2 ຊາມູເອນ 12 - ພຣະຄຳພີສັກສິນາທານເຕືອນດາວິດແລະເພິ່ນກັບໃຈ 1 ຕໍ່ມາ ພຣະເຈົ້າຢາເວໄດ້ສົ່ງຜູ້ທຳນວາຍນາທານໄປຫາກະສັດດາວິດ. ນາທານໄດ້ໄປຫາເພິ່ນ ແລະກ່າວວ່າ, “ຍັງມີສອງຄົນຢູ່ໃນເມືອງດຽວກັນ ຜູ້ໜຶ່ງເປັນຄົນຮັ່ງມີ ແລະຜູ້ໜຶ່ງອີກເປັນຄົນຍາກຈົນ. 2 ຊາຍຮັ່ງມີນັ້ນມີງົວແລະແກະຫລາຍໂຕ 3 ຝ່າຍຊາຍຍາກຈົນນັ້ນມີພຽງແຕ່ແກະນ້ອຍໂຕດຽວຊຶ່ງລາວໄດ້ຊື້ມາ. ລາວລ້ຽງຮັກສາແກະນ້ອຍໂຕນັ້ນ ແລະມັນໄດ້ໃຫຍ່ຂຶ້ນມາຮ່ວມກັບພວກລູກໆຂອງຕົນ ຢູ່ໃນເຮືອນຂອງລາວ. ມັນກິນອາຫານທີ່ລາວກິນ ແລະດື່ມຈາກຈອກທີ່ລາວດື່ມ ພ້ອມທັງນອນທີ່ເທິງຕັກຂອງລາວ. ແກະນັ້ນເປັນດັ່ງລູກສາວຄົນໜຶ່ງຂອງລາວ. 4 ວັນໜຶ່ງ ມີແຂກມາຢ້ຽມຢາມເຮືອນຂອງຄົນຮັ່ງມີ ຄົນຮັ່ງມີຜູ້ນັ້ນບໍ່ຢາກຂ້າສັດຂອງຕົນຕຽມອາຫານໃຫ້ແຂກກິນ, ແຕ່ລາວກັບເອົາແກະນ້ອຍຂອງຄົນຍາກຈົນນັ້ນ ມາຂ້າຈັດຕຽມເປັນອາຫານໃຫ້ແຂກ.” 5 ກະສັດດາວິດໃຈຮ້າຍຫຼາຍໃຫ້ຄົນຮັ່ງມີຜູ້ນັ້ນ ແລະເວົ້າຂຶ້ນວ່າ, “ເຮົາຂໍສາບານໂດຍພຣະເຈົ້າຢາເວອົງຊົງຊີວິດຢູ່ວ່າ ຄົນທີ່ເຮັດຢ່າງນັ້ນຈະຕ້ອງຕາຍ 6 ລາວຕ້ອງໃຊ້ຄືນເຖິງສີ່ເທົ່າຕໍ່ລູກແກະທີ່ລາວເອົາໄປນັ້ນ ເພາະລາວໄດ້ເຮັດໃນສິ່ງທີ່ໂຫດຮ້າຍຫລາຍ.” 7 ນາທານກ່າວວ່າ, “ຊາຍຄົນນັ້ນຄືທ່ານເອງ ພຣະເຈົ້າຢາເວ ພຣະເຈົ້າຂອງຊາດອິດສະຣາເອນ ກ່າວຕໍ່ທ່ານດັ່ງນີ້: ເຮົາໄດ້ແຕ່ງຕັ້ງເຈົ້າໃຫ້ເປັນກະສັດຂອງຊາດອິດສະຣາເອນ ແລະໄດ້ຊ່ວຍກູ້ເຈົ້າໃຫ້ພົ້ນຈາກກຳມືຂອງໂຊນ. 8 ເຮົາໄດ້ມອບອານາຈັກຂອງໂຊນກັບເມຍທັງຫລາຍຂອງລາວໃຫ້ເຈົ້າ ເຮົາໄດ້ມອບຊາວອິດສະຣາເອນ ແລະຊາວຢູດາໃຫ້ເປັນຂອງເຈົ້າ. ຖ້າສິ່ງເຫຼົ່ານີ້ຍັງບໍ່ພຽງພໍສຳລັບເຈົ້າ ເຮົາອາດໃຫ້ເຈົ້າຫລາຍກວ່ານີ້ອີກຫລາຍເທົ່າກໍໄດ້. 9 ແລ້ວເປັນຫຍັງເຈົ້າຈຶ່ງບໍ່ເຊື່ອຟັງຄຳສັ່ງຂອງພຣະເຈົ້າຢາເວ? ເປັນຫຍັງຈຶ່ງເຮັດສິ່ງຊົ່ວຊ້າຢ່າງນີ້? ເຈົ້າໄດ້ໃຫ້ອູຣິຢາຖືກຂ້າໃນສະໜາມຮົບ; ເຈົ້າປ່ອຍໃຫ້ຊາວອຳໂມນຂ້າລາວ ແລ້ວເຈົ້າກໍເອົາເມຍຂອງລາວ. 10 ບັດນີ້ ຍ້ອນວ່າເຈົ້າບໍ່ເຊື່ອຟັງເຮົາທັງເອົາເມຍຂອງອູຣິຢາ ໃນເຊື້ອສາຍຂອງເຈົ້າທຸກເຊັ່ນຄົນຈະມີບາງຄົນຕາຍດ້ວຍດາບ. 11 ພຣະເຈົ້າຢາເວກ່າວວ່າ, ‘ເຮົາຈະເຮັດໃຫ້ຜູ້ໜຶ່ງໃນຄອບຄົວຂອງເຈົ້າເອງ ນຳເອົາຄວາມເດືອດຮ້ອນມາສູ່ເຈົ້າ. ເຈົ້າຈະໄດ້ເຫັນເຫດການນີ້ ເມື່ອເຮົາເອົາເມຍທັງຫລາຍຂອງເຈົ້າໃຫ້ແກ່ຊາຍອື່ນ ແລະຊາຍຄົນນັ້ນກໍຈະສົມສູ່ກັບພວກນາງຢ່າງເປີດເຜີຍ. 12 ເຈົ້າໄດ້ເຮັດບາບໃນທີ່ລັບລີ້, ແຕ່ເຮົາຈະເຮັດໃຫ້ເຫດການນີ້ເກີດຂຶ້ນໃນທີ່ເປີດເຜີຍ ເພື່ອໃຫ້ຊາວອິດສະຣາເອນທຸກຄົນໄດ້ເຫັນ.”’ 13 ດາວິດຈຶ່ງເວົ້າຕໍ່ນາທານວ່າ, “ເຮົາໄດ້ເຮັດບາບຕໍ່ສູ້ພຣະເຈົ້າຢາເວແລ້ວ.” ນາທານກ່າວຕໍ່ດາວິດວ່າ, “ພຣະເຈົ້າຢາເວອະໄພໃຫ້ທ່ານ ແລະທ່ານຈະບໍ່ຕາຍ. 14 ແຕ່ຍ້ອນວ່າທ່ານໄດ້ໝິ່ນປະໝາດຕໍ່ພຣະເຈົ້າຢາເວ ໂດຍກະທຳຢ່າງນີ້ ລູກຂອງທ່ານທີ່ເກີດມາກໍຈະຕາຍ.” 15 ແລ້ວນາທານກໍໄດ້ກັບເມືອເຮືອນຂອງຕົນ. ພຣະເຈົ້າຢາເວໄດ້ເຮັດໃຫ້ລູກທີ່ກະສັດດາວິດໄດ້ກັບເມຍຂອງອູຣິຢານັ້ນປ່ວຍໜັກ. ລູກຊາຍຂອງດາວິດຕາຍ 16 ກະສັດດາວິດໄດ້ພາວັນນາອະທິຖານຕໍ່ພຣະເຈົ້າຂໍຊ່ວຍໃຫ້ລູກດີ. ເພິ່ນບໍ່ຍອມກິນຫຍັງໝົດ. ທຸກໆຄືນໃດ ເພິ່ນເຂົ້າໄປນອນຢຽດຢູ່ກັບພື້ນໃນຫ້ອງນອນຂອງເພິ່ນ. 17 ພວກຂ້າຣາຊການໃນວັງເຂົ້າໄປຫາເພິ່ນ ແລະພະຍາຍາມຊັກຊວນເພິ່ນໃຫ້ລຸກຂຶ້ນ, ແຕ່ເພິ່ນປະຕິເສດແລະທັງບໍ່ຍອມກິນຫຍັງກັບພວກເຂົາ. 18 ຢູ່ມາໃນວັນທີເຈັດ ເດັກນ້ອຍນັ້ນກໍໄດ້ຕາຍໄປ ແລະພວກຂ້າຣາຊການບໍ່ກ້າບອກຂ່າວນັ້ນໃຫ້ເພິ່ນຮູ້. ພວກເຂົາເວົ້າກັນວ່າ, “ເມື່ອເດັກນັ້ນຍັງມີຊີວິດຢູ່ ເພິ່ນບໍ່ໄດ້ຕອບພວກເຮົາເມື່ອພວກເຮົາເວົ້າກັບເພິ່ນ. ເຫດໃດພວກເຮົາຈຶ່ງຈະກ້າບອກເພິ່ນວ່າ ລູກຊາຍຂອງເພິ່ນໄດ້ຕາຍເສຍແລ້ວ ເພິ່ນອາດເຮັດສິ່ງອັນຕະລາຍຕໍ່ຕົນເອງກໍໄດ້.” 19 ເມື່ອກະສັດດາວິດສັງເກດເຫັນພວກເຂົາຊິ່ມກັນຢູ່ ເພິ່ນກໍເຂົ້າໃຈວ່າເດັກນ້ອຍນັ້ນໄດ້ຕາຍແລ້ວ. ເພິ່ນຖາມພວກເຂົາວ່າ, “ລູກຂອງເຮົາຕາຍແລ້ວແມ່ນບໍ?” ພວກເຂົາຕອບວ່າ, “ໂດຍ ເດັກນັ້ນໄດ້ຕາຍແລ້ວ.” 20 ກະສັດດາວິດຈຶ່ງລຸກຂຶ້ນຈາກພື້ນຫ້ອງ ໄປອາບນໍ້າ, ຫວີຜົມ ແລະປ່ຽນເຄື່ອງນຸ່ງຫົ່ມ. ແລ້ວເພິ່ນກໍໄປນະມັດສະການພຣະເຈົ້າຢາເວທີ່ພຣະວິຫານ. ເມື່ອເພິ່ນກັບຄືນມາວັງແລ້ວ ເພິ່ນກໍຖາມຫາອາຫານແລະກິນໃນທັນທີໂລດ ເມື່ອພວກເຂົາຍົກມາໃຫ້ເພິ່ນ. 21 ພວກຂ້າຣາຊການເວົ້າຕໍ່ເພິ່ນວ່າ, “ພວກຂ້ານ້ອຍບໍ່ເຂົ້າໃຈເລື່ອງນີ້ ເມື່ອເດັກຍັງມີຊີວິດຢູ່ ທ່ານຮ້ອງໄຫ້ສຳລັບລາວແລະບໍ່ຍອມກິນຫຍັງ, ແຕ່ພໍລາວຕາຍໄປແລ້ວ ທ່ານກໍລຸກຂຶ້ນມາກິນອາຫານ.” 22 ກະສັດດາວິດຕອບວ່າ, “ແມ່ນແລ້ວ ເຮົາອົດອາຫານແລະຮ້ອງໄຫ້ເມື່ອເດັກຍັງມີຊີວິດຢູ່. ເຮົາຄິດວ່າພຣະເຈົ້າຢາເວອາດຈະເມດຕາເຮົາກໍໄດ້ ແລະບໍ່ປ່ອຍໃຫ້ເດັກນັ້ນຕາຍ. 23 ແຕ່ດຽວນີ້ເດັກນັ້ນໄດ້ຕາຍໄປແລ້ວ ເຮົາຈະອົດອາຫານໄປເຮັດຫຍັງ? ເຮົາຈະນຳເດັກນັ້ນຄືນມາສູ່ຊີວິດໄດ້ຊັ້ນບໍ? ວັນໜຶ່ງ ເຮົາກໍຈະໄປຢູ່ບ່ອນທີ່ເດັກນັ້ນຢູ່, ແຕ່ເດັກນັ້ນກັບຄືນມາຫາເຮົາບໍ່ໄດ້ຈັກເທື່ອ.” ໂຊໂລໂມນເກີດ 24 ຕໍ່ມາ ກະສັດດາວິດກໍເລົ້າໂລມໃຈນາງບັດເຊບາເມຍຂອງຕົນ. ເພິ່ນໄດ້ສົມສູ່ກັບນາງ ແລະນາງໄດ້ເກີດລູກຊາຍຄົນໜຶ່ງຜູ້ທີ່ກະສັດດາວິດໃສ່ຊື່ໃຫ້ວ່າ ໂຊໂລໂມນ. ພຣະເຈົ້າຢາເວຮັກເດັກຄົນນີ້ 25 ແລະໃຊ້ຜູ້ທຳນວາຍນາທານໃຫ້ຕັ້ງຊື່ເດັກນີ້ວ່າ, ເຢດີດີຢາ ເພາະເຫັນແກ່ພຣະເຈົ້າຢາເວ. ດາວິດຢຶດເມືອງຣັບບາ ( 1 ຂຄ 20:1-3 ) 26 ໃນຂະນະດຽວກັນນັ້ນ ໂຢອາບກໍພວມສືບຕໍ່ໂຈມຕີຣັບບາ ເມືອງຫລວງຂອງຊາວອຳໂມນ ແລະໃກ້ຈະຢຶດເອົາໄດ້ແລ້ວ. 27 ໂຢອາບຈຶ່ງສົ່ງຜູ້ນຳຂ່າວມາລາຍງານຕໍ່ກະສັດດາວິດວ່າ, “ຂ້ານ້ອຍໄດ້ໂຈມຕີເມືອງຣັບບາແລະຢຶດເອົາບໍ່ນໍ້າໄດ້ແລ້ວ. 28 ບັດນີ້ ໃຫ້ທ່ານຮວບຮວມເອົາກຳລັງທີ່ຍັງເຫລືອຢູ່ນັ້ນມາໂຈມຕີ ແລະຢຶດເອົາເມືອງໂດຍຕົນເອງ ເພາະຂ້ານ້ອຍບໍ່ຢາກໄດ້ຊື່ສຽງໃນການຢຶດເມືອງນີ້.” 29 ດັ່ງນັ້ນ ກະສັດດາວິດຈຶ່ງຮວບຮວມເອົາກຳລັງຂອງເພິ່ນ ອອກໄປໂຈມຕີເມືອງຣັບບາແລະຢຶດເມືອງນີ້ໄດ້. 30 ເພິ່ນຢຶດມົງກຸດຂອງພະມິນກົມ ຮູບເຄົາຣົບຂອງຊາວອຳໂມນ ຊຶ່ງເປັນຄຳໜັກປະມານສາມສິບຫ້າກິໂລກຼາມ ແລະມີເພັດປະດັບຢູ່ໃນນັ້ນ. ກະສັດດາວິດໄດ້ແກະເອົາເພັດນັ້ນມາປະດັບໃສ່ມົງກຸດຂອງເພິ່ນ. ກະສັດດາວິດຍັງຢຶດຊັບສົມບັດຈາກເມືອງນີ້ໄດ້ຢ່າງຫລວງຫລາຍ. 31 ແລ້ວເພິ່ນກໍໄດ້ເອົາເລື່ອຍ, ຈົກ, ຂວານ, ໃຫ້ຊາວເມືອງນີ້ ແລະບັງຄັບພວກເຂົາເຮັດດິນຈີ່ໃຫ້ເພິ່ນ. ເພິ່ນໄດ້ປະຕິບັດເໝືອນກັນນີ້ຕໍ່ຊາວອຳໂມນໃນທຸກຫົວເມືອງ. ແລ້ວເພິ່ນພ້ອມທັງທະຫານຂອງເພິ່ນກໍກັບຄືນມານະຄອນເຢຣູຊາເລັມ. |
@ 2012 United Bible Societies. All Rights Reserved.