ດານີເອນ 2 - ພຣະຄຳພີສັກສິເນບູກາດເນັດຊາຝັນເທື່ອທຳອິດ 1 ເມື່ອເຈົ້າເນບູກາດເນັດຊາເປັນກະສັດໄດ້ສອງປີແລ້ວ ເພິ່ນກໍຝັນຢ່າງໜຶ່ງ. ຄວາມຝັນນີ້ເຮັດໃຫ້ເພິ່ນເປັນທຸກໃຈຈົນນອນບໍ່ຫລັບ. 2 ສະນັ້ນ ເພິ່ນຈຶ່ງສັ່ງໃຫ້ພວກໝໍມໍ, ໝໍມົນ, ໝໍວິຊາອາຄົມ ແລະໝໍຜີມາແກ້ຄວາມຝັນນັ້ນໃຫ້ແກ່ເພິ່ນ. ເມື່ອພວກເຂົາເຂົ້າມາຢືນຢູ່ຕໍ່ໜ້າກະສັດແລ້ວ 3 ເພິ່ນຈຶ່ງກ່າວຕໍ່ພວກເຂົາວ່າ, “ເຮົາເປັນທຸກໃຈຫລາຍຍ້ອນຝັນບໍ່ດີ. ເຮົາຢາກຮູ້ວ່າຄວາມຝັນນັ້ນໝາຍເຖິງຫຍັງ?” 4 ພວກເຂົາໄດ້ຕອບກະສັດເປັນພາສາອາຣາມິກວ່າ, “ຂໍໃຫ້ພະຣາຊາຂອງພວກຂ້ານ້ອຍ ຈົ່ງໝັ້ນຍືນຕະຫລອດໄປເທີ້ນ ຂໍເລົ່າຄວາມຝັນໃຫ້ພວກຂ້ານ້ອຍຟັງເບິ່ງດູ ແລະພວກຂ້ານ້ອຍກໍຈະແກ້ຄວາມຝັນນັ້ນໃຫ້.” 5 ກະສັດຈຶ່ງກ່າວຕໍ່ພວກເຂົາວ່າ, “ເຮົາຕັດສິນໃຈແລ້ວວ່າ ຖ້າພວກເຈົ້າບອກຄວາມຝັນແລະແກ້ຄວາມຝັນໃຫ້ເຮົາບໍ່ໄດ້ ເຮົາຈະຕ້ອງຕັດພວກເຈົ້າເປັນຕ່ອນໆ ແລະທຳລາຍເຮືອນຂອງພວກເຈົ້າຖິ້ມໃຫ້ເປັນກອງສິ່ງຮົກຮ້າງເພພັງ. 6 ແຕ່ຖ້າພວກເຈົ້າບອກແລະແກ້ຄວາມຝັນໃຫ້ເຮົາໄດ້ ເຮົາຈະໃຫ້ບຳເໜັດແລະກຽດຕິຍົດອັນຍິ່ງໃຫຍ່ແກ່ພວກເຈົ້າ. ດັ່ງນັ້ນ ຈົ່ງບອກຄວາມຝັນແລະແກ້ຄວາມຝັນໃຫ້ເຮົາໃນບັດນີ້.” 7 ພວກເຂົາໄດ້ຕອບກະສັດອີກວ່າ, “ຖ້າພະຣາຊາເລົ່າຄວາມຝັນໃຫ້ພວກຂ້ານ້ອຍຮູ້ ພວກຂ້ານ້ອຍກໍຈະແກ້ຄວາມຝັນນັ້ນໄດ້.” 8 ພໍໄດ້ຍິນດັ່ງນັ້ນ ກະສັດຈຶ່ງຮ້ອງຂຶ້ນວ່າ, “ເຮົາຄິດແລ້ວວ່າ ພວກເຈົ້າກຳລັງຫາທາງຖ່ວງເວລາໄວ້ ຍ້ອນຮູ້ວ່າເຮົາໄດ້ຕັດສິນໃຈ 9 ທີ່ຈະລົງໂທດພວກເຈົ້າຢ່າງດຽວກັນ ຖ້າບໍ່ບອກຄວາມຝັນໃຫ້ເຮົາຮູ້ຈັກ. ພວກເຈົ້າຕົກລົງກັນຕົວະເຮົາ ໂດຍຫວັງວ່າສິ່ງຕ່າງໆຈະປ່ຽນໄປຕາມກາລະເວລາ. ຈົ່ງເລົ່າຄວາມຝັນໃຫ້ເຮົາຮູ້ສາ ແລ້ວເຮົາກໍຈະຮູ້ວ່າພວກເຈົ້າແກ້ຄວາມຝັນນັ້ນໄດ້.” 10 ພວກການເດອານໄດ້ຕອບຄືນວ່າ, “ບໍ່ມີຜູ້ໃດດອກ ໃນໂລກນີ້ ທີ່ສາມາດບອກສິ່ງທີ່ພະຣາຊາຢາກຮູ້ນັ້ນໄດ້. ບໍ່ມີກະສັດອົງໃດ ແມ່ນແຕ່ຜູ້ໃຫຍ່ ແລະຜູ້ມີອຳນາດທີ່ສຸດ ເຄີຍໄດ້ຖາມເຊັ່ນນີ້ກັບພວກໝໍມໍ, ໝໍມົນ ແລະໝໍຜີ. 11 ສິ່ງທີ່ທ່ານກຳລັງຖາມນັ້ນ ຍາກເກີນກວ່າທີ່ໃຜໆສາມາດໃຫ້ຄຳຕອບແກ່ທ່ານໄດ້ ນອກຈາກເທບພະເຈົ້າຜູ້ທີ່ບໍ່ໄດ້ຢູ່ໃນທ່າມກາງມະນຸດເຮົາ.” 12 ຍ້ອນຄຳເວົ້ານັ້ນກະສັດຈຶ່ງຮ້າຍໃຫຍ່ ແລະສັ່ງໃຫ້ປະຫານຊີວິດພວກທີ່ປຶກສາ ປະຈຳກະສັດໃນນະຄອນບາບີໂລນ. 13 ດັ່ງນັ້ນ ຈຶ່ງມີຄຳສັ່ງປະກາດອອກໄປໃຫ້ຂ້າພວກເຂົາ ພ້ອມທັງດານີເອນ ແລະໝູ່ຂອງລາວດ້ວຍ. ພຣະເຈົ້າບອກຄວາມຝັນຂອງກະສັດແກ່ດານີເອນ 14 ຕໍ່ມາ ດານີເອນໄດ້ໄປຫາອາຣີໂອກ ຜູ້ບັນຊາການທະຫານຍາມປະຈຳກະສັດ ຄືຜູ້ທີ່ຮັບສັ່ງໃຫ້ດຳເນີນການປະຫານ. ດານີເອນໄດ້ໃຊ້ຄຳເວົ້າຢ່າງລະມັດລະວັງ 15 ໂດຍຖາມອາຣີໂອກວ່າ, “ເປັນຫຍັງກະສັດຈຶ່ງອອກຄຳສັ່ງຮຸນແຮງຢ່າງນີ້.” ສະນັ້ນ ອາຣີໂອກຈຶ່ງໄດ້ບອກດານີເອນໃຫ້ຮູ້ຕາມເຫດການທີ່ໄດ້ເກີດຂຶ້ນ. 16 ດານີເອນຈຶ່ງເຂົ້າໄປພົບກະສັດໃນທັນທີ ແລະໄດ້ຮັບອະນຸຍາດເລື່ອນກຳນົດເວລາປະຫານ ເພື່ອວ່າລາວຈະແກ້ຄວາມຝັນໃຫ້ເພິ່ນ. 17 ແລ້ວດານີເອນກໍກັບຄືນເມືອເຮືອນຂອງຕົນ ແລະບອກເລື່ອງທີ່ເກີດຂຶ້ນນັ້ນ ໃຫ້ຮານານີຢາ, ມີຊາເອນ ແລະອາຊາຣີຢາ ເພື່ອນຂອງຕົນຮູ້ນຳ. 18 ລາວບອກພວກໝູ່ໃຫ້ພາວັນນາອະທິຖານ ຂໍຄວາມເມດຕາຈາກພຣະເຈົ້າທີ່ຢູ່ເທິງສະຫວັນ ແລະຂໍໃຫ້ພຣະອົງອະທິບາຍເລື່ອງເລິກລັບນີ້ໃຫ້ແກ່ພວກຕົນ ເພື່ອວ່າພວກຕົນຈະບໍ່ຖືກຂ້າຮ່ວມກັບພວກທີ່ປຶກສາຄົນອື່ນໆໃນນະຄອນບາບີໂລນ. 19 ແລ້ວໃນຄືນນັ້ນ ພຣະເຈົ້າກໍໄດ້ເຜີຍເລື່ອງເລິກລັບໃຫ້ດານີເອນຮູ້ທາງນິມິດ ແລະລາວຈຶ່ງສັນລະເສີນພຣະເຈົ້າແຫ່ງສະຫວັນວ່າ, 20 “ພຣະອົງຊົງພຣະປັນຍາ ແລະຊົງເດຊານຸພາບ ຂໍສັນລະເສີນພຣະນາມຂອງພຣະເຈົ້າຕະຫລອດໄປເປັນນິດ 21 ພຣະອົງບັງຄັບເວລາແລະລະດູການ ພຣະອົງແຕ່ງຕັ້ງກະສັດແລະປົດກະສັດລົງ; ແມ່ນພຣະອົງທີ່ເປັນຜູ້ໂຜດປະທານ ປັນຍາແລະຄວາມເຂົ້າໃຈໃຫ້ແກ່ມະນຸດ. 22 ພຣະອົງເປີດເຜີຍສິ່ງເລິກລັບທັງຫລາຍ ຮູ້ທຸກຢ່າງທຸກແນວທີ່ຖືກປິດບັງໄວ້ ແມ່ນແຕ່ສິ່ງນີ້ຖືກປິດບັງໄວ້ໃນທີ່ມືດກໍຕາມ ແສງແຈ້ງໃສກໍອ້ອມຮອບພຣະອົງໄວ້ທຸກດ້ານ. 23 ຂ້າແດ່ພຣະເຈົ້າແຫ່ງບັນພະບຸລຸດຂອງຂ້ານ້ອຍເອີຍ ຂໍສັນລະເສີນແລະຍ້ອງຍໍໃຫ້ກຽດພຣະອົງ. ພຣະອົງໄດ້ປະທານໃຫ້ຂ້ານ້ອຍມີປັນຍາ ພ້ອມທັງໃຫ້ກຳລັງແກ່ຂ້ານ້ອຍດ້ວຍ; ພຣະອົງຕອບສິ່ງທີ່ຂ້ານ້ອຍພາວັນນາອະທິຖານຂໍ ບອກຄຳຕອບແກ່ພວກຂ້ານ້ອຍໃຫ້ກະສັດໄດ້ຮູ້.” ດານີເອນບອກ ແລະແກ້ຄວາມຝັນແກ່ກະສັດ 24 ສະນັ້ນ ດານີເອນຈຶ່ງເຂົ້າໄປຫາອາຣີໂອກ ຜູ້ທີ່ກະສັດໄດ້ສັ່ງໃຫ້ຂ້າພວກທີ່ປຶກສາປະຈຳກະສັດ. ລາວເວົ້າວ່າ, “ຂໍຢ່າໄດ້ຂ້າພວກທີ່ປຶກສາທ້ອນ. ຂໍໃຫ້ເຈົ້າພາຂ້ອຍເຂົ້າໄປພົບກະສັດ ແລະຂ້ອຍຈະບອກຄວາມຝັນໃຫ້ເພິ່ນຮູ້.” 25 ແລ້ວອາຣີໂອກກໍຟ້າວນຳຕົວດານີເອນເຂົ້າໄປພົບກະສັດເນບູກາດເນັດຊາ ແລະບອກເພິ່ນວ່າ, “ຂ້ານ້ອຍພົບຜູ້ໜຶ່ງໃນໝູ່ພວກຊາວຢິວພັດຖິ່ນ ທີ່ແກ້ຄວາມຝັນໃຫ້ແກ່ພະຣາຊາໄດ້.” 26 ກະສັດກ່າວແກ່ດານີເອນ (ຜູ້ມີຊື່ອີກວ່າເບັນເຕຊັດຊາເຣ) ວ່າ, “ເຈົ້າບອກຄວາມຝັນ ແລະແກ້ຄວາມຝັນຂອງເຮົາໄດ້ບໍ?” 27 ດານີເອນຕອບວ່າ, “ຂ້າແດ່ພະຣາຊາ ບໍ່ມີໝໍຜີ, ໝໍມົນ, ໝໍມໍ, ຫລືໝໍໂຫນຜູ້ໃດດອກ ທີ່ບອກຄວາມເລິກລັບນີ້ໄດ້. 28 ແຕ່ມີພຣະເຈົ້າອົງໜຶ່ງ ເທິງສະຫວັນ ທີ່ເປີດເຜີຍຄວາມເລິກລັບທັງຫລາຍ. ພຣະອົງໄດ້ບອກພະຣາຊາຂອງຂ້ານ້ອຍໃຫ້ຮູ້ເຖິງສິ່ງທີ່ຈະເກີດຂຶ້ນໃນອະນາຄົດ. ບັດນີ້ ຂ້ານ້ອຍຈະບອກຄວາມຝັນ ແລະນິມິດທີ່ທ່ານມີຂະນະທີ່ທ່ານໄດ້ນອນຫລັບຢູ່ນັ້ນ. 29 ໃນຂະນະທີ່ພະຣາຊາກຳລັງນອນຫລັບຢູ່ນັ້ນ ທ່ານໄດ້ຝັນເຖິງເລື່ອງທີ່ຈະເກີດຂຶ້ນໃນອະນາຄົດ; ພຣະເຈົ້າຜູ້ເປີດເຜີຍຄວາມເລິກລັບ ໄດ້ສຳແດງໃຫ້ທ່ານຮູ້ເຖິງສິ່ງທີ່ຈະເກີດຂຶ້ນ. 30 ເລື່ອງເລິກລັບນີ້ຖືກເປີດເຜີຍໃຫ້ຂ້ານ້ອຍຮູ້ ບໍ່ແມ່ນຍ້ອນຂ້ານ້ອຍເປັນຄົນສະຫລາດກວ່າຄົນອື່ນດອກ, ແຕ່ເພື່ອໃຫ້ພະຣາຊາຮູ້ຄວາມໝາຍຂອງຄວາມຝັນນັ້ນ ແລະເຂົ້າໃຈສິ່ງທີ່ລົບກວນຈິດໃຈທ່ານ. 31 ຂ້າແດ່ພະຣາຊາ ໃນນິມິດຂອງທ່ານນັ້ນ ທ່ານໄດ້ເຫັນຮູບປັ້ນຂະໜາດໃຫຍ່ຢືນຢູ່ຕໍ່ໜ້າທ່ານ; ຮູບນີ້ສ່ອງແສງໃສເຫຼື້ອມ ແລະເບິ່ງເປັນຕາໜ້າຢ້ານ. 32 ຫົວຮູບນີ້ເປັນຄຳຢ່າງດີທີ່ສຸດ ເອິກແລະແຂນເປັນເງິນ; ແອວແລະກະໂພກເປັນທອງສຳຣິດ 33 ຂາເປັນເຫຼັກ, ຕີນສ່ວນໜຶ່ງເປັນເຫຼັກ ແລະອີກສ່ວນໜຶ່ງເປັນດິນໜຽວ. 34 ຂະນະທີ່ທ່ານຫລຽວເບິ່ງຢູ່ນັ້ນ ມີຫີນໃຫຍ່ກ້ອນໜຶ່ງແຕກອອກມາເອງຈາກໜ້າຜາໂດຍບໍ່ມີຜູ້ໃດເຮັດ; ຫີນນີ້ໄດ້ກະທົບໃສ່ຕີນເຫຼັກແລະດິນໜຽວຂອງຮູບນັ້ນ ຈົນແຕກໝຸ່ນໄປ. 35 ແລ້ວໃນທັນໃດນັ້ນ ສ່ວນທີ່ເປັນເຫຼັກ, ເປັນດິນໜຽວ, ເປັນທອງສຳຣິດ, ເປັນເງິນແລະເປັນຄຳ ກໍໄດ້ແຕກຄືແກບທີ່ລານໃນລະດູຟາດເຂົ້າ. ລົມໄດ້ພັດເອົາສິ່ງທັງໝົດນັ້ນໄປໄກ ໂດຍບໍ່ມີຮ່ອງຮອຍໃຫ້ພົບເຫັນອີກເລີຍ. ແຕ່ກ້ອນຫີນນັ້ນໄດ້ໃຫຍ່ຂຶ້ນກາຍເປັນພູເຂົາເຕັມໝົດແຜ່ນດິນໂລກ. 36 ຄວາມຝັນເປັນດັ່ງນີ້ແຫຼະ ບັດນີ້ຂ້ານ້ອຍຂໍແກ້ຄວາມຝັນໃຫ້ພະຣາຊາຮູ້. 37 ຂ້າແດ່ພະຣາຊາ ທ່ານເປັນກະສັດຜູ້ຍິ່ງໃຫຍ່ກວ່າກະສັດທັງຫລາຍ. ພຣະເຈົ້າແຫ່ງສະຫວັນໄດ້ແຕ່ງຕັ້ງທ່ານໃຫ້ເປັນຈັກກະພັດ, ມີອຳນາດໃຫຍ່ໂຕ, ມີກຳລັງວັງຊາແລະມີກຽດຕິຍົດ. 38 ພຣະເຈົ້າໄດ້ແຕ່ງຕັ້ງທ່ານໃຫ້ເປັນຜູ້ປົກຄອງຄົນຕະຫລອດທັງສັດ ແລະນົກທັງປວງທີ່ອາໄສຢູ່ໃນໂລກ. ຫົວຄຳນັ້ນແມ່ນທ່ານເອງ. 39 ຕໍ່ຈາກທ່ານໄປຈະມີອານາຈັກໜຶ່ງອີກ ເປັນອານາຈັກທີ່ນ້ອຍກວ່າຂອງທ່ານ ແລະຫລັງຈາກນັ້ນ ແມ່ນອານາຈັກທີສາມ ເປັນອານາຈັກທອງສຳຣິດ ຊຶ່ງຈະມີອຳນາດແຜ່ອອກໄປທົ່ວໂລກ. 40 ແລ້ວຈະມີອານາຈັກທີສີ່ ເປັນອານາຈັກທີ່ມີອຳນາດ ແລະແຂງດັ່ງເຫຼັກ ຊຶ່ງສາມາດຕີສິ່ງທັງຫລາຍໃຫ້ຫັກ ແລະແຕກໝຸ່ນໄດ້. ເຫຼັກນີ້ຕີສິ່ງທັງຫລາຍໃຫ້ຫັກ ແລະແຕກໝຸ່ນໄດ້ສັນໃດ ອານາຈັກນີ້ກໍຈະຕີອານາຈັກທັງຫລາຍທີ່ເກີດຂຶ້ນມາກ່ອນ ໃຫ້ແຕກໝຸ່ນທະລາຍໄປໄດ້ສັນນັ້ນ. 41 ທ່ານຍັງເຫັນອີກວ່າ ຕີນແລະນີ້ວຕີນສ່ວນໜຶ່ງເປັນດິນໜຽວ ແລະອີກສ່ວນໜຶ່ງເປັນເຫຼັກ. ນີ້ໝາຍຄວາມວ່າຈະເປັນອານາຈັກທີ່ແຕກແຍກ. ມັນຈະມີຄວາມແຂງຂອງເຫຼັກປົນຢູ່ ເພາະມີເຫຼັກປະສົມຢູ່ກັບດິນໜຽວ. 42 ນີ້ວຕີນສ່ວນໜຶ່ງເປັນເຫຼັກ ແລະສ່ວນໜຶ່ງອີກເປັນດິນໜຽວນັ້ນ ໝາຍຄວາມວ່າອານາຈັກຈະມີບາງສ່ວນທີ່ແຂງແຮງ ແລະບາງສ່ວນທີ່ອ່ອນແອ. 43 ທ່ານຍັງເຫັນເຫຼັກປະສົມດິນໜຽວ. ນີ້ໝາຍຄວາມວ່າພວກຜູ້ປົກຄອງອານາຈັກນັ້ນ ຈະຫາທາງລວບລວມຄອບຄົວທັງໝົດຂອງພວກເຂົາເຂົ້າກັນດ້ວຍການແຕ່ງງານ; ແຕ່ພວກເຂົາບໍ່ສາມາດເຮັດໄດ້ ເໝືອນກັນກັບເຫຼັກບໍ່ສາມາດປະສົມກັບດິນໜຽວໄດ້. 44 ໃນສະໄໝທີ່ກະສັດເຫຼົ່ານັ້ນປົກຄອງ ພຣະເຈົ້າແຫ່ງສະຫວັນຈະຕັ້ງອານາຈັກໜຶ່ງຂຶ້ນ ຊຶ່ງຈະບໍ່ສູນຫາຍໄປຈັກເທື່ອ. ອານາຈັກນີ້ຈະບໍ່ຖືກຕີໃຫ້ພ່າຍແພ້ຈັກເທື່ອ, ແຕ່ຈະທຳລາຍອານາຈັກອື່ນໆໃຫ້ໝົດສິ້ນໄປ ແລ້ວກໍຈະຕັ້ງໝັ້ນຢູ່ຕະຫລອດໄປເປັນນິດ. 45 ການທີ່ທ່ານເຫັນຫີນໃຫຍ່ກ້ອນໜຶ່ງ ແຕກອອກມາເອງຈາກໜ້າຜາໂດຍບໍ່ມີຜູ້ໃດເຮັດນັ້ນ ກ້ອນຫີນນັ້ນໄດ້ກະທົບໃສ່ກັບຮູບເຫຼັກ, ຮູບທອງສຳຣິດ, ຮູບດິນ, ຮູບເງິນແລະຄຳ. ອັນນີ້ແມ່ນພຣະເຈົ້າອົງຍິ່ງໃຫຍ່ກຳລັງບອກໃຫ້ພະຣາຊາຮູ້ເຖິງສິ່ງທີ່ຈະເກີດຂຶ້ນໃນອະນາຄົດ. ຂ້ານ້ອຍໄດ້ບອກທ່ານຖືກຕ້ອງຕາມທີ່ທ່ານໄດ້ຝັນ ແລະແກ້ຄວາມຝັນນັ້ນແກ່ທ່ານຕາມຄວາມຈິງ.” ກະສັດໃຫ້ບຳເໜັດແກ່ດານີເອນ 46 ແລ້ວກະສັດເນບູກາດເນັດຊາກໍຂາບລົງ ທັງສັ່ງໃຫ້ນຳເອົາເຄື່ອງບູຊາ ແລະເຄື່ອງຖວາຍມາມອບໃຫ້ແກ່ດານີເອນ. 47 ກະສັດກ່າວວ່າ, “ພຣະເຈົ້າຂອງເຈົ້າເປັນພຣະເຈົ້າອົງຍິ່ງໃຫຍ່ເໜືອພະທັງປວງ ແລະເປັນອົງພຣະຜູ້ເປັນເຈົ້າເໜືອກະສັດທັງຫລາຍ ແລະເປັນຜູ້ເປີດເຜີຍຄວາມເລິກລັບຕ່າງໆ. ເຮົາຮູ້ສິ່ງນີ້ກໍເພາະວ່າເຈົ້າອະທິບາຍຄວາມເລິກລັບນີ້ໄດ້.” 48 ແລ້ວກະສັດກໍໄດ້ມອບຕຳແໜ່ງສູງໃຫ້ດານີເອນຕຳແໜ່ງໜຶ່ງ ທັງມອບຂອງຂວັນທີ່ສະຫງ່າງາມຫລາຍຢ່າງໃຫ້ແກ່ລາວ ແລະແຕ່ງຕັ້ງລາວໃຫ້ເປັນຜູ້ປົກຄອງແຂວງບາບີໂລນ ແລະເປັນຫົວໜ້າພວກທີ່ປຶກສາທັງໝົດປະຈຳກະສັດ. 49 ຕາມຄຳຮ້ອງຂໍຂອງດານີເອນ ກະສັດໄດ້ແຕ່ງຕັ້ງຊັດຣາກ, ເມຊາກ ແລະອາເບັດເນໂກໃຫ້ຮັບຣາຊການຢູ່ໃນແຂວງບາບີໂລນ, ແຕ່ດານີເອນຍັງໄດ້ຮັບຕຳແໜ່ງຢູ່ໃນຣາຊສຳນັກຕໍ່ໄປ. |
@ 2012 United Bible Societies. All Rights Reserved.