຂອງພວກເຈົ້າ ໄດ້ເຮັດໃນປະເທດເອຢິບ? ຕໍ່ໜ້າຕໍ່ຕາຂອງພວກເຈົ້າ ພຣະອົງໄດ້ໃຊ້ຣິດອຳນາດກັບພະລັງອັນຍິ່ງໃຫຍ່ແລະຣິດເດດຂອງພຣະອົງ; ພຣະອົງໄດ້ໃຫ້ໂຣກລະບາດກັບສົງຄາມເກີດຂຶ້ນ, ເຮັດສິ່ງອັດສະຈັນກັບໝາຍສຳຄັນຕ່າງໆ ແລະເຮັດໃຫ້ສິ່ງອັນໜ້າຢ້ານກົວຍິ່ງເກີດຂຶ້ນ. 35 ການສຳແດງສິ່ງເຫຼົ່ານີ້ແກ່ພວກເຈົ້າ ເພື່ອພິສູດໃຫ້ພວກເຈົ້າຮູ້ວ່າ ພຣະເຈົ້າຢາເວທີ່ເປັນພຣະເຈົ້າແລະບໍ່ມີພະອື່ນອີກ. 36 ພຣະອົງໃຫ້ພວກເຈົ້າໄດ້ຍິນສຽງຂອງພຣະອົງຈາກສະຫວັນ ເພື່ອພຣະອົງຈະສອນພວກເຈົ້າ ແລະທີ່ເທິງແຜ່ນດິນໂລກນີ້ ພຣະອົງກໍໄດ້ໃຫ້ພວກເຈົ້າເຫັນໄຟອັນສັກສິດຂອງພຣະອົງ ແລະຈາກໄຟນັ້ນພຣະອົງໄດ້ກ່າວແກ່ພວກເຈົ້າ. 37 ເພາະພຣະອົງໄດ້ຮັກປູ່ຍ່າຕາຍາຍຂອງພວກເຈົ້າ ພຣະອົງຈຶ່ງເລືອກເອົາພວກເຈົ້າ ແລະນຳພາພວກເຈົ້າອອກມາຈາກປະເທດເອຢິບ ໂດຍຣິດອຳນາດອັນຍິ່ງໃຫຍ່ຂອງພຣະອົງ. 38 ເວລາທີ່ພວກເຈົ້າໄດ້ບຸກໜ້າເຂົ້າໄປນັ້ນ ພຣະອົງໄດ້ຂັບໄລ່ຊົນຊາດຕ່າງໆທີ່ຍິ່ງໃຫຍ່ ແລະມີອຳນາດກວ່າພວກເຈົ້າອອກໄປ ເພື່ອພຣະອົງຈະໄດ້ນຳພວກເຈົ້າເຂົ້າໄປ ແລະເອົາດິນແດນຂອງພວກເຂົາໃຫ້ພວກເຈົ້າ ຄືດິນແດນທີ່ຍັງເປັນຂອງພວກເຈົ້າຢູ່ນີ້. 39 ສະນັ້ນ ໃນວັນນີ້ ຈົ່ງຈົດຈຳໄວ້ແລະຢ່າລືມໄລຈັກເທື່ອວ່າ, ພຣະເຈົ້າຢາເວແມ່ນພຣະເຈົ້າໃນສະຫວັນແລະເທິງແຜ່ນດິນໂລກ. ບໍ່ມີພຣະເຈົ້າອົງອື່ນອີກ. 40 ຈົ່ງປະຕິບັດຕາມກົດບັນຍັດແລະຂໍ້ຄຳສັ່ງທຸກຂໍ້ຂອງພຣະອົງ ທີ່ຂ້າພະເຈົ້າໄດ້ໃຫ້ພວກເຈົ້າໃນວັນນີ້ ແລະພວກເຈົ້າພ້ອມລູກຫລານກໍຈະຢູ່ເຢັນເປັນສຸກ. ພວກເຈົ້າຈະສືບຕໍ່ອາໄສຢູ່ໃນດິນແດນ ທີ່ພຣະເຈົ້າຢາເວ ພຣະເຈົ້າຂອງພວກເຈົ້າ ກຳລັງຈະມອບໃຫ້ພວກເຈົ້ານີ້ຕະຫລອດໄປ.” ເມືອງລີ້ໄພທາງຝັ່ງຕາເວັນອອກຂອງແມ່ນໍ້າຈໍແດນ 41 ແລ້ວໂມເຊກໍໄດ້ເລືອກສາມຕົວເມືອງ ທາງຟາກຕາເວັນອອກຂອງແມ່ນໍ້າຈໍແດນໄວ້ຕ່າງຫາກ. 42 ໃນເມືອງເຫຼົ່ານີ້ ຜູ້ໜຶ່ງທີ່ໄດ້ຂ້າຄົນໜຶ່ງໂດຍບໍ່ເຈດຕະນາ ແລະທີ່ບໍ່ໄດ້ເປັນສັດຕູຂອງຕົນ ເຂົ້າໄປລີ້ໄພໃນທີ່ນັ້ນໄດ້. ລາວໜີເຂົ້າໄປຢູ່ໃນເມືອງໜຶ່ງຂອງເມືອງເຫຼົ່ານີ້ໄດ້ ໂດຍບໍ່ຕ້ອງຖືກປະຫານຊີວິດ. 43 ສຳລັບເຜົ່າຣູເບັນແມ່ນເມືອງເບເຊ ທີ່ເທິງພູພຽງຂອງຖິ່ນແຫ້ງແລ້ງກັນດານ ສຳລັບເຜົ່າກາດແມ່ນເມືອງຣາໂມດໃນເຂດແດນຂອງກີເລອາດ ແລະສຳລັບເຜົ່າມານາເຊແມ່ນເມືອງໂກລານໃນເຂດແດນບາຊານ. ໂມເຊມອບກົດບັນຍັດໃຫ້ຊາວອິດສະຣາເອນ 44 ໂມເຊໄດ້ມອບກົດບັນຍັດຂອງພຣະເຈົ້າກັບຄຳສັ່ງສອນຂອງພຣະອົງ ໃຫ້ແກ່ປະຊາຊົນອິດສະຣາເອນ. 45-46 ແມ່ນຫລັງຈາກທີ່ພວກເຂົາໄດ້ອອກມາຈາກປະເທດເອຢິບ ແລະຢູ່ໃນຮ່ອມພູທາງທິດຕາເວັນອອກຂອງແມ່ນໍ້າຈໍແດນ ກົງກັນຂ້າມກັບເມືອງເບັດເປອໍ ທີ່ເພິ່ນໄດ້ມອບກົດບັນຍັດເຫຼົ່ານີ້ໃຫ້ພວກເຂົາ. ເມືອງເບັດເປອໍນີ້ຢູ່ໃນເຂດແດນຂອງເຈົ້າສີໂຫນ ກະສັດຂອງຊາວອາໂມ ຜູ້ທີ່ໄດ້ປົກຄອງຢູ່ໃນນະຄອນເຮັດຊະໂບນ. ໂມເຊກັບປະຊາຊົນອິດສະຣາເອນໄດ້ຊະນະເພິ່ນ ເມື່ອພວກເຂົາອອກມາຈາກປະເທດເອຢິບ. 47 ພວກເຂົາໄດ້ຢຶດຄອງດິນແດນຂອງເພິ່ນ ແລະດິນແດນຂອງເຈົ້າໂອກກະສັດແຫ່ງບາຊານ ແລະກະສັດຄົນໜຶ່ງອີກຂອງຊາວອາໂມ ຜູ້ທີ່ໄດ້ປົກຄອງຢູ່ທາງຟາກຕາເວັນອອກຂອງແມ່ນໍ້າຈໍແດນ. 48 ດິນແດນນີ້ຂະຫຍາຍອອກໄປ ຕັ້ງແຕ່ເມືອງອາໂຣເອທາງແຄມຝັ່ງແມ່ນໍ້າອາກໂນນ ຈົນໄປຮອດທາງເໜືອເຖິງພູສີຣິໂອນ ຊຶ່ງແມ່ນພູເຮີໂມນ. 49 ດິນແດນນັ້ນຍັງນັບລວມເອົາອານາເຂດທັງໝົດ ທີ່ຢູ່ທາງທິດຕາເວັນອອກຂອງແມ່ນໍ້າຈໍແດນ ຈົນໄປຮອດທະເລຕາຍທີ່ຕີນພູປີສະກາ. |
@ 2012 United Bible Societies. All Rights Reserved.