ພຣະບັນຍັດສອງ 32 - ພຣະຄຳພີສັກສິ1 “ໂອ ຟ້າສະຫວັນເອີຍ ຈົ່ງງ່ຽງຫູຂອງເຈົ້າຟັງສຽງຂອງຂ້ອຍ ແລະແຜ່ນດິນໂລກເອີຍ ຈົ່ງຟັງຖ້ອຍຄຳຈາກປາກຂອງຂ້ອຍ. 2 ຄຳສັ່ງສອນຂອງຂ້ອຍ ຈະຕົກລົງເໝືອນຝົນຫ່າໃຫຍ່ ຊຶ່ງຈະກໍ່ຕົວຄົງຢູ່ໄດ້ ເໝືອນນໍ້າຄ້າງຮຸ່ງອາລຸນ; ຖ້ອຍຄຳຂອງຂ້ອຍ ຈະລິນລົງເໝືອນນໍ້າຝົນເທິງພືດອ່ອນ ເໝືອນສາຍຝົນຄ່ອຍໆຍ້ອຍ ໂຮຍຮວດເທິງຫຍ້າຂຽວ. 3 ຂ້ອຍຈະປະກາດໃຫ້ດັງກ້ອງ ພຣະນາມຂອງພຣະເຈົ້າຢາເວ! ຈົ່ງຖະຫວາຍຄວາມຍິ່ງໃຫຍ່ຂອງພຣະເຈົ້າຂອງພວກເຮົາ. 4 ພຣະອົງເປັນທີ່ເພິ່ງ ອັນເຂັ້ມແຂງຂອງເຈົ້າຕະຫລອດມາ ສົມບູນແລະທ່ຽງທຳ ໃນວິຖີທາງຂອງພຣະອົງ; ພຣະເຈົ້າຂອງພວກເຈົ້າ ສັດຊື່ແລະທ່ຽງທຳ ພຣະອົງໄດ້ກະທຳ ແຕ່ສິ່ງທີ່ດີແລະຖືກຕ້ອງ. 5 ແຕ່ພວກເຈົ້ານັ້ນ ພັດບໍ່ຈົງຮັກແລະພັກດີ ບໍ່ເໝາະສົມທີ່ຈະເປັນ ໄພ່ພົນຂອງພຣະອົງ ຄືເປັນຊົນຊາດບາບ ທີ່ກະທຳຜິດຕະຫລອດມາ ພາກັນຄົດໂກງແລະຫັນໜີ ຈາກພຣະເຈົ້າມາຕະຫລອດ. 6 ປະຊາຊົນທີ່ໂງ່ຈ້າ ແລະເບົາປັນຍາເອີຍ ພວກເຈົ້າຄວນເຮັດວິທີນີ້ບໍ ກັບພຣະເຈົ້າຢາເວ? ພຣະອົງເປັນບິດາຂອງພວກເຈົ້າ ແລະທັງເປັນຜູ້ສ້າງພວກເຈົ້າມາ ທັງດູແລແລະຮັກສາ ຈົນພວກເຈົ້າກາຍເປັນຊາດໜຶ່ງ. 7 ຈົ່ງລະນຶກເຖິງອະດີດ ເວລານານຜ່ານມາ; ຖາມເບິ່ງບັນດາບິດາ ໃຫ້ເລົ່າສິ່ງທີ່ໄດ້ເກີດມາ ສູ່ຟັງເບິ່ງ ຖາມເບິ່ງພວກຄົນເຖົ້າ ຄົນຊາຣາທີ່ເກີດກ່ອນ; ບອກເພິ່ນຢ້ອນເລົ່າເລື່ອງ ໃນອະດີດສູ່ຟັງແດ່ແມ 8 ອົງພຣະຜູ້ສູງສຸດໄດ້ໃຫ້ ຊາດຕ່າງໆມີດິນແດນຂອງຕົນ; ພຣະອົງໄດ້ກຳນົດບ່ອນໃຫ້ລູກຫລານຂອງອິດສະຣາເອນ ເປັນບ່ອນທີ່ພວກເຂົາຈະອາໄສຢູ່ນັ້ນ. 9 ແຕ່ສ່ວນຂອງພຣະເຈົ້າຢາເວແມ່ນສຳລັບພຣະອົງ ພວກເຊື້ອສາຍຂອງຢາໂຄບເປັນມໍຣະດົກຂອງພຣະອົງເອງ. 10 ພຣະອົງໄດ້ເຫັນພວກເຂົາເຄື່ອນຍ້າຍ ຜ່ານຜ່າທ້ອງຖິ່ນທະເລຊາຍ ເປົ່າປ່ຽວທຸລະກັນດານ ທັງລົມພັດແຮງເຫລືອຮ້າຍ; ພຣະອົງເລີຍດູແລປົກປ້ອງໄວ້ ແລະເອົາໃຈໃສ່ພວກເຂົາ ແລະເຝົ້າປົກປັກຮັກສາ ເໝືອນດັ່ງແກ້ວຕາຂອງພຣະອົງນັ້ນ. 11 ເໝືອນດັ່ງນົກອິນຊີໂຕໜຶ່ງໄດ້ ສອນລູກໆຂອງມັນໃຫ້ບິນໄປ ກາງປີກຂອງຕົນອອກໄວ້ລໍຮັບ ລູກໆນັ້ນໄວ້ຢ່າງປອດໄພໄດ້. ທັງໄດ້ປົກປ້ອງຄຸ້ມຄອງແລະຮັກສາ ຊົນຊາດອິດສະຣາເອນ ບໍ່ໃຫ້ຫຼົ້ມຈົມລົງໄດ້. 12 ພຣະເຈົ້າຢາເວເທົ່ານັ້ນ ນຳພາປະຊາຊົນຂອງຕົນ ປາສະຈາກຄວາມຊ່ວຍເຫລືອ ຂອງບັນດາພະຕ່າງຊາດ. 13 ພຣະອົງໃຫ້ພວກເຂົາປົກຄອງໄດ້ ພູພຽງອັນກວ້າງໃຫຍ່ ແລະກິນພືດຜົນທີ່ໃຫຍ່ຂຶ້ນ ໃນທົ່ງນານັ້ນໄດ້ທັງໝົດ. ພວກເຂົາພົບຮັງເຜິ້ງປ່າ ຢູ່ທ່າມກາງໂງ່ນຫີນ ແລະທີ່ເທິງໜ້າດິນແຂງ ຕົ້ນໝາກກອກເທດກໍເກີດຂຶ້ນ. 14 ພວກເຂົາມີງົວແລະແບ້ ບຽດຢັດເຕັມຝູງ ຜະລິດນໍ້ານົມໄດ້ຫລາຍ ຢ່າງອຸດົມສົມບູນແທ້ ພວກເຂົາມີແກະແລະແບ້ ທັງງົວໂຕທີ່ຕຸ້ຍພີຍິ່ງ ທັງເຂົ້າບະເລອັນດີເລີດ ແລະເຫຼົ້າອະງຸ່ນຊັ້ນດີທີ່ສຸດ. 15 ໄພ່ພົນຂອງພຣະເຈົ້າຮັ່ງມີຂຶ້ນ ແຕ່ພັດຄິດຄົດທໍລະຍົດຕໍ່ພຣະອົງ; ພວກເຂົາອ້ວນຕຸ້ຍພີດີ ເພາະມີອາຫານການກິນຢ່າງເຫລືອລົ້ນ. ພວກເຂົາຈຶ່ງໄດ້ປະຖິ້ມ ພຣະເຈົ້າພຣະຜູ້ສ້າງຂອງຕົນໄປ ແລະບໍ່ຍອມຮັບພຣະຜູ້ຊ່ວຍກູ້ພວກເຂົາ ວ່າເປັນພຣະເຈົ້າອົງຍິ່ງໃຫຍ່. 16 ການຂາບໄຫວ້ຮູບພະຂອງພວກເຂົານັ້ນ ໄດ້ເຮັດໃຫ້ພຣະອົງຊົງຫວງແຫນ; ຄວາມຊົ່ວຊ້າທີ່ພວກເຂົາໄດ້ກະທຳ ໄດ້ເຮັດໃຫ້ພຣະອົງຕ້ອງໂກດຮ້າຍ. 17 ພວກເຂົາໄດ້ຖວາຍບູຊາໃຫ້ແກ່ບັນດາຜີມານຮ້າຍ ບໍ່ແມ່ນພຣະແທ້ ຊຶ່ງບໍ່ແມ່ນພຣະເຈົ້າແຕ່ແມ່ນພະທຽມ ຄືພະໃໝ່ໆເຫຼົ່ານັ້ນທັງຫລາຍ ທີ່ປູ່ຍ່າຕາຍາຍຂອງພວກເຂົາບໍ່ເຄີຍຮູ້; ເປັນບັນດາພະຕ່າງໆ ທີ່ຊາດອິດສະຣາເອນບໍ່ເຄີຍຮູ້ຈັກ ແລະບໍ່ຮູ້ຂາບໄຫວ້ພວກມັນ ທັງບໍ່ເຄີຍເຊື່ອຟັງມັນມາກ່ອນ. 18 ພວກເຂົາໄດ້ລືມໄລພຣະເຈົ້າ ພຣະຜູ້ໂຜດຊ່ວຍອົງຍິ່ງໃຫຍ່ຂອງພວກເຂົາ ອົງຊົງຣິດອຳນາດຫລາຍ ທີ່ໃຫ້ພວກເຂົາມີຊີວິດຢູ່. 19 ເມື່ອພຣະເຈົ້າຢາເວເຫັນເຊັ່ນນີ້ ພຣະອົງຈຶ່ງໂກດຮ້າຍຫລາຍ ຈຶ່ງບໍ່ຮັບຊາຍຍິງເຫຼົ່ານີ້ ເປັນບຸດຂອງພຣະເຈົ້າ. 20 ພຣະອົງກ່າວວ່າ, ‘ເຮົາຈະບໍ່ຊ່ວຍພວກເຂົາຕໍ່ໄປອີກ’ ‘ແລ້ວເຮົາກໍຈະເບິ່ງວ່າສິ່ງໃດເກີດຂຶ້ນກັບເຂົາເຈົ້າ ຄືຄົນທີ່ດື້ດ້ານສອນຍາກແລະຫົວແຂງ ທັງບໍ່ສັດຊື່ແລະບໍ່ໝັ້ນຄົງດ້ວຍ. 21 ໂດຍຮູບເຄົາຣົບຂອງພວກເຂົານັ້ນ ພວກເຂົາແກ້ງເຮັດໃຫ້ເຮົາໂມໂຫ ໂດຍແກ້ງເຮັດໃຫ້ເຮົາຫຶງຫວງ ຕໍ່ສິ່ງທີ່ພວກເຂົາເອີ້ນວ່າພະຂອງເຂົາເຈົ້ານັ້ນ; ພະເກ້ໆເຫຼົ່ານັ້ນລ້ວນແຕ່ເປັນພະທຽມ ບໍ່ແມ່ນພຣະເຈົ້າແທ້ຈັກດີ້. ສະນັ້ນ ເຮົາຈຶ່ງຈະໃຊ້ຊາດໜຶ່ງມາເຮັດໃຫ້ ພວກເຂົາເຈົ້າເກີດໂມໂຫ; ເຮົາຈະເຮັດໃຫ້ພວກເຂົາເກີດອິດສາ ຊົນຊາດເບົາປັນຍານີ້. 22 ຄວາມໂກດຮ້າຍຂອງເຮົາຈະລຸກໄໝ້ ເຜົາຜານດັ່ງແປວໄຟລຸກໃຫຍ່ ເຜົາໄໝ້ທຸກສິ່ງເທິງແຜ່ນດິນໂລກ ຈົນທະລາຍກ້ຽງສິ້ນສູນໝົດ. ມັນຈະເລີຍລຸກໄໝ້ໄປຮອດ ພື້ນພິພົບປັດຖະພີ ແລະເຜົາຜານທຸກສິ່ງໝົດ ຮອດຮາກໂຄນຂອງພູສູງພຸ້ນ. 23 ເຮົາຈະນຳໄພພິບັດມາສູ່ເຂົາເຈົ້າ ເປັນໄພພິບັດອັນບໍ່ສິ້ນສຸດເປັນ ເຊັ່ນລູກທະນູໜ້ອງທັງໝົດ ທີ່ເຮົາຈະໃຊ້ຕໍ່ສູ້ພວກເຂົາເຈົ້າ. 24 ພວກເຂົາຈະຕາຍເພາະ ການເຈັບໄຂ້ແລະອຶດຫິວ; ພວກເຂົາຈະສິ້ນຊີວິດໄປ ຍ້ອນພະຍາດອັນຮ້າຍແຮງມາຖືກ. ເຮົາຈະໃຫ້ສັດປ່າມາຕໍ່ຕ້ານ ກັດກິນພວກເຂົາໃຫ້ວອດວາຍ ທັງຈະໃຫ້ງູພິດຮ້າຍມາກັດ ຕອດພວກເຂົາໃຫ້ເຈັບປວດ. 25 ເສິກສົງຄາມຈະເຮັດໃຫ້ ຄົນຕາຍຕາມທາງຍ່າງ; ຄວາມຢ້ານໃຫຍ່ຈະຍ່າງຍ້າຍ ບຸກເຂົ້າສູ່ບ້ານເຮືອນ. ຊາຍໜຸ່ມຍິງສາວຈະສິ້ນຊີບ ລົ້ມຫາຍຕາຍຈາກໄປ; ແມ່ນແຕ່ເດັກອ່ອນນ້ອຍທັງຫລາຍ ແລະຜູ້ເຖົ້າກໍບໍ່ເຫຼືອດ້ວຍ. 26 ເຮົາຈະຕ້ອງລົງມືທຳລາຍ ພວກເຂົາເຈົ້າໃຫ້ສິ້ນເຊື້ອສາຍ ເພື່ອຈະບໍ່ມີໃຜອາໄລອາວອນ ຫວນຈົດຈຳພວກເຂົາໄດ້ອີກ. 27 ແຕ່ເຮົາຈະບໍ່ຍອມໃຫ້ສັດຕູໂອ້ອວດຈອງຫອງ ວ່າປະຊາຊົນຂອງເຮົາ ແມ່ນເຂົາທີ່ໄດ້ຊະນະ; ໃນເມື່ອແມ່ນເຮົານີ້ເອງ ທີ່ໄດ້ສຳແດງສີມື ພຣະເຈົ້າຢາເວເປັນຜູ້ຕີພວກເຂົາໃຫ້ສະຫລາຍໄປຕ່າງຫາກ.’ 28 ຊາວອິດສະຣາເອນເປັນຊົນຊາດ ທີ່ຂາດສະຕິແລະຄວາມຄິດ ພວກເຂົາປະພຶດຢ່າງໂງ່ຈ້າ ປັນຍາແທ້ບໍ່ມີເລີຍ. 29 ພວກເຂົາບໍ່ຮູ້ວ່າຕົນພ່າຍແພ້ນັ້ນຍ້ອນຫຍັງ ທັງບໍ່ເຂົ້າໃຈແມ່ນແຕ່ມີຫຍັງໄດ້ເກີດຂຶ້ນ. 30 ເປັນຫຍັງຄົນຜູ້ດຽວນັ້ນ ຈຶ່ງຊະນະຄົນເປັນພັນ ແລະເປັນຫຍັງພຽງສອງຄົນ ຈຶ່ງຊະນະຄົນເປັນໝື່ນ? ກໍເພາະວ່າພຣະເຈົ້າໄດ້ປະຖິ້ມພວກເຂົາ ພຣະເຈົ້າຢາເວອົງຍິ່ງໃຫຍ່ໄດ້ໃຫ້ພວກເຂົາພ່າຍແພ້. 31 ເຫຼົ່າສັດຕູຮູ້ວ່າພະຂອງພວກເຂົານັ້ນອ່ອນແອ ບໍ່ເຂັ້ມແຂງຄືພຣະເຈົ້າຂອງອິດສະຣາເອນໄດ້. 32-33 ສັດຕູຂອງພວກເຂົາເຈົ້າເປື່ອຍເຍື່ອຍກັນໝົດ ເໝືອນເມືອງໂຊໂດມແລະໂກໂມຣານັ້ນ; ເປັນຄືກົກອະງຸ່ນທີ່ເກີດໝາກຂົມແລະເປັນພິດ ເໝືອນເອົາພິດງູມາແຕ່ງເຫຼົ້າອະງຸ່ນແທ້ບໍ່ຫ່ອນເປັນ. 34 ພຮະອົງຈົດຈຳສິ່ງທີ່ເຫຼົ່າສັດຕູໄດ້ກະທຳມາ; ພຣະອົງລໍຈັງຫວະຈະລົງໂທດພວກເຂົາໃຫ້ໄດ້. 35 ພຮະອົງຈະແກ້ແຄ້ນ ແລະລົງໂທດພວກເຂົາ; ມື້ເຄາະກຳໃກ້ເຂົ້າມາ ມື້ທີ່ພວກເຂົາຫຼົ້ມຈົມຈະມາຮອດ. 36 ພຣະເຈົ້າຢາເວຈະຊ່ວຍກູ້ໄພ່ພົນຂອງພຣະອົງ ເມື່ອພຣະອົງເຫັນວ່າກຳລັງຂອງພວກເຂົາຈວນຈະສິ້ນ. ພຣະອົງຈະເມດຕາແກ່ພວກຜູ້ຮັບໃຊ້ຂອງພຣະອົງ ເມື່ອພຣະອົງເຫັນພວກເຂົາຕ້ອງການກຳລັງຊຸກຍູ້. 37 ແລ້ວພຮະອົງກໍຈະຖາມໄພ່ພົນຂອງພຣະອົງ ວ່າ, ‘ພະຍິ່ງໃຫຍ່ທີ່ເຈົ້າໄວ້ໃຈດຽວນີ້ຢູ່ໃສແລ້ວ 38 ເຈົ້າບູຊາລ້ຽງມັນໄວ້ໂດຍຖວາຍໄຂມັນໃຫ້ມັນຮັບ ທັງຖວາຍເຫຼົ້າອະງຸ່ນໃຫ້ມັນໄດ້ດື່ມຢ່າງສະບາຍ. ບັດນີ້ ຈົ່ງບອກມັນໃຫ້ຊ່ວຍເຫລືອເຈົ້າລອງເບິ່ງ ບອກມັນແລ່ນມາຊ່ວຍກູ້ເອົາເຈົ້າໄວ້ສາ. 39 ເຮົາແລະເຮົາເທົ່ານັ້ນ ທີ່ເປັນພຣະເຈົ້າແທ້ໃດ ນອກຈາກເຮົານີ້ໄປບໍ່ມີພະອື່ນໃດອີກແລ້ວ; ມີຜູ້ໃດແດ່ກ້າຕໍ່ຕ້ານແຜນການຂອງເຮົາ ເຮົາຂ້າແລະໃຫ້ຊີວິດ ເຮັດໃຫ້ບາດເຈັບແລະປິ່ນປົວດ້ວຍ. 40 ເຮົາເປັນພຣະເຈົ້າອົງຊົງຊີວິດຢູ່ຈິງໆໃດ ເຮົາຍົກມືຂຶ້ນສະຫວັນແລະເຮົາສາບານໄວ້ 41 ເຮົາຈະຝົນດາບໃຫ້ເຫລື້ອມເປັນແສງຄົມມັບໆ ແລະມືຂອງເຮົາຢຶດການຕັດສິນໄວ້. ເຮົາຈະແກ້ແຄ້ນບັນດາເຫຼົ່າສັດຕູ ແລະເຮົາຈະລົງໂທດທັນຜູ້ທີ່ກຽດຊັງເຮົານັ້ນ. 42 ລູກທະນູຂອງເຮົາເປື້ອນຍ້ອນເລືອດຫລັ່ງອອກມາ ແລະດາບຂອງເຮົາຈະຕັດຊີວາຜູ້ທີ່ມາຂັດຂວາງເຮົານັ້ນ. ເຮົາຈະບໍ່ໄວ້ຊີວິດຕໍ່ຜູ້ຄິດຕໍ່ສູ້ເຮົາ ແມ່ນແຕ່ຜູ້ບາດເຈັບ ແລະຊະເລີຍກໍບໍ່ມົ້ມ.’ 43 ບັນດາຊົນຊາດເອີຍ ຈົ່ງຊົມຊື່ນຍິນດີຮ່ວມກັບປະຊາຊົນຂອງພຣະອົງ ເພາະພຣະອົງລົງໂທດທຸກຄົນທີ່ຂ້າພວກເຂົາ. ພຣະອົງທຳການແກ້ແຄ້ນເຫຼົ່າສັດຕູທັງຫລາຍ ແລະອະໄພການບາບໄພ່ພົນຂອງພຣະອົງແລ້ວ.” 44 ໂມເຊແລະໂຢຊວຍລູກຊາຍຂອງນູນ ໄດ້ເລົ່າເພງນີ້ສູ່ປະຊາຊົນຟັງ. ໂມເຊແນະນຳປະຊາຊົນເທື່ອສຸດທ້າຍ 45 ເມື່ອໂມເຊກ່າວຄຳສັ່ງສອນຂອງພຣະເຈົ້າໃຫ້ປະຊາຊົນອິດສະຣາເອນຟັງສຸດແລ້ວ 46 ເພິ່ນຈຶ່ງກ່າວວ່າ, “ຈົ່ງເຮັດຕາມຂໍ້ຄຳສັ່ງເຫຼົ່ານີ້ທັງໝົດ ຊຶ່ງຂ້າພະເຈົ້າໄດ້ມອບໃຫ້ພວກເຈົ້າໃນວັນນີ້. ຈົ່ງສັ່ງສອນລູກຫລານຂອງພວກເຈົ້າ ເພື່ອວ່າພວກເຂົາຈະໄດ້ເຮັດຕາມຄຳສັ່ງສອນທັງໝົດຂອງພຣະເຈົ້າຢ່າງຕັ້ງໜ້າ. 47 ຄຳສັ່ງສອນເຫຼົ່ານີ້ ບໍ່ແມ່ນຖ້ອຍຄຳທີ່ບໍ່ມີປະໂຫຍດ ມັນເປັນຖ້ອຍຄຳທີ່ໃຫ້ພວກເຈົ້າມີຊີວິດ. ສະນັ້ນ ຈົ່ງເຮັດຕາມນັ້ນ ແລະພວກເຈົ້າຈະມີອາຍຸຍືນຍາວ ໃນດິນແດນທາງຟາກເບື້ອງນັ້ນຂອງແມ່ນໍ້າຈໍແດນ ຊຶ່ງພວກເຈົ້າກຳລັງຈະເຂົ້າໄປຢຶດຄອງ.” 48 ໃນມື້ນັ້ນເອງ ພຣະເຈົ້າຢາເວໄດ້ບອກໂມເຊວ່າ, 49 “ຈົ່ງຂຶ້ນໄປເທິງພູເຂົາອາບາຣິມໃນດິນແດນໂມອາບ ຊຶ່ງຢູ່ກົງກັນຂ້າມກັບເມືອງເຢຣິໂກ ຈົ່ງປີນຂຶ້ນໄປໃຫ້ຈົນເຖິງຍອດພູເຂົາເນໂບ ແລະຫລຽວເບິ່ງດິນແດນການາອານ ຊຶ່ງເຮົາກຳລັງຈະມອບໃຫ້ປະຊາຊົນອິດສະຣາເອນ. 50 ເຈົ້າຈະຕາຍຢູ່ເທິງພູໜ່ວຍນັ້ນເໝືອນດັ່ງອາໂຣນອ້າຍຂອງເຈົ້າທີ່ໄດ້ຕາຍຢູ່ເທິງພູໂຮເຣ 51 ເພາະເຈົ້າທັງສອງບໍ່ສັດຊື່ຕໍ່ເຮົາຕໍ່ໜ້າປະຊາຊົນອິດສະຣາເອນ. ຄາວຢູ່ທີ່ແມ່ນໍ້າເມຣີບາ ໃກ້ກັບເມືອງກາເດັດໃນຖິ່ນແຫ້ງແລ້ງກັນດານຊິນນັ້ນ ພວກເຈົ້າຫລົບລູ່ກຽດຂອງເຮົາໃນທ່າມກາງປະຊາຊົນອິດສາຣະເອນ. 52 ເຈົ້າຈະຫລຽວເຫັນດິນແດນນັ້ນໃນໄລຍະໄກ ແຕ່ເຈົ້າຈະບໍ່ໄດ້ເຂົ້າໄປໃນດິນແດນທີ່ເຮົາກຳລັງຈະມອບໃຫ້ປະຊາຊົນອິດສະຣາເອນ.” |
@ 2012 United Bible Societies. All Rights Reserved.