2 ກະສັດ 8 - ພຣະຄຳພີສັກສິຍິງຊາວຊູເນມກັບຄືນມາ 1 ບັດນີ້ ເອລີຊາໄດ້ບອກຍິງຢູ່ໃນເມືອງຊູເນມ ຜູ້ທີ່ເພິ່ນໄດ້ເຮັດໃຫ້ລູກຊາຍຂອງນາງເປັນຄືນມາສູ່ຊີວິດນັ້ນວ່າ, “ພຣະເຈົ້າຢາເວກຳລັງຈະສົ່ງການອຶດຢາກມາເທິງດິນແດນນີ້ເປັນເວລາເຈັດປີ.” ທັງບອກໃຫ້ນາງ ແລະຄອບຄົວໜີໄປຢູ່ທີ່ອື່ນ. 2 ນາງໄດ້ປະຕິບັດຕາມຄຳແນະນຳຂອງເອລີຊາ ແລະໄດ້ພາຄອບຄົວໜີໄປຢູ່ຟີລິດສະຕິນເປັນເວລາເຈັດປີ. 3 ໃນທ້າຍປີທີເຈັດ ນາງໄດ້ກັບຄືນມາສູ່ອານາຈັກອິດສະຣາເອນ ແລະເຂົ້າໄປຫາກະສັດເພື່ອຂໍເອົາເຮືອນ ແລະທີ່ດິນຂອງນາງຄືນ. 4 ນາງພົບກະສັດກຳລັງເວົ້າກັບເກຮາຊິຄົນຮັບໃຊ້ຂອງເອລີຊາ; ກະສັດຢາກຮູ້ເຖິງເລື່ອງທີ່ເອລີຊາເຮັດການອັດສະຈັນນັ້ນ. 5 ຂະນະທີ່ເກຮາຊິກຳລັງບອກກະສັດວ່າ, ເອລີຊາໄດ້ເຮັດໃຫ້ຄົນຕາຍເປັນຄືນມາສູ່ຊີວິດຢ່າງໃດນັ້ນ ນາງກໍເຂົ້າມາຫາກະສັດ. ເກຮາຊິຈຶ່ງເວົ້າກັບກະສັດວ່າ, “ຂ້າແດ່ພະຣາຊາ ນີ້ເດຄືຍິງຜູ້ນັ້ນ ແລະຜູ້ນີ້ແມ່ນລູກຊາຍຂອງນາງ ທີ່ເອລີຊາໄດ້ເຮັດໃຫ້ເປັນຄືນມາສູ່ຊີວິດ.” 6 ໃນການຕອບຄຳຖາມຂອງກະສັດ ນາງໄດ້ຢືນຢັນເລື່ອງທີ່ເກຮາຊິເລົ່າສູ່ກະສັດຟັງ. ດັ່ງນັ້ນ ກະສັດຈຶ່ງເອີ້ນເອົາຂ້າຣາຊການຜູ້ໜຶ່ງມາ ແລະບອກໃຫ້ເອົາສິ່ງຂອງທຸກຢ່າງທີ່ເປັນຂອງນາງຄືນໃຫ້ນາງ ພ້ອມທັງໃຫ້ໄລ່ລາຄາພືດຜົນທັງໝົດທີ່ໄດ້ຈາກໄຮ່ນາຂອງນາງ ພາຍໃນເຈັດປີທີ່ນາງບໍ່ຢູ່ນັ້ນຄືນໃຫ້ນາງດ້ວຍ. ເອລີຊາແລະກະສັດເບັນຮາດາດແຫ່ງຊີເຣຍ 7 ມີຄັ້ງໜຶ່ງ ເອລີຊາໄດ້ໄປທີ່ນະຄອນດາມັສກັດ ໃນຂະນະທີ່ກະສັດເບັນຮາດາດເປັນໄຂ້ຢູ່. ເມື່ອມີຄົນມາບອກກະສັດວ່າ ເອລີຊາມາໃນທີ່ນັ້ນ 8 ເພິ່ນຈຶ່ງກ່າວແກ່ຮາຊາເອນ ຂ້າຣາຊການຄົນໜຶ່ງຂອງຕົນວ່າ, “ຈົ່ງນຳເອົາຂອງຂວັນນີ້ໄປໃຫ້ຄົນຂອງພຣະເຈົ້າ ເພື່ອຂໍເພິ່ນຖາມພຣະເຈົ້າຢາເວວ່າ ເຮົາຈະຫາຍປ່ວຍຫລືບໍ່.” 9 ດັ່ງນັ້ນ ຮາຊາເອນຈຶ່ງຈັດເອົາຜະລິດທະພັນທຸກຊະນິດຢ່າງດີທີ່ສຸດ ໃນນະຄອນດາມັສກັດບັນທຸກໃສ່ຫລັງອູດສີ່ສິບໂຕ ໄປຫາເອລີຊາ. ເມື່ອຮາຊາເອນເຫັນເອລີຊາ ລາວກໍກ່າວແກ່ເພິ່ນວ່າ, “ກະສັດເບັນຮາດາດຜູ້ຮັບໃຊ້ຂອງທ່ານໄດ້ສົ່ງຂ້ານ້ອຍມາຖາມທ່ານວ່າ ເພິ່ນຈະຫາຍປ່ວຍຫລືບໍ່?” 10 ເອລີຊາຕອບວ່າ, “ພຣະເຈົ້າຢາເວເປີດເຜີຍໃຫ້ເຮົາຮູ້ແລ້ວວ່າ ກະສັດຈະຕາຍ, ແຕ່ໃຫ້ເຈົ້າໄປບອກເພິ່ນວ່າ ເພິ່ນຈະຫາຍປ່ວຍ.” 11 ແລ້ວເອລີຊາກໍຈ້ອງເບິ່ງໜ້າຂອງຮາຊາເອນດ້ວຍສາຍຕາອັນເຂັ້ມຂືມ ຈົນລາວຢ້ານແລະຮູ້ສຶກບໍ່ສະບາຍໃຈ. ທັນໃດນັ້ນ ເອລີຊາກໍຮ້ອງໄຫ້ຂຶ້ນ. 12 ຮາຊາເອນຖາມວ່າ, “ເປັນຫຍັງທ່ານຈຶ່ງຮ້ອງໄຫ້?” ເອລີຊາຕອບວ່າ, “ເພາະເຮົາຮູ້ວ່າ ທ່ານຈະເຮັດສິ່ງທີ່ໂຫດຮ້າຍຕໍ່ປະຊາຊົນອິດສະຣາເອນ ທ່ານຈະຈູດປ້ອມປ້ອງກັນເມືອງ, ປະຫານຊີວິດຊາຍສະກັນ, ຕົບຕີເດັກນ້ອຍໃຫ້ເຖິງຕາຍ ແລະຜ່າທ້ອງພວກແມ່ມານ.” 13 ຮາຊາເອນຕອບວ່າ, “ດ້ວຍເຫດໃດຂ້ານ້ອຍຈຶ່ງຈະມີອຳນາດເຖິງພຽງນັ້ນ ຂ້ານ້ອຍບໍ່ມີຄວາມສຳຄັນຫຍັງ.” ເອລີຊາຕອບຄືນວ່າ, “ພຣະເຈົ້າຢາເວໄດ້ໃຫ້ຂ້າພະເຈົ້າຮູ້ວ່າ ທ່ານຈະເປັນກະສັດແຫ່ງຊີເຣຍ.” 14 ຮາຊາເອນໄດ້ກັບຄືນໄປຫາກະສັດເບັນຮາດາດ ແລະເພິ່ນກໍຖາມລາວວ່າ, “ເອລີຊາບອກເຈົ້າວ່າຢ່າງໃດແດ່?” ຮາຊາເອນຕອບວ່າ, “ເພິ່ນບອກຂ້ານ້ອຍວ່າທ່ານຈະຫາຍປ່ວຍແທ້.” 15 ແຕ່ໃນມື້ຕໍ່ມາ ຮາຊາເອນໄດ້ໃຊ້ຜ້າຫົ່ມຈຸ່ມນໍ້າ ແລະເອົາໄປປົກໜ້າກະສັດຈົນຕາຍ. ແລ້ວຮາຊາເອນກໍຂຶ້ນເປັນກະສັດແຫ່ງຊີເຣຍແທນເບັນຮາດາດ. ກະສັດເຢໂຮຣາມແຫ່ງຢູດາຍ ( 2 ຂຄ 21:1-20 ) 16 ໃນຣາຊການປີທີຫ້າຂອງໂຢຣາມ ລູກຊາຍຂອງອາຮາບກະສັດແຫ່ງອິດສະຣາເອນ ເຈົ້າເຢໂຮຣາມ ລູກຊາຍຂອງເຈົ້າເຢໂຮຊາຟັດກໍໄດ້ເປັນກະສັດແຫ່ງຢູດາຍ 17 ເມື່ອເພິ່ນອາຍຸໄດ້ສາມສິບສອງປີ ແລະປົກຄອງຢູ່ທີ່ນະຄອນເຢຣູຊາເລັມ ເປັນເວລາແປດປີ. 18 ຍ້ອນເມຍຂອງເພິ່ນເປັນລູກສາວຂອງກະສັດອາຮາບ ກະສັດເຢໂຮຣາມຈຶ່ງຕິດຕາມແບບຢ່າງອັນຊົ່ວຮ້າຍຂອງບັນດາກະສັດແຫ່ງອິດສະຣາເອນ ເໝືອນກັນກັບຄອບຄົວຂອງກະສັດອາຮາບ. ເພິ່ນໄດ້ເຮັດບາບຕໍ່ສູ້ພຣະເຈົ້າຢາເວ 19 ແຕ່ພຣະເຈົ້າຢາເວບໍ່ຢາກທຳລາຍອານາຈັກຢູດາຍ ເນື່ອງຈາກພຣະອົງໄດ້ສັນຍາໄວ້ກັບກະສັດດາວິດຜູ້ຮັບໃຊ້ຂອງພຣະອົງວ່າ ລູກຫລານຂອງເພິ່ນຈະຂຶ້ນປົກຄອງສືບຕໍ່ໄປ. 20 ໃນຣາຊການຂອງກະສັດເຢໂຮຣາມນັ້ນ ເອໂດມໄດ້ກະບົດຕໍ່ຢູດາຍ ແລະກາຍເປັນອານາຈັກເອກະລາດ. 21 ດັ່ງນັ້ນ ກະສັດເຢໂຮຣາມຈຶ່ງຍົກທັບພ້ອມລົດຮົບທັງໝົດໄປເມືອງຊາອີ. ໃນຕອນກາງຄືນ ກະສັດເຢໂຮຣາມກັບຜູ້ບັນຊາການລົດຮົບ ໄດ້ຕີຜ່າວົງລ້ອມຂອງກອງທັບຊາວເອໂດມ ຊຶ່ງໄດ້ປິດລ້ອມພວກເພິ່ນໄວ້; ສ່ວນພວກທະຫານຂອງເພິ່ນນັ້ນໄດ້ກະຈັດກະຈາຍໜີຄືນເມືອເຮືອນຂອງໃຜລາວ. 22 ຕັ້ງແຕ່ນັ້ນມາ ເອໂດມກໍບໍ່ໄດ້ຂຶ້ນກັບ ອານາຈັກຢູດາຍອີກຕໍ່ໄປ. ໃນໄລຍະເວລາດຽວກັນນີ້ ເມືອງລິບນາກໍເປັນກະບົດດ້ວຍ. 23 ສິ່ງອື່ນທີ່ກະສັດເຢໂຮຣາມໄດ້ກະທຳ ແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງຢູດາຍ. 24 ກະສັດເຢໂຮຣາມໄດ້ຕາຍໄປແລະໄດ້ຖືກຝັງໄວ້ຢູ່ໃນອຸບມຸງແຫ່ງກະສັດທີ່ເມືອງຂອງດາວິດ. ແລ້ວອາຮາຊີຢາ ລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ. ກະສັດອາຮາຊີຢາແຫ່ງຢູດາຍ ( 2 ຂຄ 22:1-6 ) 25 ໃນຣາຊການປີທີສິບສອງຂອງເຈົ້າໂຢຣາມລູກຊາຍຂອງເຈົ້າອາຮາບກະສັດແຫ່ງອິດສະຣາເອນ; ເຈົ້າອາຮາຊີຢາ ລູກຊາຍຂອງເຈົ້າເຢໂຮຣາມໄດ້ຂຶ້ນເປັນກະສັດແຫ່ງຢູດາຍ 26 ເມື່ອເພິ່ນອາຍຸໄດ້ຊາວສອງປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມ ເປັນເວລາໜຶ່ງປີ. ແມ່ຂອງເພິ່ນຊື່ວ່າອາທາລີຢາ ລູກສາວຂອງກະສັດອາຮາບ ແລະຫລານສາວຂອງກະສັດອົມຣີແຫ່ງອິດສະຣາເອນ. 27 ຍ້ອນກະສັດອາຮາຊີຢາເປັນຫຼານຊາຍຂອງກະສັດອາຮາບ ເພິ່ນຈຶ່ງໄດ້ເຮັດບາບຕໍ່ສູ້ພຣະເຈົ້າຢາເວ ເໝືອນກັນກັບຄອບຄົວຂອງກະສັດອາຮາບ. 28 ກະສັດອາຮາຊີຢາໄດ້ຮ່ວມມືກັບກະສັດໂຢຣາມແຫ່ງອິດສະຣາເອນ ເຮັດເສິກຕໍ່ສູ້ກະສັດຮາຊາເອນແຫ່ງຊີເຣຍ. ກອງທັບທັງສອງຝ່າຍໄດ້ຍົກທັບໄປປະທະກັນທີ່ເມືອງຣາໂມດໃນກີເລອາດ ແລະກະສັດໂຢຣາມໄດ້ຖືກບາດເຈັບໃນສະໜາມຮົບ. 29 ເພິ່ນໄດ້ກັບຄືນເມືອເມືອງຢິດຊະເຣນເພື່ອປິ່ນປົວບາດແຜຂອງຕົນ ແລະກະສັດອາຮາຊີຢາກໍໄດ້ໄປຢ້ຽມຢາມເພິ່ນຢູ່ໃນເມືອງນີ້. |
@ 2012 United Bible Societies. All Rights Reserved.