ພຣະບັນຍັດສອງ 28 - ພຣະຄຳພີສັກສິຄຳອວຍພອນສຳລັບການເຊື່ອຟັງ ( ລລວ 26:3-13 ; ພບຍ 7:12-24 ) 1 “ຖ້າພວກເຈົ້າເຊື່ອຟັງພຣະເຈົ້າຢາເວ ພຣະເຈົ້າຂອງພວກເຈົ້າ ແລະປະຕິບັດຢ່າງສັດຊື່ຕາມພຣະຄຳສັ່ງທຸກຂໍ້ ທີ່ຂ້າພະເຈົ້າກຳລັງໃຫ້ພວກເຈົ້າວັນນີ້; ພຣະອົງຈະບັນດານໃຫ້ພວກເຈົ້າເປັນໃຫຍ່ກວ່າຊົນຊາດອື່ນໆເທິງແຜ່ນດິນໂລກ. 2 ຈົ່ງເຊື່ອຟັງພຣະເຈົ້າຢາເວ ພຣະເຈົ້າຂອງພວກເຈົ້າ ແລະຄຳອວຍພອນທັງໝົດເຫຼົ່ານີ້ກໍຈະເປັນຂອງພວກເຈົ້າ: 3 ພຣະອົງຈະອວຍພອນເມືອງຕ່າງໆ ພ້ອມກັບໄຮ່ນາແລະຮົ້ວສວນຂອງພວກເຈົ້າ. 4 ພຣະອົງຈະອວຍພອນພວກເຈົ້າໃຫ້ມີລູກຫລານຫລາຍ, ມີພືດຜົນອຸດົມສົມບູນ ແລະມີຝູງງົວແລະຝູງແກະເຕັມຄອກ. 5 ພຣະອົງຈະອວຍພອນພວກເຈົ້າໃຫ້ມີພືດຜົນຫລາຍເພື່ອຈັດຕຽມອາຫານການກິນ. 6 ພຣະອົງຈະອວຍພອນທຸກໆສິ່ງທີ່ພວກເຈົ້າເຮັດ. 7 ພຣະເຈົ້າຢາເວຈະເອົາຊະນະສັດຕູທັງຫລາຍທີ່ມາໂຈມຕີພວກເຈົ້າ. ພວກເຂົາຈະໂຈມຕີພວກເຈົ້າຈາກທິດດຽວ ແຕ່ພວກເຂົາຈະແລ່ນເປີດໜີໄປທຸກທິດທຸກທາງ. 8 ພຣະເຈົ້າຢາເວຈະອວຍພອນວຽກການທີ່ພວກເຈົ້າເຮັດ ແລະໃຫ້ພວກເຈົ້າມີເຂົ້າເຕັມເລົ້າ. ພຣະເຈົ້າຢາເວ ພຣະເຈົ້າຂອງພວກເຈົ້າຈະອວຍພອນດິນແດນທີ່ກຳລັງຈະມອບໃຫ້ພວກເຈົ້ານີ້. 9 ພຣະເຈົ້າຢາເວຈະຮັບພວກເຈົ້າເປັນໄພ່ພົນບໍຣິສຸດຂອງພຣະອົງ ຕາມທີ່ພຣະອົງໄດ້ສັນຍາໄວ້, ຖ້າພວກເຈົ້າເຊື່ອຟັງຂໍ້ຄຳສັ່ງຂອງພຣະເຈົ້າຢາເວ ພຣະເຈົ້າຂອງພວກເຈົ້າ ແລະເດີນຕາມທາງຂອງພຣະອົງ. 10 ແລ້ວທຸກຊົນຊາດເທິງແຜ່ນດິນໂລກກໍຈະເຫັນວ່າ ພວກເຈົ້າເປັນທີ່ເອີ້ນໂດຍນາມຊື່ພຣະເຈົ້າຢາເວ ແລະພວກເຂົາຈະຢ້ານກົວພວກເຈົ້າ. 11 ພຣະເຈົ້າຢາເວຈະໃຫ້ພວກເຈົ້າມີລູກຫລານຫລາຍ ມີຝູງສັດມາກມາຍ ແລະມີພືດຜົນອຸດົມສົມບູນໃນດິນແດນທີ່ພຣະເຈົ້າຢາເວໄດ້ສັນຍາໄວ້ກັບປູ່ຍ່າຕາຍາຍຂອງພວກເຈົ້າ ເພື່ອມອບໃຫ້ພວກເຈົ້າ. 12 ພຣະເຈົ້າຢາເວຈະສົ່ງຝົນຈາກຄັງອັນອຸດົມສົມບູນຂອງພຣະອົງໃນຟ້າສະຫວັນ ໃຫ້ຕົກຖືກຕາມລະດູການ ແລະອວຍພອນທຸກໆວຽກງານຂອງພວກເຈົ້າ ເພື່ອພວກເຈົ້າຈະໃຫ້ຫລາຍຊົນຊາດກູ້ຢືມ, ແຕ່ພວກເຈົ້າຈະບໍ່ໄດ້ກູ້ຢືມຈາກຊົນຊາດໃດ. 13 ພຣະເຈົ້າຢາເວຈະໃຫ້ພວກເຈົ້າເປັນຜູ້ນຳທ່າມກາງຫລາຍຊົນຊາດ, ແຕ່ບໍ່ແມ່ນຜູ້ຕິດຕາມ; ພວກເຈົ້າຈະຈະເລີນຮຸ່ງເຮືອງສະເໝີ ແລະຈະບໍ່ຫຼົ້ມຈົມຈັກເທື່ອ ຖ້າພວກເຈົ້າເຊື່ອຟັງຢ່າງຕັ້ງໜ້າຂໍ້ຄຳສັ່ງຂອງພຣະເຈົ້າຢາເວ ພຣະເຈົ້າຂອງພວກເຈົ້າ ທີ່ຂ້າພະເຈົ້າກຳລັງໃຫ້ພວກເຈົ້າໃນວັນນີ້. 14 ແຕ່ພວກເຈົ້າຢ່າໄດ້ຝ່າຝືນຂໍ້ຄຳສັ່ງເຫຼົ່ານັ້ນຈັກເທື່ອ ຫລືຂາບໄຫວ້ແລະຮັບໃຊ້ບັນດາພະອື່ນ.” ຜົນກຳແຫ່ງຄວາມບໍ່ເຊື່ອຟັງ ( ລລວ 26:14-46 ) 15 “ແຕ່ຖ້າພວກເຈົ້າບໍ່ເຊື່ອຟັງພຣະເຈົ້າຢາເວ ພຣະເຈົ້າຂອງພວກເຈົ້າ ແລະບໍ່ຢຶດຖືຢ່າງຕັ້ງໜ້າຄຳສັ່ງທຸກຂໍ້ຂອງພຣະອົງ ພ້ອມກັບກົດບັນຍັດທັງຫລາຍທີ່ຂ້າພະເຈົ້າກຳລັງໃຫ້ພວກເຈົ້າໃນວັນນີ້ ແລ້ວຄຳສາບແຊ່ງທັງໝົດເຫຼົ່ານີ້ຈະເກີດຂຶ້ນກັບພວກເຈົ້າດັ່ງນີ້: 16 ບ້ານເມືອງ ແລະໄຮ່ນາຮົ້ວສວນທັງຫລາຍຂອງພວກເຈົ້າຈະຖືກສາບແຊ່ງ. 17 ພືດຜົນແລະອາຫານການກິນທີ່ໄດ້ມາຈາກພືດຜົນນັ້ນຈະຖືກສາບແຊ່ງ. 18 ພວກເຈົ້າຈະຖືກສາບແຊ່ງ ໂດຍໃຫ້ພວກເຈົ້າມີລູກແຕ່ໜ້ອຍຄົນ ເກັບພືດຜົນໄດ້ໜ້ອຍດຽວ ແລະຝູງງົວແລະຝູງແກະມີເຫຼືອໜ້ອຍດຽວ. 19 ທຸກໆສິ່ງທີ່ພວກເຈົ້າເຮັດຈະຖືກສາບແຊ່ງ. 20 ຖ້າພວກເຈົ້າເຮັດຊົ່ວແລະປະຖິ້ມພຣະເຈົ້າຢາເວໄປ ພຣະອົງກໍຈະນຳຄວາມຈິບຫາຍຄວາມສັບສົນວຸ້ນວາຍ ແລະຄວາມຫຍຸ້ງຍາກລຳບາກນາໆປະການມາສູ່ທຸກສິ່ງທີ່ພວກເຈົ້າເຮັດ ຈົນກວ່າພວກເຈົ້າຖືກທຳລາຍຢ່າງໄວວາຈົນກ້ຽງ. 21 ພຣະເຈົ້າຢາເວຈະນຳຄວາມເຈັບໄຂ້ໄດ້ປ່ວຍມາສູ່ພວກເຈົ້າຊໍ້າແລ້ວຊໍ້າອີກ ຈົນກວ່າຈະບໍ່ມີໃຜເຫຼືອຢູ່ໃນດິນແດນທີ່ພວກເຈົ້າກຳລັງຈະເຂົ້າໄປຢຶດຄອງນັ້ນ. 22 ພຣະເຈົ້າຢາເວຈະລົງໂທດພວກເຈົ້າດ້ວຍພະຍາດຕິດຕໍ່, ພະຍາດອັກເສບແລະຄວາມເຈັບໄຂ້ໄດ້ປ່ວຍ; ນອກຈາກນີ້ ພຣະອົງຈະໃຫ້ເກີດການແຫ້ງແລ້ງ ແລະແມງໄມ້ຈະມາທຳລາຍເຄື່ອງປູກຂອງຝັງຂອງພວກເຈົ້າຈົນໝົດ. ຄວາມຈິບຫາຍເຫຼົ່ານີ້ຈະຄຸກຄາມປະຈຳ ຈົນພວກເຈົ້າຕາຍ. 23 ຝົນຈະບໍ່ຕົກແລະດິນຈະແຫ້ງແລ້ງແຂງກະດ້າງຄືເຫຼັກ. 24 ແທນທີ່ຈະສົ່ງຝົນລົງມາ ພຣະເຈົ້າຢາເວຈະສົ່ງພະຍຸຂີ້ຊາຍມາແທນ ຈົນກວ່າພວກເຈົ້າຈະຖືກທຳລາຍໄປໝົດກ້ຽງ. 25 ພຣະເຈົ້າຢາເວຈະໃຫ້ສັດຕູມາຊະນະພວກເຈົ້າ. ພວກເຈົ້າຈະໂຈມຕີພວກເຂົາທາງທິດດຽວ ແຕ່ພວກເຈົ້າຈະແລ່ນເປີດໜີໄປທຸກທິດທຸກທາງ ແລະປະຊາຊົນທັງໝົດເທິງແຜ່ນດິນໂລກຈະອົກສັ່ນຂວັນເສຍ ເມື່ອພວກເຂົາໄດ້ຍິນສິ່ງທີ່ເກີດຂຶ້ນກັບພວກເຈົ້າ. 26 ເມື່ອພວກເຈົ້າຕາຍໄປ ແຮ້ງແລະສັດປ່າຈະມາກິນຊາກສົບ ແລະຈະບໍ່ມີໃຜໄລ່ພວກມັນໜີໄປ. 27 ພຣະເຈົ້າຢາເວຈະສົ່ງຕຸ່ມຝີມາຖືກພວກເຈົ້າ ເໝືອນດັ່ງທີ່ພຣະອົງໄດ້ເຮັດກັບຊາວເອຢິບ. ພຣະອົງຈະເຮັດໃຫ້ຕົນຕົວຂອງພວກເຈົ້າມີບາດແຜ. ພວກເຈົ້າຈະມີເກັດເຕັມຕົວທັງຄັນແລະຮັກສາບໍ່ດີຈັກເທື່ອ. 28 ພຣະເຈົ້າຢາເວຈະເຮັດໃຫ້ພວກເຈົ້າເສຍສະຕິ, ຕາບອດ ແລະສັບສົນວຸ້ນວາຍ. 29 ພວກເຈົ້າຈະຍ່າງງົມໆທ່າວໆ ໄປມາໃນກາງເວັນເໝືອນຄົນຕາບອດ ແລະຈະຫາທາງເດີນບໍ່ພົບ. ວຽກງານທີ່ພວກເຈົ້າເຮັດຈະບໍ່ຈະເລີນຮຸ່ງເຮືອງ. ພວກເຈົ້າຈະຖືກກົດຂີ່ ແລະຖືກເກັບກວາດຖືກຈີ້ເປັນປະຈຳ ແລະທັງຈະບໍ່ມີຜູ້ໃດມາຊ່ວຍເຫລືອພວກເຈົ້າ. 30 ພວກເຈົ້າຈະໝັ້ນຜູ້ສາວໄວ້, ແຕ່ຄົນອື່ນຈະເອົານາງໄປເປັນເມຍ. ພວກເຈົ້າຈະສ້າງເຮືອນ, ແຕ່ຈະບໍ່ໄດ້ຢູ່ຈັກເທື່ອ. ພວກເຈົ້າຈະປູກຕົ້ນອະງຸ່ນ, ແຕ່ຈະບໍ່ໄດ້ກິນໝາກເລີຍ. 31 ຝູງສັດຂອງພວກເຈົ້າຈະຖືກຂ້າຕໍ່ໜ້າຕໍ່ຕາ, ແຕ່ພວກເຈົ້າພັດບໍ່ໄດ້ກິນຊີ້ນຂອງມັນ. ລໍຂອງພວກເຈົ້າຈະຖືກລາກໄປຕໍ່ໜ້າຕໍ່ຕາ ແຕ່ເຂົາຈະບໍ່ສົ່ງມັນກັບຄືນມາໃຫ້ພວກເຈົ້າ. ຝູງແກະຂອງພວກເຈົ້າຈະຖືກສັດຕູປ້ອງເອົາໄປ ແຕ່ຈະບໍ່ມີໃຜຊ່ວຍພວກເຈົ້າ. 32 ລູກຊາຍລູກສາວຂອງພວກເຈົ້າຈະຖືກນຳໄປເປັນຄົນຮັບໃຊ້ແກ່ຊາວຕ່າງດ້າວຕໍ່ໜ້າຕໍ່ຕາ. ແຕ່ລະມື້ແຕ່ລະວັນພວກເຈົ້າລໍຖ້າພວກເຂົາກັບມາ ແຕ່ກໍສິ້ນຫວັງ. 33 ຊົນຊາດຕ່າງດ້າວຈະມາຢຶດເອົາພືດຜົນ ທີ່ພວກເຈົ້າໄດ້ປູກຝັງໄວ້ດ້ວຍຄວາມຍາກລຳບາກ ໄປຈົນໝົດກ້ຽງ, ແຕ່ພວກເຈົ້າບໍ່ໄດ້ຫຍັງໝົດ ຊໍ້າບໍ່ໜຳຍັງຖືກກົດຂີ່ ແລະຖືກຂົ່ມເຫັງຢ່າງທາລຸນ. 34 ຄວາມທົນທຸກນີ້ຈະເຮັດໃຫ້ພວກເຈົ້າເສຍຈິດ. 35 ພຣະເຈົ້າຢາເວຈະເຮັດໃຫ້ແຂ່ງຂາຂອງພວກເຈົ້າເຈັບປວດ ແລະບໍ່ຫາຍດີຈັກເທື່ອ; ຕຸ່ມຝີຈະມີຢູ່ເຕັມຕົວຕັ້ງແຕ່ຫົວເຖິງຕີນ. 36 ພຣະເຈົ້າຢາເວຈະນຳພວກເຈົ້າແລະກະສັດຂອງພວກເຈົ້າໄປສູ່ຕ່າງແດນ ບ່ອນທີ່ພວກເຈົ້າເອງແລະປູ່ຍ່າຕາຍາຍບໍ່ເຄີຍຢູ່ມາກ່ອນ; ໃນທີ່ນັ້ນ ພວກເຈົ້າຈະຮັບໃຊ້ພະອື່ນທີ່ເຮັດດ້ວຍໄມ້ ແລະຫີນ. 37 ໃນບັນດາປະເທດທີ່ພຣະເຈົ້າຢາເວຈະໃຫ້ພວກເຈົ້າກະຈັດກະຈາຍໄປອາໄສຢູ່ນັ້ນ ປະຊາຊົນຈະຕື່ນຕົກໃຈຕໍ່ເຫດການທີ່ໄດ້ເກີດຂຶ້ນກັບພວກເຈົ້າ ແລ້ວພວກເຂົາຕ່າງກໍຈະຫົວເລາະເຍາະເຍີ້ຍພວກເຈົ້າ. 38 ພວກເຈົ້າຈະຫວ່ານພືດຢ່າງຫລວງຫລາຍ, ແຕ່ຈະເກັບກ່ຽວໄດ້ໜ້ອຍດຽວ ເພາະຕັກແຕນຈະມາກິນພືດຜົນນັ້ນ. 39 ພວກເຈົ້າຈະປູກຕົ້ນອະງຸ່ນແລະເອົາໃຈໃສ່ບົວລະບັດມັນ, ແຕ່ພວກເຈົ້າຈະບໍ່ໄດ້ເກັບໝາກ ຫລືແມ່ນແຕ່ດື່ມເຫຼົ້າອະງຸ່ນເລີຍ ເພາະໂຕບົ້ງ, ໂຕໜອນຈະກັດກິນຕົ້ນຂອງມັນ. 40 ຕົ້ນໝາກກອກເທດຈະເກີດໃນທຸກທີ່ທຸກບ່ອນໃນດິນແດນຂອງພວກເຈົ້າ, ແຕ່ພວກເຈົ້າຈະບໍ່ໄດ້ນໍ້າມັນ ເພາະໝາກຂອງມັນລົ່ນຖິ້ມເສຍໝົດ. 41 ພວກເຈົ້າຈະມີລູກຊາຍລູກສາວແຕ່ຈະສູນເສຍໄປ ເພາະພວກເຂົາຖືກຈັບໄປເປັນຊະເລີຍເສິກ. 42 ຕົ້ນໄມ້ແລະພືດຜົນທັງຫລາຍຂອງພວກເຈົ້າຈະຖືກແມງໄມ້ມາທຳລາຍໝົດ. 43 ຊາວຕ່າງດ້າວທີ່ມາອາໄສຢູ່ໃນດິນແດນຂອງພວກເຈົ້າຈະມີອຳນາດຫລາຍຂຶ້ນ ແຕ່ຂະນະດຽວກັນນັ້ນ ອຳນາດຂອງພວກເຈົ້າຈະໜ້ອຍລົງ. 44 ພວກເຂົາມີເງິນຈະໃຫ້ພວກເຈົ້າກູ້ຢືມ ແຕ່ພວກເຈົ້າບໍ່ມີເງິນໃຫ້ພວກເຂົາກູ້ຢືມ. ໃນທີ່ສຸດ ພວກເຂົາຈະເປັນຜູ້ປົກຄອງພວກເຈົ້າ. 45 ໄພພິບັດເຫຼົ່ານີ້ ຈະມາສູ່ພວກເຈົ້າແລະຕົກຖືກພວກເຈົ້າ ຈົນກວ່າພວກເຈົ້າຖືກທຳລາຍ ເພາະພວກເຈົ້າບໍ່ເຊື່ອຟັງພຣະເຈົ້າຢາເວ ພຣະເຈົ້າຂອງພວກເຈົ້າ ແລະຍືດຖືກົດບັນຍັດທັງໝົດທີ່ຂ້າພະເຈົ້າໄດ້ມອບໃຫ້. 46 ສິ່ງເຫຼົ່ານັ້ນ ຈະເປັນໝາຍສຳຄັນແລະການອັດສະຈັນສຳລັບພວກເຈົ້າແລະລູກຫລານຂອງພວກເຈົ້າຕະຫລອດໄປ. 47 ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ອວຍພອນພວກເຈົ້າໃນທຸກໆສິ່ງ, ແຕ່ພວກເຈົ້າບໍ່ໄດ້ບົວລະບັດຮັບໃຊ້ພຣະອົງດ້ວຍໃຈຊົມຊື່ນຍິນດີແລະເບີກບານ. 48 ເພາະສະນັ້ນ ພວກເຈົ້າຈະຮັບໃຊ້ເຫຼົ່າສັດຕູ ທີ່ພຣະເຈົ້າຢາເວກຳລັງນຳມາຕໍ່ສູ້ພວກເຈົ້າ. ພວກເຈົ້າຈະອຶດເຂົ້າ, ຫິວນໍ້າ, ເປືອຍຕົວ ແລະບໍ່ມີຫຍັງຈັກຢ່າງ. ພຣະອົງ ຈະກົດຂີ່ພວກເຈົ້າຢ່າງທາລຸນ ຈົນກວ່າພວກເຈົ້າຖືກທຳລາຍໄປໝົດສິ້ນ. 49 ພຣະເຈົ້າຢາເວຈະນຳຊົນຊາດທີ່ຢູ່ສຸດປາຍແຜ່ນດິນໂລກ ຊຶ່ງພວກເຈົ້າບໍ່ຮູ້ຈັກພາສາ ມາຕໍ່ສູ້ພວກເຈົ້າ. ພວກເຂົາຈະບຸກຖະຫຼົ່ມໂຈມຕີພວກເຈົ້າ ເໝືອນດັ່ງນົກອິນຊີບິນລົງຈັບເຫຍື່ອ. 50 ພວກເຂົາຈະຮ້າຍກາດທີ່ສຸດ ແລະຈະບໍ່ສະແດງຄວາມປານີແກ່ຜູ້ໃດຜູ້ໜຶ່ງເລີຍ ບໍ່ວ່າຜູ້ໜຸ່ມຫລືຜູ້ເຖົ້າ. 51 ພວກເຂົາຈະກິນງົວໃນຝູງຂອງພວກເຈົ້າ ແລະພືດຜົນຂອງພວກເຈົ້າ ສ່ວນພວກເຈົ້ານັ້ນ ກໍຈະພາກັນອຶດຕາຍ. ເຂົ້າ, ເຫຼົ້າອະງຸ່ນ, ນໍ້າມັນໝາກກອກເທດ, ງົວ, ແກະ ແລະພືດຜົນຕ່າງໆຈະບໍ່ມີເຫຼືອໄວ້ໃຫ້ເລີຍ ແລະ ພວກເຈົ້າຈະພາກັນຕາຍ. 52 ພວກເຂົາຈະໂຈມຕີທຸກໆເມືອງໃນດິນແດນ ທີ່ພຣະເຈົ້າຢາເວ ພຣະເຈົ້າຂອງພວກເຈົ້າກຳລັງຈະມອບໃຫ້ພວກເຈົ້າ ແມ່ນແຕ່ເມືອງທີ່ມີປ້ອມລ້ອມດ້ວຍກຳແພງສູງ ທີ່ພວກເຈົ້າເຊື່ອວ່າປອດໄພກໍຈະລົ້ມທະລາຍລົງ. 53 ເມື່ອເຫຼົ່າສັດຕູປິດລ້ອມເມືອງຕ່າງໆຂອງພວກເຈົ້າຢູ່ນັ້ນ ພວກເຈົ້າຈະກາຍເປັນຄົນສິ້ນຫວັງ ເພາະຂາດອາຫານການກິນຈົນກິນລູກ ທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ໂຜດໃຫ້ນັ້ນ. 54-55 ແມ່ນແຕ່ຜູ້ດີມີຖານະກໍຈະໝົດຫວັງ ເພາະຂາດອາຫານການກິນ ເວລາຖືກປິດລ້ອມຢູ່ນັ້ນ ຈົນຕ້ອງກິນລູກບາງຄົນຂອງຕົນເອງເປັນອາຫານ. ລາວຈະບໍ່ຍອມແບ່ງປັນໃຫ້ໃຜກິນນຳ ບໍ່ວ່າອ້າຍເອື້ອຍນ້ອງ, ເມຍທີ່ຮັກ ຫລືລູກບາງຄົນທີ່ຍັງມີຊີວິດຢູ່. 56-57 ແມ່ນແຕ່ຍິງຜູ້ດີມີຖານະສູງທີ່ລໍ້າລວຍຮັ່ງມີ ແລະບໍ່ເຄີຍຍ່າງໄປມາໃສໂດຍຕົນເອງຈັກເທື່ອ ກໍຈະປະພຶດແບບດຽວກັນ. ເມື່ອສັດຕູປິດລ້ອມເມືອງຂອງນາງຢູ່ນັ້ນ ນາງຈະກາຍເປັນຄົນໝົດຫວັງ ເພາະຂາດອາຫານການກິນ ຈົນຕ້ອງລີ້ກິນລູກຂອງຕົນເອງທີ່ຫາກໍເກີດໃໝ່ໆ ຕະຫລອດທັງສາຍແຮ່ດ້ວຍ. ນາງຈະບໍ່ຍອມແບ່ງປັນໃຫ້ຜົວທີ່ຮັກແລະລູກຄົນອື່ນໆຂອງຕົນກິນນຳ. 58 ຖ້າພວກເຈົ້າບໍ່ເຊື່ອຟັງຢ່າງສັດຊື່ຄຳສັ່ງສອນທຸກຂໍ້ຂອງພຣະເຈົ້າ ທີ່ໄດ້ມີຂຽນໄວ້ໃນປື້ມຫົວນີ້ ແລະຖ້າພວກເຈົ້າບໍ່ຍົກຍໍໃຫ້ກຽດນາມອັນເລີດປະເສີດແລະອັນໜ້າຢ້ານກົວ ຂອງພຣະເຈົ້າຢາເວ ພຣະເຈົ້າຂອງພວກເຈົ້າ 59 ພຣະເຈົ້າຢາເວຈະສົ່ງພະຍາດອັນຮ້າຍແຮງທັງໂຣກລະບາດ ທີ່ປິ່ນປົວບໍ່ໄດ້ແລະຮັກສາບໍ່ດີຈັກເທື່ອ ມາສູ່ພວກເຈົ້າແລະລູກຫລານຂອງພວກເຈົ້າ. 60 ພຣະອົງຈະນຳໂຣກອັນຮ້າຍແຮງທີ່ສຸດຊຶ່ງພວກເຈົ້າໄດ້ພົບພໍ້ແລ້ວທີ່ເອຢິບ ມາສູ່ພວກເຈົ້າອີກຄັ້ງໜຶ່ງ ແລະພວກເຈົ້າຈະປິ່ນປົວຮັກສາບໍ່ດີຈັກເທື່ອ. 61 ພຣະເຈົ້າຢາເວຍັງຈະນຳເອົາພະຍາດທຸກຢ່າງ ແລະໂຣກລະບາດທຸກຊະນິດ ທີ່ບໍ່ໄດ້ກ່າວໄວ້ໃນປື້ມຂໍ້ຄຳສັ່ງຫົວນີ້ ມາສູ່ພວກເຈົ້າ ຈົນກວ່າພວກເຈົ້າຈະຖືກທຳລາຍ. 62 ເຖິງແມ່ນວ່າພວກເຈົ້າຈະມີຈຳນວນພົນຫລາຍ ເໝືອນດັ່ງດວງດາວໃນທ້ອງຟ້າກໍດີ ແຕ່ຈະມີໜ້ອຍຄົນເທົ່ານັ້ນທີ່ຍັງມີຊີວິດຢູ່ ເພາະພວກເຈົ້າບໍ່ໄດ້ເຊື່ອຟັງພຣະເຈົ້າຢາເວ ພຣະເຈົ້າຂອງພວກເຈົ້າ. 63 ພຣະເຈົ້າຢາເວໄດ້ມີຄວາມສຸກໃຈ ທີ່ໄດ້ເຮັດໃຫ້ພວກເຈົ້າຈະເລີນຮຸ່ງເຮືອງແລະມີຈຳນວນພົນຫລາຍຂຶ້ນສັນໃດ ພຣະເຈົ້າຢາເວກໍຈະມີຄວາມສຸກໃຈ ທີ່ຈະທຳລາຍພວກເຈົ້າແລະເຮັດໃຫ້ພວກເຈົ້າໝຸ່ນທະລາຍສັນນັ້ນ. ພວກເຈົ້າຈະຖືກຖອດຖອນອອກຈາກດິນແດນຫຼັກແຫຼ່ງ ທີ່ພວກເຈົ້າກຳລັງຈະເຂົ້າໄປຢຶດຄອງນັ້ນ. 64 ພຣະເຈົ້າຢາເວຈະກະຈັດກະຈາຍພວກເຈົ້າໃນທ່າມກາງທຸກຊົນຊາດ ຕັ້ງແຕ່ສົ້ນໜຶ່ງຫາອີກສົ້ນໜຶ່ງຂອງໂລກ ແລ້ວພວກເຈົ້າກໍຈະຂາບໄຫວ້ບັນດາຮູບເຄົາຣົບທີ່ເປັນໄມ້ແລະເປັນຫີນ ຊຶ່ງທັງພວກເຈົ້າເອງແລະປູ່ຍ່າຕາຍາຍຂອງພວກເຈົ້າບໍ່ເຄີຍຂາບໄຫວ້ມາກ່ອນ. 65 ພວກເຈົ້າຈະບໍ່ພົບຄວາມສະຫງົບສຸກຢູ່ທີ່ໃດເລີຍ ບໍ່ມີບ່ອນໃດທີ່ຈະເອີ້ນວ່າເປັນຂອງພວກເຈົ້າ ພຣະເຈົ້າຢາເວຈະເຮັດໃຫ້ພວກເຈົ້າ ເຕັມໄປດ້ວຍຄວາມອຸກອັ່ງກະວົນກະວາຍໃຈ ສະພາບໝົດທ່າເສຍທີ ແລະສິ້ນຫວັງ. 66 ຊີວິດຂອງພວກເຈົ້າຈະຕົກຢູ່ໃນຂັ້ນອັນຕະລາຍສະເໝີ. ຄວາມຢ້ານຈະປົກຄຸມພວກເຈົ້າທັງເວັນທັງຄືນ ແລະພວກເຈົ້າຈະຢ້ານຕາຍຢູ່ສະເໝີ. 67 ໃຈພວກເຈົ້າຈະເກີດຢ້ານຕໍ່ທຸກໆສິ່ງທີ່ພວກເຈົ້າເຫັນ. ທຸກໆເຊົ້າ ພວກເຈົ້າປາຖະໜາຢາກໃຫ້ຄໍ່າໄວໆ ແລະທຸກໆແລງ ພວກເຈົ້າປາດຖະນາຢາກໃຫ້ແຈ້ງໄວໆ. 68 ພຣະເຈົ້າຢາເວຈະສົ່ງພວກເຈົ້າກັບຄືນໄປສູ່ປະເທດເອຢິບທາງເຮືອ ເຖິງແມ່ນວ່າພຣະອົງ ໄດ້ສັ່ງໄວ້ວ່າ ພວກເຈົ້າບໍ່ຕ້ອງກັບຄືນໄປທີ່ນັ້ນອີກຈັກເທື່ອກໍຕາມ. ຢູ່ໃນທີ່ນັ້ນ ພວກເຈົ້າຈະຈ່າວຂາຍຕົນເອງເປັນຄົນຮັບໃຊ້ໃຫ້ເຫຼົ່າສັດຕູຂອງພວກເຈົ້າ ແຕ່ບໍ່ມີຜູ້ໃດຕ້ອງການຊື້ພວກເຈົ້າ.” |
@ 2012 United Bible Societies. All Rights Reserved.