2 ຊາມູເອນ 1 - ພຣະຄຳພີສັກສິດາວິດໄດ້ຮັບຂ່າວວ່າໂຊນຕາຍ 1 ຫລັງຈາກກະສັດໂຊນໄດ້ຕາຍໄປແລ້ວ ດາວິດກໍໄດ້ກັບຄືນມາຈາກການຮົບຊະນະພວກອາມາເຫຼັກ ເພິ່ນໄດ້ຢູ່ໃນເມືອງຊິກລັກເປັນເວລາສອງວັນ. 2 ໃນວັນທີສາມ ມີຊາຍໜຸ່ມຜູ້ໜຶ່ງມາຈາກຄ້າຍຂອງກະສັດໂຊນ. ລາວຈີກເຄື່ອງນຸ່ງຂອງຕົນ ແລະເອົາຂີ້ຝຸ່ນດິນໂຮຍຫົວເພື່ອສະແດງຄວາມໂສກເສົ້າ ລາວເຂົ້າໄປຫາດາວິດ ແລະຂາບລົງດ້ວຍຄວາມນັບຖື. 3 ດາວິດຈຶ່ງຖາມວ່າ, “ເຈົ້າມາແຕ່ໃສ?” ລາວຕອບວ່າ, “ຂ້ານ້ອຍໜີມາແຕ່ຄ້າຍຂອງພວກອິດສະຣາເອນ.” 4 ດາວິດຖາມວ່າ, “ບອກຂ້ອຍມາວ່າມີຫຍັງເກີດຂຶ້ນ?” ຊາຍໜຸ່ມຕອບວ່າ, “ທະຫານຝ່າຍພວກເຮົາໄດ້ແລ່ນປົບໜີຈາກສະໜາມຮົບ. ແລະຄົນຝ່າຍພວກເຮົາໄດ້ຕາຍຢ່າງຫລວງຫລາຍ. ກະສັດໂຊນກັບໂຢນາທານລູກຊາຍຂອງເພິ່ນກໍຕາຍດ້ວຍ.” 5 ດາວິດຖາມລາວວ່າ, “ເຈົ້າຮູ້ໄດ້ຢ່າງໃດວ່າກະສັດໂຊນກັບໂຢນາທານຕາຍແລ້ວ?” 6 ລາວຕອບວ່າ, “ບັງເອີນຂ້ານ້ອຍຢູ່ທີ່ເທິງພູກິນໂບອາ ແລະຂ້ານ້ອຍໄດ້ເຫັນກະສັດໂຊນຢືນຄໍ້າຫອກຂອງຕົນຢູ່ ແລະລົດຮົບກັບທະຫານມ້າຂອງສັດຕູກໍແລ່ນເຂົ້າມາໃກ້ຕົວເພິ່ນ. 7 ເພິ່ນຫລຽວໄປມາເລີຍເຫັນຂ້ານ້ອຍ ຈຶ່ງເອີ້ນໃສ່ຂ້ານ້ອຍ ຂ້ານ້ອຍໄດ້ຕອບເພິ່ນວ່າ, ‘ໂດຍ ທ່ານເອີຍ.’ 8 ເພິ່ນຖາມຂ້ານ້ອຍວ່າ, ‘ເຈົ້າແມ່ນໃຜ?’ ຂ້ານ້ອຍຕອບພິ່ນວ່າ, ‘ຂ້ານ້ອຍເປັນຊາວອາມາເຫຼັກ.’ 9 ແລ້ວເພິ່ນກໍບອກຂ້ານ້ອຍວ່າ, ‘ຂ້ອຍໄດ້ຮັບບາດເຈັບສາຫັດ ໃກ້ຈະສິ້ນໃຈຕາຍຢູ່ແລ້ວ ເຈົ້າຈົ່ງຂ້າຂ້ອຍເສຍ.’ 10 ດັ່ງນັ້ນ ຂ້ານ້ອຍຈຶ່ງຂຶ້ນໄປຂ້າເພິ່ນ ເພາະຮູ້ແລ້ວວ່າຖ້າເພິ່ນລົ້ມລົງເມື່ອໃດ ເພິ່ນກໍຕ້ອງສິ້ນໃຈຕາຍເມື່ອນັ້ນໂລດ. ຕໍ່ມາ ຂ້ານ້ອຍຈຶ່ງຖອດເອົາມົງກຸດອອກຈາກຫົວຂອງເພິ່ນ ແລະແກ້ເອົາສາຍແຂນຂອງເພິ່ນ ຊຶ່ງຂ້ານ້ອຍໄດ້ນຳມາໃຫ້ທ່ານເບິ່ງນີ້ແຫຼະ.” 11 ດາວິດຈຶ່ງຈີກເຄື່ອງນຸ່ງຂອງຕົນດ້ວຍຄວາມເສຍໃຈ ແລະຄົນທັງຫລາຍຂອງເພິ່ນທຸກຄົນກໍເຮັດຄືກັນ. 12 ພວກເຂົາຮ້ອງໄຫ້ເສຍໃຈແລະໄວ້ທຸກທັງອົດອາຫານຈົນຮອດຄໍ່າ ໃຫ້ກະສັດໂຊນແລະໂຢນາທານລູກຊາຍຂອງເພິ່ນ ແລະກອງທັບຊາວອິດສະຣາເອນປະຊາຊົນຂອງພຣະເຈົ້າຢາເວ ເພາະມີຫລາຍຄົນໄດ້ຖືກຂ້າຢູ່ໃນສະໜາມຮົບ. 13 ດາວິດຖາມຊາຍໜຸ່ມທີ່ນຳຂ່າວມາບອກເພິ່ນນັ້ນວ່າ, “ເຈົ້າມາຈາກໃສ?” ລາວຕອບວ່າ, “ຂ້ານ້ອຍເປັນຄົນຕ່າງດ້າວ ເປັນຊາວອາມາເຫຼັກທີ່ອາໄສຢູ່ໃນປະເທດຂອງທ່ານ.” 14 ດາວິດຖາມລາວວ່າ, “ເປັນຫຍັງເຈົ້າຈຶ່ງກ້າຂ້າກະສັດ ທີ່ພຣະເຈົ້າຢາເວໄດ້ຊົງຫົດສົງ?” 15 ແລ້ວດາວິດກໍເອີ້ນເອົາທະຫານຄົນໜຶ່ງມາ ແລະສັ່ງວ່າ, “ຂ້າມັນຖິ້ມເສຍ.” ທະຫານຄົນນັ້ນຖອດດາບອອກມາ ແລະແທງຊາຍອາມາເຫຼັກຄົນນີ້ຈົນຕາຍ. 16 ແລ້ວດາວິດກໍກ່າວຕໍ່ຊາຍຄົນນີ້ວ່າ, “ເຈົ້ານຳໂທດນີ້ມາສູ່ຕົວເຈົ້າເອງ ເມື່ອເຈົ້າສາລະພາບວ່າເຈົ້າໄດ້ຂ້າຄົນທີ່ພຣະເຈົ້າຢາເວໄດ້ຫົດສົງ ເຈົ້າກໍໄດ້ລົງໂທດເຈົ້າເອງສາແລ້ວ.” ດາວິດໄວ້ອາໄລໃຫ້ໂຊນກັບໂຢນາທານ 17 ແລ້ວດາວິດກໍຮ້ອງເພງໄວ້ອາໄລໃຫ້ກະສັດໂຊນ ແລະໂຢນາທານ ລູກຊາຍຂອງກະສັດໂຊນ 18 ແລະເພິ່ນຍັງໄດ້ສັ່ງໃຫ້ສອນເພງນີ້ ໃຫ້ແກ່ປະຊາຊົນຊາວຢູດາດ້ວຍ. (ເພງນີ້ໄດ້ບັນທຶກໄວ້ຢູ່ໃນໜັງສືຂອງຢາຊາ.) 19 “ບັນດາຜູ້ນຳພວກເຮົານັ້ນ ໄດ້ຕາຍຢູ່ເທິງເນີນພູອິດສະຣາເອນ ຜູ້ເກັ່ງກ້າທີ່ສຸດໃນທະຫານຂອງພວກເຮົາ ໄດ້ລົ້ມຕາຍໄປເສຍແລ້ວ 20 ຢ່າບອກເລື່ອງນີ້ສູ່ຊາວເມືອງກາດຟັງ ຫລືໃນຫົນທາງທີ່ເມືອງອາຊະເກໂລນດ້ວຍ. ຢ່າເຮັດໃຫ້ພວກຜູ້ຍິງຟີລິດສະຕິນດີໃຈ. ຢ່າໃຫ້ພວກລູກສາວຂອງຄົນທີ່ບໍ່ຮັບພິທີຕັດຊື່ນໃຈຍ້ອນ. 21 ຂໍຢ່າໃຫ້ຝົນຫລືໝອກຕົກໃສ່ພູກິນໂບອາ ຂໍໃຫ້ທົ່ງໄຮ່ທົ່ງນາແຫ້ງແລ້ງຢູ່ເລື້ອຍໆເຖີດ ເພາະໂລ້ຂອງຜູ້ເກັ່ງກ້າ ວາງໄວ້ທີ່ນັ້ນຢ່າງອັບອາຍ; ໂລ້ຂອງໂຊນບໍ່ໄດ້ຖືກຜັດຖູດ້ວຍນໍ້າມັນອີກແລ້ວ. 22 ຄັນທະນູຂອງໂຢນາທານນັ້ນ ຊ່າງໜ້າຮ້າຍກາດເຫລືອຫລາຍ ດາບຂອງກະສັດໂຊນບໍ່ເມດຕາຜູ້ໃດ ໃຊ້ແທງສັດຕູຜູ້ເກັ່ງກ້າໃຫ້ຕາຍໄດ້. 23 ໂຊນກັບໂຢນາທານໜ້າຮັກແພງອີຫລີ ມີຊີວິດຢູ່ນຳກັນ ແລະຕາຍໄປນຳກັນດ້ວຍ; ທັງສອງວ່ອງໄວແທ້ໆດັ່ງນົກອີນຊີ ແຂງແຮງກວ່າໂຕສິງທັງຝູງພຸ້ນ. 24 ຍິງສາວອິດສະຣາເອນເອີຍ ພວກເຈົ້າ ຈົ່ງໄວ້ທຸກໃຫ້ກະສັດໂຊນເດີ ເພາະເພິ່ນໃຫ້ພວກເຈົ້າທັງຫລາຍ ໄດ້ນຸ່ງເສື້ອລ່າມຍາວສີແດງເຂັ້ມ ທັງໃຫ້ປະດັບດ້ວຍເພັດພອຍນາໆຊະນິດ ພ້ອມທັງຄຳຕິດຕົວຂອງພວກເຈົ້າອີກດ້ວຍ. 25 ທະຫານທີ່ເກັ່ງກ້າໄດ້ລົ້ມຕາຍແລ້ວນໍ ຕ່າງກໍຖືກຂ້າຢູ່ໃນສະໜາມຮົບທັງນັ້ນ. ສ່ວນໂຢນາທານວິລະຊົນຜູ້ໜຶ່ງ ກໍລົ້ມຕາຍຢ່າງອົງອາດທີ່ເທິງເນີນພູຂອງເພິ່ນ. 26 ຂ້ອຍຮ້ອງໄຫ້ຫາເຈົ້າອ້າຍໂຢນາທານເອີຍ ເຈົ້າເປັນທີ່ຮັກແພງຂອງຂ້ອຍຫລາຍແທ້ໆ ຄວາມຮັກທີ່ເຈົ້າມີແກ່ຂ້ອຍຊ່າງປະເສີດຫລາຍ ເໜືອກວ່າຄວາມຮັກໃດໆທີ່ມີຕໍ່ຜູ້ຍິງເສຍອີກ. 27 ທະຫານທີ່ເກັ່ງກ້າໄດ້ລົ້ມຕາຍແລ້ວນໍ ອາວຸດສົງຄາມກໍໃຊ້ການບໍ່ໄດ້ອີກແລ້ວ.” |
@ 2012 United Bible Societies. All Rights Reserved.