ພຣະບັນຍັດສອງ 27 - ພຣະຄຳພີສັກສິກົດບັນຍັດທີ່ມີຂຽນໄວ້ໃສ່ແຜ່ນຫີນ 1 ແລ້ວໂມເຊ ພ້ອມກັບພວກຜູ້ນຳຂອງຊາດອິດສະຣາເອນ ກໍໄດ້ກ່າວແກ່ປະຊາຊົນວ່າ, “ຈົ່ງເຊື່ອຟັງຄຳແນະນຳທຸກຂໍ້ທີ່ຂ້າພະເຈົ້າມອບໃຫ້ພວກເຈົ້າວັນນີ້. 2 ໃນມື້ທີ່ພວກເຈົ້າຂ້າມແມ່ນໍ້າຈໍແດນແລະເຂົ້າໄປໃນດິນແດນ ທີ່ພຣະເຈົ້າຢາເວ ພຣະເຈົ້າຂອງພວກເຈົ້າກຳລັງຈະມອບໃຫ້ນັ້ນ ພວກເຈົ້າຕ້ອງຕັ້ງຫີນໃຫຍ່ຂຶ້ນໂປ້ດ້ວຍປູນຂາວ 3 ເຈົ້າຈົ່ງຂຽນຖ້ອຍຄຳຂອງກົດບັນຍັດທັງໝົດເຫຼົ່ານີ້ໃສ່. ເມື່ອພວກເຈົ້າໄດ້ເຂົ້າໄປຢູ່ໃນດິນແດນທີ່ອຸດົມສົມບູນແລະຮັ່ງມີ ທີ່ພຣະເຈົ້າຢາເວ ພຣະເຈົ້າຂອງປູ່ຍ່າຕາຍາຍຂອງພວກເຈົ້າໄດ້ສັນຍາໄວ້ນັ້ນ 4 ແລະຂ້າມແມ່ນໍ້າຈໍແດນໄປຟາກນັ້ນແລ້ວ ຈົ່ງຕັ້ງຫີນເຫຼົ່ານີ້ຂຶ້ນທີ່ພູເອບານ ເໝືອນດັ່ງທີ່ຂ້າພະເຈົ້າໄດ້ສັ່ງພວກເຈົ້າໃນວັນນີ້ ແລະໃຊ້ປູນໂບກເປັນຢ່າງດີ. 5 ຈົ່ງເອົາຫີນທີ່ບໍ່ໃຊ້ເຫຼັກຕັດສ້າງແທ່ນບູຊາແກ່ພຣະເຈົ້າຢາເວ ພຣະເຈົ້າຂອງພວກເຈົ້າໃນທີ່ນັ້ນ 6 ພວກເຈົ້າຕ້ອງສ້າງແທ່ນບູຊາຂອງພຣະເຈົ້າຢາເວ ພຣະເຈົ້າຂອງພວກເຈົ້າດ້ວຍຫີນທີ່ບໍ່ໄດ້ສະກັດ ແລະໃຫ້ພວກເຈົ້າຖວາຍເຄື່ອງເຜົາບູຊາແກ່ພຣະເຈົ້າຢາເວ ພຣະເຈົ້າຂອງພວກເຈົ້າໃນທີ່ນັ້ນ. 7 ແລະໃນທີ່ນັ້ນ ໃຫ້ພວກເຈົ້າຖວາຍເຄື່ອງບູຊາທັງກິນເຄື່ອງຖວາຍເພື່ອຄວາມສາມັກຄີທຳ ຫລັງຈາກໂມທະນາຂອບພຣະຄຸນຢູ່ຊ້ອງໜ້າພຣະເຈົ້າຢາເວ ພຣະເຈົ້າຂອງພວກເຈົ້າ. 8 ເທິງຫີນທີ່ໃຊ້ປູນໂປ້ນັ້ນ ໃຫ້ພວກເຈົ້າຂຽນກົດບັນຍັດທຸກໆຂໍ້ໃສ່ຢ່າງຈະແຈ້ງດີ.” 9 ແລ້ວໂມເຊ ພ້ອມກັບພວກປະໂຣຫິດຊາວເລວີ ກໍໄດ້ກ່າວແກ່ປະຊາຊົນອິດສະຣາເອນທຸກຄົນວ່າ, “ປະຊາຊົນອິດສະຣາເອນເອີຍ ຈົ່ງຕັ້ງໃຈຟັງຂ້າພະເຈົ້າໃຫ້ດີ. ວັນນີ້ ພວກເຈົ້າໄດ້ເປັນປະຊາຊົນຂອງພຣະເຈົ້າຢາເວ ພຣະເຈົ້າຂອງພວກເຈົ້າແລ້ວ; 10 ສະນັ້ນ ຈົ່ງເຊື່ອຟັງພຣະເຈົ້າຢາເວ ພຣະເຈົ້າຂອງພວກເຈົ້າແລະຢຶດຖືກົດບັນຍັດທຸກຂໍ້ຂອງພຣະອົງ ທີ່ຂ້າພະເຈົ້າກຳລັງມອບໃຫ້ພວກເຈົ້າໃນວັນນີ້.” ຄຳສາບແຊ່ງສຳລັບການບໍ່ເຊື່ອຟັງ 11 ແລ້ວໂມເຊກໍໄດ້ກ່າວແກ່ປະຊາຊົນອິດສະຣາເອນວ່າ, 12 “ຫລັງຈາກທີ່ພວກເຈົ້າໄດ້ຂ້າມແມ່ນໍ້າຈໍແດນໄປແລ້ວ ໃຫ້ເຜົ່າຕ່າງໆດັ່ງຕໍ່ໄປນີ້: ຊີເມໂອນ, ເລວີ, ຢູດາ, ອິດຊາຄາ, ໂຢເຊັບແລະເບັນຢາມິນ ຢືນຢູ່ເທິງພູເກຣີຊິມເມື່ອກ່າວຄຳອວຍພອນແກ່ປະຊາຊົນ. 13 ໃຫ້ເຜົ່າຕ່າງໆດັ່ງຕໍ່ໄປນີ້: ຣູເບັນ, ກາດ, ອາເຊ, ເຊບູໂລນ, ດານ ແລະເນັບທາລີຢືນຢູ່ເທິງພູເອບານ ເມື່ອກ່າວຄຳສາບແຊ່ງແກ່ປະຊາຊົນ. 14 ຊາວເລວີຈະເປັນຜູ້ກ່າວຖ້ອຍຄຳເຫຼົ່ານີ້ດ້ວຍສຽງດັງ ດັ່ງນີ້: 15 ‘ຄຳສາບແຊ່ງເປັນຂອງທຸກໆຄົນ ທີ່ໃຊ້ຫີນ, ໄມ້ ແລະໂລຫະ ເຮັດຮູບເຄົາຣົບແລະຂາບໄຫວ້ຮູບນັ້ນຢ່າງລັບລີ້; ພຣະເຈົ້າຢາເວກຽດຊັງການຂາບໄຫວ້ຮູບເຄົາຣົບ.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.’ 16 ‘ຄຳສາບແຊ່ງເປັນຂອງຜູ້ໃດຜູ້ໜຶ່ງ ທີ່ບໍ່ເຄົາຣົບນັບຖືພໍ່ແມ່ຂອງຕົນ.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.’ 17 ‘ຄຳສາບແຊ່ງເປັນຂອງຜູ້ໃດຜູ້ໜຶ່ງ ທີ່ຍົກຍ້າຍຫລັກປັກເອົາເຂດແດນຂອງເພື່ອນບ້ານ.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.’ 18 ‘ຄຳສາບແຊ່ງເປັນຂອງຜູ້ໃດຜູ້ໜຶ່ງ ທີ່ນຳຄົນຕາບອດໄປໃນທາງຜິດ.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.’ 19 ‘ຄຳສາບແຊ່ງເປັນຂອງຜູ້ໃດຜູ້ໜຶ່ງ ທີ່ຕັດສິດຂອງຄົນຕ່າງດ້າວ, ລູກກຳພ້າ ແລະແມ່ໝ້າຍ.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.’ 20 ‘ຄຳສາບແຊ່ງເປັນຂອງຜູ້ໃດຜູ້ໜຶ່ງ ທີ່ເຮັດໃຫ້ພໍ່ຂອງຕົນຕ້ອງອັບອາຍຂາຍໜ້າ ໂດຍສົມສູ່ກັບເມຍຄົນໃດຄົນໜຶ່ງຂອງເພິ່ນ.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.’ 21 ‘ຄຳສາບແຊ່ງເປັນຂອງຜູ້ໃດຜູ້ໜຶ່ງ ທີ່ສົມສູ່ທາງເພດກັບສັດ.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.’ 22 ‘ຄຳສາບແຊ່ງເປັນຂອງຜູ້ໃດຜູ້ໜຶ່ງ ທີ່ສົມສູ່ກັບເອື້ອຍນ້ອງຄີງໆຂອງຕົນ ຫລືເອື້ອຍນ້ອງຕ່າງພໍ່ແມ່.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.’ 23 ‘ຄຳສາບແຊ່ງເປັນຂອງຜູ້ໃດຜູ້ໜຶ່ງ ທີ່ສົມສູ່ທາງເພດກັບແມ່ນ້າຂອງຕົນ.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.’ 24 ‘ຄຳສາບແຊ່ງເປັນຂອງຜູ້ໃດຜູ້ໜຶ່ງ ທີ່ຂ້າຄົນຢ່າງລັບລີ້.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.’ 25 ‘ຄຳສາບແຊ່ງເປັນຂອງຜູ້ໃດຜູ້ໜຶ່ງ ທີ່ຮັບຈ້າງຂ້າຄົນໂດຍບໍ່ມີຄວາມຜິດ.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.’ 26 ‘ຄຳສາບແຊ່ງເປັນຂອງຜູ້ໃດຜູ້ໜຶ່ງ ທີ່ບໍ່ເຊື່ອຟັງກົດບັນຍັດແລະຄຳສັ່ງສອນທຸກຂໍ້ຂອງພຣະເຈົ້າ.’ ແລະປະຊາຊົນທັງໝົດຈະພ້ອມກັນຕອບວ່າ, ‘ອາແມນ.”’ |
@ 2012 United Bible Societies. All Rights Reserved.