2 ຕີໂມທຽວ 3 - ພຣະຄຳພີສັກສິລັກສະນະຈິດໃຈມະນຸດໃນຍຸກສຸດທ້າຍ 1 ແຕ່ຈົ່ງຮູ້ຈັກຂໍ້ຄວາມນີ້ວ່າ, ໃນຍຸກສຸດທ້າຍນັ້ນ ຈະເກີດຄວາມລຳບາກຢ່າງຮ້າຍແຮງ. 2 ເພາະວ່າຄົນທັງຫລາຍຈະເຫັນແກ່ຕົວ, ເຫັນແກ່ເງິນຄຳ, ອວດຕົວ, ຈອງຫອງ, ມັກດ່າວ່າ, ບໍ່ເຊື່ອຟັງຄວາມພໍ່ແມ່, ເນຣະຄຸນ, ເປັນຄົນບໍ່ມີສິນທຳ; 3 ເປັນຄົນຂາດມະນຸດສະທຳ, ບໍ່ຍອມຜ່ອນຜັນຜູ້ໃດ, ໃສ່ຮ້າຍປ້າຍສີກັນ, ບໍ່ຮູ້ຈັກບັງຄັບຕົນ, ມີໃຈໂຫດຮ້າຍ, ເປັນຄົນບໍ່ຮັກການດີ, 4 ເປັນຄົນທໍລະຍົດ, ດື້ດ້ານ, ອວດສະຫາວ ແລະເປັນຄົນຮັກຄວາມສະໜຸກ ຫລາຍກວ່າຮັກພຣະເຈົ້າ. 5 ເຂົາກໍເຮັດເໝືອນຄົນນັບຖືພຣະເຈົ້າຢ່າງຖືກຕ້ອງ, ແຕ່ວ່າຣິດອຳນາດຂອງການນັບຖືນັ້ນ ເຂົາກໍປະຕິເສດເສຍ ເຈົ້າຈົ່ງຫລີກໜີເສຍຈາກຄົນຢ່າງນັ້ນ. 6 ເພາະໃນບັນດາຄົນເຫຼົ່ານັ້ນ ມີຄົນທີ່ມັກລ່ວງເຂົ້າໄປຕາມບ້ານເຮືອນ ກ້ຽວກ່ອມເອົາໃຈແມ່ຍິງທີ່ເບົາປັນຍາ ໜາດ້ວຍຄວາມຜິດບາບ ແລະຫລົງໄຫລໄປດ້ວຍຕັນຫາຕ່າງໆ ເອົາໄປເປັນຊະເລີຍ, 7 ຍິງພວກນີ້ ກໍຍອມຮໍ່າຮຽນຢູ່ສະເໝີ ແຕ່ບໍ່ອາດຈະເຖິງການສັງເກດຮູ້ຄວາມຈິງໄດ້ຈັກເທື່ອ. 8 ຢາເນກັບຢຳເບ ຂັດຂວາງຕໍ່ສູ້ກັບໂມເຊສັນໃດ ຄົນເຫຼົ່ານີ້ ກໍຂັດຂວາງຕໍ່ສູ້ກັບຄວາມຈິງສັນນັ້ນເໝືອນກັນ ເຂົາເປັນຄົນມີໃຈຊົ່ວຮ້າຍ ແລະໃນດ້ານຄວາມເຊື່ອນັ້ນ ເຂົາໃຊ້ບໍ່ໄດ້ເລີຍ, 9 ແຕ່ເຂົາກ້າວໜ້າຕໍ່ໄປອີກບໍ່ໄດ້ ເພາະວ່າຄວາມໂງ່ຂອງເຂົານັ້ນ ຈະປາກົດແຈ້ງແກ່ຄົນທັງປວງ ເໝືອນດັ່ງຄວາມໂງ່ຂອງຊາຍສອງຄົນນັ້ນ. ຄຳແນະນຳຂອງໂປໂລ ເຖິງຕີໂມທຽວ 10 ບັດນີ້ ເຈົ້າກໍໄດ້ຕິດຕາມເຮົາ ໃນດ້ານຄຳສອນ, ຄືດຳເນີນຕາມຄວາມປະພຶດ, ເປົ້າໝາຍຂອງຊີວິດ, ຄວາມເຊື່ອ, ຄວາມອົດທົນ, ຄວາມຮັກ, ຄວາມໜັກແໜ້ນໝັ້ນຄົງ, 11 ການຖືກຂົ່ມເຫັງ ແລະຄວາມທົນທຸກລຳບາກຂອງເຮົາ ເຈົ້າກໍຮູ້ຈັກເຫດການທັງໝົດທີ່ໄດ້ເກີດຂຶ້ນກັບເຮົາໃນເມືອງອັນຕີໂອເຂຍ ໃນເມືອງອີໂກນີອົມ ແລະໃນເມືອງລີສະຕຣາ ຄືການຖືກຂົ່ມເຫັງອັນໜັກໜ່ວງທີ່ເຮົາໄດ້ທົນເອົານັ້ນ, ແຕ່ອົງພຣະຜູ້ເປັນເຈົ້າໄດ້ຊ່ວຍກູ້ເອົາເຮົາໃຫ້ພົ້ນຈາກສິ່ງເຫຼົ່ານັ້ນທັງສິ້ນ. 12 ແທ້ຈິງ ບັນດາຄົນທີ່ປາຖະໜາຈະດຳເນີນຊີວິດຄຣິສຕຽນ ເປັນຄົນນັບຖືພຣະເຈົ້າຢ່າງຖືກຕ້ອງ ກໍຈະຖືກກົດຂີ່ຂົ່ມເຫັງ, 13 ແຕ່ຄົນຊົ່ວຮ້າຍ ແລະຄົນປອມຕົວ ຈະເພີ່ມທະວີຫລາຍຂຶ້ນ ໄປລໍ້ລວງຄົນອື່ນໃຫ້ຫລົງ ແລະຕົວເຂົາເອງກໍຈະຖືກລໍ້ລວງເໝືອນກັນ. 14 ແຕ່ສຳລັບເຈົ້າ ຈົ່ງສືບຕໍ່ດຳເນີນຕໍ່ໄປ ໃນສິ່ງທີ່ເຈົ້າໄດ້ຮຽນຮູ້ມາແລ້ວ ແລະໄດ້ເຊື່ອຢ່າງໝັ້ນຄົງ ເຈົ້າກໍຮູ້ແລ້ວວ່າເຈົ້າໄດ້ຮຽນຮູ້ມາຈາກຜູ້ໃດ. 15 ທີ່ຈິງແລ້ວ ເຈົ້າໄດ້ຮູ້ພຣະຄຳພີອັນສັກສິດ ຕັ້ງແຕ່ຄາວເຈົ້າຍັງນ້ອຍພຸ້ນ ຊຶ່ງສາມາດສອນເຈົ້າໃຫ້ມີປັນຍາ ທີ່ນຳໄປເຖິງຄວາມພົ້ນ ໂດຍທາງຄວາມເຊື່ອໃນພຣະຄຣິດເຈົ້າເຢຊູ. 16 ພຣະຄຳພີທຸກຕອນໄດ້ຮັບການຊົງບັນດົນໃຈຈາກພຣະເຈົ້າ ແລະເປັນປະໂຫຍດ ໃນການສອນ, ການກ່າວຕັກເຕືອນວ່າກ່າວ, ການປັບປຸງແກ້ໄຂໃຫ້ຖືກຕ້ອງ ແລະການອົບຮົມໃນທາງຊອບທຳ, 17 ເພື່ອຄົນຂອງພຣະເຈົ້າຈະບັນລຸຜົນສຳເລັດ ແລະຈັດຕຽມໄວ້ພ້ອມສຳລັບການດີທຸກຢ່າງ. |
@ 2012 United Bible Societies. All Rights Reserved.