2 ເທສະໂລນິກ 2 - ພຣະຄຳພີສັກສິຜູ້ຊົ່ວຮ້າຍ 1 ພວກພີ່ນ້ອງເອີຍ, ເລື່ອງການສະເດັດມາປາກົດຂອງອົງພຣະເຢຊູຄຣິດເຈົ້າຂອງພວກເຮົາ ແລະການທີ່ພຣະອົງຈະເຕົ້າໂຮມພວກເຮົາໄປເປັນຂອງພຣະອົງນັ້ນ ເຮົາຂໍຮ້ອງພວກເຈົ້າວ່າ, 2 ຢ່າໃຫ້ໃຈຂອງພວກເຈົ້າທັງຫລາຍປັ່ນປ່ວນໂດຍງ່າຍ ຫລືສະທ້ານຕົກໃຈ ບໍ່ວ່າຈະມາດ້ວຍທາງວິນຍານ ຫລືມາທາງຄຳເວົ້າ ຫລືທາງຈົດໝາຍທີ່ອ້າງວ່າມາຈາກເຮົາ ໂດຍອ້າງວ່າວັນຂອງອົງພຣະຜູ້ເປັນເຈົ້າມາເຖິງແລ້ວ. 3 ຢ່າໃຫ້ຜູ້ໃດຫລອກລວງພວກເຈົ້າໃນທາງໃດທາງໜຶ່ງເລີຍ. ດ້ວຍວ່າ, ວັນນັ້ນຈະບໍ່ມາເຖິງ ຈົນກວ່າການທໍລະຍົດຄັ້ງສຸດທ້າຍຈະເກີດຂຶ້ນກ່ອນ ແລະຜູ້ຊົ່ວຮ້າຍຈະປາກົດຕົວຂຶ້ນ ຄືຜູ້ທີ່ຖືກໝາຍໄວ້ສຳລັບນະຣົກ. 4 ມັນຈະຂັດຂວາງທຸກສິ່ງທີ່ມະນຸດຂາບໄຫວ້ ແລະທຸກສິ່ງທີ່ມະນຸດຖືເປັນພຣະເຈົ້າ ແລະຈະຍົກຕົວຂຶ້ນເໜືອສິ່ງເຫຼົ່ານັ້ນທັງໝົດ. ມັນຈະເຂົ້າໄປນັ່ງຢູ່ໃນວິຫານຂອງພຣະເຈົ້າ ແລະອ້າງຕົນເອງວ່າເປັນພຣະເຈົ້າ. 5 ພວກເຈົ້າຈື່ໄດ້ບໍ? ເມື່ອເຮົາຍັງຢູ່ກັບພວກເຈົ້ານັ້ນ ເຮົາກໍເຄີຍບອກສິ່ງເຫຼົ່ານີ້ທັງໝົດແກ່ພວກເຈົ້າແລ້ວ. 6 ແຕ່ໃນເວລານີ້ ຍັງມີສິ່ງທີ່ກີດກັ້ນມັນໄວ້ບໍ່ໃຫ້ປາກົດຕົວ ແລະພວກເຈົ້າກໍຮູ້ວ່າສິ່ງນັ້ນແມ່ນຫຍັງ ເມື່ອເຖິງເວລາກຳນົດແລ້ວ ມັນກໍຈະປາກົດຕົວ. 7 ອຳນາດອັນເລິກລັບແຫ່ງຄວາມຊົ່ວຮ້າຍກໍດຳເນີນການຢູ່ແລ້ວ ແຕ່ສິ່ງທີ່ຕ້ອງເກີດຂຶ້ນນັ້ນຈະເກີດຂຶ້ນໄດ້ ກໍຕໍ່ເມື່ອຜູ້ທີ່ກີດກັ້ນມັນໄວ້ນັ້ນຖືກຍົກໄປເສຍ. 8 ໃນຂະນະນັ້ນ ຜູ້ຊົ່ວຮ້າຍຈຶ່ງຈະປາກົດຕົວ ແລະອົງພຣະເຢຊູເຈົ້າກໍຈະປະຫານມັນເສຍດ້ວຍລົມຈາກປາກຂອງພຣະອົງ ແລະຈະລ້າງຜານໃຫ້ມັນດັບສູນໄປດ້ວຍແສງອັນຮຸ່ງເຮືອງ ໃນເວລາທີ່ພຣະອົງສະເດັດມານັ້ນ. 9 ຜູ້ຊົ່ວຮ້າຍນັ້ນຈະມາດ້ວຍອຳນາດຂອງມານຊາຕານ ແລະຈະເຮັດການອິດທິຣິດທຸກຢ່າງກັບໝາຍສຳຄັນແລະການອັດສະຈັນຫຼາຍຢ່າງທີ່ຈອມປອມ 10 ແລະໃຊ້ກົນອຸບາຍອັນຊົ່ວຊ້າທຸກຢ່າງຫລອກລວງຜູ້ທີ່ກຳລັງຈະຈິບຫາຍໄປ. ຄົນເຫຼົ່ານີ້ຈະຈິບຫາຍໄປເພາະພວກເຂົາບໍ່ໄດ້ຍອມຮັບຄວາມຈິງ ຊຶ່ງຈະຊ່ວຍພວກເຂົາໃຫ້ພົ້ນ. 11 ດັ່ງນັ້ນ ພຣະເຈົ້າຈຶ່ງໃຫ້ອິດທິພົນອັນຫລອກລວງນັ້ນ ເຮັດການຢູ່ພາຍໃນ ເພື່ອໃຫ້ພວກເຂົາເຊື່ອຟັງຄວາມບໍ່ຈິງ. 12 ໃນທີ່ສຸດ ທຸກຄົນທີ່ບໍ່ໄດ້ເຊື່ອຄວາມຈິງ ຄືຜູ້ທີ່ເພີດເພີນຢູ່ໃນການຊົ່ວຮ້າຍ ກໍຈະຖືກພິພາກສາລົງໂທດ. ພວກເຈົ້າຖືກເລືອກໄວ້ສຳລັບຄວາມພົ້ນ 13 ພວກພີ່ນ້ອງ ຜູ້ທີ່ເປັນທີ່ຮັກຂອງອົງພຣະຜູ້ເປັນເຈົ້າເອີຍ ພວກເຮົາຕ້ອງໂມທະນາຂອບພຣະຄຸນພຣະເຈົ້າຢູ່ທຸກເວລາ ເພາະວ່າພຣະເຈົ້າຊົງເລືອກພວກເຈົ້າໄວ້ຕັ້ງແຕ່ຕົ້ນເດີມ ເພື່ອໂຜດໃຫ້ພົ້ນໂດຍຣິດອຳນາດຂອງພຣະວິນຍານ ອົງທີ່ເຮັດໃຫ້ພວກເຈົ້າເປັນໄພ່ພົນຜູ້ບໍຣິສຸດຂອງພຣະອົງ ແລະໂດຍພວກເຈົ້າເຊື່ອໃນຄວາມຈິງ. 14 ພຣະເຈົ້າຊົງເອີ້ນເອົາພວກເຈົ້າໃຫ້ມາເຖິງຊີວິດໃໝ່ນີ້ ກໍໂດຍຂ່າວປະເສີດທີ່ພວກເຮົາໄດ້ປະກາດແກ່ພວກເຈົ້າ ພຣະອົງໄດ້ຊົງເອີ້ນເອົາພວກເຈົ້າ ໃຫ້ມີສ່ວນໃນສະຫງ່າຣາສີຂອງອົງພຣະເຢຊູຄຣິດເຈົ້າຂອງພວກເຮົາ. 15 ເຫດສະນັ້ນ ພີ່ນ້ອງທັງຫລາຍເອີຍ, ຈົ່ງຕັ້ງໝັ້ນຄົງຢູ່ ແລະຢຶດຖືເອົາຄຳສອນທີ່ສືບມາ ຊຶ່ງພວກເຮົາໄດ້ສອນພວກເຈົ້ານັ້ນ ບໍ່ວ່າຈະເປັນທາງວາຈາ ຫລືທາງຈົດໝາຍຂອງພວກເຮົາກໍດີ. 16 ຂໍໃຫ້ອົງພຣະເຢຊູຄຣິດເຈົ້າຂອງເຮົາທັງຫລາຍ ແລະ ພຣະເຈົ້າ ພຣະບິດາເຈົ້າຂອງພວກເຮົາ ຜູ້ຊົງຮັກເຮົາທັງຫລາຍ ແລະຊົງໂຜດປະທານໃຫ້ພວກເຮົາ ມີຄວາມຊູໃຈເປັນນິດແລະຄວາມຫວັງໃຈອັນດີ ໂດຍພຣະຄຸນນັ້ນ, 17 ຊົງຊູໃຈແລະຕັ້ງເຈົ້າໄວ້ໃຫ້ໝັ້ນຄົງ ໃນການງານແລະໃນວາຈາອັນດີທຸກຢ່າງ. |
@ 2012 United Bible Societies. All Rights Reserved.